مەن پامير ۇستىرتىندە تاماق جەتكىزەمىن
□ انار بۇلت \ شينجياڭ گازەتىنىڭ ٴتىلشىسى ٴجازيرا نەسىپبەك
قىس ماۋسىمىنداعى پامير ۇستىرتىندە تاماق جەتكىزۋ ٴۇشىن، ٴۇستىرتتىڭ سۋىعىنا ٴتوزۋ، وتتەگى جەتىسپەۋ قيىنشىلىعىن جەڭۋ كەرەك. بىرنەشە كۇننىڭ الدىندا تاشقورعاندا اۋا تەمپەراتۋراسى نولدەن تومەن 36 سەلتسي گرادۋسقا تومەندەگەندە، ٴالشىر بادال توڭعانىنان جىلاپ جىبەردى.
ٴالشىر تاشقورعان تاجىك اۆتونوميالى اۋدانىنداعى مەيتۋاننىڭ تاماق جەتكىزۋشىسى. 1 ـ ايدىڭ 13 ـ كۇنى ٴتىلشى الشىرگە ىلەسىپ بىرگە تاماق جەتكىزىپ ەدى، ٴبىر بۇرىلمادا ودان كوز جازىپ قالدى.
”كۇن سۋىتقان سايىن تاپسىرىس كوبەيەدى، جەتكىزۋشىلەرىمىز دە ەرەكشە باتىر!“، ـ دەدى تاشقورعان مەيتۋان تاماق جەتكىزۋ پۋنكتىنىڭ جاۋاپتىسى نياز ٴالي.
ٴالشىردىڭ مۇنشالىق قىزۋ ىنتالى ىستەۋىنىڭ سەبەبى تاشقورعاندا قىستا اس ـ سۋ، قوناق ٴۇي، ساۋدا دۇكەندەرىنىڭ اشىلۋ سالىستىرماسىنىڭ جىلدان ـ جىلعا ارتۋى بولدى.
”الدىڭعى جىلداردا قىس كىرىسىمەن 90 _ %80 دۇكەن ساۋداسىن توقتاتاتىن، قازىر تەڭ جارتىسىنان استامى اشىق، بولاشاقتا جاعدايدىڭ ونان ارى جاقساراتىندىعىنا سەنىمدىمىز“، ـ دەدى تاشقورعان اۋداندىق پارتكوم ۇگىت ٴبولىمىنىڭ ورىنباسار باستىعى ياڭ گوميڭ.
قازىر تاشقورعاندا 4 تاماق جەتكىزۋ تۇعىرى بار، ولار تاشقورعاننىڭ قاۋىرت گۇلدەنگەن ساياحات كاسىبىنە ارقا سۇيەپ وسى اراعا كەلىپ ىرگە تەپتى ٴارى جەرگىلىكتى ورىنداعى بۇقارانىڭ كومەسكى سۇرانىسىن جانداندىردى، كوپتەگەن اس ـ سۋ دۇكەنى قوجايىندارى دا قىس ماۋسىمىندا تيجارات جۇرگىزۋدى تاڭدادى. مەيتۋان چيشوۋدىڭ ساناعىنا نەگىزدەلگەندە، قىستا تاپسىرىستىڭ %70ى جەرگىلىكتى تۇرعىنداردان كەلەدى ەكەن.
”تاپسىرىس تىم كوپ، قازىر ٴاربىر ادامنىڭ قولىندا 5 تە 6 تاپسىرىس بار“. تۇسكى دەمالىستا ٴتىلشى تاشقورعان مەيتۋان تاماق جەتكىزۋ پۋنكتىنە بارعاندا، نيازدىڭ ورنالاستىرۋ جۇيەسىن قاداعالاۋمەن قاربالاس ەكەندىگىن كوردى.
سىرتتا تەمپەراتۋرا نولدەن تومەن 18 سەلتسي گرادۋسقا ٴتۇستى، كۇن سۋىق، جول تايعاق، جەتكىزۋشىلەر تاپسىرىستى جەتكىزگەندە بەلگىلەنگەن ۋاقىتىنان اسىپ كەتۋى مۇمكىن. نياز تانىستىرىپ بىلاي دەدى: ولاردىڭ ۇستىنەن ازدى ـ كوپتى شاعىم ايتاتىندار دا بار، ٴبىراق باسىم كوپ الارمان باۋىرمال، جەتكىزۋشىلەردىڭ قاقاعان قىستا تاپسىرىس جەتكىزۋىنىڭ وڭاي ەمەس ەكەندىگىن تۇسىنەدى.
