شينحۋا اگەنتتىگىنىڭ 1 ـ ايدىڭ 6 ـ كۇنى بەيجيڭنەن بەرگەن حابارى. 1 ـ ايدىڭ 6 ـ كۇنى مەملەكەت ٴتوراعاسى شي جينپيڭ بوتسۆانا زۇڭتۇڭى بوكومەن ٴوزارا قۇتتىقتاۋ تەلەگرامماسىن جولداپ، ەكى ەلدىڭ ديپلوماتيالىق قارىم ـ قاتىناس ورناتقاندىعىنىڭ 50 جىلدىعىن قۇتتىقتادى.
شي جينپيڭ بىلاي دەپ اتاپ كورسەتتى: ديپلوماتيالىق قارىم ـ قاتىناس ورناتقان 50 جىلدان بەرى، مەيلى حالىقارالىق جاعداي قالاي وزگەرسە دە، جۇڭگو مەن بوتسۆانا قارىم ـ قاتىناسى باستان ـ اياق تاماشا دامۋ ارىنىن ساقتاپ، تەڭ تۇرعىدا مامىلە جاسايتىن جاقسى دوسقا، قول ۇستاسا داميتىن ابزال سەرىككە اينالدى. مەن ەكى ەلدىڭ تەك شىنايى دوستىققا، ىنتىماقتاسا سەلبەسۋگە تاباندى بولعاندا عانا، جۇڭگو مەن بوتسۆانا قارىم ـ قاتىناسىن دامىتۋدىڭ ۇلكەن ارناسى جۇرگەن سايىن كەڭەيەتىندىگىنە، ەكى جاق سەلبەستىگىنىڭ بولاشاعى، ٴسوز جوق، اناعۇرلىم نۇرلى بولا تۇسەتىندىگىنە كامىل سەنەمىن. بيىل جۇڭگو _ افريكا سەلبەستىك تالقى مىنبەرى بەيجيڭ باسشىلار ٴماجىلىسىنىڭ جەتىستىكتەرىن تياناقتاندىرۋدىڭ باستاما جىلى. جاڭا باستامادا تۇرىپ، مەن زۇڭتۇڭ مىرزامەن بىرگە قۇلشىنىپ، ەكى جاقتىڭ ساياسي ٴوزارا سەنىمىن اناعۇرلىم ارتتىرىپ، ٴجىتى قاداعالاپ وتىرعان كەلەلى ماسەلەلەردە ٴوزارا باتىل قولداۋ كورسەتىپ، وزدەرىنىڭ وسىزامانداندىرۋ ىستەرىن قول ۇستاسا ىلگەرىلەتىپ، جۇڭگو مەن بوتسۆانانىڭ ستراتەگيالىق سەرىكتەستىك قارىم ـ قاتىناسىنىڭ شىت جاڭا تاراۋىن اشۋدى قالايمىن.
بوكو مىنالاردى ٴبىلدىردى: ديپلوماتيالىق قارىم ـ قاتىناس ورناتقاندىقتىڭ 50 جىلدىعى _ بوتسۆانا مەن جۇڭگو قارىم ـ قاتىناسىنىڭ ماڭىزدى بەلەسى. جۇڭگو جاقتىڭ وتكەن 50 جىلدا بوتسۆاناعا كورسەتكەن تەرەڭ دوستىق سۇيىسپەنشىلىگىنە جانە ىنتىماقتاسا سەلبەستىك جاساعانىنا شىن جۇرەكتەن العىس ايتامىن. بوتسۆانا جاق جۇڭگونىڭ ەرەن دامۋ جەتىستىكتەرىنەن ايرىقشا شابىت الدى، ەكى ەلدىڭ ستراتەگيالىق سەرىكتەستىك قارىم ـ قاتىناسىنىڭ بوتسۆانانىڭ سيىسىمدى دامۋىنا وراي الا كەلەتىندىگىنە سەنەمىن.ٴبىز ٴبىر جۇڭگو ساياساتىن باتىل قولدايمىز، ٴوزارا سەنىم ارتۋ جانە قۇرمەت ەتۋ نەگىزىندە بوتسۆانا _ جۇڭگو قارىم ـ قاتىناسىن اناعۇرلىم كۇشەيتىپ، جۇڭگو _ افريكا سەلبەستىك تالقى مىنبەرى بەيجيڭ باسشىلار ٴماجىلىسىنىڭ جەتىستىكتەرىن قول ۇستاسا تياناقتاندىرىپ، ورتاق دامۋدى جانە گۇلدەنىپ ـ كوركەيۋدى جۇزەگە اسىرۋدى ٴۇمىت ەتەمىز.
