شينحۋا اگەنتتىگىنىڭ 3 ـ ايدىڭ 10 ـ كۇنى بەيجيڭنەن بەرگەن حابارى. 14 ـ كەزەكتى مەملەكەتتىك حالىق قۇرىلتايى 3 ـ ٴماجىلىسىنىڭ ٴتوراعالار القاسى 3 ـ ايدىڭ 10 ـ كۇنى تۇستەن كەيىن بەيجيڭ حالىق سارايىندا 3 ـ جيىنىن وتكىزدى.
ٴتوراعالار القاسىنىڭ تۇراقتى ٴتوراعاسى جاۋ لىجيدىڭ تاپسىرۋىمەن ٴتوراعالار القاسىنىڭ تۇراقتى ٴتوراعاسى لي حۇڭجۇڭ جيىندى باسقاردى.
جيىنعا قاتىناسۋعا ٴتيىستىسى 176 ادام، قاتىناسقانى 172 ادام، 4 ادام قاتىناسپادى، قاتىناسقان ادام سانى زاڭدا بەلگىلەنگەن ادام سانىنا ۇيلەسەدى.
3 ـ ايدىڭ 9 ـ كۇنى تۇستەن بۇرىن ۋاكىلدەر ۇيىرمەلەرى مەملەكەتتىك حالىق قۇرىلتايى جانە جەرگىلىكتى ٴار دارەجەلى حالىق قۇرىلتايلارى ۋاكىلدەرى زاڭىنا وزگەرىس ەنگىزۋ جونىندەگى قاۋلى جوباسىن مۇقيات قارادى. مەملەكەتتىك حالىق قۇرىلتايى نەگىزگى زاڭ جانە زاڭدار كوميتەتى ۋاكىلدەر ۇيىرمەلەرىنىڭ قاراۋ پىكىرىنە ساي، قاۋلى جوباسىن قاراپ، قاۋلى جوباسىنىڭ داۋىسقا سالۋ نۇسقاسىن ورتاعا قويدى. ٴتوراعالار القاسىنىڭ جيىنى مەملەكەتتىك حالىق قۇرىلتايى نەگىزگى زاڭ جانە زاڭدار كوميتەتىنىڭ مەڭگەرۋشى مۇشەسى شين چۇنيىڭ جاساعان مەملەكەتتىك حالىق قۇرىلتايى نەگىزگى زاڭ جانە زاڭدار كوميتەتىنىڭ ۋاكىلدەر زاڭىنا وزگەرىس ەنگىزۋ جونىندەگى قاۋلى جوباسىنا وزگەرىس ەنگىزۋ پىكىرى جونىندەگى باياندامانى تىڭدادى. جيىن داۋىسقا سالۋ ارقىلى جوعارىداعى باياندامانى جانە قاۋلى جوباسىنىڭ داۋىسقا سالۋ نۇسقاسىن ماقۇلداپ، ۋاكىلدەر زاڭىنا وزگەرىس ەنگىزۋ جونىندەگى قاۋلى جوباسىنىڭ داۋىسقا سالۋ نۇسقاسىن ٴماجىلىس جالپى جيىنىنىڭ داۋىسقا سالۋىنا ۇسىنۋدى ۇيعاردى.
3 ـ ايدىڭ 8 ـ كۇنى تۇستەن كەيىن جانە 3 ـ ايدىڭ 10 ـ كۇنى تۇستەن بۇرىن ۋاكىلدەر ۇيىرمەلەرى مەملەكەتتىك حالىق قۇرىلتايى تۇراقتى كوميتەتىنىڭ قىزمەت بايانداماسىن مۇقيات قارادى. ۋاكىلدەر مەملەكەتتىك حالىق قۇرىلتايى تۇراقتى كوميتەتىنىڭ وتكەن ٴبىر جىلداعى قىزمەتتەرىن تولىق تۇراقتاندىرىپ، الداعى ٴبىر جىلداعى قىزمەت ورنالاستىرۋلارىن قۇپتايتىندىقتارىن ٴبىلدىردى. قاراۋ بارىسىندا ۋاكىلدەر بايانداما جانە حالىق قۇرىلتايى قىزمەتى جونىندە كەيبىر پىكىرلەر مەن ۇسىنىستاردى ورتاعا قويدى. كوميتەت باستىقتارى ٴماجىلىسى ۋاكىلدەردىڭ قاراۋ پىكىرلەرىن مۇقيات اقىلداسىپ، بايانداماعا وزگەرىس ەنگىزدى. ٴتوراعالار القاسىنىڭ تۇراقتى ٴتوراعالارى ۋاكىلدەردىڭ قاراۋ پىكىرىنە جانە بايانداماعا وزگەرىس ەنگىزۋ جاعدايىنا نەگىزدەلىپ، تۇراقتى كوميتەتتىڭ قىزمەت بايانداماسىن بەكىتۋدى ۇسىنىس ەتتى ٴارى تۇراقتى كوميتەتتىڭ قىزمەت بايانداماسى جونىندەگى قارار جوباسىن وكىلەتتى دايىندادى. جيىن داۋىسقا سالۋ ارقىلى 14 ـ كەزەكتى مەملەكەتتىك حالىق قۇرىلتايى 3 ـ ٴماجىلىسىنىڭ مەملەكەتتىك حالىق قۇرىلتايى تۇراقتى كوميتەتىنىڭ قىزمەت بايانداماسى جونىندەگى قارار جوباسىن ۋاكىلدەر ۇيىرمەلەرىنىڭ قاراۋىنا ۇسىنۋدى ۇيعاردى.
