ۋاكىل جۋ گۋاڭلان:
اۋىل شارۋاشىلىعى، اۋىل ـ قىستاق، شارۋالار قۇنارلى توپىراعىنا تامىر تارتىپ، مىندەت اتقارۋدىڭ جاڭا تاراۋىن جازامىن
انار بۇلت \ شينجياڭ گازەتىنىڭ ٴتىلشىسى جاڭ لەي
”قايتكەندە حالىق قۇرىلتايىنىڭ جاقسى ۋاكىلى بولۋعا بولادى؟ ول ٴۇشىن پارتيانىڭ جانە جۇمىسشى ـ قىزمەتكەرلەر قاۋىمىنىڭ ماڭىزدى تاپسىرماسىن قاشاندا ەستە بەرىك ساقتاپ، حالىق ٴۇن قاتقان زامان جاۋاپ قايتارىپ، ٴىس جۇزىندىك ارەكەتىم ارقىلى ۋاكىلدىك مىندەت بورىشىمدى وتەۋىم كەرەك“. بۇل شينجياڭدا تۇراتىن مەملەكەتتىك حالىق قۇرىلتايى ۋاكىلى جۋ گۋاڭلاننىڭ ەستەلىك داپتەرىنىڭ تۇڭعىش بەتىنە جازىلعان سوزدەر.
بيىل جۋ گۋاڭلاننىڭ مىندەت اتقارۋىنداعى ٴۇشىنشى جىل، ول ٴتىپتى دە قاربالاس بولا ٴتۇستى. جۋ گۋاڭلان شينشيڭ قالاسى حۋاڭتيان ەگىس الاڭى 5 ـ ليانىنىڭ قىزمەتكەرى، كوكونىس ەگۋ تەحنولوگياسىن زەرتتەپ، جۇمىسشى ـ قىزمەتكەرلەر قاۋىمىنىڭ عىلمي ەگۋىنە، ساتۋ جولىن تۇيىلىستىرۋىنە جەتەكشىلىك ەتەدى؛ ٴارى جۇمىسشى ـ قىزمەتكەرلەر قاۋىمىنىڭ ”جۋ اپەكەسى“، اتىز باسىنا جانە الەۋمەتتىك اۋماقتارعا، ليان ـ دۇيلەرگە ىشكەرىلەي بارىپ تەكسەرۋ ـ زەرتتەۋ جۇرگىزىپ، جۇمىسشى ـ قىزمەتكەرلەر قاۋىمىنىڭ قيىنشىلىعىن، ارمان ـ تىلەگىن تىڭداپ، مىندەت اتقارىپ، جاۋاپكەرشىلىگىن ادا ەتىپ، حالىقتىڭ جارشىسى بولدى.
ەگىس الاڭىندا تۇراتىندىقتان جۋ گۋاڭلان اۋىل شارۋاشىلىعى، اۋىل ـ قىستاق، شارۋالار ىستەرىنە ايرىقشا كوڭىل بولەدى، ”بۇرىن كوپشىلىكتى باستاپ بايىسام عانا بولدى دەپ ويلايتىنمىن، حالىق قۇرىلتايى ۋاكىلى بولىپ سايلانعاننان كەيىن كوپشىلىكتى باستاپ قايتكەندە جاڭا ٴداۋىر شارۋاسى جانە جۇمىسشى ـ قىزمەتكەرى بولۋعا بولادى دەگەنگە وي جۇگىرتەتىن بولدىم“. 2024 ـ جىلى قايتا ـ قايتا تەكسەرۋ ـ زەرتتەۋ جۇرگىزۋ، كەمەلدەندىرۋ ارقىلى وسى زامانعى اۋىل شارۋاشىلىعىنىڭ دامۋىن جەبەۋ، اۋىل ـ قىستاق نەگىزدىك قۇرىلعى قۇرىلىسىن كۇشەيتۋ، اۋىل شارۋاشىلىعى ونىمدەرىن ساتۋ ارناسىن ساپالىلاندىرۋ سياقتى جاقتارعا قاتىستى ۇسىنىستار تاپسىردى، قاتىستى تاراۋلار بەلسەنە جاۋاپ قايتاردى جانە ناقتى تياناقتاندىردى.
