شينجياڭ حالىقارالىق ۇلكەن بازارى
انساي بەل بارابانى كوكتەم مەرەكەسىنىڭ مەرەيىن اسىردى
انار بۇلت \ شينجياڭ گازەتىنىڭ ٴتىلشىسى سو رۇڭجى
بيىلعى كوكتەم مەرەكەسى تۇڭعىش رەتكى دۇنيە جۇزىلىك ”بەيزاتتىق مادەنيەت مۇرالارى“ ۇلگىسىندەگى كوكتەم مەرەكەسى، ي ـ سى جىلان جىلىنىڭ مەرەكە لەبى ايرىقشا قويۋ بولدى. 1 ـ ايدىڭ 30 ـ كۇنى، كوكتەم مەرەكەسىنىڭ 2 ـ كۇنى تۇستەن بۇرىن شينجياڭ حالىقارالىق ۇلكەن بازارى دىر ـ دۋمانعا بولەندى. كوز قىدىرتا قاراساڭىز، بارلىق جەر ٴتۇستى تورعىندارمەن اشەكەيلەنىپ، ۇلكەن قىزىل تۇمشالامالى شامدار بيىك ٴىلىنىپ، وزگەشە ەرەكشەلىككە يە قۇرىلىستارمەن ٴبىرىن ـ ٴبىرى اجارلاندىرىپ، بار الاپتان شات ـ شادىمان، بەرەكەلى مەرەكە لەبى ەستى.
ساعات 12دە ويناقى دا جالىندى مۋزيكا ٴۇنى كوتەرىلىپ، ”ۇلكەن بازاردا كوكتەم مەرەكەسىن قۇتتىقتاۋ“ جەلىلەس قيمىلى باستالدى. جايناعان ۇلتتىق كيىمدەر كيگەن بيشىلەر قۇلپىرعان بايشەشەكتەي ٴاپ ـ ساتتە ۇلكەن بازاردى ساندەندىرىپ جىبەردى. ۇيعۇر ۇلتىنىڭ مىڭ بۇرالعان ۇلتتىق بيىنە باسقان بيشىلەر شىر كوبەلەك اينالعاندا، كويلەكتەرىنىڭ ەتەكتەرى جەلمەن جەلبىرەپ، جانارلارى جايناپ، وتتاي جالىندادى؛ قازاق ۇلتىنىڭ جايساڭ دا جايدارى ۇلتتىق بيىنە باسقان بيشىلەر ويناقى ارەكەتتەرىمەن جايلاۋ ۇلاندارىنىڭ اسىل ارمانعا تولى ماقتانىش سەزىمىن ايگىلەدى؛ موڭعۇل ۇلتىنىڭ قايراتتى دا تىنىستى ۇلتتىق بيىنە باسقان بيشىلەر بىردە وجەت، بىردە نازدى ارەكەتتەرىمەن تۇرمىسقا دەگەن سۇيىسپەنشىلىكتەرى مەن ارماندارىن جەتكىزدى... ٴار ۇلت بيشىلەرى ورەلى ونەرلەرىمەن جانە تاسقىنداعان قىزۋ سۇيىسپەنشىلىكتەرىمەن كورەرمەندەردىڭ كوز مەيىرىن جانە قۇلاق قۇرىشىن قاندىرعان سالتانات ۇسىنىپ، دۋ قول شاپالاققا جانە القاۋعا بولەندى.
قالا تۇرعىندارى مەن ساياحاتشىلار شينجياڭنىڭ ۇلتتار ٴبيىنىڭ باۋرامدىلىعىنا ٴتانتى بولىپ تۇرعاندا، كوكتەم ناجاعايىنداي دۋ قول شاپالاق ٴۇنى كوتەرىلدى، دۋ قول شاپالاق ٴۇنى كوتەرىلگەن جاققا كوز جىبەرگەندە، باستارىنا اق ورامال بايلاپ، بەلدەرىنە قىزىل بەل بارابانىن اسىپ، كۇركىرەگەن بارابان ۇنىندە ٴوزىن ۇمىتا بيگە باسقان ٴبىر توپ بارابانشىلار ارىندى قادامدارىمەن قالىڭ سايگۇلىك قۇيعىتقان ايبىندى بەينە قالىپتاستىرىپ، الاڭ رايىن جوعارى ورلەۋگە كوتەردى. قاۋمالاي تاماشالاعاندار قول تەلەفوندارىن الىپ شىعىپ، وسى تاماشا ٴساتتى ەستەلىككە الدى، بۇكىل ۇلكەن بازار شاتتىق تەڭىزىنە شومدى.
