انار بۇلت \ شينجياڭ گازەتىنىڭ ٴتىلشىسى ۋاڭ جيڭجيڭ
1 ـ ايدىڭ 5 ـ كۇنى پراكتيكا جاساپ جاتقان ٴۇرىمجى كاسىپتىك داشۋەسى ورتا دارەجەلى كاسىپتىك وقۋ ـ اعارتۋ شۋەيۋانىنىڭ وقىتۋشىسى يۇي چىڭزى مەن تومەن جىلدىقتاعى ٴبىلال مامەت تۇسكى دەمالىس ۋاقىتىندا شينجياڭ كۇنلۇن قوناق ٴۇيى ”بالوۋ“ نەگىزگى تاقىرىپتىق اۆتوبۋز بەكەتىندە كەزدەسۋگە ۋادەلەستى. ”يۋە چيانچياندار جاڭا تاپسىرىس قابىلداپتى، الارمان ’بالوۋ‘ نەگىزگى تاقىرىبىنداعى قاعاز ويما شىراق جاساتپاقشى ەكەن، ٴبىز بارىپ ناقتى ورىندى كورىپ ٴبىراز سۋرەت ٴتۇسىرىپ كەلەيىك، نوبايىن سىزۋىمىزعا پايدالى“، ـ دەدى يۇي چىڭزى.
باستاپقى ويدان نىسانعا اينالعانعا دەيىن، ينتەرنەت جەلىسىندە جانە جەلىدەن تىسقارى ساتۋدان تاپسىرىس قابىلداۋعا، دارالانعان قىزمەت وتەۋگە دەيىن دامىدى. ٴبىر جارىم جىلدان بەرى، وسى ۇجىمداعى 7 سەرىك قاعاز ويما شىراق جونىندەگى شارۋاشىلىق قۇرۋ نىسانى ارقىلى ٴبىر توپ جاڭا شەبەرلىك قالىپتاستىردى. ”سىرتقا كوپ شىقپايتىن وقۋشى نىسان باستاۋ قارجىسى ٴۇشىن قوسىمشا جۇمىس ىستەدى، سوزگە شورقاق مۇشە نىساندى ىلگەرىلەتۋ ٴۇشىن ساۋداگەرلەرمەن سويلەستى، مەن ولاردىڭ شارۋاشىلىق قۇرۋ نىسانىنىڭ ارقاسىندا وزگەرۋ بارىسىنا كۋا بولدىم“، ـ دەدى وسى شۋەيۋاننىڭ شارۋاشىلىق قۇرۋعا جەتەكشى وقىتۋشىسى لين جوۋچياڭ.
”جەمىس جانشىپ ٴجۇرىپ“ تاپقان باستاۋ قارجى
2023 ـ جىلى 6 ـ ايدا ەلەكتروندى ساۋدا ىستەرى ماماندىعىنداعى يۋە چيانچيان، يۇي چىڭزى، ليۋ چيانيۇي جانە ما رۇيتيڭ ورتا دارەجەلى كاسىپتىك وقۋ ـ اعارتۋ بويىنشا 2 ـ جىلدىققا شىعۋ الدىندا تۇرعان، مەكتەپ اشقان شارۋاشىلىق قۇرۋ جوبالاۋى ساباعىندا ولار شاعىن گرۋپپا بولىپ ۇيىمداستى. ”ادەتتەگى ورتا مەكتەپتەر جوعارى مەكتەپكە ەمتيحان بەرۋدى باعدار ەتەدى، ورتا دارەجەلى كاسىپتىك وقۋ ـ اعارتۋ مەكتەپتەرى جۇمىستانۋدى باعدار ەتەدى، 2 ـ جىلدىققا كەلگەن كەزدە ٴبىز وقۋشىلاردى شارۋاشىلىق قۇرۋ شاعىن گرۋپپاسى بولىپ ۇيىمداسىپ، شارۋاشىلىق قۇرۋ نىسانىن ىستەۋگە باستايمىز“، ـ دەدى لين جوۋچياڭ.
