جۇڭگو كوممۋنيستىك پارتياسى ورتالىق كوميتەتى، مەملەكەتتىك كەڭەس كوكتەم مەرەكەسىن توپتىق قۇتتىقتاۋ ٴماجىلىسىن وتكىزدى

جۇڭگو كوممۋنيستىك پارتياسى ورتالىق كوميتەتى، مەملەكەتتىك كەڭەس كوكتەم مەرەكەسىن توپتىق قۇتتىقتاۋ ٴماجىلىسىن وتكىزدى

شي جينپيڭ ٴسوز سويلەدى

پارتيا ورتالىق كوميتەتى مەن مەملەكەتتىك كەڭەس اتىنان بۇكىل ەلدەگى ٴار ۇلت حالقىنىڭ، شياڭگاڭ ەرەكشە اكىمشىلىك رايونىنداعى باۋىرلاستاردىڭ، اۋمىن ەرەكشە اكىمشىلىك رايونىنداعى باۋىرلاستاردىڭ، تايۋاندىق باۋىرلاستاردىڭ جانە شەتەلدەگى چياۋمين باۋىرلاستاردىڭ مەرەكەسىن قۇتتىقتادى

لي چياڭ باسقاردى، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ قاتىناستى

　　1 - ايدىڭ 27 - كۇنى جۇڭگو كوممۋنيستىك پارتياسى ورتالىق كوميتەتى، مەملەكەتتىك كەڭەس بەيجيڭ حالىق سارايىندا 2025 - جىلعى كوكتەم مەرەكەسىن توپتىق قۇتتىقتاۋ ءماجىلىسىن وتكىزدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ ءسوز سويلەدى.

□ سۋرەتتى شينحۋا اگەنتتىگىنىڭ ءتىلشىسى ۋاڭ يە تۇسىرگەن

　　1 - ايدىڭ 27 - كۇنى جۇڭگو كوممۋنيستىك پارتياسى ورتالىق كوميتەتى، مەملەكەتتىك كەڭەس بەيجيڭ حالىق سارايىندا 2025 - جىلعى كوكتەم مەرەكەسىن توپتىق قۇتتىقتاۋ ءماجىلىسىن وتكىزدى. پارتيا مەن مەملەكەت باسشىلارىنان شي جينپيڭ، لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ قاتارلىلار استاناداعى ءار سالا قايراتكەرلەرمەن ءبىر ارادا شاتتانا باس قوسىپ، مەرەيلى مەرەكەنى بىرگە قارسى الدى.

□ سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

　　شينحۋا اگەنتتىگىنىڭ 1 ـ ايدىڭ 27 ـ كۇنى بەيجيڭنەن بەرگەن حابارى. جۇڭگو كوممۋنيستىك پارتياسى ورتالىق كوميتەتى، مەملەكەتتىك كەڭەس 1 ـ ايدىڭ 27 ـ كۇنى تۇستەن بۇرىن حالىق سارايىندا 2025 ـ جىلعى كوكتەم مەرەكەسىن توپتىق قۇتتىقتاۋ ٴماجىلىسىن وتكىزدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ٴتوراعاسى، ورتالىق اسكەري ىستەر كوميتەتىنىڭ ٴتوراعاسى شي جينپيڭ ٴسوز سويلەپ، پارتيا ورتالىق كوميتەتى مەن مەملەكەتتىك كەڭەس اتىنان بۇكىل ەلدەگى ٴار ۇلت حالقىنىڭ، شياڭگاڭ ەرەكشە اكىمشىلىك رايونىنداعى باۋىرلاستاردىڭ، اۋمىن ەرەكشە اكىمشىلىك رايونىنداعى باۋىرلاستاردىڭ، تايۋاندىق باۋىرلاستاردىڭ جانە شەتەلدەگى چياۋمين باۋىرلاستاردىڭ مەرەكەسىن قۇتتىقتادى.

