32 التىن مەدال
جۇڭگونىڭ التىن مەدال سانى ٴبىر ۋاكىلدەر ۇيىرمەسىنىڭ ٴبىر كەزەكتى ازيا قىسقى سپورت جارىسىنداعى التىن مەدال رەكوردىمەن تەڭەستى
شينحۋا اگەنتتىگىنىڭ 2 ـ ايدىڭ 13 ـ كۇنى حاربيننەن بەرگەن حابارى (تىلشىلەر ۋاڭ حىڭجى، يۋە ۋىنۋان). حاربين ازيا قىسقى سپورت جارىسىندا 2 ـ ايدىڭ 13 ـ كۇنى 6 التىن مەدال تاراتىلدى، جۇڭگو كومانداسى قىسقى ەكى ٴتۇر بويىنشا ايەلدەر 6×4 كيلومەترلىك ۇتىلامالى جارىسىندا التىن مەدال الدى، التىن مەدال جالپى سانى 32گە جەتىپ، قازاقستان كومانداسىنىڭ 2011 ـ جىلعى استانا _ الماتى ازيا قىسقى سپورت جارىسىندا جاراتقان ٴبىر كەزەكتەگى التىن مەدال سانى رەكوردىمەن تەڭەستى.
قىسقى ەكى تۇردەگى جارىس الاڭىندا تاڭ جيالين، ۋىن يىڭ، چۋ يۋانمىڭ، مىڭ فانچيدەن قۇرالعان جۇڭگو كومانداسى جۇڭگو ۋاكىلدەر قۇراماسىنىڭ سول كۇنگى بىردەن ـ ٴبىر التىن مەدالىن الدى. جارىس باستالعاندا ٴتيىمسىز ورىندا قالعان جاعدايدا، جۇڭگو كومانداسى ەڭ سوڭعى ساتتە كورەيا كومانداسىنان اسىپ ٴتۇسىپ، 21 سەكۋندتىق باسىمدىقپەن اعا جۇلدەگەر بولدى، ەڭ سوڭعى تاياقتى ۇستاعان مىڭ فانچي جارىستان كەيىن بىلاي دەدى: ”ەڭ سوڭعى تاياقتىڭ قىسىمى، شىنىندا، وتە زور بولدى، ٴبىراق ىشتەي جەڭىلىسكە مويىنسال بولمايمىن دەگەن جىگەرمەن، ناتيجە قالاي بولسا دا، ەڭ سوڭىنا دەيىن كۇرەسۋدى ويلادىم“.
جاپونيا كومانداسى ەرلەر 7.5×4 كيلومەترلىك ۇتىلامالى جارىسىندا التىن مەدال الدى، جۇڭگو كومانداسى قولا مەدال الدى.
قار ٴۇستى جارىس تۇرلەرى 2 ـ ايدىڭ 13 ـ كۇنى اياقتادى. بوران سەبەبىنەن بۇرىنعى جوسپارداعى سىڭار تاقتايمەن سىرعاناۋ U فورمالى الاڭنىڭ شەبەرلىك شەشۋشى جارىسى كۇشىنەن قالدىرىلىپ، ەڭ سوڭىندا دايىندىق جارىس ناتيجەسى بويىنشا مەدال يەگەرلەرىنىڭ رەت ٴتارتىبى بەلگىلەندى. كورەيا مەن جاپونيا شەبەرلەرى جەكە ـ جەكە ەرلەر، ايەلدەر گرۋپپاسى بويىنشا اعا جۇلدەگەر بولدى، جۇڭگو كومانداسىنداعى ۋ شاۋتۇڭ ايەلدەر گرۋپپاسى بويىنشا قولا مەدال الدى.
مۇز شاۋگىم جارىسىنىڭ جارتىلاي شەشۋشى جارىسى اياقتاپ، جۇڭگو ايەلدەر كومانداسى 5كە قارسى 2 ۇپايمەن جاپونيا كومانداسىن جەڭىپ، كورەيا كومانداسىمەن اعا جۇلدەگەرلىككە تالاساتىن بولدى، مۇنىڭ جۇڭگو ۋاكىلدەر قۇراماسىنىڭ ەڭ سوڭعى التىن مەدالعا تالاسۋ ٴتۇيىنى بولۋ مۇمكىندىگى كۇشتى؛ ال ەرلەر كومانداسى 6عا قارسى 7 ۇپايمەن فيليپپين كومانداسىنان ۇتىلىپ، جۇڭگو شياڭگاڭ كومانداسىمەن قولا مەدالعا تالاساتىن بولدى.
جۇڭگو ەرلەر، ايەلدەر مۇز دوپ كومانداسى سول كۇنى بىردەي قازاقستان كومانداسىنان جەڭىلدى، ەرلەر كومانداسى شەشۋشى جارىسقا قاتىناسۋ ورايىنا يە بولا المادى، ايەلدەر كومانداسى اينالما جارىستا ۋاقىتشا 3 ـ ورىندى يەلەدى، التىن مەدالعا تالاسۋدان ٴۇمىت از.
مانەرلەپ سىرعاناۋ جارىسى سول كۇنى اياقتادى، كورەيا شەبەرلەرى ەرلەر، ايەلدەر جەكە سىرعاناۋ تۇرىندە التىن مەدال الدى. جۇڭگو كومانداسىنداعى داي دا ـ ۋي ەرلەر جەكە سىرعاناۋ تۇرىندە 4 ـ بولدى، جۋ ي مەن ان شياڭي ايەلدەر جەكە سىرعاناۋ تۇرىندە جەكە ـ جەكە 5 ـ، 6 ـ بولدى.
باسەكە الاڭىنداعى تەبىرەنۋ دايىم مەدالمەن عانا شەكتەلمەيدى. مالايزيادان كەلگەن ”ساقا ساڭلاق“ لو چۇنحۇڭ مانەرلەپ سىرعاناۋ ەرلەر جەكە جارىسىندا سوڭىنان ساناعاندا 2 ـ ورىندى يەلەدى، ٴبىراق ول سوندا دا قاتتى قۋاندى. ەندى 2 كۇننەن كەيىن 30 جاسقا تولاتىن ول تۇڭعىش رەت ”وسىنشاما ۇلكەن الاڭعا“ شىقتى، سونداي ـ اق تۇڭعىش رەت سونشاما جاقىن ارالىقتان شەبەرلەردىڭ جارىسىن كوردى، ول بىلاي دەدى: ”تەك سىرعاناي السام بولعانى سىرعاناي بەرەمىن، اياقتاتۋدى ويلاعان ەمەسپىن“.
2 ـ ايدىڭ 13 ـ كۇنىنە دەيىن جۇڭگو كومانداسى 32 التىن مەدال، 26 كۇمىس مەدال، 24 قولا مەدال الىپ، مەدال تاقتاسىندا ٴبىرىنشى ورىندى يەلەدى، كورەيا كومانداسى 15 التىن مەدال، 14 كۇمىس مەدال، 13 قولا مەدالمەن 2 ـ ورىندا، جاپونيا كومانداسى 9 التىن مەدال، 11 كۇمىس مەدال، 14 قولا مەدالمەن 3 ـ ورىندا تۇردى.
