شينجياڭ - حيلۇڭجياڭ قار ـ مۇز سەلبەستىگىنىڭ بولاشاعى نۇرلى
2 ـ ايدىڭ 13 ـ كۇنى، ازيا قىسقى سپورت جارىسىنىڭ سىڭار تاقتايمەن سىرعاناۋ U فورمالى الاڭى شەتىندە ۇيىرمە باستاپ وسى جولعى ازيا قىسقى سپورت جارىسىن حابارلاپ جاتقان حيلۇڭجياڭ گازەتى مەكەمەسى مادەنيەت ـ ساياحات، دەنە تاربيە ٴبولىمىنىڭ ورىنباسار مەڭگەرۋشىسى لي شي: ”دىلنيگار كەزىندە بەيجيڭ قىسقى وليمپيادا سپورت جارىسىنىڭ الاۋىن تۇتاندىرعان، بۇلۇر وسى كەزەكتى ازيا قىسقى سپورت جارىسىندا 2 التىن مەدال الدى. ولاردىڭ تالىقپاس قۇلشىنىسى شينجياڭنىڭ ازيا قىسقى سپورت جارىسىندا مەدال الا الماۋ جاعدايىن وزگەرتتى ٴارى قايسارلىقپەن سايىساتىن دەنە تاربيە رۋحىن ايگىلەدى“، ـ دەپ شينجياڭنان كەلگەن قار ـ مۇز ساڭلاقتارىنىڭ داڭقىن ەگجەي ـ تەگجەيلى بايانداپ جاتتى.
وسى كەزەكتى ازيا قىسقى سپورت جارىسىندا شينجياڭنان كەلگەن 8 قار ـ مۇز ساڭلاعى جۇڭگو ۋاكىلدەر ۇيىرمەسىنە 6 التىن، 2 كۇمىس، 4 قولا مەدال اپەردى. شينجياڭ مەن حيلۇڭجياڭ جۇڭگو قار ـ مۇزىنىڭ ”ەكى ۇيەگى“ رەتىندە، قىسقى قار ـ مۇز بايلىعى توتەنشە مول، الايدا ەكى جەردىڭ وزىنە ٴتان ەرەكشەلىگى دە بار. شينجياڭدا ازيا بويىنشا ماڭداي الدى شاڭعى الاڭى بار، جەر ـ جەردىڭ سپورتشىلارىن باۋراپ وتىر؛ ال حيلۇڭجياڭدا مۇزدا سىرعاناۋ الاڭى كەڭ تارالعان، ٴتىپتى، دۇنيە جۇزىنە تانىمالى حاربين قار ـ مۇز الەمى بار. ”ەكى جەردىڭ قار ـ مۇز سپورتشىلارى اۋىس ـ كۇيىستى، ىقپالداستىقتى كۇشەيتىپ، بىرلەسكەن جاتتىعۋ لاگەرىن ۇيىمداستىرىپ، ەكى جەردىڭ ابزال بايلىعىنان تولىق پايدالانىپ، سپورتشىلاردىڭ دەڭگەيىن جوعارىلاتۋعا ٴتيىس“، ـ دەدى لي شي.
حاربين گازەتى مەكەمەسىنىڭ ٴتىلشىسى جاڭ كۇنلەي شينجياڭ قار ـ مۇز ساڭلاقتارىنىڭ ناتيجەسىنە باستان ـ اياق نازار اۋدارىپ كەلدى: ”جارىس الاڭىندا شينجياڭدىق سپورتشىلار ايانباي سايىساتىن رۋحپەن الاڭداعى قالىڭ كورەرمەننىڭ جانە مەديالاردىڭ نازارىن اۋداردى. شينجياڭ مەملەكەتتىك 13 ـ كەزەكتى قىسقى سپورت جارىسىن ۇستىنە الىپ وتكىزگەننەن كەيىن، قار ـ مۇز سپورتى بارعان سايىن تەبىندى دامىدى، اسىرەسە، الىس ارالىقتى مۇز ٴۇستى سپورتى جاعىندا قار ـ مۇز دارىندىلارى مولىنان شىعىپ، جۇڭگو قار ـ مۇز سپورتىنىڭ دامۋىنا ماڭىزدى كۇش قوستى“.
