جۇڭگو كومانداسى ازيا قىسقى سپورت جارىسىندا 100 التىن مەدال بەلەسىنەن ٴوتتى
شينحۋا اگەنتتىگىنىڭ 2 ـ ايدىڭ 8 ـ كۇنى حاربيننەن بەرگەن حابارى (تىلشىلەر ۋاڭ حىڭجى، ۋاڭ چۇنيان). تۇڭعىش التىن مەدالدى الا الماعانىمەن، الايدا حاربين ازيا قىسقى سپورت جارىسى باستالعاننان كەيىنگى تۇڭعىش جارىس كۇنىندە جۇڭگو كومانداسى قار، مۇز سپورتىندا بىردەي ناتيجە جاراتىپ، 5 تارماق تۇردەن 8 التىن مەدال الىپ، مەدال تاقتاسىندا 1 ـ ورىندى يەلەدى. وسىعان دەيىن جۇڭگو ۋاكىلدەر قۇراماسى ازيا قىسقى سپورت جارىسىنا قاتىناسۋ تاريحىندا 100 التىن مەدال بەلەسىنەن ٴوتىپ، 102 التىن مەدال ەنشىلەدى.
2 ـ ايدىڭ 8 ـ كۇنى جالپى 17 التىن مەدال جارىققا شىعىپ، وسى كەزەكتى ازيا قىسقى سپورت جارىسىندا جارىققا شىققان التىن مەدال سانى ەڭ كوپ ٴبىر كۇن بولدى. جارىستاعى تۇڭعىش التىن مەدال قىسقا ارالىقتا تەز سىرعاناۋ ارالاسپا قۇراماسىنىڭ 2000 مەترلىك ۇتىلامالى سىرعاناۋ تۇرىندە جارىققا شىقتى. جۇڭگو كومانداسى فان كىشين، گۇڭ لي، ليۋ شاۋ ـ اڭ، لين شياۋجۇندەردى جارىسقا قاتىناستىردى، الايدا باستان ـ اقىر الدا كەلە جاتقان جاعدايدا، سوڭعى تاياقتاعى لين شياۋجۇن وقىس جىعىلىپ، جۇڭگو كومانداسى ەڭ سوڭىندا سيلىق تاقتاسىنان كورىنبەي، جارىستىڭ تۇڭعىش التىن مەدالىن كورەيا كومانداسى ەنشىلەدى.
قايدا جىعىلسا، سول جەردە ورنىنان تۇرۋ كەرەك. كورەيا كومانداسىنىڭ قىسقا ارالىقتا سىرعاناۋ جارىسىندا 4 التىن مەدالدى ارت ـ ارتىنان ەنشىلەگەن جاعدايى الدىندا، جۇڭگو كومانداسى ەرلەردىڭ 500 مەترگە سىرعاناۋ شەشۋشى جارىسىندا نەگىزگى الاڭنىڭ ابىرويىن قورعادى. بۇل مايدان شەشۋشى جارىستا قايتا ـ قايتا قاتەلەسۋ كورىلىپ، ەكى رەت قايتا باستاۋ بۇيرىعى بەرىلدى، كورەيالىق شەبەر جين تايشيڭ 2 ـ رەت باستاپ جۇگىرگەندە ەرەجەگە قايشىلىق جاساعاندىقتان جارىستان شىعارىلدى. 3 ـ رەت باستاپ جۇگىرگەندە جۇڭگو _ كورەيا شەبەرلەرى ”2V2“ بولىپ، اقىرى لين شياۋجۇن باسىپ وزىپ اعا جۇلدەگەرلىكتى ەنشىلەدى، سوڭعى مارەگە جەتكەننەن كەيىن ول قورشاما بوگەتتەن اتىلىپ شىعىپ، توسەنىشكە جۇگىنە كەتىپ جەتەكشىسى جاڭ جيڭدى قۇشاقتاپ جىلادى.
