شي جينپيڭ ماداقتالىپ ـ سيلانعان مەملەكەتتىك دەمالىسقا، زەينەتكە شىققان كادرلار وزات كوللەكتيۆتەرى مەن وزات جەكەلەرى ۋاكىلدەرىن قابىلدادى
ساي چي، ديڭ شۋەشياڭ كەزدەسۋگە قاتىناستى
شينحۋا اگەنتتىگىنىڭ 12 ـ ايدىڭ 31 ـ كۇنى بەيجيڭنەن بەرگەن حابارى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ٴتوراعاسى، ورتالىق اسكەري ىستەر كوميتەتىنىڭ ٴتوراعاسى شي جينپيڭ 12 ـ ايدىڭ 31 ـ كۇنى تۇستەن بۇرىن بەيجيڭ حالىق سارايىندا ماداقتالىپ ـ سيلانعان مەملەكەتتىك دەمالىسقا، زەينەتكە شىققان كادرلار وزات كوللەكتيۆتەرى مەن وزات جەكەلەرى ۋاكىلدەرىن ىقىلاسپەن قابىلداپ، ولاردى قىزۋ قۇتتىقتادى، ولاردىڭ داڭقتى ٴداستۇردى اسقاقتاتىپ، ساياسي قاسيەتتى ماڭگى ساقتاپ، جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسىن، ۇلتتى گۇلدەندىرۋ ۇلى ٴىسىن جاپپاي ىلگەرىلەتۋگە ۇزدىكسىز بەلسەندى ۇلەس قوسۋىن ٴۇمىت ەتتى.
جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق كوميتەت شۋجيچۋىنىڭ شۋجيى ساي چي، جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەستىڭ ورىنباسار زۇڭليى ديڭ شۋەشياڭ قابىلداۋعا قاتىناستى.
تۇستەن بۇرىن ساعات 11دەن 30 مينۋت وتكەندە، شي جينپيڭ قاتارلىلار حالىق سارايىنىڭ سولتۇستىك زالىنا كىرگەندە، تۇتاس زالدا قىزۋ شاپالاق ٴۇنى كوتەرىلدى. شي جينپيڭ قاتارلىلار ۋاكىلدەرمەن ىقىلاسپەن قول الىسىپ، ٴالسىن ـ ٴالى اڭگىمەلەستى ٴارى توپتىق ەستەلىك سۋرەتكە ٴتۇستى.
جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، ورتالىق كوميتەت ۇيىمداستىرۋ ٴبولىمىنىڭ باستىعى لي گانجيە قابىلداۋعا قاتىناستى ٴارى 12 ـ ايدىڭ 30 ـ كۇنى تۇستەن بۇرىن اشىلعان مەملەكەتتىك دەمالىسقا، زەينەتكە شىققان كادرلار وزات كوللەكتيۆتەرى مەن وزات جەكەلەرىن ماداقتاۋ ـ سيلاۋ جينالىسىندا ٴسوز سويلەدى. ول مىنالاردى ٴبىلدىردى: باس شۋجي شي جينپيڭنىڭ قارت كادرلار قىزمەتى جونىندەگى ماڭىزدى بايىمداۋلارىنىڭ جانە ماڭىزدى نۇسقاۋلارىنىڭ، بەكىتۋلەرىنىڭ رۋحىن ىشكەرىلەي ۇيرەنىپ، دايەكتىلەندىرىپ، ”ەكىنى تۇراقتاندىرۋدىڭ“ شەشۋشى ٴمانىن تەرەڭ ٴتۇسىنىپ، ”ەكىنى قورعاۋدى“ باتىل ورىنداپ، جاڭا ٴداۋىردىڭ جاڭا جورىعىندا قارت كادرلار قىزمەتىن جوعارى ولشەممەن، جوعارى ساپامەن ويداعىداي ىستەۋ كەرەك.
جينالىستا دەمالىسقا، زەينەتكە شىققان كادرلاردان 150 وزات كوللەكتيۆ جانە 450 وزات جەكە ماداقتالىپ ـ سيلاندى. شاڭحاي قالاسى ياڭپۋ رايونى ”لاۋياڭشۋ ۇگىت لەكسيا ۇيىرمەسىنىڭ“ ۇجىم جاۋاپتىسى ني لايدي، شانشي ولكەسى يۇيلين قالاسى جياشيان اۋداندىق حالىق شيپاحاناسىنىڭ زەينەتكە شىققان كادرى لۋ شىڭمەي، شىنجوۋ الەم كەمەسىنىڭ تۇڭعىش باس جوبالاۋشىسى چي فارىن قاتارلىلار جەكە ـ جەكە جينالىستا ٴسوز سويلەدى.
حى ۋيدۇڭ، شىن يچين قابىلداۋعا قاتىناستى، جياڭ شينجى قابىلداۋعا قاتىناستى ٴارى جينالىستى باسقاردى.