　　شي جينپيڭ بىلاي دەپ باسا دارىپتەدى: اياقتاۋ الدىندا تۇرعان جياچىن ۇلۋ (ايداعار) جىلى ٴبىز ارعىماق ايداعار رۋحىن سەرپىلتىپ، بوران ـ شاشىندى جانە ارايلى كۇندەردى باستان وتكەرگەن ٴبىر جىل بولدى. ٴبىر جىلدان بەرى كۇردەلى دە قاتاڭ جاعداي الدىندا ٴبىز وزگەرىسكە بايىپتىلىقپەن توتەپ بەرىپ، كەشەندى شارا اتقارىپ، قامال الىپ قيىندىقتى جەڭىپ، قايراتتانا ەكپىندەي ىلگەرىلەپ، جۇڭگو ۇلگىسىندەگى وسىزامانداندىرۋدا تىڭ دا نىق قادام تاستادىق.

　　لي چياڭ توپتىق قۇتتىقتاۋ ٴماجىلىسىن باسقاردى، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ قاتارلىلار قاتىناستى.

　　حالىق سارايىنىڭ قوناعاسى زالىندا شامدار جايناپ، قۋانىش لەبى ەستى، ٴار سالا قايراتكەرلەرىنەن 2000نان استام ادام ٴبىر ارادا شاتتانا باس قوسىپ، مەرەيلى مەرەكەنى بىرگە قارسى الدى، زال ٴىشى شاتتىققا، بەرەكەگە تولى مەرەكەلىك بەينەگە ەندى.

　　تۇستەن بۇرىن ساعات 10 مولشەرىندە شات مەرەيلى مۋزيكا ٴۇنى ىشىندە شي جينپيڭ قاتارلى پارتيا مەن مەملەكەت باسشىلارى زالعا كىرىپ، كوپشىلىككە ىقىلاسپەن قۇرمەت ٴبىلدىردى، كوپشىلىكپەن ٴوزارا امانداستى، كوكتەم مەرەكەسى بايلانىسىمەن باقىت تىلەدى، بۇكىل زالدان قىزۋ شاپالاق ٴۇنى كوتەرىلدى.

