شي جينپيڭ باستالۋ سالتىنا قاتىناستى ٴارى وسى كەزەكتى ازيا قىسقى سپورت جارىسىنىڭ باستالعاندىعىن جاريالادى
ساي چي، ازيانىڭ جەر ـ جەرىنەن كەلگەن باسشىلار مەن سيلى قوناقتار قاتارلىلار قاتىناستى
2 ـ ايدىڭ 7 ـ كۇنى كەشتە 9 ـ كەزەكتى ازيا قىسقى سپورت جارىسى حيلۇڭجياڭ ولكەسىنىڭ حاربين قالاسىندا سالتاناتپەن باستالدى. سۋرەتتە: مەملەكەت ٴتوراعاسى شي جينپيڭ ٴتوراعالار مىنبەسىندە كوپشىلىككە قول بۇلعاپ قۇرمەت بىلدىرۋدە.
□ سۋرەتتى شينحۋا اگەنتتىگىنىڭ ٴتىلشىسى شيە حۋانچى تۇسىرگەن
2 ـ ايدىڭ 7 ـ كۇنى كەشتە 9 ـ كەزەكتى ازيا قىسقى سپورت جارىسى حيلۇڭجياڭ ولكەسىنىڭ حاربين قالاسىندا سالتاناتپەن باستالدى. شي جينپيڭ قاتارلى پارتيا مەن مەملەكەت باسشىلارى باستالۋ سالتىنا قاتىناستى.
□ سۋرەتتى شينحۋا اگەنتتىگىنىڭ ٴتىلشىسى يان يان تۇسىرگەن
شينحۋا اگەنتتىگىنىڭ 2 ـ ايدىڭ 7 ـ كۇنى حاربيننەن بەرگەن حابارى. قار ـ مۇز ورتاق ارمانى شۇعىلا شاشتى، ازيا ٴبىر نيەتپەن تارتىمدى سيمفونيا جازدى. 9 ـ كەزەكتى ازيا قىسقى سپورت جارىسى 2 ـ ايدىڭ 7 ـ كۇنى كەشتە حيلۇڭجياڭ ولكەسىنىڭ حاربين قالاسىندا سالتاناتپەن باستالدى. مەملەكەت ٴتوراعاسى شي جينپيڭ باستالۋ سالتىنا قاتىناستى ٴارى وسى كەزەكتى ازيا قىسقى سپورت جارىسىنىڭ باستالعاندىعىن جاريالادى.
ساي چي، ازيانىڭ جەر ـ جەرىنەن كەلگەن باسشىلار مەن سيلى قوناقتار قاتارلىلار باستالۋ سالتىنا قاتىناستى.
ٴتۇن قۇشاعىندا حاربين حالىقارالىق جينالىس ـ كورمە دەنە تاربيە ورتالىعىندا شامدار سامالاداي جارقىراپ، الۋان ٴتۇستى نۇر شاشتى. باستالۋ سالتى باستالۋدان بۇرىن حيلۇڭجياڭنىڭ جەر ـ جەرىنەن كەلگەن بۇقارا وڭىرلىك ەرەكشەلىككە يە ويىن قويىپ، الاڭ ايرىقشا دۋمانعا بولەندى.
ساعات 19دان 58 مينۋت وتكەندە «بەيبىتشىلىك _ تاعدىرلاس ورتاق تۇلعا» اتتى مۋزيكا ٴۇنى ىشىندە شي جينپيڭ مەن حانىمى پىڭ لييۋان حالىقارالىق وليمپيادا كوميتەتىنىڭ ٴتوراعاسى باح، ازيا وليمپيادا القالار كەڭەسىنىڭ ٴبىرىنشى ورىنباسار ٴتوراعاسى حو جىنتيڭ قاتارلىلارمەن بىرگە ٴتوراعالار مىنبەسىنە قادام تاستاپ، كورەرمەندەرگە قول بۇلعاپ قۇرمەت ٴبىلدىردى. زالدان ۇزاققا سوزىلعان قىزۋ قول شاپالاق ٴۇنى كوتەرىلدى.
