انار بۇلت \ شينجياڭ گازەتىنىڭ ٴتىلشىسى باي سۋجۇن
2 ـ ايدىڭ 11 ـ كۇنى، قىزمەتتەن قايتىپ ٴبىر جارىم ساعات دەگەندە ابۋگە ۋاڭ ياۋيدەن تەلەفون كەلدى. ۋاڭ ياۋي ەسىكتەن كىرگەن زامان ٴابۋ مەن شەشەسى ونىڭ الدىنان شىعىپ، ۇشەۋى ىستىق ىقىلاسپەن قۇشاقتاستى. سوڭىنان اس ۇيگە كىرىپ تاڭيۋان پىسىرۋ قامىنا كىرىستى.
ٴابۋدىڭ تولىق اتى ابليكىم ۇرايىم، بيىل 24 جاستا، ٴۇيى قاشقار ايماعى كونەشار اۋدانىندا، قازىر كۇيتۇن قالاسىندا سۋرەت سالۋ دۇكەنىن اشادى. 34 جاستاعى ۋاڭ ياۋي كۇيتۇن قالاسى بەيجيڭ جولى ٴمالىسى ٴۇيسىن الەۋمەتتىك اۋماعى پارتيا باس ياچەيكاسىنىڭ شۋجيى.
”اپەكە، ٴسىزدىڭ ۇيگە كەلىپ مەرەكەنى بىزبەن بىرگە وتكىزگەنىڭىزگە قاتتى قۋانىشتىمىن. شەشەم بۇگىن سىزگە ارنايى كۇرىش كەسپە قۋىرماشىن دايىندادى“. ٴابۋ سويلەي ٴجۇرىپ ۋاڭ ياۋيگە ٴبىر شىنى كۇرىش كەسپە قۋىرماشىن ۇسىندى، قاسىندا وتىرعان شەشەسى ۋاڭ ياۋيگە تاماقتى ىستىقتاي جەۋدى ايتتى.
ۇيدەن شات كۇلكى داۋىسى ەستىلدى...
ٴابۋ تىلشىگە بىلاي دەدى: شەشەم ەكەۋىمىز ۋاڭ ياۋيدىڭ قىزمەتىنىڭ قاربالاس ەكەندىگىن بىلەمىز، يۋانشياۋ مەرەكەسىندە الەۋمەتتىك اۋماقتا مەرەكەگە ارنالعان ويىن ـ ساۋىق وتكىزىلەدى، سوندىقتان ول كۇنى بۇرىن بىزگە سەرىك بولىپ مەرەكەنى وتكىزۋگە كەلدى.
ٴابۋ ۋاڭ ياۋيگە 4 سىزبا سۋرەت ۇسىندى، وندا ماي بوياۋلى سۋرەت تە، جاي سىزبا سۋرەت تە بار، الايدا ٴابۋ ٴۇشىن بۇلار ازدىق ەتەدى، ”قىل قالاممەن اپەكەمنىڭ بەت الپەتىن سىزا العانىممەن، ونىڭ اق پەيىلىن جانە اشىق ـ جارقىن مىنەزىن بەينەلەي المايمىن. ٴار جولى الەۋمەتتىك يگىلىك ىستەرىن ىستەگەنىمدە، جۇرەگىم تەبىرەنىسكە تولادى، مۇنىڭ بارلىعى ونىڭ ىقپالى“.
2024 ـ جىلى 6 ـ ايدا ٴابۋ شينجياڭ قولدانىلمالى كاسىپتىك تەحنولوگيا شۋەيۋانى اسەمونەرلىك تاربيە ماماندىعىنان وقۋ تاۋىستى. باستابىندا ول ساباقتاستارىمەن بىرگە جالعا بەرىلگەن تار بولمەدە تۇردى. ول كۇندىز كوشەدە جايما جايىپ سۋرەتتەرىن ساتسا، كەشتە دوسىنا كومەكتەسىپ الەۋمەتتىك نومىردە قىزمەت ىستەدى. ٴبىر ايدان كەيىن ساباقتاسى قاشقارداعى اكە ـ شەشەسىنىڭ جانىنا كوشىپ كەتتى.
