شينجياڭ سپورتشىلارى ازيا قىسقى سپورت جارىسىنداعى ەڭ جاقسى ناتيجەگە قول جەتكىزدى
تيانشان تورى - شينجياڭ گازەتىنىڭ حابارى (ٴتىلشى حۋاڭ شيڭ حابارلايدى). 2 ـ ايدىڭ 14 ـ كۇنى 9 ـ كەزەكتى ازيا قىسقى سپورت جارىسى حاربيندە تابىسپەن اياقتادى. جۇڭگو دەنە تاربيە ۋاكىلدەر ۇيىرمەسى 32 التىن، 27 كۇمىس، 26 قولا مەدال الۋداي ناتيجەمەن تاريحتاعى ەڭ جاقسى ناتيجەنى جاراتتى.
وسى كەزەكتى جارىستا جۇڭگو دەنە تاربيە ۋاكىلدەر ۇيىرمەسىندە شاڭعىمەن تاۋعا شىعۋ سپورتشىسى بۇلۇر، دالالىق قار شاڭعى سپورتشىسى دىلنيگار يىلھامجان، بايان جالىن، سامعار سەرىك، مۇزدا تەز سىرعاناۋ سپورتشىسى تيان رۇينيڭ، قاناعات مۇقامەت قاتارلى شينجياڭدىق 6 سپورتشى جارىسقا قاتىناسىپ، وسى كەزەكتى ازيا قىسقى سپورت جارىسىندا 5 التىن، 2 كۇمىس، 4 قولا مەدال الۋداي ۇزدىك ناتيجەگە قول جەتكىزدى.
9 ـ كەزەكتى ازيا قىسقى سپورت جارىسىندا تيان رۇينيڭ ەكى مەدالعا يە بولدى. سۋرەت شينحۋا اگەنتتىگىنەن
”كوپ جىلدان بەرى، اۆتونوميالى رايوندىق پارتكوم مەن ۇكىمەت شينجياڭ قار ـ مۇز كاسىپ سالاسىن جانە قار ـ مۇز سپورتىن دامىتۋعا ايرىقشا ٴمان بەردى. شينجياڭ دەنە تاربيەشىلەرىنىڭ قاجىماي قۇلشىنىس جاساۋىندا بارعان سايىن جاقسارىپ، تاريحي سيپاتتى تىڭ تابىسقا قول جەتكىزدىك. ٴبىز اسقاقتاۋشىلىقتان جانە ۇشقالاقتىقتان ساقتانىپ، كەمشىلىككە ٴۇڭىلىپ، باسىمدىقتى ساۋلەلەندىرىپ، جالعاستى شۇعىلالى ناتيجە جاراتۋعا ۇمتىلامىز“، ـ دەدى اۆتونوميالى رايوندىق دەنە تاربيە مەكەمەسى پارتيا باسشىلىق گرۋپپاسىنىڭ شۋجيى شاڭ حۇڭبو.
وسى كەزەكتى ازيا قىسقى سپورت جارىسىنان بۇرىن شينجياڭدا ليۋ يانفي، جۋ جيافان جانە راقىمباي تالاپقان سىندى 3 تەز سىرعاناۋ سپورتشىسى ازيا قىسقى سپورت جارىسىنا 3 كەزەك قاتىناسىپ، ەڭ جاقسى ناتيجەسى 4 ـ ورىن بولعان ەدى.
وسى رەتكى جارىستا شينجياڭ سپورتشىلارى ٴار كەزەكتى حالىقارالىق كەشەندى سپورت جارىسى بويىنشا جۇڭگو دەنە تاربيە ۋاكىلدەر ۇيىرمەسىنە اپەرگەن التىن مەدال جانە مەدال سانىندا رەكورد جاراتتى. شاڭعىمەن تاۋعا شىعۋ، دالالىق قار شاڭعى، مۇزدا تەز سىرعاناۋ جارىس تۇرىندە شينجياڭ ەل ىشىندە ەڭ وزىق دەڭگەيدەگى ناقتى كۇشىن ازىرلەدى.
مۇنىڭ ىشىندە 19 جاستاعى بۇلۇر وسى كەزەكتى ازيا قىسقى سپورت جارىسىنىڭ شاڭعىمەن تاۋعا شىعۋ جارىس تۇرىندە 2 التىن مەدال الىپ، كەشەندى حالىقارالىق جارىستا 2 التىن مەدال العان شينجياڭدىق تۇڭعىش سپورتشىعا اينالدى. شاڭعىمەن تاۋعا شىعۋ جارىس تۇرىندە شينجياڭ شەبەرلەرى قۋاتتى توپتىق باسىمدىعىن كورسەتتى.