ادامداردىڭ اراسىندا ۋشيلىك ساياحاتشى نيڭ شياۋشياۋ قول تەلەفونىن بيىك ۇستاپ بۇكىل بارىستى ەستەلىككە الدى، ول بىلاي دەدى: ويىن نومىرلەرى مەنى قاتتى تاڭ قالدىردى، وسى بەينەجازبالار ارقىلى الىستاعى تۋىس ـ تۋعان، دوس ـ جاراندارىمنىڭ دا كورۋ مەن ەستۋ سالتاناتىن سەزىنۋىن ٴۇمىت ەتەمىن.
”وتە تاماشا! ويىندى كورىپ كوڭىلىم كولدەي تولقىپ، ەرىكسىز ىلەسىپ بيگە باستىم. شينجياڭنان دا انساي بەل بارابانىن كورەتىنىمدى ويلاماعان ەكەنمىن “. لانجوۋدان ۇرىمجىدەگى تۋىسىنىڭ ۇيىنە كوكتەم مەرەكەسىن وتكىزۋگە كەلگەن دۋان مىرزا 2 بالاسىنا ٴتۇسىندىرىپ جاتتى. ول بىلاي دەدى: انساي بەل بارابانىنىڭ تاريحى ۇزاق، 2006 ـ جىلى 1 ـ توپتاعى مەملەكەت دارەجەلى بەيزاتتىق مادەنيەت مۇرالارى تىزىمدىگىنە ەنگىزىلگەن.
كورەرمەندەردىڭ ىقىلاسى ارتقان سايىن، بيشىلەر جىگەرلەنە بيگە باستى. ۇلكەن بازارداعى جاياۋلار كوشەسىن بويلاپ، بيشىلەر بيلەپ العا جىلجىدى. كورەرمەندەر ارتيستەرگە ىلەسىپ بيگە باستى. سانگىگى انساي بەل بارابانى ونەر ۇجىمىنىڭ باستىعى ۋاڭ شىحۋ بىلاي دەدى: وسىدان ىلگەرى ٴبىز التاي، قاشقار سياقتى جەرلەرگە بارىپ كوپ رەت ويىن قويدىق، وسى رەت ٴبىزدىڭ تۇڭعىش رەت شينجياڭ حالىقارالىق ۇلكەن بازارىندا ويىن قويۋىمىز.
سانگىگى انساي بەل بارابانى ونەر ۇجىمىندا 13 جاستان 70جاسقا دەيىن 30 ارتيست بار. ”بەيزاتتىق مادەنيەت مۇرالارىنا ٴوتىنىش بەرۋ ٴساتتى بولعاننان كەيىنگى تۇڭعىش رەتكى كوكتەم مەرەكەسىندە ٴبىزدىڭ انساي بەل بارابانىن شينجياڭعا اكەلىپ، وسى اراداعى كوپ نەگىزدى مادەنيەتپەن توعىستىرۋىمىز تاپتىرماس وراي بولدى“. ۋاڭ شىحۋ بىلاي دەدى: بەيزاتتىق مادەنيەت مۇراسىنىڭ ٴتىلسىم باۋراۋ كۇشىنە تولى وسى كوكتەم مەرەكەسىندە شينجياڭ حالىقارالىق ۇلكەن بازارى مادەنيەت اۋىس ـ كۇيىسىنىڭ ۇلكەن ساحناسىنا اينالىپ، ادامدارعا جۇڭحۋانىڭ تاڭداۋلى ٴداستۇرلى مادەنيەتىنىڭ تەرەڭ استارىن سەزىندىردى.
(حابارلارعا قوسىپ بەرىلگەن تىلشىلەردىڭ باس سۋرەتى AI ارقىلى شارجعا اينالدىرىلعان)
