شينحۋا اگەنتتىگىنىڭ 1 - ايدىڭ 2 - كۇنى بەيجيڭنەن بەرگەن حابارى. 1 - ايدىڭ 2 - كۇنى مەملەكەت ءتوراعاسى شي جينپيڭ ەكۆادور زۇڭتۇڭى نوبوامەن ءوزارا قۇتتىقتاۋ تەلەگرامماسىن جولداپ، ەكى ەلدىڭ ديپلوماتيالىق قارىم - قاتىناس ورناتقاندىعىنىڭ 45 جىلدىعىن قۇتتىقتادى.
شي جينپيڭ بىلاي دەپ اتاپ كورسەتتى: جۇڭگو مەن ەكۆادور − جالپى بەتتىك ستراتەگيالىق سەرىكتەستەر. ديپلوماتيالىق قارىم - قاتىناس ورناتقان 45 جىلدان بەرى، جۇڭگو - ەكۆادور قارىم - قاتىناسى باستان - اياق تاماشا دامۋ ارىنىن ساقتاپ كەلدى. سوڭعى جىلدارى ەكى جاقتىڭ ساياسي ءوزارا سەنىمدىلىگى كۇن سايىن بەكەمدەلىپ، ءتۇرلى سالاداعى ناقتى ىستەر سەلبەستىگىنىڭ جەتىستىگى قوماقتى بولىپ، جۇڭگو − ەكۆادور دوستىعى جۇرت جۇرەگىنە اناعۇرلىم تەرەڭ ۇيالادى. اسىرەسە، جۇڭگو − ەكۆادور ەركىن ساۋدا كەلىسىمىنە ءساتتى قول قويىلۋى جانە ونىڭ كۇشكە يە بولۋى ەكونوميكا - ساۋدا سەلبەستىگى ساپاسىنىڭ ءوسىپ، دارەجەسىنىڭ كوتەرىلۋىن پارمەندى ىلگەرىلەتىپ، ەكى ەل قارىم - قاتىناسىنىڭ دامۋىنا جاڭا قوزعاۋشى كۇش ۇستەدى. جۇڭگو − ەكۆادور قارىم - قاتىناسىنىڭ دامۋىنا ايرىقشا ءمان بەرەمىن، زۇڭتۇڭ مىرزامەن بىرگە قۇلشىنىپ، ەكى ەلدىڭ ديپلوماتيالىق قارىم - قاتىناس ورناتقاندىعىنىڭ 45 جىلدىعىن تىڭ باستاما ەتىپ، ءداستۇرلى دوستىقتى جالعاستىرىپ، ءتۇرلى سالاداعى اۋىس - كۇيىستى، سەلبەستىكتى تەرەڭدەتىپ، جۇڭگو − ەكۆادور قارىم - قاتىناسىنىڭ تاعى دا تىڭ ساتىعا كوتەرىلۋىن ىلگەرىلەتۋدى قالايمىن.
نوبوا مىنالاردى ءبىلدىردى: ەكۆادور مەن جۇڭگونىڭ ديپلوماتيالىق قارىم - قاتىناس ورناتقاندىعىنىڭ 45 جىلدىعى تەرەڭ مانگە يە ەسكەرتكىش بەلگى. 45 جىلدان بەرى، ەكى جاق ءوزارا قۇرمەت ەتۋ جانە سەنىم ارتۋ نەگىزىندە جالپى بەتتىك ستراتەگيالىق سەرىكتەستىك قارىم - قاتىناس ورناتىپ، ءتۇرلى سالالار سەلبەستىگىندە قوماقتى جەتىستىككە قول جەتكىزدى. ەكۆادوردىڭ ”ءبىر بەلدەۋ، ءبىر جول“ باستاماسىنا قوسىلۋى جانە ەكۆادور − جۇڭگو ەركىن ساۋدا كەلىسىمىنىڭ كۇشكە يە بولۋى ەكى ەل حالقىنىڭ قۇت - ىرىسىن پارمەندى نىعايتتى. ەكۆادور جاق جۇڭگو جاقپەن ۇزدىكسىز ءجيى ىستەستىك جاساسىپ، دوستىقتى، تىلدەسۋ مەن سەلبەسۋدى تەرەڭدەتىپ، ورتاق گۇلدەنىپ - كوركەيگەن بولاشاق قۇرۋدى قالايدى.