”سول كەزدە تىڭ ويعا تولى شارۋاشىلىق قۇرۋ نىسانىن ىستەۋدى ويلادىم، كوپشىلىك كوپتەگەن ويلاردى ورتاعا قويدى، اقىرىندا قاعاز ويما شىراق پەن ەكى ولشەمدى كەڭىستىك كارتون كەيىپكەرىن ۇشتاستىرۋ جاڭالىعى ەڭ كوپ قولداۋعا يە بولدى، ٴبىزدىڭ ويىمىز وسىدان باستالدى“، ـ دەدى يۋە چيانچيان.
بازاردا تەكسەرۋ ـ زەرتتەۋ جۇرگىزگەن سوڭ ولار بۇل نىساندى ىستەۋ ٴۇشىن كارتون جاساۋ تەحنولوگياسى، ٴىرى ساندى مالىمەت جانە بۇعالتىرلىق ماماندىعىنداعى وقۋشىلاردىڭ كومەگى قاجەت ەكەنىن بايقايدى. ولار وقىتۋشىلاردان كومەك سۇراعان سوڭ، كارتون جوبالاۋ ماماندىعىنداعى ٴبىلال مەن رۋان مينتيڭ، ٴىرى ساندى مالىمەت جانە بۇعالتىرلىق ماماندىعىنداعى ليۋ يفي كەلىپ قوسىلادى.
كارتون جوبالاۋ ماماندىعىنداعى مۇشەلەر كارتون كەيىپكەردىڭ ۇلگىسىن سىزۋعا جاۋاپتى بولادى، وزگە ساباقتاستار جەكە ـ جەكە سالىستىرىپ كورىپ، ەڭ سوڭىندا حىناننان ويما شىراق وندىرەتىن ٴبىر زاۆودتى تاۋىپ شىعادى. ”توپتاپ وندىرىلسە ارزان، الايدا ٴبىزدىڭ ۇلگى بويىنشا تاپسىرىسپەن جاسالسا وتە قىمبات، ٴبىرىنشى توپتاعى ٴونىمدى تاپسىرىسپەن جاساۋ ٴۇشىن، كەم دەگەندە، 5000 يۋان قاجەت بولدى“، ـ دەدى يۋە چيانچيان.
جيىن اشىپ اقىلداسقان سوڭ، ۇجىم الدىمەن ٴار ادامنان 150 يۋاننان جيىپ ٴبىرىنشى قارجىنى توپتايدى، قالعان قارجىنى قالاي تولتىرۋ كەرەك؟ يۇي چىڭزى مەن ليۋ چيانيۇي بوس ۋاقىتتارىنان پايدالانىپ قوسىمشا جۇمىس ىستەيدى. ”يۇي چىڭزى ۇيكۇشىك، مەكتەپكە بارۋدان سىرت نەگىزىنەن ۇيىنەن شىقپايدى، نىسان قارجىسىنىڭ ٴالى كەمشىل ەكەنىن كورىپ ول وقۋدان تاراعان سوڭ ٴۇيىنىڭ ماڭىنداعى ٴسۇتتى شاي دۇكەنىنە بارىپ ساعاتتىق جۇمىس ىستەۋدى ٴبىرىنشى بولىپ ويلادى“، ـ دەدى ليۋ چيانيۇي.
ٴسۇتتى شاي دۇكەنىندە ٴبىر ستاكان ليمون شىرىنىن جاساۋ ٴۇشىن، الدىمەن ٴبىر ليموندى تۇتاستاي جانشۋ قاجەت، ٴبىر ستاكانى ٴۇشىن 80 تيىن بەرەدى. وقۋدان تاراپ تاپسىرماسىن ورىنداپ بولعان سوڭ يۇي چىڭزى ساعات 19دان 23كە دەيىن جۇمىس ىستەپ، كۇنىنە 170 ستاكاننان ارتىق ليمون سۋىن دايىندايدى. ليۋ چيانيۇي ٴبىر ٴدامدى تاعام الاڭىندا داياشى بولىپ ىستەپ، كۇنىنە 100 يۋاننان ارتىق كىرىس كىرگىزەدى. ول ەكەۋى 10 كۇن جۇمىس ىستەپ نىساننىڭ تۇڭعىش توپتاعى باستاۋ قارجىسىن قۇرايدى.
