تيانشان تورى - شينجياڭ گازەتىنىڭ حابارى (ٴتىلشى حۋاڭ شيڭ حابارلايدى). 2 ـ ايدىڭ 12 ـ كۇنى 9 ـ كەزەكتى ازيا قىسقى سپورت جارىسىنا قاتىناسقان جۇڭگو دەنە تاربيە ۋاكىلدەر ۇيىرمەسىندەگى شينجياڭنان كەلگەن 8 سپورتشىنىڭ جارىسى تۇگەلدەي اياقتادى، مۇنىڭ ىشىندە 2 شەبەر جۇڭگو قۇراماسىنا تاعى 2 التىن مەدال اپەردى.
24 جاستاعى دىلنيگار شات كوڭىلمەن التىن مەدالدى كۇتۋدە. سۋرەت شينحۋا اگەنتتىگىنەن
وسى كۇنى 19 جاستاعى بۇلۇر شاڭعىمەن تاۋعا شىعۋ نىسانىنىڭ ارالاس ۇتىلامالى جارىسىندا سەرىگىمەن سايكەسىپ، ٴوزىنىڭ 2 ـ التىن مەدالىن الدى. 24 جاستاعى دىلنيگار يىلھامجان دالالىق قار شاڭعى ايەلدەر 4✕5 كيلومەترلىك ۇتىلامالى جارىسىندا مەملەكەتتىك كومانداداعى سەرىكتەرىمەن قول ۇستاسا اعا جۇلدەگەر بولىپ، ٴوزىنىڭ ازيا قىسقى سپورت جارىسىنداعى 3 ـ مەدالىن، ازيا قىسقى سپورت جارىسىنداعى تۇڭعىش التىن مەدالىن الدى.
سول كۇنى تۇستەن بۇرىن الدىمەن اياقتاعان دالالىق قار شاڭعى ايەلدەر 5✕4 كيلومەترلىك ۇتىلامالى جارىسىندا التايلىق بويجەتكەن دىلنيگار مەن مەملەكەتتىك كومانداداعى سەرىكتەرى چى چۇنشۋە، لي لەي، چىن ليڭشۋاڭ 53 مينۋت 59 سەكۋند 3 تاقىلدىق ناتيجەمەن اعا جۇلدەگەر بولدى. بۇدان بۇرىن دالالىق قار شاڭعى ايەلدەر جەكە قىسقا ارالىقتى (ٴداستۇرلى شەبەرلىك) جانە ايەلدەردىڭ 5 كيلومەترلىك (ەركىن شەبەرلىك) جارىسىندا العان ٴبىر قولا مەدالى مەن ٴبىر كۇمىس مەدالىن قوسقاندا، دىلنيگار وسى كەزەكتى ازيا قىسقى سپورت جارىسىندا جالپى ٴبىر التىن مەدال، ٴبىر كۇمىس مەدال، ٴبىر قولا مەدال الىپ، وسى كەزەكتى ازيا قىسقى سپورت جارىسىندا ەڭ كوپ مەدال العان شينجياڭ قار ـ مۇز ساڭلاعى بولدى.
شاڭعىمەن تاۋعا شىعۋ نىسانىنىڭ ارالاس ۇتىلامالى جارىسىندا بۇلۇر مەن مەملەكەتتىك كومانداداعى سەرىگى سىدان يۇيجىن قۇراماسى اعا جۇلدەگەر بولدى. بۇلۇر جالپىلىق حالىقارالىق جارىستا 2 التىن مەدال العان شينجياڭدىق تۇڭعىش سپورتشى بولدى.
19 جاستاعى بۇلۇر ومىرىندەگى تاعى ءبىر شىڭىنا جىلدام كوتەرىلدى. سۋرەت شينحۋا اگەنتتىگىنەن
شاڭعىمەن تاۋعا شىعۋ قارلى تاۋلى رايوندارداعى تۇرعىنداردىڭ ٴداستۇرلى ٴجۇرىس ـ تۇرىس تاسىلىنەن باستاۋ العان، قارلى تاۋعا شىعۋ جالپىلىق شەبەرلىگىن نەگىز، تاۋ شاڭعىنى قوسىمشا ەتكەن تاۋلى ٴوڭىر قىسقى دالالىق سپورتى. بۇل ميلان قىسقى وليمپيادا سپورت جارىسىنىڭ رەسمي جارىس ٴتۇرى بولعاندىقتان، ازيا قىسقى سپورت جارىسىنىڭ رەسمي جارىس تۇرىنە تۇڭعىش رەت ەنگىزىلدى.
بۇلۇر مەن سىدان يۇيجىن قۇراماسى قازىر جۇڭگو كومانداسىنىڭ وسى تۇردەگى سەركەسى. وسى كەزەكتى ازيا قىسقى سپورت جارىسىندا جۇڭگو كومانداسى جەكە ـ جەكە 4 ەر سپورتشى مەن 4 ايەل سپورتشىنى شاڭعىمەن تاۋعا شىعۋ نىسانىنا قاتىناسۋعا جىبەردى ٴارى ەرلەر، ايەلدەر جانە ارالاس ۇتىلامالى سىندى 3 تۇردە بارلىق التىن مەدالدى ٴساتتى جەڭىپ الدى.
سول كۇنى سىڭار تاقتايمەن سىرعاناۋ ەرلەر U فورمالى الاڭ شەبەرلىك جارىسىندا وتكەن ايدا عانا دۇنيە جۇزىلىك اعا جۇلدەگەر بولعان ۋاڭ زىياڭ جارالانىپ قالدى.
2 ـ ايدىڭ 12 ـ كۇنىنە دەيىن جۇڭگو دەنە تاربيە ۋاكىلدەر ۇيىرمەسىندەگى شاڭعىمەن تاۋعا شىعۋ سپورتشىسى بۇلۇر، دالالىق قار شاڭعى سپورتشىسى دىلنيگار يىلھامجان، بايان جالىن، سامعار سەرىك، تەز سىرعاناۋ سپورتشىسى تيان رۇينيڭ، قاناعات مۇقامەت، اقنار اداق (تيانجينگە تىركەلگەن)، سىڭار تاقتايمەن سىرعاناۋ سپورتشىسى ۋاڭ زىياڭ (بەيجيڭگە تىركەلگەن) قاتارلى شينجياڭنىڭ 8 قار ـ مۇز ساڭلاعىنىڭ وسى كەزەكتى ازيا قىسقى سپورت جارىسىنداعى بارلىق جارىسى اياقتادى، ولار جۇڭگو ۋاكىلدەر ۇيىرمەسىنە جيىنى 6 التىن، 2 كۇمىس، 4 قولا مەدال الىپ بەردى.
ازيا قىسقى سپورت جارىسى اياقتاعاننان كەيىن دە وسى جارىس ماۋسىمىنداعى جارىستار اياقتاي قويمايدى. مەملەكەتتىك كوماندانىڭ ٴارقايسى تارماق كوماندالارى ٴسال تىنىعىپ رەتتەلگەننەن كەيىن دۇنيە ٴجۇزىنىڭ جەر ـ جەرىنە بارىپ ٴتۇرلى حالىقارالىق جارىستارعا قاتىناسادى.
