انار بۇلت \ شينجياڭ گازەتىنىڭ ٴتىلشىسى ما ينيڭ
جۇڭگو وڭتۇستىك اۆياتسياسىنىڭ 1 ـ ايدىڭ 5 ـ كۇنگى ساندى مالىمەتىندە كورسەتىلۋىنشە، الداعى ٴبىر ايدا وڭتۇستىك اۆياتسيانىڭ التاي ايماعىنا قاتىنايتىن ۇشاق بەلەتىنىڭ ساتىلۋ مولشەرى كورنەكتى ارتقان، مۇنىڭ ىشىندە باراتىن ۇشاق بەلەتىنىڭ ساتىلۋ مولشەرى الدىڭعى ساناق مەزگىلدەگىمەن سالىستىرعاندا %25 ارتقان، بەيجيڭ داشيڭنان، گۋاڭجوۋدان التايعا ۇشاتىن ۇشاق بەلەتىنىڭ ساتىلۋ مولشەرىنىڭ ارتۋى الدىڭعى ساناق مەزگىلدەگىمەن سالىستىرعاندا %40تەن اسقان.
شينجياڭ قار ـ مۇز بايلىعى مول رايون، قار مەزگىلى ۇزاق، قار ساپاسى جاقسى بولۋ قاتارلى ەرەكشەلىكتەرگە يە. سوڭعى جىلدارى شينجياڭ حالىقتىق اۆياتسياسى بازار تامىرىن ٴجىتى قاداعالاپ، ساياحاتشىلاردىڭ سۇرانىسىنا تىعىز جاناسىپ، اۋە لەنياسىمەن قامداۋ، قىزمەت وتەۋدى قامتاماسىز ەتۋ سياقتى كوپ جاقتان بىردەي كۇش جۇمساپ، شينجياڭنىڭ قار ـ مۇز ەكونوميكاسىنىڭ ”جاندانۋىنا“ بەلسەنە دەم بەرىپ، قار ـ مۇز ساياحاتىنىڭ قولايلى ساياحات، مەيىرگە تولى ساياحات جانە ناقتى تيىمدىلىككە كەنەلەتىن ساياحات بولۋىنا كۇش سالدى.
التاي ايماعىنداعى اۋەجايلاردى مىسالعا الساق، 2024 ـ جىلى قىستا التاي، قاناس، كوكتوعاي سىندى 3 جەردەگى اۋەجايدا ۇشاق ۇشاتىن لەنيا 22گە جەتىپ، كۇنىنە ورتا ەسەپپەن 12 كەزەكتە 24 ۇشاق (رەت) قاتىنايتىن بولىپ، 2023 ـ جىلعى قىسقى اۆياتسيا ماۋسىمىنداعى كۇندىك ورتاشا ۇشىپ ـ قونۋ رەت سانىمەن سالىستىرعاندا ورتا ەسەپپەن %22 ارتتى. 2024 ـ جىلى 1 ـ ايدىڭ 1 ـ كۇنىنەن 12 ـ ايدىڭ 31 ـ كۇنىنە دەيىن التاي شۋەدۋ اۋەجايىندا ۇشىپ ـ قونعان كەزەكشى ۇشاق 8160 رەتكە جەتىپ، سايكەس مەزگىلدەگىدەن %50.5 ارتقان؛ جولاۋشى قابىلداۋ ـ جونەلتۋ مولشەرى 760 مىڭ 118 ادامعا (رەت) جەتىپ، سايكەس مەزگىلدەگىدەن %50.71 ارتقان.
ٴۇرىمجى حالىقارالىق اۋەجايى بۇكىل شينجياڭنىڭ تورابى رەتىندە، باتىستا ەۆروپا _ ازيامەن تۇتاسىپ، شىعىستا ەل ىشىمەن بايلانىسىپ، شينجياڭ ىشىمەن تۇتاسۋ سىندى ماڭىزدى بورىشتى ارقالاپ وتىر، 2024 ـ جىلى مەرزىمدى جولاۋشى، جۇك تاسىمالى بويىنشا جيىنى 240 اۋە لەنياسى ىسكە قوسىلىپ، جولاۋشى قابىلداۋ ـ جونەلتۋ مولشەرى 27 ميلليون 700 مىڭ ادامنان (رەت) استى.