سىناپ ٴجۇرىپ شىعارعان ەرەكشە ٴونىم
2024 ـ جىلى 6 ـ ايدىڭ ٴبىر كۇنى ۇجىمداعى سەرىكتەر ٴبىر اراعا باس قوسىپ وزدەرىنىڭ ٴبىرىنشى توپتاعى ٴونىمى _ كارتون نەگىزگى تاقىرىبىنداعى 4 قاعاز ويما شىراقتى تاپسىرىپ الادى. ”ٴبىز ەلەكتروندى ساۋدا ىستەرى ماماندىعىندامىز، باستالعاندا ـ اق ينتەرنەت جەلىسىندە ساتۋدى سىناپ كوردىك، شياۋحۇڭشۋ، دوۋيىنداعى تىكە تاراتۋدىڭ بارلىعىن ىستەپ كوردىك، الايدا ٴونىمى جاقسى بولمادى“، ـ دەدى يۋە چيانچيان.
ٴدامدى تاعامدار الاڭىندا داياشى بولىپ ىستەگەن كەزدە ليۋ چيانيۇي كوپتەگەن جاستىڭ وزدەرى جاساعان مادەنيەت جاسامپازدىعى ونىمدەرىن الىپ جايما جايعانىن كورگەن، ”قاعاز ويما شىراقتارىمىزدى دا بازارعا الىپ بارايىق“، ـ دەدى يۋە چيانچيان، مىنە وسىلاي قاعاز ويما شىراق شانشان وۋتلەس، تيانشان ميڭيۋەچىڭ سياقتى جەرلەردەگى مادەنيەت جاسامپازدىعى بازارلارىنا شىعادى، ”الارماندارمەن ارالاسۋ بارىسىندا، ونىمدەرىمىزدىڭ وتە جالاڭ ەكەنىن، الارماندار شينجياڭ مادەنيەتىنە جانە تاريحىنا قاتىستى قاعاز ويما شىراق ونىمدەرى بولۋىن ٴۇمىت ەتەتىندىگىن بايقادىق“.
ٴبىلال جازعى دەمالىس كەزىندە اكە ـ شەشەسىمەن بىرگە ىلەگە بارىپ، كەڭساي كوپىرىن، ىلە گەنەرال مەكەمەسىن ساياحاتتايدى. ول كوپشىلىك كورگەن، ۇناتقان شينجياڭ ەرەكشەلىگىنە يە كورىنىس رايوننان باستاپ كىرىسىپ، ۇجىمدارىنىڭ 2 ـ جەلىلەس ٴونىمى _ شينجياڭ كورىنىسىندەگى جەلىلەس قاعاز ويما شىراعىن جاساۋدى ۇسىنىس ەتەدى.
شينجياڭنىڭ كورىنىسى مەن قاعاز ويما كوركەمونەرى سايكەسىپ، شام جارىعى قاباتتاسقان قاعاز ويماعا ٴتۇسىپ، جارىق پەن قاراڭعى اراسىندا كورىنىس كەسكىندەلىپ، ايرىقشا كوركەمونەرلىك سيپاتقا يە بولدى. ”شينجياڭ كورىنىسى جەلىلەس قاعاز ويما شىراعى“ ولاردىڭ ينتەرنەت جەلىسىندە ساتۋ ارناسىن اشتى، ەلەكتروندى ساۋدا ىستەرى ماماندىعىن وقيتىن سەرىگى كاسىپتىك بىلىمدەرىن امالياتتا پايدالانىپ، الارمانداردىڭ تالابى بويىنشا ٴونىم جاساۋعا كىرىستى، ينتەرنەت جەلىسىندەگى الارماندارى بارعان سايىن كوبەيدى.
”ويۋدان“ كەلگەن شارۋاشىلىق قۇرۋ ۇلكەن سيلىعى
قاعاز ويما شىراعى شارۋاشىلىق قۇرۋ نىسانى بارعان سايىن تولىسىپ، 2024 ـ جىلى 10 ـ ايدا شارۋاشىلىق قۇرۋ ۇجىمىنداعىلاردىڭ قاعاز ويما تۋىندىلارى ”ارەكەتكە“ كەلە باستادى. قول تەلەفونمەن ٴونىم قورابىنا جاپسىرىلعان ەكىلىك كودتى جايمالاساڭىز، قاعاز ويما تۋىندىسىنا جاسىرىنعان حيكايانى، كارتوندى نەمەسە ٴتۇسىندىرۋدى كورە الاسىز.
