انار بۇلت \ شينجياڭ گازەتىنىڭ ٴتىلشىسى ۋاڭ يايۇن 1 ـ ايدىڭ 9 ـ كۇنى ۇرىمجىدەن حابارلايدى. اۆتونوميالى رايوندىق جاراتىلىستىق بايلىق مەڭگەرمەسىنەن ۇعىسۋىمىزشا، 2024 ـ جىلى شينجياڭ جاسىل كەندەردى سارالاۋ قىزمەتىن ۇدايىلاندىرا ورىستەتكەن، تۇتاس جىلدا اۆتونوميالى رايون دارەجەلى 47 جاسىل كەن تىڭنان قوسىلعان، مۇنىڭ ىشىندە 25 مۇناي ـ گاز الابى، 12 كومىر كەنى، 4 تەمىر كەنى، 4 مىس ـ نيكەل كەنى، ٴبىر مۇنايلى قۇم كەنى جانە ٴبىر مىس كەنى بار. كەزەكتە شينجياڭدا 158 جاسىل كەن قۇرىلعان، مۇنىڭ 61ى مەملەكەت دارەجەلى، 97سى اۆتونوميالى رايون دارەجەلى كەن.
اۆتونوميالى رايوندىق جاراتىلىستىق بايلىق مەڭگەرمەسى كەن بايلىعىن قورعاۋ، باقىلاۋ باسقارماسىنىڭ قاتىستى جاۋاپتىسى بىلاي دەپ تانىستىردى: 2024 ـ جىلى تىڭنان قوسىلعان اۆتونوميالى رايون دارەجەلى جاسىل كەن، مۇناي ـ گاز سالاسى جوڭعار ويپاتىنا، تۇرپان _ قۇمىل ويپاتىنا جانە تارىم ويپاتىنا شوعىرلانعان، كومىر كەن سالاسى قۇمىل قالاسىنا، سانجى حۇيزۋ اۆتونوميالى وبلىسىنا، تارباعاتاي ايماعىنا، اقسۋ ايماعىنا جانە بايىنعولين موڭعۇل اۆتونوميالى وبلىسىنا تارالعان.
سوڭعى جىلدارى شينجياڭ جاسىل كەن قۇرىلىسىن نىق قاداممەن ىلگەرىلەتىپ، جاسىل كەندى سارالاۋ قىزمەتىن ۇدايىلاندىرا ورىستەتىپ، جاسىل بارلاپ تەكسەرۋ جابدىعى قۇرىلىسىن جانە ونىڭ قولدانىلۋىن كۇشەيتىپ، كەن بايلىعىن قازىپ الۋ مولشەرىن، كەن رۋداسىن سۇرىپتاپ جيناپ الۋ مولشەرىن جانە جالپىلىق پايدالانۋ مولشەرىن ۇزدىكسىز جوعارىلاتتى. بيىل شينجياڭ جاسىل كەن قۇرىلىسىن جەدەل ىلگەرىلەتىپ، ساياساتتىق قولداۋ سەرپىنىن ارتتىرىپ، جاسىل كەن قۇرىلىسىن باسقارۋ ادىسىنە وزگەرىس ەنگىزىپ جانە اتقارىپ، جاسىل كەن قۇرىلىسى نىساناسىن تياناقتاندىرىپ، جاسىل كەن قۇرىلىسى تالابىن جانە سارالاۋ ٴتارتىبىن كەمەلدەندىرەدى؛ تۇرگە ايىرىپ شارا قولدانىپ، كەن كاسىپورىندارىن باقىلاۋ ـ باسقارۋ سەرپىنىن كۇشەيتىپ، جاسىل كەن قۇرىلىسىن قاداعالاۋ تىزىمدىگىن ورناتادى؛ جاسىل كەن باعالاۋ مەن تەكسەرۋ جۇيەسىن ورناتىپ، جاسىل كەن قۇرىلىسى ساپاسىن ٴۇرتىس قامتاماسىز ەتەدى.
