شينحۋا اگەنتتىگىنىڭ 2 ـ ايدىڭ 3 ـ كۇنى بەيجيڭنەن بەرگەن حابارى. 2 ـ ايدىڭ 3 ـ كۇنى جۇڭگو كوممۋنيستىك پارتياسى ورتالىق كوميتەتى ۆيەتنام كوممۋنيستىك پارتياسى ورتالىق كوميتەتىنە تەلەگرامما جولداپ، ۆيەتنام كوممۋنيستىك پارتياسى قۇرىلعاندىعىنىڭ 95 جىلدىعىن قۇتتىقتادى. قۇتتىقتاۋ تەلەگرامماسىندا بىلاي دەلىندى:
95 جىلدان بەرى، ۆيەتنام كوممۋنيستىك پارتياسى ۆيەتنام حالقىن ىنتىماقتاستىرىپ جانە باستاپ، مەملەكەت تۇتاستىعى مەن ۇلت ازاتتىعىن جەڭىسپەن جۇزەگە اسىرىپ، سوتسياليستىك قۇرىلىس پەن جاڭارتۋ ىستەرىندە كۇللى جۇرتتى جالت قاراتقان شۇعىلالى تابىستارعا قول جەتكىزدى. اسىرەسە، ۆيەتنام كوممۋنيستىك پارتياسىنىڭ 13 ـ قۇرىلتايىنان بەرى، ۆيەتنام كوممۋنيستىك پارتياسى پارتيا قۇرىلىسى مەن رەتتەۋدى كۇش سالا كۇشەيتتى، ۆيەتنامنىڭ ساياسيى ورنىقتى، قوعامى تىنىش بولدى، ەكونوميكاسى قارىشتاپ پارمەندى دامىدى، حالىقارالىق ورنى كۇن سايىن جوعارىلادى. كەزەكتە ۆيەتنام پارتياسى مەن حالقى باس شۋجي سۋليننىڭ جەتەكشىلىگىندەگى ۆيەتنام كوممۋنيستىك پارتياسى ورتالىق كوميتەتىنىڭ پارمەندى باسشىلىعىندا، ۆيەتنام كوممۋنيستىك پارتياسىنىڭ 13 ـ قۇرىلتايىندا العا قويىلعان ٴتۇرلى نىسانا مەن مىندەتتەردى قۇلشىنا جۇزەگە اسىرىپ، پارتيا قۇرىلعاندىعىنىڭ، مەملەكەت قۇرىلعاندىعىنىڭ 100 جىلدىق كۇرەس نىساناسىنا قاراي ۇزدىكسىز ارشىندى قادام تاستاپ، ۆيەتنام كوممۋنيستىك پارتياسىنىڭ 14 ـ قۇرىلتايىن جەڭىسپەن اشۋدى قارسى الۋدا. ٴبىز سىزدەردىڭ نىسانانى، ٴسوز جوق، ورىندايتىندىقتارىڭىزعا سەنەمىز!
جۇڭگو كوممۋنيستىك پارتياسىنىڭ ۆيەتنام كوممۋنيستىك پارتياسىمەن توڭكەرىستىك دوستىعىنىڭ جانە دوستىق سەلبەستىك قارىم ـ قاتىناسىنىڭ تاريحى ۇزاق. ٴتوراعا ماۋ زىدۇڭ مەن ٴتوراعا حۋ جىميڭ قاتارلى اعا بۋىن باسشىلاردىڭ ٴوز قولدارىمەن ورناتۋىنىڭ جانە دەن قويا جەتىلدىرۋىنىڭ ارقاسىندا، ەكى ەل حالقى توڭكەرىستىك كۇرەس بارىسىندا ٴوزارا قولداۋ كورسەتىپ، سوتسياليستىك قۇرىلىس بارىسىندا ٴبىر جاعادان باس، ٴبىر جەڭنەن قول شىعارىپ، رەفورما جاساۋ، ەسىك اشۋ جانە جاڭارتۋ ىستەرىندە قايراتتانا العا ىلگەرىلەپ، سوتسياليستىك وسىزامانداندىرۋ جورىعىندا بىرگە قادام تاستاۋدا. جۇڭگو كوممۋنيستىك پارتياسى جۇڭگو مەن ۆيەتنام ەكى پارتيا، ەكى ەل قارىم ـ قاتىناسىن دامىتۋعا باستان ـ اياق ستراتەگيالىق بيىكتەن جانە ۇزاق بولاشاقتىق تۇرعىدان باسا ٴمان بەرەدى، ۆيەتنام كوممۋنيستىك پارتياسىمەن بىرگە ەكى پارتيانىڭ ەڭ جوعارى باسشىلارى كەلىسكەن ماڭىزدى ورتاق تانىمدى ويداعىداي تياناقتاندىرىپ، ”16 ارىپتىك“ باعىتتى جانە ”ٴتورت جاقسى بولۋ“ رۋحىن ۇستانىپ، ”التى اناعۇرلىم“ جالپى تۇلعالىق نىساناسى بويىنشا، جوعارى جىكتەگىلەردىڭ بارىس ـ كەلىسىن جيىلەتىپ، ستراتەگيالىق تىلدەسۋدى كۇشەيتىپ، ٴداستۇرلى دوستىقتى بەكەمدەپ، ٴار سالاداعى اۋىس ـ كۇيىستى، سەلبەستىكتى كەڭەيتىپ، پارتيانى باسقارۋ، ەل باسقارۋ نازارياسى مەن تاجىريبەسى اۋىس ـ كۇيىسىن، ٴوزارا ۇلگى الۋدى تەرەڭدەتىپ، ٴوز ەلىنىڭ مەملەكەت جاعدايىنا ۇيلەسەتىن سوتسياليستىك دامۋ جولىن بىرگە قاراستىرىپ، جۇڭگو _ ۆيەتنام تاعدىرلاس ورتاق تۇلعاسى قۇرىلىسىنىڭ تەرەڭدەۋىن، ناقتىلانۋىن ىلگەرىلەتىپ، ەكى ەل حالقىنا اناعۇرلىم مول قۇت ـ ىرىس اكەلىپ، ادامزاتتىڭ بەيبىتشىلىگى مەن العا باسۋ ىستەرىنە اناعۇرلىم زور ۇلەس قوسۋدى قالايدى.