　　شي جينپيڭ سوزىندە بىلاي دەپ اتاپ كورسەتتى: وتكەن ٴبىر جىلدا ٴبىز جوعارى ساپالى دامۋدى تىڭعىلىقتى ىلگەرىلەتىپ، ٴتۇرلى قولدا بار ساياساتتاردى ٴونىمدى تياناقتاندىرىپ، ٴبىر قىدىرۋ تىڭنان ارتتىرىلعان ساياساتتاردى كۇش سالا شىعارىپ، ەكونوميكانىڭ قايتا ورلەۋىن، جاقسارۋىن جەبەدىك. عىلىم ـ تەحنولوگيادا جاڭالىق اشۋ جانە كاسىپ سالاسىندا جاڭالىق اشۋ جەتىستىگى قوماقتى بولدى، جاڭاشا وندىرگىش كۇشتەر نىق قاداممەن دامىدى. وڭىرلەردىڭ سايكەستى دامۋى، قالا مەن اۋىلدىڭ توعىسا دامۋى جاڭا كەلبەتىن ايگىلەدى. بۇكىل الەمگە كوز جىبەرسەك، ەلىمىز ٴالى دە دۇنيە ٴجۇزى ەكونوميكاسىنىڭ ارتۋىنداعى ماڭىزدى قوزعالتقىش. ٴبىز ٴتۇرلى ىستەردىڭ سايكەسە قاتار ىلگەرىلەۋىنە باسا ٴمان بەرىپ، سوتسياليستىك دەموكراتيالىق زاڭمەن باسقارۋ قۇرىلىسىنىڭ، مادەنيەت قۇرىلىسىنىڭ، قوعامدىق قۇرىلىستىڭ، ەكولوگيالىق وركەنيەت قۇرىلىسىنىڭ، مەملەكەت قورعانىسى مەن ارميا قۇرىلىسىنىڭ بارىندە تىڭ ىلگەرىلەۋشىلىككە قول جەتكىزدىك. جاڭا جۇڭگو قۇرىلعاندىعىنىڭ 75 جىلدىعىن سالتاناتپەن قۇتتىقتادىق. پارتيا 20 ـ كەزەكتى ورتالىق كوميتەتىنىڭ ٴۇشىنشى جالپى ٴماجىلىسىن اشىپ، رەفورمانى ونان ارى جاپپاي تەرەڭدەتۋدى ىلگەرىلەتتىك. حالىق تۇرمىسىن كۇش سالا قامتاماسىز ەتتىك جانە جاقسارتتىق، جۇمىستاندىرۋ، زات باعاسى تۇراقتىلىقتى ساقتادى، كەدەيلىكتەن ارىلتۋدان قامال الۋ جەتىستىگى ونان ارى بەكەمدەلدى، كەڭەيتىلدى. دامۋ مەن حاۋىپسىزدىكتى ٴبىر تۇتاس جوسپارلاپ، ٴتۇيىندى سالالارداعى حاۋىپ ـ قاتەرلەردى ٴتارتىپتى، ٴونىمدى جويدىق، قوعامدىق كەلەلى جاعداي ورنىقتىلىقتى ساقتادى. ەلەۋلى جاراتىلىستىق اپاتتارعا پارمەندى توتەپ بەرىپ، شيزاڭنىڭ ديڭرىسىنداعى ٴۇستىرت، سۋىق، وتتەگى تاپشى وڭىردە جەر سىلكىنىسىنە قارسى اتتانىپ اپاتتان قۇتقارۋدى جوعارى ٴونىمدى ورىستەتتىك. شياڭگاڭ، اۋمىن، تايۋان قىزمەتىن ۇزدىكسىز جاقسى ىستەپ، اۋمىننىڭ وتان قۇشاعىنا ورالعاندىعىنىڭ 25 جىلدىعىن سالتاناتپەن قۇتتىقتادىق. ەلىمىزدىڭ دەنە تاربيە ساڭلاقتارى پاريج وليمپيادا سپورت جارىسىندا شەكارا سىرتىندا قاتىناسقان جارىستارىنداعى ەڭ تاماشا ناتيجەگە قول جەتكىزىپ، ەل ٴىشى ـ سىرتىنداعى جۇڭحۋا پەرزەنتتەرىن ماقتانىش سەزىمىنە بولەدى. ٴبىز جۇڭگوشا ٴىرى ەل ديپلوماتياسىن ىشكەرىلەي ىلگەرىلەتىپ، الەمدىك باسقارۋ جۇيەسى وزگەرىسىن بەلسەنە ىلگەرىلەتىپ، ”جەر شارىنىڭ وڭتۇستىگىنىڭ“ ىنتىماعىن، سەلبەستىگىن تەرەڭدەتىپ، ”ٴبىر بەلدەۋ، ٴبىر جولدى“ جوعارى ساپالى بىرگە قۇرۋدىڭ تەرەڭدەۋىن، ناقتىلانۋىن ىلگەرىلەتىپ، دۇنيە ٴجۇزىنىڭ بەيبىتشىلىگىن، ورنىقتىلىعىن قورعاۋعا، ادامزاتتىڭ دامۋىن، العا باسۋىن جەبەۋگە اناعۇرلىم كوپ وڭ ەنەرگيا ۇستەدىك. ٴبىز پارتيانى جاپپاي قاتاڭ باسقارۋدى بۇلجىماي ىلگەرىلەتىپ، پارتيا ٴتارتىبىن ۇيرەنۋ تاربيەسىن تىڭعىلىقتى ورىستەتىپ، شىرىكتەسۋگە قارسى تۇرۋ سەرپىنىن ۇزدىكسىز ارتتىردىق، پارتيانىڭ باسشىلىعى باتىل دا پارمەندى بولىپ، پارتيا ستيلى، ۇكىمەت ستيلى ٴۇرتىس جاقسارىپ، ٴتۇرلى ىستەردىڭ دامۋىنا ٴتۇبىرلى كەپىلدىك ازىرلەدى.