9 ـ كەزەكتى ازيا قىسقى سپورت جارىسىندا 19 جاستاعى بۇلۇر قاتارىنان ەكى التىن مەدالدى قانجىعالادى. سۋرەت شينحۋا اگەنتتىگىنەن
دالالىق قار شاڭعى جارىس تۇرىندە بايان مەن دىلنيگار ايەلدەردىڭ دالالىق قار شاڭعى سالاسىندا توپتىق باسىمدىق قالىپتاستىردى. 20 جاستاعى جاس ساڭلاق سامعار ەرلەردىڭ دالالىق قار شاڭعىسىندا بەرتىندە كوزگە تۇسكەن ساڭلاققا اينالدى. وسى كەزەكتى ازيا قىسقى سپورت جارىسىندا شينجياڭدىق 3 دالالىق قار شاڭعى شەبەرى جيىنى 2 التىن، ٴبىر كۇمىس، 2 قولا مەدال الدى. دىلنيگار 3 مەدال الىپ، كەشەندى حالىقارالىق جارىستا جۇڭگو دەنە تاربيە ۋاكىلدەر ۇيىرمەسىنە التىن، كۇمىس، قولا مەدالدى تولىعىمەن اپەرگەن شينجياڭدىق تۇڭعىش سپورتشىعا اينالدى.
9 ـ كەزەكتى ازيا قىسقى سپورت جارىسىندا، دىلنيگار جالعىز ءوزى 3 مەدالعا يە بولدى. سۋرەت شينحۋا اگەنتتىگىنەن
مۇزدا تەز سىرعاناۋ سپورتشىسى تيان رۇينيڭ مەن قاناعات جەكە ـ جەكە ايەلدەردىڭ قىسقا ارالىقتا جانە ەرلەردىڭ ۇزاق ارالىقتا سىرعاناۋى سالاسىندا باسىم كۇشىن ايگىلەپ، شينجياڭدىق تەز سىرعاناۋشىلاردىڭ 35 جىل كۇتكەن ازيا قىسقى سپورت جارىسىندا مەدال الۋ ارمانىن ورىندادى. ەكەۋى جيىنى ٴبىر التىن، ٴبىر كۇمىس، 2 قولا مەدال الۋ سىندى ۇزدىك ناتيجەگە قول جەتكىزدى.
قازىر اۆتونوميالى رايوندىق دەنە تاربيە مەكەمەسى «اۆتونوميالى رايوننىڭ قار ـ مۇز سپورتىن جوعارى ساپالى دامىتۋ ارقىلى قار ـ مۇز ەكونوميكاسىنىڭ ومىرشەڭ كۇشىن قاۋلاتۋ جونىندەگى اتقارۋ جوباسىنىڭ» تالاپتارىن ٴتۇيىندى تۇردە تياناقتاندىرىپ، جاستار مەن ورەندەرگە قار ـ مۇز سپورتىن جالپىلاستىرۋ اياسىن اناعۇرلىم كەڭەيتىپ، كاسىپتىك قار ـ مۇز سپورتى دارىندىلارىن باۋلۋ تەبىنىن كۇشەيتىپ، شينجياڭ قار ـ مۇز ساڭلاقتارىنىڭ بولاشاقتا حالىقارالىق ٴىرى جارىستاردا ٴتىپتى جاقسى ناتيجەگە قول جەتكىزۋىنە دەم بەرۋدە.
9 - كەزەكتى ازيا قىسقى سپورت جارىسىندا بايان شينجياڭ سپورتشىلارىنىڭ ازيا سپورت جارىسىنداعى تۇڭعىش التىن مەدالىنا يە بولدى. سۋرەت شينحۋا اگەنتتىگىنەن
”باسەكەلىك دەنە تاربيە — قاجىماي كۇش سالاتىن قىزمەت، نەگىزگى ساتىدا جاستاردى جاتتىقتىرۋدى جانە جالپىلاستىرۋدى مۇقيات يگەرۋ — شينجياڭ قار ـ مۇز سپورتىن دامىتۋداعى ماڭداي الدى قىزمەت ٴارى شينجياڭ قار ـ مۇز سپورتى بولاشاق دامۋىنىڭ مىعىم نەگىزىن بەكەمدەيدى“، ـ دەدى شاڭ حۇڭبو.
