انار بۇلت \ شينجياڭ گازەتىنىڭ ٴتىلشىسى لي جياني 2 ـ ايدىڭ 10 ـ كۇنى اراساننان حابارلايدى. 2 ـ ايدىڭ 10 ـ كۇنى 9 ـ كەزەكتى جۇڭگو مۇگەدەكتەر قار ـ مۇز سپورت ماۋسىمى (شينجياڭ بەكەتى) قيمىلى جانە مۇگەدەكتەر دالالىق قار شاڭعى ۇسىنىس جارىسى اراسان اۋدانىنداعى اراسان دالالىق قار شاڭعى الاڭىندا باستالدى، شينجياڭعا كومەكتەسەتىن ولكە، قالالاردان، تۇتاس شينجياڭداعى 14 ايماق، وبلىس، قالادان جانە شينجياڭ ٴوندىرىس ـ قۇرىلىس بيڭتۋانىنان 500دەن استام مۇگەدەك جانە قار ـ مۇز اۋەسكەرلەرى قاتىناسىپ، قار ـ مۇز سپورتىنىڭ قىزىعىنا شومدى.
بۇل رەتكى جارىستى جۇڭگو مۇگەدەكتەر بىرلەستىگى، اۆتونوميالى رايوندىق مۇگەدەكتەر بىرلەستىگى جانە بۇراتالا موڭعۇل اۆتونوميالى وبلىستىق حالىق ۇكىمەتى قاتارلى ورىندار بىرگە وتكىزدى، مۇندا مۇگەدەكتەر بۇقارالىق قار ـ مۇز سپورتىن اناعۇرلىم جالپىلاستىرىپ، ورىستەتىپ، مۇگەدەكتەردى قىس ماۋسىمىنداعى ساۋىعۋ، دەنە شىنىقتىرۋ دەنە تاربيە قيمىلدارىنا بەلسەنە قاتىناسۋعا جەتەكتەۋ جانە شابىتتاندىرۋ، مۇگەدەكتەر قار ـ مۇز سپورتىنىڭ باسەكەلىك دەڭگەيىن جوعارىلاتىپ، مۇگەدەكتەر قار ـ مۇز سپورتىنىڭ دامۋىن ىلگەرىلەتۋ ماقسات ەتىلدى.
”ۇيدەن ’شىعىپ‘ قار ـ مۇز سپورتىنىڭ قىزىعىنا شومعاندىعىما وتە كوڭىلدىمىن“. قول ـ اياعى كەمتار سپورتشى ميرابۇل ماحمۇت بىلاي دەدى: دەنە تاربيە _ زاعيپ جانداردىڭ كەمتارلىقتى ويىنا الماي، كەمەلدىلىكپەن قاۋىشۋىنداعى كوپىر، ٴتىپتى دە كوپ مۇگەدەك جانداردىڭ تولىق سەنىممەن ۇيدەن شىعىپ، مۇزدا قىزىققا شومىپ، قاردا ساۋىق ـ سايران قۇرۋ ارقىلى تۇرمىسپەن قاۋىشۋىن، سپورتتىڭ ٴلاززاتىن سەزىنۋىن ٴۇمىت ەتەمىن.
جۇڭگو مۇگەدەكتەر بىرلەستىگى دەنە تاربيە ٴبولىمىنىڭ ورىنباسار مەڭگەرۋشىسى يۇڭ جىجۇن مىنالاردى ٴبىلدىردى: وسى رەتكى جارىس ورايىنان پايدالانىپ، ٴار ۇلت مۇگەدەك جانداردى دەنە تاربيەدەن ٴلاززات الۋعا، ٴوزىن الۋەتتەندىرۋگە، جان ـ جاقتى دامۋعا شابىتتاندىرۋدى، سونىمەن بىرگە شينجياڭنىڭ مۇگەدەكتەر ىستەرىنىڭ دامۋىنداعى كورنەكتى ناتيجەلەردى ۇگىتتەپ، شينجياڭنىڭ مۇگەدەكتەر دەنە تاربيە ىستەرىنىڭ ٴتىپتى دە جوعارى دەڭگەيگە قادام تاستاۋىن جەبەپ، جۇڭحۋا ۇلتى ورتاق تۇلعا تانىمىن بەكەمدەۋدە، مۇگەدەكتەردىڭ ۇقىق ـ مۇددەسىن قامتاماسىز ەتۋدە تىڭ دا اناعۇرلىم زور رول اتقارۋدى ٴۇمىت ەتەمىز.
”قار ـ مۇزدا شەكارا بولعانىمەن، سۇيىسپەنشىلىكتە شەكارا جوق؛ ارمان سامعايدى، سپورتتا كەدەرگى بولمايدى“. اۆتونوميالى رايوندىق مۇگەدەكتەر بىرلەستىگى پارتيا باسشىلىق گرۋپپاسىنىڭ شۋجيى، القا باستىعى شيا جيانشين بىلاي دەدى: بۇل رەتكى جارىستى وتكىزۋ دەنە تاربيە رۋحىن ساۋلەلەندىرۋ جانە ونى جالعاستىرۋ عانا ەمەس، ونان دا ماڭىزدىسى، شينجياڭنىڭ كوركەم كەلبەتى مەن شۇعىلالى مادەنيەتىن ٴبىر رەت جان ـ جاقتى ايگىلەۋ سانالادى.
2016 ـ جىلدان بەرى، جۇڭگو مۇگەدەكتەر قار ـ مۇز سپورت ماۋسىمى ٴۇرتىس 8 كەزەك وتكىزىلىپ، مۇگەدەك جانداردىڭ مۇز تاماشالاپ، قاردا كوڭىل اشاتىن، قىس ماۋسىمىندا دەنە شىنىقتىراتىن ماڭىزدى قيمىلىنا اينالدى. وسى كەزەكتى جارىستا مۇگەدەك قار ـ مۇز سپورت اۋەسكەرلەرى دالالىق قار شاڭعى جارىسىنا قاتىناسۋمەن بىرگە، قاردا شىعىرىق تاستاۋ، قاردا فۋتبول تەبۋ، قاردا موتوتسيكل ٴمىنۋ سياقتى قىزىقتى كوڭىل اشۋ تۇرلەرىنە دە قاتىناسا الادى.