شيەچىڭ ساندى مالىمەتىندە كورسەتىلۋىنشە، 2024 ـ جىلى قىس كىرگەننەن بەرى، شينجياڭدا شاڭعى تەبۋ بويىنشا قوناق ساراي تاپسىرىس مولشەرى سايكەس مەزگىلدەگىدەن %70 ارتقان. قار ـ مۇز ەكونوميكاسى شينجياڭنىڭ قىسقى تۇتىنۋىن بارعان سايىن جانداندىردى. قالىڭ ساياحاتشى ”ۇشاتىن تاكسيگە“ وتىرىپ، شينجياڭ قار ـ مۇزىنىڭ قىزىعىنا باتۋ تۇتىنۋدىڭ جاڭا قالىبىنا اينالدى. مۇنىڭ ىشىندە ۇرىمجىگە كەلگەن جاپونيالىق ساياحاتشىلاردىڭ تاپسىرىس مولشەرى كۇرت ارتىپ، %162 بولعان.
2024 ـ جىلعى قىسقى، كوكتەمگى اۆياتسيا ماۋسىمىنان بەرى، قالىڭ شاڭعى اۋەسكەرلەرىنىڭ ٴجۇرىس ـ تۇرىس قاجەتىن قاناعاتتاندىرۋ ٴۇشىن، شينجياڭ اۋە لەنياسى بايلىعىن ورنالاستىرۋدى ساپالىلاندىرىپ، قار ـ مۇز ساياحاتى اۋە لەنياسى تورىن بار كۇشپەن قۇردى.
وڭتۇستىك اۆياتسيا گۋاڭجوۋدان التايعا توتە ۇشاتىن اۋە لەنياسىندا اپتاسىنا 2 كەزەك، بەيجيڭنەن التايعا توتە ۇشاتىن اۋە لەنياسىندا كۇنىنە ٴبىر كەزەك، ۇرىمجىدەن قاناسقا دەيىنگى اۋە لەنياسىندا كۇنىنە ٴبىر كەزەك ۇشاق كوبەيتىپ قاتىناتىپ، ٴۇرىمجى _ التاي اۋە لەنياسىندا كۇنىنە 3 _ 2 كەزەك، ٴۇرىمجى _ كوكتوعاي اۋە لەنياسىندا اپتاسىنا 3 كەزەك ۇشاق قاتىناۋدى ىسكە اسىردى. وڭتۇستىك اۆياتسيا سەرىكتەستىگى ەل ىشىندەگى شاڭعى اۋەسكەرلەرى ٴبىرشاما شوعىرلانعان جەرلەر مەن التاي ايماعىنىڭ كەزەكشى ۇشاقتارىنا ورتا جولدا اۋىسۋ قولايلىلىعىن تولىق ويلاستىرىپ، ۇرىمجىدەن التايعا ۇشاتىن كەزەكشى ۇشاقتاردى تاڭەرتەڭ، ٴتۇس، كەش بويىنشا ورنالاستىرادى؛ قاناس پەن كوكتوعايعا ۇشاتىن كەزەكشى ۇشاقتاردى تۇگەلدەي تۇسكە ورنالاستىرىپ، گۋاڭجوۋ، چىڭدۋ، ۋحان، چاڭشا سياقتى جەرلەرمەن سول كۇنى قوس باعىتتا ورتا جولدا اۋىسۋدى، ۇشتاسۋدى جۇزەگە اسىرادى. قازىر التاي ايماعىنا باراتىن جولاۋشىلار ەل ىشىندەگى 20 قالادان توتە ۇشۋىنا نەمەسە ٴۇرىمجىنى باسىپ ۇشاق اۋىستىرىپ، كوزدەگەن جەرىنە جەتۋىنە بولادى. 2024 ـ جىلى قىس، كوكتەم ماۋسىمدارىنان بەرى، وڭتۇستىك اۆياتسيا التاي ايماعىندا 55 مىڭ ادامنان (رەت) استام جولاۋشى تاسىمالداعان، بۇل سايكەس مەزگىلدەگىدەن %19 ارتقان.
