انار بۇلت \ شينجياڭ گازەتىنىڭ ٴتىلشىسى ما ينيڭ 2 ـ ايدىڭ 8 ـ كۇنى ۇرىمجىدەن حابارلايدى. 2025 ـ جىلعى شينجياڭ قاتىناس ـ تاسىمال قىزمەتى ماجىلىسىنەن ۇعىسۋىمىزشا، بيىل شينجياڭ تاس جول قاتىناسىنا 80 ميلليارد يۋان قارجى قوسىپ، سايكەس مەزگىلدەگىدەن %13.5 ارتتىرىپ، جوعارى قارقىندى (1 ـ دارەجەلى) تاس جولدى 13 مىڭ كيلومەتر اينالاسىنا جەتكىزىپ، جوعارى قارقىندى تاس جولدى 8000 كيلومەتردەن اسىرىپ، تۇتاس رايونداعى تاس جول جالپى ۇزىندىعىن ”14 ـ بەسجىلدىق“ جوبا نىساناسىنداعىدان اسىرۋدى جوسپارلاعان.
تانىستىرۋعا قاراعاندا، قازىر تۇتاس رايونداعى تاس جولدىڭ جالپى ۇزىندىعى 230 مىڭ كيلومەترگە جەتكەن، بىلتىر جاڭادان سالىنعان مەملەكەت، ولكە دارەجەلى 9 نەگىزگى تاس جول جەلىسى تۇگەلدەي ۋاعىندا جۇمىس باستاپ، مەملەكەت، ولكە دارەجەلى 16 نەگىزگى جەلى نىسانى سالىنىپ بولىپ كولىك قاتىناعان، تيانشان جەڭىس تۋنەلى ٴبىر جىل بۇرىن تۇتاسىپ، شينجياڭنان كىرىپ ـ شىعاتىن ٴبىر وتكەل جانە اۋدان، قالانى تۇتاستىراتىن 4 جوعارى قارقىندى (1 ـ دارەجەلى) تاس جول تىڭنان كوبەيىپ، تۇتاس رايونداعى اۋدان، قالانى تۇتاستىراتىن جوعارى قارقىندى (1 ـ دارەجەلى) تاس جول سالىستىرماسى %94تەن اسىپ، 3A دارەجەلى، سونداي ـ اق ودان جوعارى كورىنىس اۋماعى جوعارى قارقىندى (1 ـ دارەجەلى) تاس جولىنىڭ قامتۋ مولشەرى %95كە جەتكەن.
بيىل شينجياڭ نىسان قۇرىلىسىنىڭ سەرپىنىن ۇزدىكسىز ارتتىرىپ، G0711 جەلىسىنىڭ ۇرىمجىدەن لوپنۇرعا دەيىنگى جەلىسى قاتارلى مەملەكەت، ولكە دارەجەلى 26 نەگىزگى جەلى نىسانىن سالىپ بولۋعا قۇلشىنىپ، 5 اۋدان، قالاعا (شىڭگىل اۋدانى، ٴۇشتۇرپان اۋدانى، اقشي اۋدانى، شايار اۋدانى، قوبىقسارى موڭعۇل اۆتونوميالى اۋدانى) تۇتاساتىن جوعارى قارقىندى (1 ـ دارەجەلى) تاس جولدى تىڭنان كوبەيتىپ، 3A دارەجەلى، سونداي ـ اق ودان جوعارى كورىنىس وڭىرىندە جوعارى قارقىندى (1 ـ دارەجەلى) تاس جولدىڭ قامتۋ مولشەرىن %99.5كە جەتكىزەدى، اۆتونوميالى رايون ىشىندەگى G331 جەلىسىنىڭ تۇتاس جەلىسىندە كولىك قاتىنايدى. سونىمەن بىرگە G218 جەلىسىنىڭ ناراتتان بالعىنتايعا دەيىنگى جەلىسى قاتارلى مەملەكەت، ولكە دارەجەلى 18 نەگىزگى جەلى نىسانى جالعاستىرا سالىنىپ، G3033جەلىسىنىڭ كۇيتۇننەن مايتاۋعا، كۇشارعا دەيىنگى جەلىسى سياقتى 20 كەلەلى نىساندا جاڭادان قۇرىلىس باستالادى.
بيىل شينجياڭ قاتىناس ـ تاسىمال ارقىلى جان ـ جاقتى تۇردە سىرتقا ەسىك اشۋعا دەم بەرۋ ساپاسىن، ونىمدىلىگىن ۇزدىكسىز جوعارىلاتىپ، نەگىزدىك قۇرىلعى ”قاتتى بولشەكتەرىنىڭ ۇلاستىرىلۋىن“ كۇشەيتىپ، تايكەشكەن شەكارا وتكەلىنە تۇتاساتىن 1 ـ دارەجەلى تاس جولدى جاڭادان سالىپ، تۇتاس رايونداعى رۇقسات ەتىلىپ اشىلعان شەكارا وتكەلدەرىنىڭ ىشىندە 8 شەكارا وتكەلىنە جوعارى قارقىندى (1 ـ دارەجەلى) تاس جول تۇتاستىرۋدى جۇزەگە اسىرىپ، مۇزارت شەكارا وتكەلىنە تۇتاساتىن 2 ـ دارەجەلى تاس جولدى جاڭادان سالىپ، تۇتاس رايوندا 14 شەكارا وتكەلىنە 2 ـ دارەجەلى، سونداي ـ اق ودان جوعارى تاس جول تۇتاستىرادى.
اۋىل ـ قىستاق تاس جولى ٴالى دە قۇرىلىس ٴتۇيىنى بولىپ تابىلادى. بيىل شينجياڭ اۋىل ـ قىستاق تاس جولىندا ”ٴۇشتى تۇتاستىرۋدى“ جەدەل ىلگەرىلەتىپ، تۇتاس جىلدا 6000 كيلومەتر اۋىل ـ قىستاق تاس جولىن جاڭادان سالادى، وزگەرتىپ سالادى، 3 ـ دارەجەلى جانە ودان جوعارى تاس جول تۇتاسقان ٴبىر اۋىل ـ قالاشىقتى، قاتتىلاندىرىلعان جول تۇتاسقان، جان سانى كولەمى ٴبىرشاما جوعارى 30 تابيعي قىستاقتى (گرۋپپا) تىڭنان كوبەيتەدى.
