2 ـ ايدىڭ 6 ـ كۇنى تۇستەن بۇرىن مەملەكەت ٴتوراعاسى شي جينپيڭ بەيجيڭ حالىق سارايىندا جۇڭگوعا مەملەكەتتىك ساپارمەن كەلگەن برۋنەي سۇلتانى حاسانالمەن كەڭەس وتكىزدى. سۋرەتتە: شي جينپيڭ حاسانالمەن قول الىسۋدا.
□ سۋرەتتى شينحۋا اگەنتتىگىنىڭ ٴتىلشىسى حۋاڭ جيڭۋىن تۇسىرگەن
شينحۋا اگەنتتىگىنىڭ 2 ـ ايدىڭ 6 ـ كۇنى بەيجيڭنەن بەرگەن حابارى (تىلشىلەر شاۋ يبو، دۇڭ شۋە). 2 ـ ايدىڭ 6 ـ كۇنى تۇستەن بۇرىن مەملەكەت ٴتوراعاسى شي جينپيڭ بەيجيڭ حالىق سارايىندا جۇڭگوعا مەملەكەتتىك ساپارمەن كەلگەن برۋنەي سۇلتانى حاسانالمەن كەڭەس وتكىزدى.
شي جينپيڭ بىلاي دەپ اتاپ كورسەتتى: جۇڭگو مەن برۋنەيدىڭ ٴداستۇرلى دوستىعى ارىدان باستاۋ الادى. ديپلوماتيالىق قارىم ـ قاتىناس ورناتقان 30 نەشە جىلدان بەرى، ەكى جاق ساياسي ٴوزارا سەنىمدىلىكتى ۇزدىكسىز تەرەڭدەتىپ، دامۋ ستراتەگياسىن بەلسەنە ٴتۇيىلىستىرىپ، ٴار سالاداعى ناقتى ىستەر سەلبەستىگىندە سۇبەلى تابىستارعا قول جەتكىزىپ، حالىقارا جانە ٴوڭىر ىستەرىندە تاماشا سايكەسۋدى ساقتاپ، ٴىرى، شاعىن ەلدەردىڭ تەڭ تۇرعىدا مامىلە جاساۋىنىڭ، ٴوزارا پايدا جەتكىزىپ تەڭ يگىلىككە كەنەلۋىنىڭ ۇلگىسىن ورناتتى، سونداي ـ اق ٴوڭىردىڭ بەيبىتشىلىگىنە، ورنىقتىلىعىنا جانە دامۋىنا، گۇلدەنۋىنە بەلسەنە ۇلەس قوستى. جۇڭگو مەن برۋنەيدىڭ تاعدىرلاس ورتاق تۇلعانى بىرگە قۇرۋى ٴداۋىردىڭ دامۋ ۇلكەن اۋقىمىنا سايكەسكەن، ەكى ەلدىڭ جانە ەكى ەل حالقىنىڭ ٴتۇبىرلى مۇددەسىنە ۇيلەسىپ، ەكى ەل قارىم ـ قاتىناسىنىڭ شىت جاڭا پاراعىن اشتى. ەكى جاق قولايلى ساتتەن پايدالانىپ العا ۇمتىلىپ، ٴوزارا پايدا جەتكىزۋ سەلبەستىگى مەن ستراتەگيالىق سايكەستىكتى تەرەڭدەتىپ، ٴوزارا قۇرمەت ەتىپ، بۇكپەسىز بولىپ، ٴوزارا سەنىم ارتىپ، ارالارىن تەڭىز ٴبولىپ جاتقان ماڭگىلىك جاقسى كورشى، ٴبىر ـ بىرىنە سەنىم ارتقان جاقسى دوس، بىرگە داميتىن جاقسى سەرىك بولۋى كەرەك.