«سۇيەم سەنى، جۇڭگو» ٴانىنىڭ تەرەڭ سۇيىسپەنشىلىككە تولى اۋەنىمەن 8 قۇرمەت قاراۋىلى نىق قادام تاستاپ، جۇڭحۋا حالىق رەسپۋبليكاسىنىڭ مەملەكەت تۋىن قورعاپ الاڭعا كىردى. بۇكىل زالداعىلار ورىندارىنان تۇرىپ، جۇڭحۋا حالىق رەسپۋبليكاسىنىڭ مەملەكەت ٴانىن اسقاقتاتا شىرقادى، بەس جۇلدىزدى نارت قىزىل تۋ باياۋ كوتەرىلدى.
ۇلكەن ەكراندا «نۇرلى جىلدار» قىسقا فيلمى قويىلىپ، كوكتەم مەرەكەسىندىك كيىم كيگەن بالالار قولىنا مۇز شام الىپ، حاربيننىڭ قالا جەر بەلگىسىن جارقىراتتى. وسىدان كەيىن «مۇز شامنان تۋىنداعان ارمان» اتتى قوناق قارسى الۋ ويىنى باستالدى، مۇزداق قار ٴپىشىنى تۇسىرىلگەن قول جاۋلىق گۇلى ٴبيى وتاعاسى ەلدىڭ توڭىرەكتىڭ ٴتورت بۇرىشىنان كەلگەن قوناقتاردى قۇشاق جايا قارسى العان قىزۋ سۇيىسپەنشىلىگىن بەينەلەدى.
ساعات 20دان 8 مينۋت وتكەندە سپورتشىلاردىڭ الاڭعا كىرۋ سالتى باستالدى. «قار ـ مۇزداعى ازيانىڭ» ويناقى مۋزيكا ٴۇنى ىشىندە 34 مەملەكەت پەن وڭىردەن كەلگەن دەنە تاربيە ۋاكىلدەر ۇيىرمەسى ىركەس ـ تىركەس الاڭعا كىرىپ، تۇتاس الاڭداعى كورەرمەندەردىڭ قىزۋ قارسى الۋىنا بولەندى. «وتاندى جىرلايمىزدىڭ» اسقاق اۋەنى كوتەرىلىسىمەن وتاعاسى ەل جۇڭگو ۋاكىلدەر ۇيىرمەسى ەڭ سوڭىندا الاڭعا كىردى، شي جينپيڭ مەن حانىمى پىڭ لييۋان ورىندارىنان تۇرىپ قول بۇلعاپ قۇرمەت ٴبىلدىردى، بۇكىل الاڭ دۋمانعا شومدى، شاپالاق ٴۇنى، الاقايلاعان داۋىستار تولاستامادى. جۇڭگو ۋاكىلدەر ۇيىرمەسىندە جالپى 257 ادام بار، ولاردىڭ اراسىندا جارىسقا قاتىناساتىن 170 سپورتشى وسى كەزەكتى ازيا قىسقى سپورت جارىسىندا 6 ۇلكەن ٴتۇر، 64 كىشى ٴتۇر بويىنشا جارىسقا قاتىناسادى.
حاربين ازيا قىسقى سپورت جارىسىن ۇيىمداستىرۋ القاسىنىڭ ٴتوراعاسى، حيلۇڭجياڭ ولكەسىنىڭ باستىعى لياڭ حۇيليڭ ارناۋ سوزىندە ۇيىمداستىرۋ القاسى مەن 30 ميلليوننان استام حيلۇڭجياڭ حالقى اتىنان ازياداعى ٴار ەلدەن جانە وڭىردەن كەلگەن سپورت ساڭلاقتارىن قىزۋ قارسى الاتىندىعىن ٴبىلدىردى، ولاردىڭ جارىس الاڭىندا ٴوز ـ وزىنە سايىس جاريالاپ، كەلبەتتەرىن ايگىلەپ، ارماندارىن ورىنداپ، دوستىققا قول جەتكىزۋىن تىلەدى.
حاربين ازيا قىسقى سپورت جارىسىن ۇيىمداستىرۋ القاسىنىڭ ٴتوراعاسى، جۇڭگو وليمپيادا كوميتەتىنىڭ ٴتوراعاسى گاۋ جىدان ارناۋ سوزىندە مىنانى ٴبىلدىردى: ٴتوراعا شي جينپيڭنىڭ شىنايى قامقورلىعى مەن پارمەندى باسشىلىعىندا، ٴبىر كەزەكتى تارتىمدى ازيا قىسقى سپورت جارىسى سالتاناتى شىمىلدىعىن اشۋ الدىندا تۇر. ٴبىز جۇڭگو ۇلگىسىندەگى وسىزامانداندىرۋدىڭ سان الۋان كەلبەتىن بارىنشا ٴبولىسىپ، ازيا دەنە تاربيەسىنىڭ جاڭا دا شۇعىلالى كوركەم كارتيناسىن ٴبىر نيەتپەن كەستەلەپ، ازيا تاعدىرلاس ورتاق تۇلعاسىنىڭ تاماشا سيمفونياسىن بىرگە اسقاقتاتايىق.
