انار بۇلت \ شينجياڭ گازەتىنىڭ ٴتىلشىسى باي سۋجۇن
كوكتەم مەرەكەسىنىڭ الدىندا بارلىق وتباسى مەرەكە بۇيىمدارىن دايىنداپ قاربالاستانىپ جاتتى. لي ماۋجۇن بۇعان ۇلگىرمەدى، ونىڭ زاۆودتا بىتىرەتىن ٴتىپتى دە ماڭىزدى جۇمىستارى بار ەدى.
”جۇمىس ىستەگەندە مۇقيات بولىڭدار، ٴاربىر قالتارىستاعى جۇگەرىنى تۇگەلدەي اۋدارىستىرىپ تۇرىڭدار، قامبانىڭ اۋاسىن الماستىرۋعا كوڭىل بولىڭدەر.“ 1 ـ ايدىڭ 23 ـ كۇنى اراسان اۋدانى حوحتوحا اسىل تۇقىمدى مال فەرماسىندا لي ماۋجۇن، ٴبىر جاعىنان، جۇمىسشىلارعا جۇگەرىنى اۋدارىستىرۋدا كوڭىل بولەتىن ىستەردى قاداعالاسا، ەندى ٴبىر جاعىنان، جابدىقتاردى دەن قويا تەكسەردى. مەرەكە ـ مەيرامدار سايىن ٴوندىرىس حاۋىپسىزدىگى جانە ورتتەن ساقتانۋ سياقتى ماسەلەلەر ونى ٴتىپتى الاڭداتا تۇسەدى.
لي ماۋجۇن قىستاقتاعى ەگىمشىلىك ٴىرى وتباسى، ودان باسقا 2 سەرىكتەستىك پەن ٴبىر سەلبەستىك كووپەراتيۆىن جۇرگىزەدى. وزىنە ىلەسىپ جۇمىس ىستەيتىندەردىڭ بارلىعىنىڭ جاقسى تۇرمىس كەشىرۋى ٴۇشىن، ول ۇنەمى مۇرنىنا سۋ جەتپەي قاربالاس جۇرەدى.
”مەيلى قىستاق تۇرعىندارى، الدە زاۆودتاعى جۇمىسشىلار بولسىن، بارلىعى ٴبىر جىلدىق ۇمىتتەرىن ماعان ارتىپ وتىرسا، مەنىڭ بويكۇيەزدىككە سالىنۋعا قايدان باتىلىم بارسىن“، ـ دەدى لي ماۋجۇن.
2000 ـ جىلى لي ماۋجۇن اسكەري قوسىنداعى كۇندەرىن اياقتاتىپ، اۋىلعا قايتىپ شارۋاشىلىق قۇرۋعا بەكيدى. تەحنولوگيا بىلمەگەندىكتەن، ول ۇيىنە قايتقان سوڭ الدىمەن اكەسىنە ەرىپ ازىقتىق كۇنباعىس ەگەدى.
كىرىس جاقسى بولعاندىقتان، ول جەردى كوتەرمەگە الىپ ەگىمشىلىك كولەمىن كەڭەيتەدى. 2015 ـ جىلى كوتەرمەگە العان 600 مۋ جەرگە ەككەن ازىقتىق كۇنباعىستان مول ٴونىم الىپ، اۋدان قالاشىعىنان عيماراتتان ٴۇي ساتىپ الادى.
2017 ـ جىلى لي ماۋجۇن تاعى دا 400 مۋ جەر كوتەرمەگە الىپ جۇگەرى ەگىپ، اراسان اۋدانى حوحتوحا اسىل تۇقىمدى مال فەرماسى جاۋفىڭ جۇگەرى ەگىمشىلىگى كاسىپتىك سەلبەستىك كووپەراتيۆىن قۇرادى، 54 قىستاق تۇرعىنى ىرىقتىلىقپەن سەلبەستىك كووپەراتيۆىنە قوسىلادى.
2018 ـ جىلى لي ماۋجۇن ازىقتىق كۇنباعىس وڭدەۋ زاۆودىن جانە جۇگەرى كەپتىرۋ زاۆودىن قۇرادى. ٴبىر جىلدىق كىرىسى 3 ميلليون يۋاننان اسىپ، ماڭايىنداعى 70 قىستاق تۇرعىنىن جۇمىستانۋعا باستايدى.
قىستاق تۇرعىنى يمام نۇرمامەتتىڭ جەرى از، نەگىزىنەن كۇندىك جۇمىس ىستەپ كۇنەلتەدى. 2019 ـ جىلدان باستاپ، ول لي ماۋجۇننىڭ جۇگەرى كەپتىرۋ زاۆودىندا جۇمىس ىستەپ، ايلىق كىرىسى 7000 _ 6000 يۋانعا جەتەدى.
”لي زاۆود باستىعى ادام ورنالاستىرىپ ماعان ماشينا رەمونتتاۋ جاعىنداعى تەحنولوگيانى ۇيرەتىپ قانا قويماي، مەنى ەمتيحان بەرىپ اۆتوكولىك جۇرگىزۋ كۋالىگىن الۋعا شابىتتاندىردى. قازىر اماناتقا قويعان اقشام بار، قالاشىقتان ٴۇي دە ساتىپ الدىم، تۇرمىسىمىز بارعان سايىن جاقسارىپ كەلەدى“، ـ دەدى يمام.
قۇلجا قالاسى جەليۇزى قالاشىعىندا تۇراتىن پارھات داۋۇت 2014 ـ جىلدان باستاپ لي ماۋجۇنگە ىلەسىپ ىستەگەندىگىن، قازىر تۇقىم سۇرىپتاۋ، ەگىن ەگۋ، ەگىن جيناۋ، الدە كەپتىرۋ بولسىن، ٴاربىر بۋىنعا توتەنشە قانىق ەكەندىگىن ايتتى. ”لي ماۋجۇن قىستاق تۇرعىندارىنا ەگىمشىلىك جانە باسقارۋ جاعىنداعى تەحنولوگيالاردى ەش بۇكپەسىز ۇيرەتتى ٴارى ٴبىزدى ەرتىپ گانسۋ، جياڭسۋ، شاندۇڭعا بارىپ بازارعا تەكسەرۋ جۇرگىزىپ، جاڭا تەحنولوگيا ۇيرەنىپ، كوز ايامىزدى كەڭەيتىپ، ونەرىمىزدى ۇشتادى“.
قازىر لي ماۋجۇن سەلبەستىك كووپەراتيۆىنىڭ مۇشەلەرىن باستاپ جۇگەرى جانە ازىقتىق كۇنباعىس ەگۋ كولەمىن 13 مىڭ مۋعا كەڭەيتتى. مۇنان تىس، ول تاعى كوپشىلىكپەن بيىل بانلانگىن جانە جەر المۇرتىن ەگىپ كورۋدى اقىلداستى، ونىڭ بۇل ويىن كوپشىلىك قۇپتادى.
”ٴبىر ادامنىڭ بايىعانى بايۋ ەسەپتەلمەيدى، بىرگە بايىعاندا عانا جول تابۋعا بولادى. بۇدان بىلاي مەن اناعۇرلىم كوپ ادامدى باستاپ بىرگە قۇلشىنىپ، كوپشىلىكتىڭ تۇرمىسىن ٴتىپتى دە جاقسارتامىن“، ـ دەدى لي ماۋجۇن باتىل تۇردە.