شي جينپيڭ بىلاي دەپ باسا دارىپتەدى: جۇڭگو جاق برۋنەي جاقپەن بىرگە مەملەكەت دامۋى جولىندا قول ۇستاسا العا باسىپ، ەكى ەل حالقىنا اناعۇرلىم مول قۇت ـ ىرىس اكەلۋدى قالايدى. ەكى جاق ”ٴبىر بەلدەۋ، ٴبىر جولدى“ بىرگە قۇرۋ باستاماسىن برۋنەيدىڭ ”2035 جىل ۇلى ارمان“ ستراتەگياسىمەن ٴتۇيىلىستىرۋدى كۇشەيتىپ، گۋاڭشي _ برۋنەي ەكونوميكالىق ٴدالىزى، حىڭي مۇناي حيميا ونەركاسىبى سىندى 2 باستاماشى نىساندى ىلگەرىلەتىپ، جۇڭگو _ شىعىس وڭتۇستىك ازيا ەلدەرى وداعى شىعىس بولىك ارتۋ ٴوڭىرى مەن ”قۇرلىق ـ تەڭىز جاڭا ارناسى“ سىندى قوس توراپتى قالىپتاستىرۋى كەرەك. جۇڭگو جاق اناعۇرلىم كوپ كاسىپورىندى برۋنەيگە بارىپ قارجى قوسىپ، شارۋاشىلىقتى گۇلدەندىرۋگە شابىتتاندىرىپ، برۋنەيدىڭ سيفرلى ەكونوميكا، جاساندى زەردە، جاڭا ەنەرگيا كاسىپ سالاسىن دامىتۋىنا قولداۋ كورسەتىپ، برۋنەي جاقتىڭ ەكونوميكاسىنىڭ كوپ نەگىزدەنۋىنە دەم بەرۋدى قالايدى. جۇڭگو جاق ەكى ەلدىڭ بۋدانداستىرىلعان كۇرىش زەرتتەۋ سەلبەستىگىن ورىستەتۋىن قولدايدى، برۋنەي جاقتىڭ جۇڭگو حالىقارالىق يمپورت كورمەسى، جۇڭگو _ شىعىس وڭتۇستىك ازيا ەلدەرى وداعى كورمەسى سياقتى تۇعىرلاردان ويداعىداي پايدالانىپ، ساپالى اۋىل شارۋاشىلىعى، بالىق شارۋاشىلىعى ونىمدەرىن جۇڭگوعا ەكسپورت ەتۋدى كەڭەيتۋىن قارسى الادى. ەكى جاق گۋمانيتارلىق اۋىس ـ كۇيىس اسىل ٴداستۇرىن اسقاقتاتىپ، وقۋ ـ اعارتۋ، مادەنيەت ـ ساياحات، جەرگىلىكتى ورىندار، دەنە تاربيە جاقتاعى اۋىس ـ كۇيىستى، سەلبەستىكتى تەرەڭدەتىپ، دۇنيە ٴجۇزىنىڭ تەڭ، ٴتارتىپتى كوپ ۇيەكتەنۋىن، جالپىعا ٴتيىمدى، سيىسىمدى ەكونوميكانىڭ جاھاندانۋىن بىرگە ىلگەرىلەتىپ، حالىقارالىق ادىلدىك پەن ادىلەتتىلىكتى قورعاپ، حالىقارا جانە ٴوڭىر بەيبىتشىلىگىن، ورنىقتىلىعىن جەبەۋدە بەلسەندى رول اتقارۋى كەرەك.
