انار بۇلت \ شينجياڭ گازەتىنىڭ ٴتىلشىسى باي سۋجۇن
سىرتتا ۇسكىرىك جەل ازىناپ تۇر.
بولمە ىشىندە جۇك تيەلگەن پويەزدار گۋدەك تارتىپ الاتاۋ ساعاسى ۆوگزالىنىڭ كونتينەر اۋىستىرىپ تيەۋ قامباسىنان رەت ـ رەتىمەن شىعىپ جاتىر، شىعىپ جاتىر.
1 ـ ايدىڭ 20 ـ كۇنى تاڭەرتەڭ، ماشينالاردىڭ گۇرىلى مەن تىلدەسكىدەن ەمىس ـ ەمىس جەتكەن نۇسقاۋلارعا ىلەسە، ياڭ چياڭلين جەر بەتىنەن 20 مەتر بيىكتىكتەگى رەليستى كرانعا لىپ ەتىپ شىعىپ، كابينكەگە كىرىپ اسپا كراندى جۇرگىزە باستادى.
اسپا كران سارى ٴتۇستى ۇزىن بىلەكتەرى مەن تەمىر تەگەۋرىندەرىن سوزىپ، اقىرىن قوزعالىپ، جەر بەتىندەگى سالماعى 20 توننالىق كونتينەردەن بىرەۋىن دالدىكپەن ٴىلىپ الىپ، ٴبىراز بيىككە ورنىقتى كوتەرگەن سوڭ، تومەن ٴتۇسىردى. سىناقتان وتكىزۋ ارەكەتىن وسىلاي ۇزدىكسىز 3 رەت قايتالاعاننان كەيىن، ول كونتينەردى اۋەلگى ورنىنا قويدى.
بۇل ٴار رەتكى اۋىستىرىپ تيەۋدىڭ الدىنداعى قاجەتتى سىناق. سىناق ناتيجەسىندە ماشينانىڭ تەجەۋ قۋاتى ايتارلىقتاي جاقسى، كوتەرىلۋ ـ تومەندەۋى حاۋىپسىز بولسا عانا، رەسمي جۇمىس باستاۋعا بولادى.
ياڭ چياڭلين تەرەزەدەن قيعاش قارسى جاققا كوز جىبەردى. ول جەردە سيگنال قولباسشىسى ۋاڭ دۇڭشان تۇرعان ەدى. ٴدال وسى ساتتە ۋاڭ دۇڭشان قولىنداعى جاسىل جالاۋدى بۇلعاپ، جۇمىس باستاۋ سيگنالىن بەردى.
نۇسقاۋدى تاپسىرىپ العان ياڭ چياڭلين تەمىر تەگەۋرىندى مەڭگەرىپ، سول جاق الدىعا قاراي باياۋ جىلجىتتى. جىلجىتىپ كەڭ رەليستى پويەز ۆاگونىنىڭ ۇستىنە بارعاندا، جاسىل جالاۋ استىعا قاراي قوزعالدى، ياڭ چياڭلين تەمىر تەگەۋرىندى تومەن ٴتۇسىرىپ، ونى كونتينەردىڭ توبەسىندەگى قۇلىپپەن بەكىتىپ، تۇتاستىرۋ قىزمەتىن اياقتاتتى.
جاسىل جالاۋ ۇستىگە قاراي قوزعالدى، ەندى عانا كونتينەردى مىقتاپ ىلگەن تەمىر تەگەۋرىن ەپپەن كوتەرىلدى، ٴبىر سەكۋند، ەكى سەكۋند...كونتينەر قارسى جاقتاعى ولشەمدى رەليستى پويەزدىڭ ۇستىنە جەتكىزىلدى. وسى كەزدە جاسىل جالاۋ تاعى دا استىعا قاراي قوزعالدى، ياڭ چياڭلين تەمىر تەگەۋرىندى تومەنگە ٴتۇسىردى، كونتينەردىڭ توبەسىندەگى قۇلىپ اشىلىپ، اجىراتۋ قىزمەتى اياقتالدى. كونتينەر كەڭ رەليستى پويەزدەن ولشەمدى رەليستى پويەزگە ٴساتتى اۋىستىرىلدى. تۇتاس اۋىستىرىپ تيەۋ بارىسىنا 2 مينۋت ۋاقىت كەتتى.
ياڭ چياڭلين مەن ونىڭ تاعى ەكى قىزمەتتەسى رەليستى كراندارىن ۇزدىكسىز جۇرگىزىپ، تەمىر تەگەۋرىندەردى رەتىمەن كونتينەرلەرگە قاراي سوزدى.
”23 ـ اۋىستىرۋ قامباسى“ اتانعان وسى اۋىستىرىپ تيەۋ قامباسىنىڭ بيىكتىگى 23 مەتر، ۇزىندىعى 800 مەتردەن اسادى، ٴبىر كەزەك جۇڭگو _ ەۆروپا كەزەكشى پويەز جۇگىن ٴبىر رەتتە ٴبۇتىن تۇلعا بويىنشا اۋىستىرىپ تيەۋ قۋاتىنا يە.
