جۇڭگو تەز سىرعاناۋ قۇراماسى تاعى 2 التىن مەدال الدى
شينجياڭدىق قىز ـ جىگىتتەر كەرەمەت
انار بۇلت \ شينجياڭ گازەتىنىڭ ٴتىلشىسى حۋاڭ شيڭ 2 ـ ايدىڭ 11 ـ كۇنى حاربيننەن حابارلايدى. 2 ـ ايدىڭ 11 ـ كۇنى حيلۇڭجياڭ ولكەسى مۇز ٴۇستى جاتتىعۋ ورتالىعىنىڭ تەز سىرعاناۋ سارايىنان جەڭىس حابارى جەتتى: 9 ـ كەزەكتى ازيا قىسقى سپورت جارىسىنىڭ تەز سىرعاناۋ ەرلەر توپتىق قۋالاما جارىسىندا قاناعات مۇقامەت مەملەكەت كومانداسىنداعى سەرىكتەرى ليۋ حانبينمەن، ۋ يۇيمەن قول ۇستاسا جارىسقا شىعىپ، 3 مينۋت 45 سەكۋند 94 تاقىلدىق ناتيجەمەن جۇڭگو كومانداسىنا التىن مەدال اپەردى. سوڭىنان ايەلدەر توپتىق قۋالاما جارىسىندا اقنار اداق پەن سەرىكتەرى حان مەي، ياڭ بينيۇي ەرەكشە سەلبەسىپ، 3 مينۋت 2 سەكۋند 75 تاقىلدىق ناتيجەمەن جۇڭگو كومانداسىنا تاعى ٴبىر التىن مەدال اپەردى.
قاناعات مۇقامەت 1999 ـ جىلى 8 ـ ايدا التاي قالاسىندا تۋعان. 2024 ـ جىلى 3 ـ ايدىڭ 21 ـ كۇنى مەملەكەتتىك تەز سىرعاناۋ اعا جۇلدەگەرلىككە تالاسۋ جارىسىندا ەرلەر 5000 مەتر تۇرىندە اعا جۇلدەگەرلىكتى جەڭىپ الادى. وسى كەزەكتى ازيا قىسقى سپورت جارىسىنىڭ مۇزدا تەز سىرعاناۋ ەرلەر 5000 مەترلىك جارىسىندا ول 6 مينۋت 31 سەكۋند 54 تاقىلدىق ناتيجەمەن قولا مەدال الدى. وسى توپتىق التىن مەدال ونىڭ وسى كەزەكتى ازيا سپورت جارىسىندا قول جەتكىزگەن ەكىنشى مەدالى.
اقنار اداق 1999 ـ جىلى 6 ـ ايدا سانجى حۇيزۋ اۆتونوميالى وبلىسى قۇتىبي اۋدانىندا تۋعان، قازىر تيانجيندە تىركەلگەن. ول بۇرىن تالاي رەت مەملەكەتتىك جارىستاردا اعا جۇلدەگەر بولعان ٴارى جۇڭگو اتىنان بەيجيڭ 2022 ـ جىلعى قىسقى وليمپيادا سپورت جارىسىنا قاتىناسقان.
2 ـ ايدىڭ 11 ـ كۇنىنە دەيىن جۇڭگو دەنە تاربيە ۋاكىلدەر قۇراماسى وسى كەزەكتى ازيا قىسقى سپورت جارىسىندا 27 التىن مەدال، 23 كۇمىس مەدال، 20 قولا مەدال الىپ، ٴار كەزەكتى ازيا قىسقى سپورت جارىسىنا قاتىناسقانداعى ەڭ تاماشا ناتيجەنى جاراتتى. مۇنىڭ ىشىندە شينجياڭنىڭ قار ـ مۇز ساڭلاقتارى 4 التىن مەدال، 2 كۇمىس مەدال، 4 قولا مەدال الۋ سىندى تاڭداۋلى ۇلەس قوستى.