ٴداستۇرلى باسىمدىققا يە قىسقا ارالىقتا تەز سىرعاناۋ جارىسىندا تابىس مول بولماعانىمەن، الايدا وسى رەتكى جالپى ٴتۇر بويىنشا جارىسقا قاتىناسقان جۇڭگو ۋاكىلدەر قۇراماسىنىڭ التىن مەدال ەنشىلەۋىندە جاپپاي ناتيجە جاراتۋ اۋقىمى كورىلدى. يابۋليداعى ەركىن شاڭعى ايەلدەر U فورمالى الاڭىنداعى شەبەرلىك جارىسىندا گۋ ايليڭنىڭ ورنىنا جارىسقا قاتىناسقان لي فاڭحۇي جۇلدەگەرلىكتى قينالماي الا سالدى، بۇل جۇڭگو ۋاكىلدەر قۇراماسىنىڭ وسى كەزەكتى جارىستا العان تۇڭعىش التىن مەدالى سانالادى. لي فاڭحۇي جارىستان كەيىن ميلان قىسقى وليمپيادا سپورت جارىسىندا سيلىق مىنبەسىنە شىعۋدى ٴۇمىت ەتەتىندىگىن ايتتى.
سىڭار شاڭعى ايەلدەر كولبەۋ كەدەرگى شەبەرلىك جارىسىندا جۇڭگو كومانداسىنىڭ شەبەرلەرى جاڭ شياۋنان مەن شيۇڭ شىرۇي التىن، كۇمىس مەدالدى تۇگەل الدى؛ دالالىق قار شاڭعى جەكەلەر قىسقا ارالىق (ٴداستۇرلى شەبەرلىك) تۇرىندە ۋاڭ چياڭ ەرلەر جارىسىنىڭ اعا جۇلدەگەرى بولدى، لي لەي مەن مىڭ حۇڭليان، دىلنيگار يىلھامجان ايەلدەر جارىسىنىڭ التىن، كۇمىس، قولا مەدالدارىن تۇگەل ەنشىلەدى، لي لەيدىڭ بۇل التىن مەدالى جۇڭگو ۋاكىلدەر قۇراماسىنىڭ ازيا قىسقى سپورت جارىسىنا قاتىناسۋ تاريحىنداعى 100 ـ التىن مەدال.
مۇزدا تەز سىرعاناۋ جارىس الاڭىنان دا قۋانىشتى حابار ارت ـ ارتىنان تارالدى. بەيجيڭ قىسقى وليمپيادا سپورت جارىسى ەرلەر 500 مەترلىك جارىسىنىڭ اعا جۇلدەگەرى گاۋ تيڭيۇي 9 سەكۋند 35 تاقىل تەزدىكپەن ەرلەردىڭ 100 مەترلىك جارىسىنىڭ التىن مەدالىنا يە بولۋمەن بىرگە، ازيا رەكوردىن جانە جارىس رەكوردىن جاڭالادى؛ وسى كەزەكتى ازيا قىسقى سپورت جارىسىندا جۇڭگو ۋاكىلدەر قۇراماسىنىڭ تۋ ۇستاۋشىسى بولعان نيڭ جۇڭيان ەرلەردىڭ 1500 مەترلىك جارىسىنىڭ اعا جۇلدەگەرى بولدى؛ حان مەيزى مەن سەرىكتەرى ياڭ بينيۇي، يىن چي ايەلدەردىڭ 1500 مەترلىك جارىسىنىڭ الدىڭعى ٴۇش ورنىن يەلەدى.
گاۋ تيڭيۇيدىڭ بۇل ناتيجەسى قازاقستان شەبەرى جاڭا عانا جاڭالاعان ەكى رەكوردتى 0.12 سەكۋند جوعارىلاتتى. ول بىلاي دەدى: ”الدىڭعى شەبەر سىرعاناۋدا تاماشا ناتيجە جاراتقاننان كەيىن مەن دە جىگەرلەنىپ، وسى التىن مەدالدى، ٴسوز جوق، الۋعا قۇلشىندىم“.
ازيا قىسقى سپورت جارىسىنا تۇڭعىش ەنگىزىلگەن مۇز شاۋگىم ارالاسپا قوس تۇرىندە حان يۇي \ ۋاڭ جىيۇي ەكەۋىنەن قۇرالعان جۇڭگو كومانداسى قولا مەدالعا يە بولدى، التىن مەدالدى جاپونيا كومانداسى ەنشىلەدى.
سيلىق تاقتاسىندا جۇڭگو كومانداسى 8 التىن، 8 كۇمىس، 5 قولا مەدالمەن الدىڭعى ورىندى يەلەدى، كورەيا كومانداسى 7 التىن، 5 كۇمىس، 7 قولا مەدالمەن ەكىنشى ورىندى يەلەدى.