　　شي جينپيڭ بىلاي دەپ باسا دارىپتەدى: ٴبىر جىلدان بەرگى دامۋ بارىسى وتە ەرەكشە بولدى، ناتيجە ادامدى جەلپىندىرەدى. ٴبىز ايانباي كۇرەس جۇرگىزۋ ارقىلى ٴارقانداي ماشاقات، قيىندىق، قاتەر، كەدەرگىنىڭ بارلىعى جۇڭگو حالقىنىڭ تاماشا تۇرمىسقا تالپىنۋداعى العا باسۋ قادامىن بوگەي المايتىندىعىن، بارلىعى ٴبىزدىڭ مەملەكەتتى قۇدىرەتتەندىرۋ قۇرىلىسىن، ۇلتتى گۇلدەندىرۋدى ىلگەرىلەتۋدەگى تاريحي ٴۇردىسىمىزدى بوگەي المايتىندىعىن تاعى ٴبىر رەت دالەلدەدىك. تەك مۇرات ـ سەنىمدى بەكەمدەۋدەن اۋىتقىماساق، قايشىلىققا، ماسەلەگە تىكە قاراۋدان تايساقتاماساق، حاۋىپ ـ قاتەرگە، سىن ـ سايىسقا توتەپ بەرۋدەن يمەنبەسەك عانا، ٴسوز جوق، رەفورمانىڭ، دامۋدىڭ تىڭ ٴورىسىن اشا الامىز.

　　شي جينپيڭ بىلاي دەپ اتاپ كورسەتتى: 2025 ـ جىل ” 14 ـ بەسجىلدىق“ جوبا اياقتالاتىن جىل. جاڭا داۋىردەگى جۇڭگوشا سوتسياليزم يدەياسىن جەتەكشى ەتۋگە تاباندى بولىپ، پارتيا 20 ـ قۇرىلتايىنىڭ جانە 20 ـ كەزەكتى ورتالىق كوميتەت ەكىنشى، ٴۇشىنشى جالپى ماجىلىستەرىنىڭ رۋحىن جاپپاي دايەكتىلەندىرىپ، ورنىقتىلىق بارىسىندا ىلگەرىلەۋ قىزمەت جالپى ارناسىنان جازباي، دامۋدىڭ تابان تىرەر تياناعىن جوعارى ساپالى دامۋعا قويۋعا تاباندى بولىپ، جاڭا دامۋ ۇستانىمىن تولىق، دالمە ـ ٴدال، جاپپاي دايەكتىلەندىرىپ، جاڭا دامۋ ارناسىن جەدەل قالىپتاستىرىپ، رەفورمانى ونان ارى جاپپاي تەرەڭدەتىپ، جوعارى دەڭگەيلى سىرتقا ەسىك اشۋدى كەڭەيتىپ، ٴتۇيىندى سالالارداعى حاۋىپ ـ قاتەرلەردەن جانە سىرتقى سوققىدان ساقتانىپ جانە ونى جويىپ، ەكونوميكانىڭ ٴۇرتىس قايتا ورلەۋىن، جاقسارۋىن ىلگەرىلەتىپ، قوعامنىڭ جاراسىمدىلىعىن، ورنىقتىلىعىن ساقتاپ، پارتيانى جاپپاي قاتاڭ باسقارۋدى ىشكەرىلەي ىلگەرىلەتۋىمىز كەرەك. ٴبىز ” 15 ـ بەسجىلدىق“ جوبا ۇسىنىسىن جاساپ، ماكرولىق نىساناعا قاراي ٴۇرتىس ەكپىندەي ىلگەرىلەيمىز.