حيلۇڭجياڭ ولكەسىنەن شينجياڭعا كومەككە كەلگەن كادر، التاي ايماقتىق مادەنيەت، دەنە تاربيە، راديو ـ تەلەۆيزيا جانە ساياحات مەكەمەسىنىڭ ورىنباسار باستىعى لي يۋانحاۋ دا شينجياڭدىق سپورتشىلاردىڭ ازيا قىسقى سپورت جارىسىنداعى بەينەسىن ٴجىتى قاداعالاپ وتىردى: ”8 سپورتشىنىڭ بەسەۋى التايدان كەلگەن، ولاردىڭ بەينەسى شينجياڭداعى قار ـ مۇزدى سۇيەتىن بالالارعا اسا زور شابىت بەردى“.
قازىر التاي ايماعىندا قار ـ مۇز سپورتى بويىنشا تىركەلگەن 360 جاس ـ ٴوسپىرىم سپورتشى بار. قارىشتاپ دامىعان قار ـ مۇز سپورتىنىڭ جانە قار ـ مۇز ساياحاتىنىڭ دارىندى قاجەتىنەن پايدالانىپ التاي ايماعى كاسىپتىك مەكتەپتەردىڭ ماماندىق بەتالىسىن رەتتەدى. التاي ايماعىنداعى جوعارى، ورتا دارەجەلى 4 كاسىپتىك مەكتەپ سپورتتىق جاتتىعۋ، قار ـ مۇز سپورتى جانە باسقارۋ، قار ـ مۇز قۇرىلعىلارىن كۇتىمدەۋ جانە باسقارۋ، سپورتتىق قورعانۋ قاتارلى قار ـ مۇز بەتالىسىنداعى 7 ماماندىقتى اشتى، مەكتەپتە وقىپ جاتقان وقۋشى 735 ادامعا، مەكتەپ تاۋىسقاندار 228گە جەتتى.
حيلۇڭجياڭ مەن شينجياڭ التاي شينجياڭعا باعىتتامالى كومەكتەسۋ قىزمەتىنىڭ ورىستەتىلۋىندە تەرەڭ اۋىس ـ كۇيىس جاسادى. ”ٴبىز حيلۇڭجياڭ ولكەسىنىڭ ازيا قىسقى سپورت جارىسىن وتكىزۋ ورايىن يگەرىپ، كومەك بەرۋشى جانە كومەك قابىلداۋشى ەكى جاقتىڭ باسىمدىقتارى ارقىلى ٴبىرىن ـ ٴبىرى تولىقتاۋىن، مىقتىلار مەن مىقتىلار بىرلەسۋىن ارقاۋ ەتىپ، ٴبىرسىپىرا قار ـ مۇز ىقپالداستىق قيمىلدارىن جوسپارلاپ ورىستەتىپ، ەكى جەردىڭ قار ـ مۇز اۋىس ـ كۇيىس سەلبەستىگىن ىشكەرىلەي ىلگەرىلەتتىك“، ـ دەدى لي يۋانحاۋ.
