جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى كوميتەتى ٴماجىلىس اشتى
شيزاڭنىڭ ديڭرىسىنداعى جەر سىلكىنىسىنە قارسى اتتانىپ، اپاتتان قۇتقارۋ قىزمەتىن اقىلداسىپ ورنالاستىردى
جۇڭگو كوممۋنيستىك پارتياسى ورتالىق كوميتەتىنىڭ باس شۋجيى شي جينپيڭ ٴماجىلىستى باسقاردى
شينحۋا اگەنتتىگىنىڭ 1 ـ ايدىڭ 9 ـ كۇنى بەيجيڭنەن بەرگەن حابارى. جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى كوميتەتى 1 ـ ايدىڭ 9 ـ كۇنى ٴماجىلىس اشىپ، شيزاڭنىڭ ديڭرىسىنداعى جەر سىلكىنىسىنە قارسى اتتانىپ، اپاتتان قۇتقارۋ قىزمەتىن اقىلداسىپ ورنالاستىردى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى شي جينپيڭ ٴماجىلىستى باسقاردى ٴارى ماڭىزدى ٴسوز سويلەدى.
ٴماجىلىس مىنالاردى اتاپ كورسەتتى: شيزاڭنىڭ ديڭرىسىندا 6.8 بال جەر سىلكىنىسى تۋىلعاننان بەرى، شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ پارمەندى باسشىلىعىندا، قاتىستى جەرگىلىكتى ورىندار مەن تاراۋلاردىڭ ارەكەتى جىلدام، ۇيىمداستىرۋى پارمەندى بولدى، قالىڭ پارتيا مۇشەلەرى، كادرلار، بۇقارا ىنتىماقتاسا ەرلىكپەن شايقاستى، اسىرەسە، مەملەكەتتىڭ جالپىلىق ٴورت ٴسوندىرۋ ـ ورتتەن ساقتانۋ، قۇتقارۋ ـ كومەكتەسۋ قوسىنى، ازاتتىق ارميا، قارۋلى ساقشى بولىمدەرى جانە ورتالىق كاسىپورىندارى سياقتى قۇتقارۋ ـ كومەكتەسۋ كۇشتەرى ەرەكشە سۋىق، وتتەگى تاپشى بولۋ سىندى قيىندىقتى جەڭىپ، مينۋت، سەكۋندتى قولدان جىبەرمەي قامالىپ قالعانداردى ىزدەپ جانە قۇتقارىپ، ٴولىم ـ ٴجىتىمدى مۇمكىندىگىنشە ازايتتى، جەر سىلكىنىسىنە قارسى اتتانىپ، اپاتتان قۇتقارۋ جالپى جاقتان ٴساتتى بولدى.
ٴماجىلىس مىنالاردى باسا دارىپتەدى: قازىر جەر سىلكىنىسىنە قارسى اتتانىپ، اپاتتان قۇتقارۋ قىزمەتى شەشۋشى كەزەڭگە ٴوتتى، تيتتەي دە بوساڭسۋعا بولمايدى. قىزمەتتى اناعۇرلىم ەگجەي ـ تەگجەيلى ىستەپ، جەر سىلكىنىسىنە قارسى اتتانىپ، اپاتتان قۇتقارۋ سىندى وسى قيان ـ كەسكى شايقاستىڭ جەڭىسىنە باتىل قول جەتكىزۋ كەرەك. قۇتقارۋ ـ كومەكتەسۋ، سوڭعى جۇمىستاردى ىڭعايلاستىرۋ قىزمەتىن ۇزدىكسىز ورىستەتۋ كەرەك. ەمدەۋ ماماندارىن بىرىگىپ تەكسەرۋگە ۇيىمداستىرىپ، جارالانعانداردى بار كۇشپەن قۇتقارۋ ـ ەمدەۋ كەرەك. اپاتقا ۇشىراعان بۇقارانىڭ نەگىزگى تۇرمىسىن دەن قويا، سۇيىسپەنشىلىكپەن قامتاماسىز ەتىپ، ۋاقىتشا ورنالاستىرۋ جانە وتپەلى مەرزىمدىك ورنالاستىرۋدى ٴبىر تۇتاس ويداعىداي جوسپارلاپ، اپاتقا ۇشىراعان بۇقارانىڭ قىستان جىلى وتۋىنە شىنايى كەپىلدىك ەتۋ كەرەك. اپاتتان كەيىنگى قالپىنا كەلتىرۋدى، قايتا قۇرۋدى تەزدەتىپ، نەگىزدىك قۇرىلعىلاردى قالپىنا كەلتىرۋ جانە قيراندىلاردى تازالاۋ جۇمىسىن ۋاقىتتى مىقتى يگەرىپ ويداعىداي ىستەپ، اپات تۋىلعان ٴوڭىردىڭ قالىپتى ٴوندىرىس ـ تۇرمىس ٴتارتىبىن تەز ارادا قالپىنا كەلتىرۋ كەرەك. قوعام ورنىقتىلىعى قىزمەتىن شىن مانىندە ويداعىداي ىستەپ، ٴتۇرلى قايشىلىقتاردى، داۋ ـ شارلاردى دەر كەزىندە ٴبىر ـ بىردەن تەكسەرىپ شەشىپ، قۇزىرلى ينفورماتسيالاردى جاريالاۋدى ويداعىداي ىستەۋ كەرەك. ٴتۇيىندى وڭىرلەردەگى ۇيلەردىڭ، نەگىزدىك قۇرىلعىلاردىڭ جەر سىلكىنىسىنە توزىمدىلىك قۋاتىن جانە جەر سىلكىنىسى اپاتىنا توتەپ بەرۋ قۋاتىن ونان ارى جوعارىلاتىپ، ٴتۇرلى شۇعىل جاعدايعا توتەپ بەرۋ دايىندىعىن ويداعىداي ىستەۋ كەرەك.
ٴماجىلىس مىنالاردى تالاپ ەتتى: جەرگىلىكتى پارتكوم مەن ۇكىمەت ساياسي جاۋاپكەرشىلىكتى شىنايى ارقالاۋى، قاتىستى جاقتار تىعىز سايكەسۋ، سەلبەسۋى، ٴار دارەجەلى كادرلار ٴبىرىنشى شەپتەن تاپجىلماي، بار كۇشىن سالۋى، نەگىزگى ساتى پارتيا ۇيىمدارى مەن قالىڭ پارتيا مۇشەلەرى جاۋىنگەر قامالدىق رولىن جانە اۆانگارد، ۇلگىلىك رولىن تولىق ساۋلەلەندىرۋى كەرەك.
ٴماجىلىس باسقا دا ىستەردى اقىلداستى.