يۋە چيانچيان كوپشىلىكپەن بىرگە ٴبىر جىلدان استام ۋاقىتتان بەرگى نىسان ىستەۋ بارىسىن رەتتەپ، مەكتەپتىڭ تانىستىرۋىمەن شارۋاشىلىق قۇرۋ جارىسىنا قاتىناسادى. ”بەينەلەۋ قابىلەتى جاقسىلار ساحناعا شىعىپ نىساندى تانىستىردى، ۇستەل قىزمەتىنە ۇيلەسەتىندەر PPT جاسادى، شارۋاشىلىق قۇرۋ نىسانى ٴبىزدىڭ بالامىز ىسپەتتى بولدى“، ـ دەدى يۋە چيانچيان.
2024 ـ جىلى 11 ـ ايدا ولاردىڭ جارىسقا قاتىناستىرعان نىسانى «ويما ساۋلەسىمەن كولەڭكە ٴتۇسىرۋ: سيقىرلى ساۋلەمەن كولەڭكە ٴتۇسىرۋ، قاعازدان ويىلعان سالتانات» اۆتونوميالى رايوننىڭ 3 ـ كەزەكتى حۋاڭ يانپەي كاسىپتىك وقۋ ـ اعارتۋ بويىنشا جاڭالىق اشۋ، شارۋاشىلىق قۇرۋ جارىسىندا ورتا دارەجەلى كاسىپتىك وقۋ ـ اعارتۋ گرۋپپاسى بويىنشا 1 ـ دارەجەلى سيلىققا يە بولادى، باعالاۋشى ۇستازدار شارۋاشىلىق قۇرۋ نىسانى ويمەن عانا شەكتەلمەي، امالياتقا اينالىپ، ناقتى زات جاسالىپ شىقتى دەپ باعالادى ٴارى ولاردىڭ بازارعا ىشكەرىلەي ارالاسىپ سەرپىلىس ٴتۇيىنىن ىزدەگەن ناقتى رۋحتارىن القادى.
”ٴبىرىنشى دارەجەلى سيلىق 5000 يۋان، ٴبىز ونى تۇگەلدەي قاعاز ويما شىراعى جاڭا جەلىلەس ونىمدەرىن اشۋعا پايدالانباقشىمىز“. يۋە چيانچيان كەلەسى قادامداعى جوسپارلارىنىڭ بازاردا قارسى الىناتىن قاعاز ويما شىراق ونىمدەرىن سارالاپ كوپتەپ ٴوندىرۋ ەكەندىگىن، تەك وسىلاي ىستەگەندە عانا وزىندىك قۇندى تومەندەتىپ، اناعۇرلىم كوپ تۇتىنۋشىنى ساتىپ الۋعا باۋراۋعا بولاتىندىعىن ايتتى.
”ورتا دارەجەلى كاسىپتىك وقۋ ـ اعارتۋ مەكتەپتەرىندەگى بالالاردىڭ كوبى ورتا مەكتەپ ەمتيحانىندا ساتسىزدىككە ۇشىراۋ سوققىسىن باستان كەشىرگەن، سەنىمدەرى مۇقالعاندىقتان وزدەرىن ۇنەمى قوراشسىنادى، الايدا وسى رەتكى شارۋاشىلىق قۇرۋ جانە جارىس ارقىلى ولار تەك شەبەرلىككە يە بولىپ قانا قويماي، ونان دا ماڭىزدىسى، بولاشاق جونىندە سەنىمگە يە بولىپ، اتا ـ انالارى دا بالالارىنداعى وزگەرىستى ايقىن سەزىندى“. لين جوۋچياڭ كەلەر جىلى 9 ـ ايدا وسى بالالاردىڭ جوعارى تەحنيكۋمعا تۇسەتىندىگىن، ولاردىڭ ۇزدىكسىز قۇلشىنىپ، قاعاز ويما شىراعى نىسانىن كاسىپ رەتىندە ىستەۋىن ٴۇمىت ەتەتىندىگىن ايتتى.