حيلۇڭجياڭ ولكەسى قار ـ مۇز سپورتىنداعى قۋاتتى ولكە، جاتتىقتىرۋ جۇيەسى كەمەلدى، جاتتىقتىرۋ تاجىريبەسى مول. ال شينجياڭ، اسىرەسە، التاي ايماعى وزگەشە جاراتىلىستىق شارت ـ جاعدايىنا سۇيەنىپ قار ـ مۇز سپورتشىلارى جاتتىعاتىن تاپتىرماس جەرگە اينالدى. سوڭعى جىلدارى حيلۇڭجياڭ ولكەسى بەلسەندىلىكپەن تاڭداۋلى باپكەرلەردى التاي ايماعىنا جاتتىقتىرۋشى بولۋعا تاڭداپ جىبەرىپ، وزىق جاتتىعۋ ۇستانىمى مەن شەبەرلىكتى جەرگىلىكتى سپورتشىلارعا ۇيرەتتى. وسى باپكەرلەر قىسقا ارالىقتا تەز سىرعاناۋ، مۇزدا تەز سىرعاناۋ، تاۋ شاڭعى، دالالىق شاڭعى سياقتى كوپ تۇرلەردى قامتىدى، ولاردىڭ كەلۋى التاي ايماعىنداعى سپورتشىلاردىڭ جاتتىعۋ ورەسىن بارىنشا جوعارىلاتتى. سونىمەن بىرگە التاي ايماعىنداعى سپورتشىلار دا حيلۇڭجياڭعا بارىپ قىسقا مەرزىمدى جاتتىعۋ جۇرگىزۋ، جوعارى دەڭگەيدەگى سپورتشىلارمەن ٴبىر الاڭدا باسەكەلەسۋ ورايىنا يە بولىپ، ناقتى قۋاتىن تەز ارادا جوعارىلاتتى.
1 - ايدىڭ 14 - كۇنى 2 - كەزەكتى التاي تاۋىن اينالۋ قىسقى سپورت جارىسىنداعى دالالىق شاڭعى ءتۇرىنىڭ ەرلەر، ايەلدەر 10 كيلومەترلىك (كوللەكتيۆ اتتانۋ ەركىن تەحنيكاسى) جارىسى التاي قالاسى سارقوبى دالالىق شاڭعى الاڭىندا باستالدى. (سۋرەتتى تۇسىرگەن: ارداق بەيىسقان)
”ازيا قىسقى سپورت جارىسى باستالاردان بۇرىن التاي ايماعى 2 ـ كەزەكتى التاي تاۋىن اينالۋ قىسقى دەنە تاربيە جارىسىن وتكىزىپ، 4 مەملەكەتتەن كەلگەن 13 ۋاكىلدەر ۇيىرمەسىنىڭ 170تەن استام قار ـ مۇز ساڭلاعى التايدا باس قوستى. بۇدان كەيىن ٴبىز دە حيلۇڭجياڭنىڭ قار ـ مۇز سپورتشىلارىن التايعا ۇسىنىس ەتىپ، التاي تاۋىن اينالۋ قىسقى دەنە تاربيە جارىسىنا قاتىناسىپ، جارىس ارقىلى ەكى جاقتىڭ قار ـ مۇز سپورتىنداعى اۋىس ـ كۇيىسى مەن سەلبەستىگىن جەبەيمىز“، ـ دەدى لي يۋانحاۋ.
شينجياڭ داشۋەسى ساياحات شۋەيۋانى پارتكومىنىڭ ورىنباسار شۋجيى، شۋەيۋان باستىعى شيە شيا بىلاي دەدى: ”قار ـ مۇزدى دانەكەر ەتكەن شينجياڭ مەن حيلۇڭجياڭ بايلانىستى كۇشەيتۋمەن قاتار، توڭىرەكتەگى ەلدەرمەن قار ـ مۇز ەكونوميكالىق سەلبەستىگىن كۇشەيتىپ، قار ـ مۇز گۋمانيتارلىق اۋىس ـ كۇيىسىن ٴار ەل حالقىنىڭ كوڭىلىن بايلانىستىراتىن بەرىك كوپىرگە اينالدىرىپ، ٴوڭىردىڭ باياندى ورنىقتىلىعىنا جانە دامۋىنا تاماشا گۋمانيتارلىق ورتا جاراتىپ، ەلىمىزدىڭ قار ـ مۇز ەكونوميكاسىنىڭ حالىقارالىق سەلبەستىك تولقىنىندا قارىشتاپ دامۋىن ىلگەرىلەتىپ، وزگەشە باۋرامدىلىعى مەن قۇنىن ايگىلەۋگە ٴتيىس“.