تاياۋدا جۋ گۋاڭلان اۆتونوميالى رايوندىق حالىق قۇرىلتايى تۇراقتى كوميتەتى ۇيىمداستىرعان مەملەكەتتىك حالىق قۇرىلتايى ۋاكىلدەرىنىڭ شوعىرلى كوزدەن كەشىرۋىنە قاتىناستى. جەمەنەي اۋدانى جەمەنەي قالاشىعى سارولەڭ قىستاعىندا ول قىستاق تۇرعىندارىنىڭ قار ـ مۇز كاسىپ سالاسىن بەلسەندىلىكپەن كەڭەيتىپ، قار ـ مۇز ساياحاتىن دامىتىپ، تۇرمىس شارت ـ جاعدايلارىنىڭ كورنەكتى جاقسارعاندىعىن كوردى. كوپشىلىك بايۋمەن بىرگە، شەكارا ٴوڭىر قۇرىلىسىنا جانە دامۋىنا بەلسەنە ات سالىسىپ، مەملەكەتتىڭ حاۋىپسىزدىگىن جانە شەكارا ٴوڭىردىڭ ورنىقتىلىعىن قورعاۋعا كۇش قوسىپ جاتىر ەكەن.
”مەن اتىز باسىنان شىققان حالىق قۇرىلتايى ۋاكىلىمىن، اۋىل ـ قىستاقتى گۇلدەندىرۋدە كاسىپ سالاسىنا سۇيەنۋ كەرەك، كاسىپ سالاسىن دامىتۋدا ەرەكشەلىك بولۋ كەرەك“. جۋ گۋاڭلان بىلاي دەدى: وسى رەتكى كوزدەن كەشىرۋدە ۇيرەنگەن تاجىريبەلەرىمدى قىزمەتپەن توعىستىرىپ، ەرەكشە اۋىل شارۋاشىلىعىن دامىتۋ مەن مادەنيەت ـ ساياحاتتى توعىستىرۋدى ۇشتاستىرىپ، جۇمىسشى ـ قىزمەتكەرلەر قاۋىمىنىڭ كىرىس ارتتىرۋ جولىن كەڭەيتۋگە كوبىرەك جول قاراستىرۋدى ٴۇمىت ەتەمىن.
حۋاڭتيان ەگىس الاڭىنداعى ەڭ ەرتە كوكونىس جىلىجايىن كوتەرەگە العان قىزمەتكەر رەتىندە، جۋ گۋاڭلان ٴوزى بايۋ جولىنا تۇسۋمەن بىرگە، اناعۇرلىم كوپ جۇمىسشى ـ قىزمەتكەرلەر قاۋىمىن قۇرىلعىلى جىلىجاي ەگىمشىلىگى ارقىلى كىرىستەرىن ارتتىرىپ، بايۋعا باستادى. ونىڭ جەتەكشىلىگىندە حۋاڭتيان ەگىس الاڭى 5 ـ ليانىندەگى بوس تۇرعان 128 جىلىجاي تۇگەلدەي ىسكە قوسىلدى، ول تاعى سەلبەستىك كووپەراتيۆىنە سۇيەنىپ كوپشىلىكتى باستاپ جوعارى ٴونىمدى جاسىل جەمىس ـ جيدەك، كوكونىس ەگىپ، 90 نەشە جۇمىسشى ـ قىزمەتكەردى كىرىستەرىن ارتتىرۋعا جەتەكتەدى.