قالتاسىندا نەبارى 900 يۋان عانا قالعان ٴابۋ الداعى بىرنەشە ايداعى ٴۇي ماياقىسىن دا تولەي المايتىندىعىنا بولا قاتتى قاپالاندى، 4 جىلدىڭ الدىندا ناۋقاستان قايتىس بولعان اكەسىن، وسى جىلدارى ناۋقاستانىپ جۇرسە دە ٴوزىن وقىتىپ كەلگەن شەشەسىن ويلاپ، ول ٴبىر مەزگىل قايتەرىن بىلمەي قورعانسىز كۇيدە قالعان ەدى.
ٴابۋ الەۋمەتتىك اۋماققا بارىپ سۋرەت سىزۋدى نەمەسە اسحاناعا بارىپ جۇمىس ىستەپ، تاماق جانە جاتاق ورىنمەن قامدايتىن ورىن تاۋىپ، الدىمەن تياناقتاي تۇراتىن جەر ىزدەۋدى جوسپارلادى. ول ٴاربىر الەۋمەتتىك اۋماقتى ارالاپ، اسحانالاردان سۇراستىرعاندا، ادام قابىلدامايمىز دەگەن جاۋاپ الدى. ”سول كەزدە ابىرجىعانىمنان كەشتەرى ۇيىقتاي المادىم. ەگەر ۇيگە قايتسام، شەشەمە ىلەسىپ ەگىن سالامىن نەمەسە سول ماڭنان جۇمىس تاۋىپ ىستەيمىن“. ٴابۋ ٴوزىنىڭ سۋرەت سالۋ ونەرىن تاستاعىسى كەلمەيتىنىن ايتتى.
2024 ـ جىلى 7 ـ ايدىڭ 2 ـ كۇنى ٴابۋ ٴۇيسىن الەۋمەتتىك اۋماعىنا باردى، ونى كۇتىپ العان الەۋمەتتىك اۋماقتىڭ كادرى ونى ۋاڭ ياۋيدىڭ كەڭسەسىنە باستاپ باردى، ٴابۋ ٴوزىنىڭ قازىرگى قيىنشىلىعى مەن بولاشاق جونىندەگى ويىن ايتتى. ”ۋاڭ شۋجيدىڭ مەنى سابىرلىلىقپەن كۇتىپ الارىن ويلاماعان ەدىم. ەرتەسى ول قىزمەتتەسىمەن بىرگە ىرگەدەگى ۇساق ـ تۇيەك زاتتار ۇيىلگەن بولمەنى تازالاپ، اۋاشالادى. تۇستەن كەيىن مەنى باستاپ سول ماڭنان ٴۇي ىزدەدى“. ٴابۋ ٴبىر اپتادان كەيىن ٴوزىنىڭ الەۋمەتتىك جالعا بەرىلەتىن ۇيگە ساتىمەن ٴوتىنىش بەرگەندىگىن ەسكە الدى.
بارلىق شارۋا ورنالاستىرىلىپ بولدى، ٴابۋ الەۋمەتتىك اۋماقتا 55 شارشى مەترلىك سۋرەت بولمەسىنە يە بولدى، سونداي ـ اق جەرگىلىكتى ورىننىڭ جوعارى مەكتەپ تاۋىسقان وقۋشىلاردىڭ شارۋاشىلىق قۇرۋىنا باعىتتالعان ٴتيىمدى ساياساتىنىڭ ارقاسىندا، ٴۇي اقىسىن 6 اي كەشىرىم ەتۋ تيىمدىلىگىنەن يگىلىكتەندى.
ٴابۋ دەن قويا سۋرەت سىزا باستادى، ۋاڭ ياۋي ۋيشين دوستار شەڭبەرى ارقىلى ونىڭ سۋرەتتەرىن ساتۋىنا كومەكتەستى. ٴبىرىنشى ايىندا ٴابۋ 3000 يۋان تاپتى؛ ەكىنشى ايىندا 3400 يۋان تاپتى؛ جارتى جىلدان كەيىن ول ايىنا 5000 يۋان تابىس تاباتىن بولدى.
