انار بۇلت \ شينجياڭ گازەتىنىڭ ٴتىلشىسى گو چيان 1 ـ ايدىڭ 13 ـ كۇنى ۇرىمجىدەن حابارلايدى. اۆتونوميالى رايوندىق گەولوگيا مەكەمەسى ٴۇرىمجى گەولوگيا ۇلكەن اترەتىنەن ۇعىسۋىمىزشا، ٴۇرىمجىنىڭ وڭتۇستىگىندەگى ساياپىل ويىعىنىڭ سولتۇستىك جيەگىنە بارلاۋ جۇرگىزۋدە تىڭ تابىستارعا قول جەتكەن. مەجەلەۋگە قاراعاندا، وسى وڭىردەگى تابيعي گاز گەولوگيالىق بايلىعىنىڭ مولشەرى 100 ميلليارد تەكشەمەترگە جەتىپ، ٴىرى مۇناي ـ گاز الابىن قالىپتاستىرۋى ابدەن مۇمكىن ەكەن.
جوڭعار ويپاتى _ ەلىمىزدىڭ باتىس بولىگىندەگى مۇناي ـ گاز بايلىعى مول ٴىرى كوپ اينالمالى قاتتالعان ويپاتتاردىڭ ٴبىرى، ساياپىل ويىعى جوڭعار ويپاتىنىڭ وڭتۇستىك جيەگىندەگى ەكىنشى رەتتىك قۇرىلىمدىق بىرلىك بولىپ، ٴبىرشاما جاقسى بارلاۋ بولاشاعى بار.
ءۇرىمجى قالاسى ساياپىل ويىعىنىڭ سولتۇستىك جيەگىندەگى مۇناي ـ گاز بايلىعىنىڭ كومەسكى كۇشىن باعالاۋ نىسانى قىزمەت رايونى دابانچىڭ رايونىنداعى ساڭگەسارى ماڭىنا ورنالاسقان. 2024 ـ جىلى 1 ـ ايدا اۆتونوميالى رايوندىق گەولوگيا مەكەمەسىنىڭ ٴۇرىمجى گەولوگيا ۇلكەن اترەتى نىسان وڭىرىندە گەولوگيالىق بارلاۋ قىزمەتىن جۇرگىزىپ، فيزيكالىق بارلاۋ جانە بۇرعىلاپ بارلاۋ مىندەتىن ىركەس ـ تىركەس ورىندادى، مۇنىڭ ىشىندە شينچايدي _ 1 ۇڭعىماسى 3030 مەترگە دەيىن بۇرعىلاندى. 1510 مەتر جانە 2295 مەتر بۇرعىلاعاندا، گاز ولشەۋدەگى قالىپسىز جاعداي ىركەس ـ تىركەس جارىققا شىقتى. تاۋ جىنىسى قارالتقىم سۇرى تۇنبا جىنىستان توسىننان اقشىل سۇرى ۇساق قۇم جىنىسقا اينالدى، ۇستىندە الىنعان گازدى جاققاندا، سولعىن كوك ٴتۇستى جالىن شىعادى، سىنامادا دا ايقىن ماي ٴيىسى بۇرقىراعان بەلگىلەر بار، بۇل مۇناي ـ گاز بايلىعى جاقىندا ەكەندىگىن تۇسىندىرەدى.
”قازىرگى كەزەڭدەگى العاشقى باعالاۋعا نەگىزدەلگەندە، ٴبىز وسى وڭىردەگى تابيعي گازدىڭ گەولوگيالىق بايلىق مولشەرى 100 ميلليارد تەكشەمەترگە جەتەدى دەپ مەجەلەدىك. وسى كولەم بويىنشا تۇجىرىمداعاندا، بۇل وڭىردە ٴىرى مۇناي ـ گاز الابى قالىپتاسقان بولۋى ابدەن مۇمكىن“، ـ دەدى اۆتونوميالى رايوندىق گەولوگيا مەكەمەسى ٴۇرىمجى گەولوگيا ۇلكەن اترەتىنىڭ نىسان جاۋاپتىسى لياڭ بين.
”ٴۇرىمجىنىڭ وڭتۇستىگىندەگى ساياپىل ويىعىنىڭ سولتۇستىك جيەگىندەگى بارلاۋ ـ اشۋ ناتيجەسى وسى وڭىردەگى مۇناي ـ گاز ىزدەۋ قىزمەتىنە جاڭا باعدار كورسەتتى. وسى وڭىردەگى مۇناي ـ گاز بايلىعىن بارلاۋدى، اشۋدى، پايدالانۋدى كۇشەيتىپ، ٴۇرىمجىنىڭ جانە ماڭايىنىڭ گازدان پايدالانۋىن الدىمەن قاناعاتتاندىرۋعا بولادى“. ٴۇرىمجى قالالىق جاراتىلىستىق بايلىق مەكەمەسىنىڭ قاتىستى جاۋاپتىسىنىڭ ايتۋىنشا، كەلەسى قادامدا وسى وڭىرگە باعىتتالعان مۇناي ۇڭعىماسىن قىسىممەن جارۋ قىزمەتى ورىستەتىلىپ، ٴتىپتى دە كوپ مۇناي ـ گاز ٴوندىرىس قۋاتىنا قول جەتكىزىلەدى ەكەن.