ازيا وليمپيادا القالار كەڭەسىنىڭ ٴبىرىنشى ورىنباسار ٴتوراعاسى حو جىنتيڭ ارناۋ سوزىندە جۇڭگونىڭ ازيا قار ـ مۇز سپورتىن دامىتۋدا اتقارعان ماڭىزدى رولىن تۇراقتاندىردى، جۇڭگو ۇكىمەتىنىڭ، جۇڭگو وليمپيادا كوميتەتىنىڭ، حيلۇڭجياڭ ولكەلىك ۇكىمەتتىڭ، حاربين قالالىق ۇكىمەتتىڭ جانە ازيا قىسقى سپورت جارىسىن ۇيىمداستىرۋ القاسىنىڭ دەن قويا دايىندىق جاساعاندىعىنا جانە ىنتىماقتاسا سەلبەسكەندىگىنە، سونداي ـ اق سپورتشىلاردىڭ، كورەرمەندەردىڭ جانە قىزمەتكەرلەردىڭ قولداۋىنا العىس ايتىپ، حاربيندى قيالداعى قار ـ مۇز قالاسى دەپ القادى.
ساعات 20دان 51 مينۋت وتكەندە باستالۋ سالتى جۇرت جۇرەگىن تەبىرەنتەتىن ٴساتتى قارسى الدى. مەملەكەت ٴتوراعاسى شي جينپيڭ: حاربين 9 ـ كەزەكتى ازيا قىسقى سپورت جارىسى باستالدى! ـ دەپ جاريالادى. بۇكىل الاڭ لەزدە دۋمانعا شومدى، شاپالاق ٴۇنى مەن الاقايلاعان داۋىستار كوپكە دەيىن تولاستامادى. جايناعان ٴتۇستى جارقىلداق تۇنگى اسپاندى جارقىراتتى.
ەلىمىزدىڭ تاڭداۋلى سپورتشىلارىنىڭ 6 ۋاكىلى ازيا وليمپيادا القالار كەڭەسىنىڭ تۋىن ۇستاپ الاڭعا كىردى. ازيا وليمپيادا القالار كەڭەسىنىڭ انىنە ىلەسە، ازيا وليمپيادا القالار كەڭەسىنىڭ تۋى باياۋ كوتەرىلىپ، بەس جۇلدىزدى قىزىل تۋمەن قاتار بيىك جەلبىرەدى.
سپورتشى نيڭ جۇڭيان مەن ساي شۋەتۇڭ، تورەشى جاڭ چۇنحۇي مەن چىن ۋىنحۇڭ جارىسقا قاتىناسقان بارلىق سپورتشىلار مەن تورەشىلەر اتىنان جەكە ـ جەكە سەرت بەردى.
وسىدان كەيىن ۇلكەن ەكراندا «جالىندى قىس كۇندەرى» اتتى قىسقا فيلم بۇكىل الاڭداعىلاردىڭ نازارىن بۇردى: قار ـ مۇزعا قۇمار حاربيندىكتەر ”ازيا قىسقى سپورت جارىسىن ەكى كەزەك وتكىزگەن قالانىڭ“ قالا ىنتاسىن ايگىلەدى.