”ٴار كۇنى جۇمىسشىلارىمىز وسى ارادا جۇڭگو _ ەۆروپا كەزەكشى پويەزىنە رەليس اۋىستىرادى، ياعني اۋىستىرىپ تيەۋ قىزمەتىن اتقارادى“، ـ دەدى جۇڭگو تەمىر جولى ٴۇرىمجى مەكەمەسى توبى شەكتى سەرىكتەستىگى الاتاۋ ساعاسى ۆوگزالى زات تيەۋ سەحىنىڭ زات تاسىمالداۋشىسى تان لەي تانىستىرىپ.
نەلىكتەن رەليس اۋىستىرۋ كەرەك؟ تان لەي بىلاي دەپ ٴتۇسىندىردى: جۇڭگو تەمىر جولىنا 1435 ميلليمەتر كەڭدىكتەگى ولشەمدى رەليس پايدالانىلعان، ال كورشىلەس قازاقستان قاتارلى مەملەكەتتەرگە 1520 ميلليمەتر كەڭدىكتەگى كەڭ رەليس پايدالانىلعان. ەكى ەل تەمىر جولىنىڭ رەليس كەڭدىگى ۇقسامايتىندىقتان، زاتتى شەكارا اتتاپ تاسىمالداعاندا توتە تاسۋعا كەلمەيدى، ٴسوزسىز، شەكارا وتكەلىندە اۋىستىرىپ تيەۋ قىزمەتىن جۇرگىزۋ كەرەك، ياعني زاتتى مىنا ٴبىر كەڭدىكتە جۇرەتىن رەليستى پويەزدەن ٴتۇسىرىپ الىپ، انا ٴبىر كەڭدىكتە جۇرەتىن رەليستى پويەزگە تيەۋ. بۇل بەينە ەسىكتەن كىرەردە ”اياق كيىم“ اۋىستىرعان ىسپەتتى، وسىلاي ىستەگەندە عانا پويەز تۇرلىشە ەلدەردىڭ رەليستەرىندە ٴساتتى جۇرە الادى.
”شەكارادان شىققان جۇڭگو _ ەۆروپا كەزەكشى پويەزى قازاقستاندا اۋىستىرىلىپ تيەلەدى، شەكارادان كىرەتىن جۇڭگو _ ەۆروپا كەزەكشى پويەزى الاتاۋ ساعاسىندا اۋىستىرىپ تيەلەدى“، ـ دەدى تان لەي. كەزىندە جۇمىسشىلار سىرتتا اۋىستىرىپ تيەۋ قىزمەتىن جۇرگىزەتىن، بوراندى اۋا رايى اۋىستىرىپ تيەۋ ونىمدىلىگى مەن حاۋىپسىزدىگىنە ىقپال جاسايتىن ەدى.
وسى ماسەلەنى ويداعىداي شەشۋ ٴۇشىن، 2008 ـ جىلى الاتاۋ ساعاسى تۇڭعىش تەمىر جول بولمە ٴىشى كونتينەر اۋىستىرىپ تيەۋ قامباسى _ ”23 ـ اۋىستىرۋ قامباسىن“ قۇردى. وسىدان باستاپ ٴبىر جىلدىڭ 365 كۇنىندە، ٴبىر كۇننىڭ 24 ساعاتىندا ۇزدىكسىز اۋىستىرىپ تيەۋ جۇمىسى ورىندالىپ، جىلدىق اۋىستىرىپ تيەۋ قۋاتى 200 مىڭ ولشەمدى كونتينەرگە جەتكىزىلدى.
2024 ـ جىلى تەمىر جول بولمە ٴىشى كونتينەر اۋىستىرىپ تيەۋدىڭ ەكىنشى قامباسى _”22 ـ اۋىستىرۋ قامباسىن“ ٴساتتى قۇردى. ەگەر 3 اسپا كران ٴبىر ۋاقىتتا جۇمىس جۇرگىزسە، ٴبىر پويەزدىڭ (55 كونتينەر) اۋىستىرىپ تيەۋ مىندەتىن ٴبىر ساعات مولشەرىندە ورىنداپ بولۋعا بولادى.
”10 جىلدىڭ الدىندا الاتاۋ ساعاسىنان قاتىنايتىن جۇڭگو _ ەۆروپا كەزەكشى پويەزى اپتاسىنا 10عا جەتپەيتىن، قازىر كۇندىك قاتىناۋ مولشەرى 21گە جەتتى، جەلىسى دە العاشقى 1 دەن 123 كە كەڭەيدى، گەرمانيا، رەسەي، پولشا سياقتى 21 مەملەكەتكە تۇتاستى، تاسىمالداعان زاتتارى كۇندەلىكتى تۇتىنۋ بۇيىمدارى، اعاش ماتەريالدارى سياقتىلار بولىپ، 200 تۇردەن اسادى“، ـ دەدى الاتاۋ ساعاسى ۆوگزالى تەحنولوگيا ٴبولىمىنىڭ ينجەنەرى ۋاڭ كاي.
”وسى ارادا قىزمەت ىستەگەنىمەن 20 جىل بولدى، جۇڭگو _ ەۆروپا كەزەكشى پويەزىنىڭ سانى بارعان سايىن كوبەيىپ كەلەدى، ٴوز قولىمىزدان شىققان زاتتار دۇنيە جۇزىنە بەت الدى، بۇل قىزمەت ىستەۋگە تاتيدى ەكەن!“، ـ دەدى تان لەي ماقتانىشپەن.
