ٴار ۇلت ايەلدەرىنىڭ سالاماتتىعىن قورعاۋ اياق الىسىن توقتاتپادى
— 2025 ـ جىلعى ”ەڭ ارداقتى جەلەكتى كۇرەسكەر“ ماينۇر نياز جونىندە
انار بۇلت \ شينجياڭ گازەتىنىڭ ٴتىلشىسى سۋ لۋپيڭ
3 ـ ايدىڭ 8 ـ كۇنى اۆتونوميالى رايوندىق حالىق شيپاحاناسىنىڭ ايەلدەر اۋرۋى ٴبولىمى ناۋقاستار بولىمىندە ناۋقاستار بولمەسىن ارالاپ كەلگەن ماينۇر نيازدى كورىپ، ناۋقاستىڭ ٴۇي ىشىندەگىلەر جابال ورىندارىنان تۇرىپ الدىنان شىقتى. ”ونىڭ وسىندا جۇرگەنىن كورسەك بولدى، الاڭسىز بولامىز“، ـ دەدى ٴبىر ناۋقاس.
جۋىقتا اۆتونوميالى رايوندىق حالىق شيپاحاناسىنىڭ اعا شيپاگەرى، مەملەكەتتىك كلينيكالىق ٴتۇيىندى ارناۋلى ٴبولىم ٴپان باستاماشىسى، مەملەكەتتىك كەڭەستىڭ ۇكىمەت ەرەكشە قوسىمشا قاراجاتىنان يگىلىكتەنەتىن مامان ماينۇر نياز مەملەكەتتىك 8 ـ ناۋرىز قىزىلتۋشىسى ۇلگىسى اتاعىنا يە بولدى ٴارى 2025 ـ جىلعى ”ەڭ ارداقتى جەلەكتى كۇرەسكەر“ بولىپ تاڭدالدى.
1976 ـ جىلى ماينۇر نياز شاڭحاي مەديتسينا داشۋەسىنەن وقۋ تاۋىسىپ، اۆتونوميالى رايوندىق حالىق شيپاحاناسى تۋىت ٴبولىمىنىڭ شيپاگەرى بولادى. ناۋقاس كورۋ بارىسىندا جاتىر موينى راگىنىڭ سوڭعى مەزگىلىنە وتكەن ناۋقاستاردىڭ اۋرۋ ازابىن تارتقانىن كورىپ، ول ىشتەي مىناداي بەكىمگە كەلەدى: جاتىر موينى راگىنەن ساقتانۋ، ەمدەۋ جولىن، ٴسوز جوق، اشۋىم كەرەك.
ماينۇر نياز باس الماي زەرتتەۋ جۇرگىزىپ، ”ساساكاۋا مەديتسينالىق وقۋ سيلىق اقشاسى“ ورايىن يگەرىپ، 2 رەت جاپونياعا بارىپ ٴبىلىم اسىرىپ، ۇزدىك ناتيجەمەن وقۋىن تامامدايدى، الايدا ول جەرگىلىكتى ورىننىڭ ۇسىنىسىن تويتارىپ، ٴارى ـ ٴسارى بولماي شينجياڭعا قايتادى.
ماينۇر نياز جاتىر موينى راگىن ەرتە سارالاپ تەكسەرۋدىڭ، وعان ەرتە دياگنوز قويۋدىڭ ماڭىزدىلىعىن ابدەن بىلەدى، قاتىستى نىسان قارجىسىنىڭ قولداۋىندا، ۇجىمدى باستاپ تاكلاماكان ٴشولى جيەگىنە جول تارتادى. قىستاقتا ولار بالاۋىز شام جاعىپ قويىپ كەستە تولتىرىپ، سۋىق سۋعا قاتقان نان شىلاپ جەيدى؛ نولدەن تومەن 20 سەلتسي گرادۋستىق كۇنلۇن تاۋىنىڭ سولتۇستىك بوكتەرىندە ماقتا كورپە جامىلىپ وتىرىپ ساندى مالىمەتتەردى ەستەلىككە الادى. ەڭ كوپ بولعاندا، 5 كۇندە 5000نان استام ادامعا (رەت) سارالاپ تەكسەرۋ جاسايدى. ول ۇنەمى كوپشىلىككە: ”قانشا بەينەت كورىپ، قانشا جاپا تارتساق تا، بىردە ـ ٴبىر ناۋقاستى قاعىس قالدىرۋعا بولمايدى“، ـ دەيتىن.
2009 ـ جىلى مەملەكەتتىڭ اۋىل ـ قىستاق ايەلدەرىندەگى ”ەكى ٴتۇرلى راك اۋرۋىن“ سارالاپ تەكسەرۋ نىسانى رەسمي باستالىپ، شينجياڭداعى جاتىر موينى راگىن سارالاپ تەكسەرۋ نىسانىن جۇرگىزەتىن 14 اۋدان جانە ومىراۋ بەزى راگىن سارالاپ تەكسەرۋ نىسانىن جۇرگىزەتىن 6 اۋدان مەملەكەتتىڭ العاشقى توپتاعى سىناق ٴتۇيىنى ورىندارىنا ەنگىزىلدى. ماينۇر نياز ۇجىمدى باستاپ جيىنى 360 مىڭنان استام ادامعا (رەت) سارالاپ تەكسەرۋ جۇرگىزىپ، شينجياڭداعى تۇڭعىش جاتىر موينى راگى ساندى مالىمەت قامباسىن قۇرىپ، شينجياڭ جاتىر موينى راگىنىڭ تۋىلۋ مولشەرى سياقتى نەگىزگى جاعدايلاردى تۇڭعىش رەت انىقتاپ، مەملەكەتتىڭ قاتىستى سارالاپ تەكسەرۋ نىساندارىنىڭ شينجياڭدا تياناقتانۋىنا ساندى مالىمەت تىرەگىن ازىرلەدى.
