2 ـ ايدىڭ 8 ـ كۇنى جۇڭگو شەبەرلەرى دىلنيگار يىلھامجان (سولدا)، سامعار سەرىك جارىستا. سۋرەتتەر تۇگەلدەي شينحۋا اگەنتتىگىنەن
انار بۇلت \ شينجياڭ گازەتىنىڭ ٴتىلشىسى حۋاڭ شيڭ 2 ـ ايدىڭ 8 ـ كۇنى حاربيننەن حابارلايدى. 2 ـ ايدىڭ 8 ـ كۇنى بەينەكەسكىندى قايتالاي كورۋ ارقىلى الدىڭعى قاتاردا تۇرعان شەبەردىڭ ەرەجەگە قايشىلىق جاساعاندىعى تۇراقتاندىرىلدى، شينجياڭنان كەلگەن جۇڭگونىڭ دالالىق قار شاڭعى سپورتشىسى دىلنيگار يىلھامجان دالالىق قار شاڭعى ايەلدەر جەكەلەر قىسقا ارالىق (ٴداستۇرلى شەبەرلىك) جارىسىندا، سامعار سەرىك دالالىق قار شاڭعى ەرلەر جەكەلەر قىسقا ارالىق (ٴداستۇرلى شەبەرلىك) جارىسىندا قولا مەدال ەنشىلەدى.
وسىدان بۇرىن 4 ـ بولۋ شينجياڭ سپورتشىلارىنىڭ ازيا قىسقى سپورت جارىسىنداعى ەڭ تاماشا ناتيجەسى بولاتىن. قىسقا ارالىقتا تەز سىرعاناۋ سپورتشىسى ليۋ يانفي ازيا قىسقى سپورت جارىسىنا تۇڭعىش قاتىناسقان شينجياڭدىق سپورتشى، ول جۇڭگو كومانداسى اتىنان 2 ـ كەزەكتى جانە 3 ـ كەزەكتى ازيا قىسقى سپورت جارىسىنا قاتىناسىپ، قىسقا ارالىقتا تەز سىرعاناۋ 1500 مەترلىك جارىسىندا 4 ـ بولعان. 2017 ـ جىلى 8 ـ كەزەكتى ازيا قىسقى سپورت جارىسىندا شينجياڭدىق قىسقا ارالىقتا تەز سىرعاناۋ سپورتشىسى جۋ جيافان مەن راقىمباي تالاپقان جۇڭگو كومانداسى اتىنان جارىسقا قاتىناسىپ، ەرلەر قۋالاما جارىسىندا 4 ـ بولعان.
دىلنيگار 2001 ـ جىلى 5 ـ ايدىڭ 3 ـ كۇنى شينجياڭنىڭ التاي قالاسىندا تۋعان. ول بۇرىن جۇڭگو كومانداسى اتىنان 2022 ـ جىلعى بەيجيڭ قىسقى وليمپيادا جارىسىنا قاتىناسقان ٴارى الاۋگەر بولىپ وليمپيادا سپورت جارىسىنىڭ الاۋىن تۇتاندىرعان. 2 ـ ايدىڭ 8 ـ كۇنى وتكىزىلگەن دالالىق قار شاڭعى ايەلدەر جەكەلەر قىسقا ارالىق (ءداستۇرلى شەبەرلىك) جارىسىندا ول 3 مينۋت 28 سەكۋند 56 تاقىلدىق ناتيجەمەن 3 ـ بولىپ، قولا مەدال ەنشىلەدى.
”وتباسىمىزداعىلار بۇل حاباردى ەستىگەندە ايرىقشا قۋاندىق، ٴبىر ٴۇيلى جان تەبىرەنگەنىمىزدەن جىلاپ جىبەردىك. جۇڭگو كومانداسى سول كۇنى العان مەدالدىڭ ەكەۋىن مەنىڭ قىزىم مەن شاكىرتىم الدى، بۇل شينجياڭنىڭ قار ـ مۇز سپورتىنداعى تاريحي سيپاتتى سەرپىلىس، ٴبىز ٴۇش ۇرپاق جاننىڭ ارمانى اقىرى ورىندالدى“. دىلنيگار يىلھامجاننىڭ اكەسى يىلھامجان مىراجى تەلەفوندا تەبىرەنە وسىلاي دەدى.
20 جاستاعى التايلىق ازامات سامعار 2 ـ ايدىڭ 8 ـ كۇنى وتكىزىلگەن دالالىق قار شاڭعى ەرلەر جەكەلەر قىسقا ارالىق (ءداستۇرلى شەبەرلىك) جارىسىندا 2 مينۋت 58 سەكۋند 51 تاقىلدىق ناتيجەمەن 3 ـ بولىپ، قولا مەدال ەنشىلەدى.
”2000 ـ جىلداردان كەيىن تۋىلعان ەكى سپورتشى وتكەن جىلعى مەملەكەتتىك قىسقى سپورت جارىسىندا شىنىعۋ ارقىلى بارىنشا تولىستى. ولار ەنشىلەگەن 2 قولا مەدال مەملەكەت ٴۇشىن داڭق اپەرىپ قانا قويماي، شينجياڭنىڭ قار ـ مۇز سپورتىندا تاريح جاراتتى“. اۆتونوميالى رايوندىق دەنە تاربيە مەكەمەسى قىسقى سپورت جاتتىعۋ ورتالىعى پارتكومىنىڭ شۋجيى كاڭ يۇڭشين بىلاي دەدى: ”بۇل شينجياڭ قار ـ مۇز ساڭلاقتارىنىڭ كەلەسى جارىستاردا اناعۇرلىم تاماشا ناتيجەگە قول جەتكىزۋىندە شابىتتاندىرۋ رولىن اتقارادى ٴارى ٴبىزدىڭ جاس جانە ٴوسپىرىم قار ـ مۇز دارىندىلارىمىزدىڭ نەگىزىن ونان ارى بەكەمدەۋ بەكىمىمىزدى ٴتىپتى دە نىعايتتى“.
2 ـ ايدىڭ 8 ـ كۇنى تۇستەن بۇرىن وتكىزىلگەن ايەلدەر قىسقا ارالىقتا تەز سىرعاناۋ ايەلدەر 100 مەترلىك جارىسىندا قارامايلى قالاسىنان كەلگەن تيان رۇينيڭ 10 سەكۋند 52 تاقىلدىق ناتيجەمەن 4 ـ بولدى، ونىمەن اعا جۇلدەگەر بولعان كورەيالىق شەبەردە 0.02 تاقىلدىق بولماشى پارىق ساقتالدى. اقنار اداق تەز سىرعاناۋ ايەلدەر 1500 مەترلىك جارىسىندا 11 ـ بولدى.