حاسانال ٴتوراعا شي جينپيڭ مەن جۇڭگو حالقىنا جىلان جىلعى كوكتەم مەرەكەسى بايلانىسىمەن باقىت تىلەدى. حاسانال مىنالاردى ٴبىلدىردى: ٴتوراعا شي جينپيڭنىڭ باسشىلىعىندا، جۇڭگو ەكونوميكانىڭ ٴۇرتىس، تەز قارقىنمەن ارتۋىن ساقتاپ، نەشە ٴجۇز ميلليون ادامدى كەدەيلىكتەن ارىلتتى، بۇل كەرەمەت تابىس. جۇڭگو ٴۇش ۇلكەن الەمدىك باستامانى العا قويىپ، دۇنيە ٴجۇزىنىڭ بەيبىتشىلىگى، ورنىقتىلىعى، دامۋى ٴۇشىن شەشۋشى رول اتقارىپ، جاۋاپكەرشىلىك ارقالايتىن ٴىرى ەل جاۋاپكەرشىلىگىن ايگىلەدى. برۋنەي مەن جۇڭگو باستان ـ اياق ٴبىر ـ بىرىنە قۇرمەت ەتىپ، ٴبىر ـ بىرىنە سەنىم ارتىپ كەلەدى، ەكى ەل قارىم ـ قاتىناسى ۇزدىكسىز دامىپ، برۋنەي _ جۇڭگو تاعدىرلاس ورتاق تۇلعاسىنا قول ۇستاسا قادام تاستادى. جۇڭگو جاقتىڭ برۋنەيدىڭ ەكونوميكانى كوپ نەگىزدەندىرۋ ستراتەگياسىن قولداعاندىعىنا العىس ايتامىن، ەكى ەلدىڭ سەلبەستىگى برۋنەي حالقىن يگىلىككە كەنەلتتى. برۋنەي جاق ٴبىر جۇڭگو ساياساتىن تاباندىلىقپەن اتقارادى، جۇڭگو جاقپەن ستراتەگيالىق سەلبەستىك سەرىكتەستىك قارىم ـ قاتىناستى بەكەمدەپ، ەكى ەل حالقىنا اناعۇرلىم مول قۇت ـ ىرىس اكەلۋدى قالايدى. برۋنەي جاق جۇڭگو جاقپەن ساياسي ٴوزارا سەنىمدىلىكتى كۇشەيتىپ، ساۋدا، اۋىل شارۋاشىلىعى، بالىق شارۋاشىلىعى، ەنەرگيا سياقتى سالالارداعى سەلبەستىكتى تەرەڭدەتىپ، گۋمانيتارلىق اۋىس ـ كۇيىستى جەبەۋدى قالايدى. قازىر حالىقارالىق قوعام جاڭا كۇردەلى جاعداي مەن سىن ـ سايىستارعا ٴدوپ كەلىپ وتىر، برۋنەي جاق جۇڭگو جاقپەن سەلبەستىكتى كۇشەيتىپ، كوپ جاقتىلىققا جانە ەركىن ساۋداعا تاباندى بولىپ، وركەندەپ كەلە جاتقان ەلدەردىڭ ورتاق مۇددەسىن قورعاۋدى قالايدى.
ەكى جاق «جۇڭحۋا حالىق رەسپۋبليكاسى جانە برۋنەي دارۋسسالام ەلىنىڭ ستراتەگيالىق سەلبەستىك سەرىكتەستىك قارىم ـ قاتىناستى تەرەڭدەتۋ، جۇڭگو _ برۋنەي تاعدىرلاس ورتاق تۇلعاسى قۇرىلىسىن ىلگەرىلەتۋ جونىندەگى بىرلەسكەن مالىمدەمەسىن» جاريالادى.
كەڭەستەن كەيىن ەكى ەلدىڭ مەملەكەت باسشىلارى ٴادىليا، ”ٴبىر بەلدەۋ، ٴبىر جولدى“ بىرگە قۇرۋ، ەكونوميكا ـ ساۋدا، مەديا سياقتى سالالارداعى كوپتەگەن سەلبەستىك حۇجاتتارىنا قول قويىلۋىنا بىرگە كۋا بولدى.
كەڭەستەن ىلگەرى شي جينپيڭ حالىق سارايىنىڭ سولتۇستىك زالىندا حاسانالدى قارسى الۋ سالتىن وتكىزدى.
تيان ـ انمىن الاڭىندا 21 رەت قۇرمەت ساليۋتى اتىلدى، قۇرمەت قاراۋىلى قاتار تۇزەپ قۇرمەت ٴبىلدىردى. ەكى ەلدىڭ مەملەكەت باسشىلارى كوزدەن كەشىرۋ مىنبەسىنە شىققاندا، اسكەري وركەستر جۇڭگو مەن برۋنەي ەكى ەلدىڭ مەملەكەت ٴانىن ورىندادى. حاسانال شي جينپيڭنىڭ سەرىك بولۋىندا جۇڭگو حالىق ازاتتىق ارمياسىنىڭ قۇرمەت قاراۋىلىن كوزدەن كەشىردى ٴارى سالتانات قاتارىن تاماشالادى.
سول كۇنى تۇستە شي جينپيڭ حالىق سارايىنىڭ جينسى زالىندا حاسانالدى قارسى الۋ قوناعاسىن وتكىزدى.
ۋاڭ ي جوعارىداعى قيمىلدارعا قاتىناستى.