ۋاڭ ياۋيدىڭ جىگەرلەندىرۋىندە، ٴابۋدىڭ كاسىپ اياسى بارعان سايىن كەڭەيە ٴتۇستى، ول قابىرعا سۋرەت، جاي سىزبا، ماي بوياۋلى سۋرەتتەردىڭ ٴبارىن سىزدى، وعان كەلىپ سۋرەت سىزدىراتىندار دا بارعان سايىن كوبەيدى، ولاردىڭ اراسىندا الەۋمەتتىك اۋماق تۇرعىندارى، بەيتانىس توراپكەر، تاعى مەكتەپتەگى وقىتۋشى ـ وقۋشىلار بار.
سول جىلى 12 ـ ايدا ٴابۋ شەشەسىن قاسىنا اكەلىپ الدى. بۇل كەزدە ونىڭ تاپقان اقشاسى ەكەۋىنىڭ تۇرمىس قاراجاتىنا ەمىن ـ ەركىن جەتەتىن بولدى. العىسىن ٴبىلدىرۋ ٴۇشىن، ول شەشەسىمەن بىرگە الەۋمەتتىك اۋماقتاعى ٴاربىر وزىنە كومەكتەسكەن قىزمەتكەرگە قولدان جاسالعان دوپپا مەن ٴشارپى ۇسىندى. سوڭىنان ول تاعى ماڭايداعى جولداعى تەكسەرۋ قۇدىعىنىڭ قاقپاعىنا جانە تاس وتىرعىعا قۇس، بالىق، قۇرت ـ قۇمىرسقا، تاۋ، وزەن، كول، تەڭىز، حالىقتىق سالت ـ سانا مادەنيەتى سياقتى ەلەمەنتتەر قامتىلعان سۋرەتتەردى سىزدى.
”قىزمەت ۋاعىندا ٴبىز ٴبىر ـ ٴبىرىمىزدى كاسىبي اتاعىمىزبەن شاقىرامىز، قىزمەتتەن قايتقانىمىزدا ٴبىز اپەكە ـ باۋىرعا ۇقساپ كەتەمىز. اپەكەم ماعان ٴدامدى تاعام اكەلۋمەن بىرگە، سيىر، قوي ەتى جانە كوكونىس، جەمىس ـ جيدەكتەردى ۇنەمى اكەلىپ بەرىپ تۇرادى“. ٴابۋ ۋاڭ ياۋيگە العىس جاۋدىرعىسى كەلدى، الايدا ۋاڭ ياۋي ونىڭ قولى بوساعاندا الەۋمەتتىك يگىلىك ىستەرىنە ات سالىسۋىن، كومەككە ٴزارۋ ادامدارعا كومەكتەسۋىن ٴۇمىت ەتتى.
بۇل دا ٴابۋدىڭ ويلاعانى، ارمانى ەدى.
سونىمەن ٴابۋ اپتا سايىن ۋاقىت شىعارىپ، شاعىن اۋماقتاعى جەتىم ـ جەسىر قارتتارعا اقىسىز سۋرەت سىزىپ بەردى، كوشەگە بارىپ مەرەكە كەزىندە كەزەكشىلىكتە تۇرعان قاتىناس ساقشىلارىنا ارناپ سۋرەت سالدى، ناۋقاستار بولمەسىنە بارىپ اق قان اۋرۋىنا جانە وسپە ناۋقاسىنا شالدىققان بالالارعا سۋرەت سالىپ بەردى...
قازىر ٴابۋدىڭ 2 شاكىرتى بار، كوپتەگەن الەۋمەتتىك اۋماق قىزمەتكەرلەرى مەن مەكتەپتەگى وقىتۋشى ـ وقۋشىلار دا ۇنەمى ونى ىزدەپ سۋرەت سالۋعا جەتەكشىلىك ەتۋگە نەمەسە سەلبەستىك جاساۋعا ۇسىنىس ەتەدى، كىرىس جاقسى كەزدەرى ول ايىنا 9000 _ 8000 يۋان تابىس تابادى.
”بۇل قالا مەنى مەيىرگە بولەدى، اپەكەم اق پەيىلىمەن ماعان جول كورسەتتى، مەن سۋرەت سالۋ ونەرىمدى ۇزدىكسىز جوعارىلاتىپ، اسەمدىك پەن تەبىرەنىسىمدى تۋىندىلارىما ٴسىڭدىرىپ، ٴتىپتى دە كوپ كومەككە ٴزارۋ ادامدارعا ٴۇمىت سيلايمىن“، ـ دەدى ٴابۋ.