قازىر شينجياڭداعى ٴارقايسى اۆياتسيا سەرىكتەستىگى اۆياتسيا مەن ساياحاتتى توعىستىرۋدى، قىزمەت وتەۋ دەڭگەيىن جوعارىلاتۋدى ۇزدىكسىز كۇشەيتتى، وڭتۇستىك اۆياتسيا شاڭعى تەبۋ ۇيىرمەلەرى ٴۇشىن ۇشاققا شىعۋ راسمياتىن ٴبىتىرۋ جانە ۇشاق اۋىستىرۋ ارناۋلى تەكشەسىن اشىپ، ”الدىن الا كەلىسىپ اقىسىز شاڭعى الۋ“، ”ۇشاقتان ۇشاققا توتە شىعۋ“ سياقتى قىزمەت وتەۋمەن قامدادى؛ چىڭدۋ اۆياتسياسى 150 يۋانمەن، 299 يۋانمەن، 499 يۋانمەن شينجياڭعا ”شەكتەمەسىز ۇشۋ“ قيمىلىن ورىستەتتى؛ حۋاشيا اۆياتسياسى ەرەكشە ساياحات، قار ـ مۇز ساياحاتى سياقتى جاقتاردا ”اۆياتسيا + ساياحات“ كاسىپ سالاسى تىزبەگىنىڭ جابىق اينالىمدى ونىمدەرىن قالىپتاستىردى...
شينجياڭ ساياحاتشىلارعا قىزمەت وتەۋدى، قامتاماسىزداندىرۋدى جاپپاي جاقسى ىستەدى. ٴۇرىمجى حالىقارالىق اۋەجايى ورتا جولدا اۋىسۋ دەمالىس اۋماعىن جاڭالاپ، تۇنەپ ۇشاق اۋىستىراتىندارعا بەرىلەتىن تەگىن جاتاق سياقتىلاردىڭ دارەجەسىن ٴوسىرىپ، اۋەجايدان ٴۇرىمجى اۋدانىنىڭ شاڭعى تەبۋ وڭىرىنە توتە باراتىن ارناۋلى اۆتوكولىك ورنالاستىردى. التايداعى اۋەجايلار شاڭعى تەبۋ ۇيىرمەلەرىمەن الدىن الا كەلىسۋدى جانە ارناۋلى تەكشەلەردە قىزمەت وتەۋدى جۇرگىزىپ، شاڭعى تەبەتىندەردىڭ ۇشاققا شىعۋ راسمياتىن ٴبىتىرۋ ارناۋلى تەكشەسىن كوبەيتىپ، الدىمەن ورىن تاڭداۋعا بولاتىن ەتىپ، جۇكتەردى جەرگە ٴتۇسىرىپ جەتكىزىپ بەرۋ، شاڭعى تاسۋعا اماناتتاۋ ارناۋلى تەكشەسىن قۇرۋ سياقتى الۋان ٴتۇرلى قىزمەت وتەۋ ۇسىندى.
2025 ـ جىلى 1 ـ ايدان 2 ـ ايعا دەيىنگى مەزگىلدە التاي ايماعى قار ـ مۇز ساياحاتى بويىنشا پۋدۇڭ _ تۇرپان _ قاناس، شىنجىن _ تۇرپان _ التاي سياقتى جەلىلەردە ۇشاق جالداپ جەتكىزەتىن اۋە لەنيالارىن اشىپ، قالىڭ شاڭعى اۋەسكەرلەرى ٴۇشىن شاڭعى جابدىقتارىن كوزەۋلى جەرگە تىكە جەتكىزۋ سىندى ساپار اسەرىن ازىرلەپ، قالىڭ ساياحاتشىلار مەن التايدىڭ اراسىن ونان ارى جاقىنداتادى.