ادەبيەت ـ كوركەمونەر كونسەرتى باستالدى، كونسەرت الدىڭعى، ورتاڭعى، سوڭعى سىندى ٴۇش بولىمگە ٴبولىندى. الدىڭعى ٴبولىم «جالىندى قار ـ مۇز» اسقاق كەرناي ٴۇنى ىشىندە باستالدى، مۇز ويۋشى جىگىتتەر قولدارىنا قاشاۋ ۇستاپ مۇز ۇستىندە بيگە باستى، «الدىڭعى مۇز» داريادان ويىلىپ شىقتى، قىزىل تورعىن ۇشىپ كەلىپ، وسى كەزەكتى ازيا قىسقى سپورت جارىسىنىڭ گەربى ”چاۋيۋەنى“ جارقىراتتى، بالەت بيشىلەرى قار ـ مۇزدا بيگە باسىپ، ادام مەن تابيعات جاراسىمدى قاتار ٴومىر سۇرگەن تاماشا جاعدايدى كەسكىندەدى. ورتاڭعى ٴبولىم «جىگەردى جالىنداتقان جىلدامدىقتا» ازيا قىسقى سپورت جارىسى ساڭلاقتارىنىڭ دەنە تۇلعاسى جارقىراعان پەردەدەن ۇشىپ ٴوتىپ، مۇزدا قۇيعىتىپ، قاردا ۇشىرتقان ايبىنىن ايگىلەدى، شاتتىققا شومعان ادامدار سايران سالىپ بىرگە بيگە باستى، موماقان ”ٴداۋ قار ادام“ الاڭدا بوي كورسەتىپ، مۇز قالاسىنىڭ سالتاناتىن قارسى الدى. سوڭعى ٴبولىم «اسقار تاۋ، الىپ وزەندە» ازيا ەرەكشەلىگىندەگى كيىم ـ كەشەكتەردى كيگەن بيشىلەر دۋماندى ٴبي ارەكەتى ارقىلى اركىم ٴوز سۇلۋلىعىن ايگىلەگەن، سۇلۋلىقتان بىرگە سۋسىنداعان جاندى كورىنىستى ايگىلەدى، وزىندىك ەرەكشەلىككە يە ”بالكون مۋزيكا ساۋىعى“ ساحنادان كورەرمەندەر ورنىنا دەيىن كەڭەيىپ، بيگە باسقان نوتا بەلگىلەرى تاعدىرلاس بولعان ازيا ٴبىر وتباسى ادامدارىنىڭ جۇرەك قىلىن شەرتتى.
ساعات 21دەن 24 مينۋت وتكەندە نەگىزگى الاۋدى تۇتاندىرۋ سالتى باستالدى. ۇلكەن ەكران حاربين قار ـ مۇز الەمى بولىمشە الاڭىمەن ۇستىندە جالعانىپ، ياڭ ياڭ، حان شياۋپىڭ، ۋاڭ جىن، جاڭ حۇڭ سياقتى 4 الاۋگەر كۇش جالعاپ جەتكىزىپ، تۇتاس الاڭداعىلاردىڭ قىزۋ قول شاپالاعىنا بولەندى. قولدارىنا مۇز شام كوتەرگەن بالالار الاۋگەرلەرمەن قول ۇستاسا العا ىلگەرىلەپ، نەگىزگى الاۋ مۇناراسىن بىرگە تۇتاندىرىپ، ”قارداعى قالامپىر“ نۇر شاشىپ، ازيا قىسقى سپورت جارىسىنىڭ قاسيەتتى الاۋىن مازداتتى.
بۇكىل الاڭداعىلار نەگىزگى تاقىرىپتىق ٴان «ازيانى نۇرلاندىرۋدى» بىرگە شىرقاپ، بۇكىل دەنە تاربيە الاڭى شاتتىقتىڭ شالقار تەڭىزىنە اينالدى.
باستالۋ سالتىنا قاتىناسقان حالىقارالىق سيلى قوناقتاردان برۋنەي سۇلتانى حاسانال، قىرعىزستان زۇڭتۇڭى جاپاروۆ پەن حانىمى جاپاروۆا، پاكيستان زۇڭتۇڭى زارداري، تايلاند زۇڭليى پەي تۇڭتان، كورەيا پارلامەنتىنىڭ باستىعى يۇي يۋانجى مەن حانىمى شىن جيڭحۇي بار.
ۋاڭ ي، حى ليفىڭ، ۋاڭ شياۋحۇڭ، شىن يچين باستالۋ سالتىنا قاتىناستى.
شياڭگاڭ ەرەكشە اكىمشىلىك رايونىنىڭ اكىمى لي جياچاۋ، اۋمىن ەرەكشە اكىمشىلىك رايونىنىڭ اكىمى سىن حاۋحۇي باستالۋ سالتىنا قاتىناستى.
ازيا وليمپيادا القالار كەڭەسىنىڭ ٴمانساپتىلارى قاتارلىلار باستالۋ سالتىنا قاتىناستى.
