اۋىل ـ قىستاقتى جاپپاي گۇلدەندىرۋ ۇلى ساپارىندا كاسىپ سالاسىنىڭ دامۋى شەشۋشى ٴتۇيىن. تاياۋدا حوتان اۋدانى لاڭرۋ اۋىلى سۋىق سۋ بالىعىن باعۋ كاسىبىندە تىڭ تابىستارعا قول جەتكىزىپ، كۇمجا بالىعى، جۇڭحۋا بەكىرەسى سياقتى بالىق تۇرلەرىن ٴساتتى جەتىلدىرىپ، كولەمدەنگەن باعىمشىلىقتى جۇزەگە اسىرىپ، جەرگىلىكتى قىستاق تۇرعىندارىنىڭ كىرىستى مولايتىپ، اۋقاتتانۋىنا جاڭا جول اشىپ قالماستان، تەڭىز دەڭگەيىنەن بيىك رايونداردىڭ ەرەكشە كاسىپ سالاسىن دامىتۋ ىستەرىن ۇلگى بولارلىق قۇندى تاجىريبەلەرمەن قامدادى.
حوتان اۋدانى لاڭرۋ اۋىلى ياپچاللىق قىستاعى اسقارالى كۇنلۇن تاۋىنىڭ ەتەگىنە ورنالاسقان. بۇل ارادا ەرەكشە تابيعي ابزالدىلىققا يە تازا سۋىق سۋ بايلىعى بار، جىل بويى ۇيلەسىمدى سۋ تەمپەراتۋراسىن ساقتاپ، سۋىق سۋ بالىعىنىڭ ٴوسىپ - وربۋىنە تاماشا ورتا جاراتقان. سوڭعى جىلدارى لاڭرۋ اۋىلدىق پارتكوم مەن ۇكىمەتتىڭ پارمەندى جەتەكشىلىگىندە، ياپچاللىق قىستاعىنىڭ ”ەكى كوميتەتى“ مەملەكەتتىڭ اۋىل ـ قىستاقتى گۇلدەندىرۋ ستراتەگياسىنىڭ كەلەلى ورايىن مىقتاپ يگەرىپ، جەرگىلىكتى بايلىقتىڭ كومەسكى كۇشىن ىشكەرىلەي اشىپ، سۋىق سۋ بالىعى باعىمشىلىق كاسىبىن زور كۇشپەن دامىتۋدى ۇيعاردى.
وزىق باعىمشىلىق تەحنيكاسىن ەنگىزۋ ارقىلى ساپالى شاباقتاردى دەن قويا سۇرىپتادى. كاسىپتىك تەحنيكانىڭ دەمەۋى جانە قىستاق تۇرعىندارىنىڭ دەن قويا قارايلاسۋىندا، كۇمجا بالىعى، جۇڭحۋا بەكىرەسى سياقتى سۋىق سۋ بالىعىنىڭ تۇرلەرى وسى ارادا جەتىلدى. بۇل سۋىق سۋ بالىقتارى بازارعا سالىنىسىمەن، ەتىنىڭ ءدامدى، جاڭا بولۋى جانە ساپاسىنىڭ جوعارى بولۋىمەن تۇتىنۋشىلاردىڭ قىزۋ قارسى الۋىنا يە بولىپ، بازار بولاشاعىنان تاماشا ءۇمىت بايقاتتى.
ياپچاللىق قىستاعىنىڭ قىزمەت اترەتىنىڭ مۇشەسى ۋاڭ يۇي تەبىرەنە بىلاي دەپ تانىستىردى: ”قىستاعىمىزدىڭ سۋىق سۋ بالىعىن باعۋىنىڭ ونىمدىلىگى ايتاقالسىن كورنەكتى بولدى، العاشقى توپتاعى باعىمشىلىق قىستاق كوللەكتيۆىنە 26 مىڭ يۋان كىرىس كىرگىزدى. قازىر ەكىنشى توپتاعى كۇمجا بالىعى، جۇڭحۋا بەكىرەسىنىڭ 200 شاباعى سالىندى. الداعى جەردە باعىمشىلىق جەتىستىكتەرىن ونان ارى كەڭەيتىپ، ’سەلبەستىك كووپەراتيۆى + شارۋا وتباسى‘ سىندى كاسىپ سالالانعان تيجارات ۇلگىسىن بەلسەنە ىلگەرىلەتەمىز. مۇنداي ۇلگى باعىمشىلىق ونىمدىلىگىن جوعارىلاتىپ قانا قويماي، بازاردىڭ باسەكەلىك قۋاتىن ارتتىرىپ، اناعۇرلىم كوپ قىستاق تۇرعىندارىنىڭ كاسىپ سالاسىنىڭ دامۋىنا ات سالىسۋىنا، دامۋدىڭ پايداسىنان بىرگە يگىلىكتەنۋىنە مۇمكىندىك جاسايدى“.
حوتان اۋدانى لاڭرۋ اۋىلدىق پارتكومنىڭ شۋجيى جۋاڭ يۋانچياڭ بىلاي دەدى: اۋىلدىق پارتكوم مەن ۇكىمەت سۋىق سۋ بالىعىن باعۋ كاسىبىنە وسكەلەڭ ٴمان بەرىپ، بولاشاقتا قولداۋ تەبىنىن ۇزدىكسىز ارتتىرادى. ٴبىر جاعىنان، باعىمشىلىق كولەمىن ونان ارى كەڭەيتىپ، ٴونىم مولشەرىن جوعارىلاتامىز؛ ەندى ٴبىر جاعىنان، ايگىلى ماركانىڭ ىقپال كۇشىن كۇش سالا جوعارىلاتىپ، لاڭرۋ اۋىلىنىڭ سۋىق سۋ بالىق ونىمدەرىن اناعۇرلىم كەڭ بازارعا باعىتتايمىز. بۇدان سىرت، اۋىلدىق ۇكىمەت ياپچاللىق قىستاعىنىڭ تابىستى تاجىريبەلەرىن اۋىلداعى باسقا قىستاقتارعا جالپىلاستىرىپ، تۇيىندەگى جۇمىستار ارقىلى جالپى جۇمىستاردى ىلگەرى باستىرىپ، اۋىلدىڭ ەرەكشە كاسىپ سالاسىن دامىتۋدىڭ ومىرشەڭدىك كۇشىن تاسقىنداتۋدى جوسپارلادىق.
(حوتان اۋداندىق توعىسپالى مەديا ورتالىعىنىڭ ٴتىلشىسى ۋىن فاحۇي، ەرىكتى ٴتىلشى ۋاڭ چيڭۋي)