2024 ـ جىلى 8 ـ ايدا مەيتۋان تاماق جەتكىزۋ قىزمەت وتەۋى تاشقورعانعا ىرگە تەپتى. ”1 ـ قازان“ دەمالىسى كەزى ساياحاتتىڭ قاۋىرت مەزگىلى، مەيتۋان تاماق جەتكىزۋىنىڭ كۇندىك تاپسىرىسى 1500گە جەتتى. تاشقورعاندا جەتكىزۋشىلەر از بولعاندىقتان، مەيتۋان ياركەن اۋدانىنان 10 ادامدى كومەككە ارنايى اكەلدى.
قىس ماۋسىمىندا ساياحاتشىلار ازايعانىمەن، الايدا مەيتۋان تاماق جەتكىزۋى كۇنىنە 300دەن استام تاپسىرىس قابىلدايدى، اپتا سوڭىندا تاپسىرىس 400دەن اسادى.
”ديڭ، سىزگە ٴبىر تاماق تاپسىرىسى كەلدى“. بۇل 37 جاستاعى سىرعانبەك ٴمىرالىنىڭ 1 ـ ايدىڭ 13 ـ كۇنى تاپسىرىپ العان 39 ـ تاپسىرىسى، ول بىلتىر 12 ـ ايدىڭ سوڭىندا تاماق جەتكىزۋشى بولىپ ىستەگەن ەدى، 1 ـ ايدىڭ وزىندە ـ اق ”تاپسىرىس قابىلداۋ ۇزدىگى“ بولدى. ”بۇل قىزمەت جاقسى بولدى، قۇلشىنىپ ىستەسەڭ، كىرىسىڭ جامان بولمايدى ەكەن“، ـ دەدى ول.
سىرعانبەكتىڭ ەكى بالاسى بار، ۇلكەن ۇلى موڭعۇلكۇرە اۋدانىنا ات ونەرى ارمانىن قۋعالى كەتسە، كىشى ۇلى باستاۋىش مەكتەپتە وقيدى ەكەن. كەزىندە مال باعۋمەن كۇن كورىپ كەلگەن سىرعانبەك تە سىرتقا شىعىپ جۇمىس ىستەۋگە بەكيدى. ول كەلۋدەن بۇرىن ”تاپسىرىس قابىلداۋ ۇزدىگى“ ٴالشىر بولاتىن، قازىر سىرعانبەكتىڭ بەينەسى كورنەكتى بولعاندىقتان، ٴالشىر وزىنە زور باسىم تۇسكەندىگىن سەزىندى.
قاقاعان سۋىقتى جەڭۋ ٴۇشىن، جەتكىزۋشىلەر كوپ ٴادىس ويلادى. الىستاۋ جەردەگى تاپسىرىستى 4 جەتكىزۋشى ٴبىر گرۋپپا بولىپ اۆتوكولىكپەن جەتكىزدى؛ جاقىنداۋ جەردەگى تاپسىرىستى جاياۋ جەتكىزدى؛ الىس تا، جاقىن دا ەمەس ارالىقتاعى تاپسىرىستار جونىنەن ەلەكترسيكل ەڭ جاقسى قۇرال. مەيتۋان تاماق جەتكىزۋشىلەرگە سۋىقتان قورعايتىن باس كيىم، شاپان بەرىپ قالماستان، وتباسىندا قيىنشىلىعى بار جەتكىزۋشىلەردىڭ ەلەكترسيكل جانە باتارەيا جالعا الۋ اقىسىن ازايتۋ، كەشىرىم ەتۋ ارقىلى ٴۇستىرتتى سۋىق وڭىردە قۇلشىنا ەڭبەك ەتكەن جەتكىزۋشىلەرگە قامقورلىق جاسادى.
ٴتىلشى سىرعانبەككە ىلەسىپ بىرنەشە تاپسىرىستى جەتكىزەمىن دەپ بىردە جۇگىرىپ، بىردە سىرعاناپ، بەت ـ اۋزى، قول ـ اياعى توڭعانىنان ۇيىپ قالدى، ال سىرعانبەك بۇرىنعىسىنداي تاعى ٴبىر تاپسىرىستى قۋانا قابىلدادى.
جياڭسۋلىق ساياحاتشى حۋاڭ شۋە سىرعانبەكتىڭ جەتكىزۋ جىلدامدىعىن ماقتاپ بىلاي دەدى: ”ٴالى ىستىق ەكەن عوي، راقىمەت سىزگە، جاپا شەكتىڭىز!“
قاس قارايدى، تۇنگى اسپان استىندا الىستاعى مۇز تاۋ اپپاق بولىپ كوز ۇيالتادى، ەرجۇرەك جەتكىزۋشىلەر ٴالى دە مۇرىندارىنا سۋ جەتپەي زىر جۇگىرىپ، وسىناۋ سۋىق ۇستىرتتەگى وتتەگى جەتىسپەيتىن شاعىن قالانىڭ قىس ماۋسىمىنا جىلۋلىق سيلادى.
