انار بۇلت \ شينجياڭ گازەتىنىڭ ٴتىلشىسى لي ياڭ 1 ـ ايدىڭ 18 ـ كۇنى ۇرىمجىدەن حابارلايدى. بيىل اۆتونوميالى رايوندىق ەكى ٴماجىلىس ”ۋاكىلدەر، مۇشەلەر ارناسىن“ تۇڭعىش رەت اشتى، 1 ـ ايدىڭ 18 ـ كۇنى تۇستەن بۇرىن ساعات 9دا اۆتونوميالى رايوندىق ساياسي كەڭەس 13 ـ كەزەكتى كوميتەتى 3 ـ ٴماجىلىسىنىڭ اشىلۋ جيىنىنان ىلگەرى ”مۇشەلەر ارناسىنىڭ“ شوعىرلى تىلشىلىك قيمىلى شينجياڭ حالىق سارايىندا وتكىزىلدى.
شامامەن جارتى ساعاتتاي ۋاقىتتا نازار كاسىپ سالاسىن دامىتۋ، ادەبيەت ـ كوركەمونەردى گۇلدەندىرۋ، ەكولوگيانى قورعاۋ، شينجياڭدى مادەنيەتپەن نارلەندىرۋ، شەكارا بويىن دامىتۋ، اۋىل ـ قىستاقتى گۇلدەندىرۋ سياقتى شينجياڭنىڭ ەكونوميكالىق، قوعامدىق دامۋىنداعى قولامتالى، جارقىن تۇيىندەرگە شوعىرلاندىرىلدى، تۇرلىشە سالادان كەلگەن اۆتونوميالى رايوندىق ساياسي كەڭەستىڭ 6 مۇشەسى رەتىمەن ”مۇشەلەر ارناسىنا“ شىعىپ، تىلشىلەردىڭ سۇراۋىنا جاۋاپ بەردى. ولار حيكايالارىن بايانداپ، ناتيجەنى ايگىلەپ، ناقتى اقىل ـ كەڭەس بەرىپ، ٴجىتى قاداعالاپ وتىرعان ماسەلەلەرگە بۇكپەسىز جاۋاپ قايتارىپ، مىندەت اتقارۋداعى جۇرەك سوزدەرىن اقتارىلا اڭگىمەلەدى.
ميكروفون حالىقتىڭ ٴۇنى مەن حالىق جاعدايىن جەتكىزدى. سەنىم وسى ارادا اسقاقتاپ، قوزعاۋشى كۇش وسى ارادا تاسقىندادى.
ادامدى جەلپىندىرەتىن جاڭا داۋىردەگى جۇڭگونىڭ شينجياڭ حيكايالارى تىكە تاراتۋ سيگنالى جانە مەديالاردىڭ حابارلاۋى ارقىلى دۇنيە جۇزىنە تارالدى.
مۇشە گاۋ جيانجۇن شينجياڭنىڭ جاڭا ەنەرگيا كاسىپ سالاسىنىڭ جەل، كۇن ەنەرگياسىنان پايدالانىپ جارقىن بولاشاق جاراتىپ، شينجياڭ ەكونوميكاسىنىڭ جوعارى ساپالى دامۋىن ىلگەرىلەتۋدىڭ ماڭىزدى تىرەگىنە اينالعاندىعىن باياندادى؛ مۇشە اينۇر ٴماۋلىت تيانشان ادەبيەت سيلىعى تاعايىندالعاننان كەيىن، ٴار ۇلت جازۋشىلارىنىڭ، ادەبيەت ـ كوركەمونەر اۋەسكەرلەرىنىڭ قۋانىشى قوينىنا سيماي، مۇنى شينجياڭنىڭ ادەبيەت ىستەرىنىڭ دامۋىنداعى ماڭىزدى بەلەس دەپ قاراپ، شينجياڭنىڭ كوركەمدىگى مەن گۇلدەنۋىن ايگىلەۋگە سۇبەلى تۋىندى تارتۋ ەتەتىندىگىن ٴبىلدىردى؛ مۇشە توحتى راحمان تاكلاماكان ٴشولىنىڭ جيەگىن تورلاپ تۇتاستىرۋ، قۇمايتتانۋدان ساقتانۋ، قۇمدى تىزگىندەۋدەگى وسى جاڭا كەرەمەتتىڭ استارىنداعى ادامداردىڭ قۇلشىنىسىن ٴوز باسىنان وتكەرۋشى رەتىندە باياندادى؛ مۇشە جاۋ لي 34 جىلدان بەرگى مادەني ەسكەرتكىشتەردى قورعاۋ قىزمەتىن ورىستەتكەن كەشىرمەلەرىمەن بىرلەستىرىپ، شينجياڭنىڭ مادەنيەت مۇرالارىن سيفرلاندىرىپ قورعاۋ جاعىندا قالاي شىنايى كۇش سالعاندىعىن باياندادى؛ مۇشە قۇربانقول كاماس ۇستىرتتەگى شەكارا قورعاۋشىلاردىڭ پاك ماحابباتىن وتانعا ارناعان وتان سۇيىسپەنشىلىگىن تەرەڭ سۇيىسپەنشىلىكپەن ماداقتادى ٴارى اۋىلدا تۋىلعان وراسان زور وزگەرىستەردى باياندادى؛ مۇشە يىن شىڭ حالىقتىق كاسىپورىنداردىڭ اۋىل ـ قىستاقتى گۇلدەندىرۋگە دەم بەرۋدە قول جەتكىزگەن وراسان زور جەتىستىكتەرىن ماقتانىشپەن ٴبولىستى.
ٴاربىر بايانداۋ جاڭا داۋىردەگى پارتيانىڭ شينجياڭدى باسقارۋ جالپى جوباسىنىڭ شينجياڭداعى تابىستى امالياتىن جان ـ جاقتى، جاندى ايگىلەدى. سونىمەن بىرگە، ”اۋەلگى ماقساتتى وزگەرتپەۋ، حالىق ٴۇشىن مىندەت وتەۋدىڭ“ قاراپايىم ۇران ەمەس، قايتا مۇشەلەردىڭ كوكەيىندەگى سەنىمى مەن تابان تىرەر ناقتى ارەكەتى ەكەندىگىن ايگىلەدى.