حۋاڭتيان ەگىس الاڭى 6 ـ ليانىنىڭ قىزمەتكەرى يۇي شىمەي بالالار سال اۋرۋىنا شالدىققان، وتباسى تۇرمىسىندا قيىنشىلىق بار. جاعدايدى ۇعىسقاننان كەيىن جۋ گۋاڭلان ٴسان قاباق جاڭا سورتىنىڭ ۇرىعىن الدىمەن وعان بەرىپ، ٴبىر ـ بىردەن تەحنولوگيالىق جەتەكشىلىك ىستەيدى؛ حۋاڭتيان ەگىس الاڭى 5 ـ ليانىنىڭ قىزمەتكەرى ليۋ ۋىنليڭ باكلاجان، قيار سياقتى داقىلداردى ەگەتىن، ٴبىراق كىرىسى ايتارلىقتاي بولمادى. جۋ گۋاڭلان ونىڭ داقىل ٴتۇرىن وزگەرتىپ ٴسان قاباق ەگۋىنە جەتەكشىلىك ەتكەننەن كەيىن، سول جىلعى كىرىسى 100 مىڭ يۋاننان استى... تەحنولوگيا جاعىندا كومەكتەستى، قارجى جاعىندا قولدادى، جۋ گۋاڭلاننىڭ جەتەكتەۋىندە جانە كومەگىندە، حۋاڭتيان ەگىس الاڭىنداعى 20دان استام جۇمىسشى ـ قىزمەتكەر وتباسى قۇرىلعىلى اۋىل شارۋاشىلىعىن دامىتۋ ارقىلى بايۋ جولىنا ٴتۇستى.
بيىلعى مەملەكەتتىك ەكى ٴماجىلىس اشىلۋ الدىندا تۇر، جۋ گۋاڭلاننىڭ مىندەت اتقارۋ جاۋاپناماسىنىڭ تاعى ٴبىر جاڭا پاراعى اشىلدى. ”مەن حالىق قۇرىلتايى ۋاكىلدەرىنىڭ كوپىرلىك، دانەكەرلىك رولىن تولىق ساۋلەلەندىرىپ، جۇمىسشى ـ قىزمەتكەرلەر قاۋىمىنىڭ جاقسى ’جارشىسى‘ بولامىن“، ـ دەدى ول.
اۋىل ـ قىستاقتى گۇلدەندىرۋدەگى ارمانعا تالپىنۋشى
ءتىلشى ەستەلىگى
ۋاكىل جۋ گۋاڭلان ”مەن قۇلشىنىسىم ارقىلى جۇمىسشى ـ قىزمەتكەرلەر قاۋىمىنىڭ تۇرمىسىن ٴتىپتى دە جاقسارتسام دەيمىن“ دەگەن ٴسوزدى اۋزىنان تاستامايدى. جۋ گۋاڭلاندى حۋاڭتيان ەگىس الاڭىنداعىلاردىڭ ٴبارى ماقتايدى، ول جۇمىسشى ـ قىزمەتكەرلەر قاۋىمىن بايۋعا باستاۋشى؛ حالىق قۇرىلتايى ۋاكىلدەرى بايلانىس پۋنكتىندە ول جۇمىسشى ـ قىزمەتكەر قاۋىمىنىڭ ”جۋ اپەكەسى“، بۇقارامەن تىعىز بايلانىس جاساپ، بۇقارانىڭ تىلەگىن تىڭداپ، شۇعىل، قيىن، ۋايىمداعان، ٴزارۋ ماسەلەلەرىن شەشۋدى جەبەدى. حالىقتىڭ جاقسى جارشىسى بولىپ، ناقتى ٴىس ىستەۋ ەجەلدەن جۋ گۋاڭلاننىڭ العا باسۋداعى قوزعاۋشى كۇشى جانە بەتالىسى بولىپ كەلدى، ول قاراپايىم ارەكەتى ارقىلى حالىق قۇرىلتايى ۋاكىلدەرىنىڭ مىندەتىن اتقاردى.
جۋ گۋاڭلان سياقتى اتىز باسىندا ەڭبەكتەنىپ جاتقان سانسىز جاننىڭ بويىنان ٴبىز شينجياڭنىڭ وسى زامانعى اۋىل شارۋاشىلىعىنىڭ قارىشتاپ دامىعان جاڭا بەينەسىن كوردىك. ٴۇمىت اتىزىندا اۋىل ـ قىستاقتى گۇلدەندىرۋدىڭ تاماشا كارتيناسى بىرتىندەپ اشىلۋدا.