ٴپان باستاماشىسى رەتىندە، ماينۇر نياز ۇجىمدى باستاپ ايەلدەر اۋرۋى سالاسىنداعى كوپ ٴتۇرلى مەديتسينالىق قيىن تاقىرىپتاردان قامال الىپ، مەملەكەت دارەجەلى 26 ٴتۇرلى ساباق تاقىرىبىن باسقارىپ، جاتىر موينى اۋرۋ وزگەرىسى ٴۇش دارەجەلى دياگنوز قويۋ، ەمدەۋ جۇيەسىن قۇرىپ، اۆتونوميالى رايوندىق حالىق شيپاحاناسى ايەلدەر اۋرۋى ٴبولىمىن باتىس سولتۇستىكتەگى تۇڭعىش مەملەكەتتىك كلينيكالىق ٴتۇيىندى ارناۋلى ٴبولىم ەتىپ تۇلعالاپ، 56 ماگيستر، دوكتور تاربيەلەپ، عىلمي زەرتتەۋ ۇشقىنىن تيانشان الابىندا قاۋلاتتى.
زەينەتكە شىققان سوڭ ماينۇر نياز اۆتونوميالى رايوندىق حالىق شيپاحاناسىنىڭ ايتۋلى مامان رەتىندە شاقىرۋىمەن اپتاسىنا 4 رەت ناۋقاس كورەدى، قالعان ۋاقىتىندا ناۋقاستارعا وپەراتسيا جاسايدى. ٴبىر قاتەرلى وسپە وپەراتسياسىن ورتا ەسەپپەن 3 ساعاتتان استام، ادەتتەگى وپەراتسيانى 2 ساعاتتان استام ۋاقىت جاساپ، تۇستەن باستاپ كەش باتقانشا تىكەسىنەن تىك تۇراتىن. ۇستازدارىنىڭ بار زەيىنىن سالعانىن كورىپ، وقۋشىلار تيتتەي دە بويكۇيەزدىككە سالىنبادى، بارلىعى ۇستازدارىن ۇلگى ەتىپ، ”جاتىر موينى راگىن جويۋ“ سىندى ورتاق نىساناعا قۇلشىنىس جاسايدى.
”ولاردىڭ بارلىعى ٴبولىمنىڭ تىرەگىنە اينالدى، بارلىعى جەكە ٴوزى ـ اق مەڭگەرىپ كەتە بەرەدى“، ـ دەدى وقۋشىلارى جايلى ٴسوز بولعاندا ماينۇر نياز ماقتانىشپەن. جاتىر موينى راگىنىڭ پايدا بولۋ مەحانيزمىنە، راك كلەتكاسىنىڭ تارالۋ ـ تارالماۋىنا مولەكۋلا دەڭگەيىنەن تالداۋ جاساۋدان جاتىر موينى راگىن جۇڭي دارىمەن ەمدەۋگە، اسا حاۋىپتى سيپاتتى جۇعىمدالۋ سەبەبىنە دەيىن، ودان قىناپ اينەگىمەن ٴتىرى تكاننان ۇلگى الىپ تەكسەرۋدى كوزبەن باقىلاۋعا دەيىن... ول ۇجىم باستاپ جاۋاپتى بولعان ٴتۇيىندى زەرتتەۋ ـ اشۋ نىسانى بيىل اياقتاۋ الدىندا تۇر.
”ٴبىز جاساندى زەردەدەن پايدالانىپ بارلىق تەكسەرۋ ناتيجەسىن ساندى مالىمەت قامباسىنا ەنگىزىپ، جاساندى زەردە ارقىلى دياگنوزعا قوسىمشا پىكىر ۇسىنامىز، مىنە وسىلاي بولعاندا، ايماق، وبلىس، قالالاردا دا پايدالانۋعا بولادى“. ماينۇر نياز ايماق، وبلىس، قالالارعا تاعى بىرنەشە رەت بارىپ، جاتىر موينى راگىن دالمە ـ ٴدال سارالاپ تەكسەرۋدى جالپىلاستىرىپ، نەگىزگى ساتى ەمدەۋ قىزمەتكەرلەرىنىڭ ەڭ جاڭا تەحنولوگيانى يگەرۋىنە مۇمكىندىك جاساۋدى جوسپارلاپ وتىر. ”اتاق ـ ابىروي ەمدەۋ شەبىندە قۇلشىنا كۇرەس جاساپ، ٴار ۇلت ايەلدەرىنىڭ سالاماتتىعىن قورعاپ جاتقان ٴاربىر قىزمەتكەرگە ٴتان. تەك دەنساۋلىعىم جار بەرسە، ۇجىمدى باستاپ جالعاستىرا بەرەمىن“.