　　شي جينپيڭ بىلاي دەپ باسا دارىپتەدى: حالىقتى وزەك ەتۋگە باستان ـ اياق تاباندى بولىپ، بۇقارانىڭ سۇرانىسى مەن ٴجىتى قاداعالاپ وتىرعان ىستەرىنە دەر كەزىندە ٴونىمدى جاۋاپ قايتارىپ، حالىق تۇرمىسىنداعى ناقتى ىستەردى دەن قويا، سۇيىسپەنشىلىكپەن ويداعىداي ىستەپ، حالىقتىڭ تۇرمىس دەڭگەيىن ۇزدىكسىز جوعارىلاتىپ، وسىزامانداندىرۋ قۇرىلىسى جەتىستىگىنەن جالپى حالىقتى اناعۇرلىم كوپ، اناعۇرلىم ٴادىل يگىلىكتەندىرۋىمىز كەرەك.

　　شي جينپيڭ بىلاي دەپ اتاپ كورسەتتى: جۇڭحۋا مادەنيەتىندە جىلان زەيىندىلىكتىڭ، اقىل ـ پاراساتتىڭ جانە ومىرشەڭدىكتىڭ سيمۆولى، مول ٴونىم، ىزگىلىك، قۇت ـ ىرىس ماعىناسىن بەرەدى. ي ـ سى جىلان جىلىندا بۇكىل ەلدەگى ٴار ۇلت حالقىنىڭ جىلاننىڭ مىڭ شاقىرىم جول باساتىن جىگەرىمەن سەنىمدى بەكەمدەپ، كوكىرەك تولى ۇمىتپەن ٴورىس اشا العا ىلگەرىلەپ، قايسارلىقپەن كۇرەس جۇرگىزىپ، جۇڭگو ۇلگىسىندەگى وسىزامانداندىرۋدىڭ جاڭا تاراۋىن بىرگە جازۋىن ٴۇمىت ەتەمىن.

　　توپتىق قۇتتىقتاۋ ماجىلىسىندە ادەبيەت ـ كوركەمونەر قىزمەتكەرلەرى تارتىمدى كونسەرت نومىرلەرىن قويدى.

　　جۇڭگو كوممۋنيستىك پارتياسى ورتالىق كوميتەتىندەگى، مەملەكەتتىك حالىق قۇرىلتايى تۇراقتى كوميتەتىندەگى، مەملەكەتتىك كەڭەستەگى، ەڭ جوعارى حالىق سوتى مەكەمەسىندەگى، ەڭ جوعارى حالىق پروكۋراتۋراسىنداعى، مەملەكەتتىك ساياسي كەڭەستەگى، ورتالىق اسكەري ىستەر كوميتەتىندەگى باسشى جولداستار جانە ساقا جولداستار توپتىق قۇتتىقتاۋ ماجىلىسىنە قاتىناستى.

　　توپتىق قۇتتىقتاۋ ماجىلىسىنە ورتالىقتاعى پارتيا، ۇكىمەت، ارميا تاراۋلارىنداعى، بۇقارالىق تاراۋلارداعى جانە بەيجيڭ قالاسىنداعى جاۋاپتى جولداستار، ٴارقايسى دەموكراتيالىق پارتيا ـ توپتاردىڭ ورتالىق كوميتەتتەرىنىڭ، مەملەكەتتىك ساۋدا ـ ونەركاسىپشىلەر بىرلەستىگىنىڭ جاۋاپتىلارى جانە پارتيادا، توپتا جوق قايراتكەرلەردىڭ ۋاكىلدەرى، دەمالىسقا، پەنسياعا شىققان ساقا جولداستاردىڭ ۋاكىلدەرى، ايگىلى مامانداردىڭ، وقىمىستىلاردىڭ جانە استانانىڭ ٴار سالاسىنداعى قايراتكەرلەردىڭ ۋاكىلدەرى دە قاتىناستى.