□ سۋرەتتى شينحۋا اگەنتتىگىنىڭ ءتىلشىسى چىن جىنحاي تۇسىرگەن
شينحۋا اگەنتتىگىنىڭ 2 ـ ايدىڭ 11 ـ كۇنى حاربيننەن بەرگەن حابارى (تىلشىلەر ۋاڭ حىڭجى، ما سىجيا). حاربين ازيا قىسقى سپورت جارىسىندا 2 ـ ايدىڭ 11 ـ كۇنى 10 التىن مەدالعا شەشىم جاسالدى، جۇڭگو كومانداسى سول كۇنى تاعى 6 التىن، 5 كۇمىس، 5 قولا مەدال الىپ، جالپى مەدال سانى 70كە جەتىپ، جۇڭگو ۋاكىلدەر قۇراماسىنىڭ ٴبىر كەزەكتەگى مەدال سانىنىڭ تاريحي رەكوردىن جاڭالادى. تايلاند كومانداسى دا تاريح جاراتىپ، ۋاكىلدەر قۇراماسىنىڭ ازيا قىسقى سپورت جارىسى تاريحىنداعى تۇڭعىش مەدالىن الدى.
جۇڭگو ۋاكىلدەر قۇراماسى وسى كەزەكتى ازيا قىسقى سپورت جارىسىندا ۇزدىكسىز تىڭ ناتيجەلەر جاراتتى. 2 ـ ايدىڭ 10 ـ كۇنى 21 التىن مەدالمەن جۇڭگو ۋاكىلدەر قۇراماسىنىڭ ٴبىر كەزەكتەگى ازيا قىسقى سپورت جارىسىنا قاتىناسۋ تاريحىنداعى ەڭ تاماشا ناتيجەسىن جاراتقان سوڭ، 2 ـ ايدىڭ 11 ـ كۇنى 16 مەدالعا يە بولعاننان كەيىن، تاعى دا 70 مەدالمەن جۇڭگو ۋاكىلدەر قۇراماسىنىڭ ٴبىر كەزەكتى ازيا قىسقى سپورت جارىسىنا قاتىناسقانداعى مەدال سانىنىڭ تاريحتاعى ەڭ جوعارى دەڭگەيىن جاڭالادى، بۇرىنعى رەكورد 2007 ـ جىلعى چاڭچۇن ازيا قىسقى سپورت جارىسىندا العان 61 مەدال بولاتىن. اتاپ وتۋگە تاتيتىنى، 70 مەدال قازاقستاننىڭ 2011 ـ جىلعى استانا _ الماتى ازيا قىسقى سپورت جارىسىندا ٴبىر ۋاكىلدەر ۇيىرمەسىنىڭ ٴبىر كەزەكتە العان مەدال سانىنىڭ رەكوردىمەن دە تەڭەستى.
جاڭا رەكورد جاڭالاعان تاريحي ٴسات قاردا ەركىن سىرعاناۋ جارىس الاڭىندا تۋىلدى. ايەلدەردىڭ قيا بەتتە كەدەرگىدەن ٴوتۋ شەبەرلىگى جارىسى اياقتاۋدان بۇرىن، جۇڭگو ۋاكىلدەر قۇراماسى وسى كەزەكتى ازيا قىسقى سپورت جارىسىندا 60 مەدالعا يە بولدى، جۇڭگو كومانداسىنىڭ شەبەرلەرى ليۋ مىڭتيڭ، ياڭ رۋ ـ ي، حان لينشانداردىڭ الدىڭعى ٴۇش ورىندى يەلەۋىمەن جۇڭگو ۋاكىلدەر قۇراماسىنىڭ ٴبىر كەزەكتە العان مەدال سانى تاريحي رەكوردى جاڭالادى.
بۇل جارىس الاڭىندا تاعى ٴبىر تاريح جاراتىلدى. ەرلەردىڭ قيا بەتتە كەدەرگىدەن ٴوتۋ شەبەرلىگى جارىسىندا تايلاند شەبەرى پاۋل حەنري ۆيەر قولا مەدال الدى، بۇل تايلاند ۋاكىلدەر قۇراماسىنىڭ ازيا قىسقى سپورت جارىسى تاريحىندا العان تۇڭعىش مەدالى. ىستىق بەلدەۋ وڭىرىندەگى تايلاندتان كەلگەن شەبەردىڭ سيلىق مىنبەسىنە شىعۋى قار ـ مۇز سپورتىنىڭ ازياداعى بارعان سايىن كوپ مەملەكەت پەن وڭىردە قارىشتاپ دامىعان جاعدايىن ايگىلەدى.
قازاقستان كومانداسى سول كۇنى 2 التىن مەدال الدى، قىسقى ەكى ٴتۇر بويىنشا ەرلەردىڭ 10 كيلومەترلىك قىسقا ارالىقتى تۇرىنەن التىن، كۇمىس مەدال الۋدان سىرت، قاردا ەركىن سىرعاناۋ بويىنشا ەرلەردىڭ كەڭىستىكتەگى شەبەرلىگى ەكى ادامدىق قادامداس جارىسىندا رومان يۆانوۆ \ شەرزود قاشيربويەۆتىڭ ەڭ سوڭعى سەكىرۋدە ونەرلەرىن كەمەلدى ساۋلەلەندىرىپ، ەكى جۇپ جۇڭگو شەبەرلەرىنەن اسىپ ٴتۇسىپ، اعا جۇلدەگەرلىكتى جەڭىپ الۋى جۇرتتى تاڭ قالدىردى. ايەلدەردىڭ كەڭىستىكتەگى شەبەرلىگى ەكى ادامدىق قادامداس جارىسىندا جۇڭگو قۇراماسى فىڭ جۇنشي \ ۋاڭ شۋە، چىن مەيتيڭ \ شۇي مىڭتاۋ اعا جۇلدەگەرلىكتى، جۇلدەگەرلىكتى وپ ـ وڭاي جەڭىپ الدى.
جۇڭگو مۇزدا تەز سىرعاناۋ كومانداسى جارىستى تابىستى اياقتاتتى، سول كۇنى 4 التىن مەدالدى تۇگەلدەي جۇڭگو كومانداسى الدى. نيڭ جۇڭيان مەن حان مەي جەكە ـ جەكە ەرلەردىڭ، ايەلدەردىڭ 1000 مەترلىك تۇرىنەن التىن مەدالعا يە بولدى، جۇڭگو كومانداسى تاعى ەرلەردىڭ، ايەلدەردىڭ توپتىق قۋالاما تۇرىنەن اعا جۇلدەگەر بولدى. وسى كەزەكتى ازيا قىسقى سپورت جارىسىندا جۇڭگو تەز سىرعاناۋ كومانداسى جالپى 11 التىن مەدال الدى.
2 ـ ايدىڭ 11 ـ كۇنىنە دەيىن جۇڭگو كومانداسى 27 التىن مەدال، 23 كۇمىس مەدال، 20 قولا مەدال الىپ، 1 ـ ورىندى يەلەدى، كورەيا كومانداسى 12 التىن مەدال، 12 كۇمىس مەدال، 11 قولا مەدالمەن 2 ـ ورىندا، جاپونيا كومانداسى 5 التىن مەدال، 6 كۇمىس مەدال، 10 قولا مەدالمەن 3 ـ ورىندا تۇر.