3 ـ ايدىڭ 9 ـ كۇنى تولىق كۇن جانە 3 ـ ايدىڭ 10 ـ كۇنى تۇستەن بۇرىن ۋاكىلدەر ۇيىرمەلەرى ەڭ جوعارى حالىق سوتى مەكەمەسىنىڭ قىزمەت بايانداماسىن، ەڭ جوعارى حالىق پروكۋراتۋراسىنىڭ قىزمەت بايانداماسىن مۇقيات قارادى، ۋاكىلدەر ەڭ جوعارى حالىق سوتى مەكەمەسىنىڭ، ەڭ جوعارى حالىق پروكۋراتۋراسىنىڭ وتكەن ٴبىر جىلداعى قىزمەتىن تولىق تۇراقتاندىرىپ، الداعى ٴبىر جىلداعى قىزمەت ورنالاستىرۋلارىن قۇپتايتىندىقتارىن ٴبىلدىردى. قاراۋ بارىسىندا ۋاكىلدەر كەيبىر پىكىرلەر مەن ۇسىنىستاردى دا ورتاعا قويدى. ەڭ جوعارى حالىق سوتى مەكەمەسى، ەڭ جوعارى حالىق پروكۋراتۋراسى ۋاكىلدەردىڭ قاراۋ پىكىرىن جانە قاتىستى جاقتاردىڭ پىكىرىن مۇقيات اقىلداسىپ، بايانداماعا وزگەرىس ەنگىزدى. ٴتوراعالار القاسىنىڭ تۇراقتى ٴتوراعالارى ۋاكىلدەردىڭ قاراۋ پىكىرىنە جانە بايانداماعا وزگەرىس ەنگىزۋ جاعدايىنا نەگىزدەلىپ، ەڭ جوعارى حالىق سوتى مەكەمەسىنىڭ قىزمەت بايانداماسىن، ەڭ جوعارى حالىق پروكۋراتۋراسىنىڭ قىزمەت بايانداماسىن بەكىتۋدى ۇسىنىس ەتتى ٴارى ەڭ جوعارى حالىق سوتى مەكەمەسىنىڭ قىزمەت بايانداماسى، ەڭ جوعارى حالىق پروكۋراتۋراسىنىڭ قىزمەت بايانداماسى جونىندەگى 2 قارار جوباسىن وكىلەتتى دايىندادى. جيىن داۋىسقا سالۋ ارقىلى وسى 2 قارار جوباسىن ۋاكىلدەر ۇيىرمەلەرىنىڭ قاراۋىنا ۇسىنۋدى ۇيعاردى.
جيىن ٴماجىلىستىڭ ورىنباسار باس حاتشىسى ليۋ جۇنچىننىڭ 14 ـ كەزەكتى مەملەكەتتىك حالىق قۇرىلتايى 3 ـ ٴماجىلىسى حاتشىلار باسقارماسىنىڭ ۋاكىلدەر العا قويعان كەڭەستىك جوبالاردى ٴبىر جاقتى ەتۋ پىكىرى جونىندە جاساعان بايانداماسىن تىڭدادى. ليۋ جۇنچىن بىلاي دەدى: 3 ـ ايدىڭ 8 ـ كۇنى ساعات 12گە دەيىن ٴماجىلىس حاتشىلار باسقارماسى جالپى 269 كەڭەستىك جوبانى تاپسىرىپ الدى، مۇنىڭ ىشىندە 26 كەڭەستىك جوبانى ۋاكىلدەر ۇيىرمەسى ورتاعا قويعان، 243 كەڭەستىك جوبانى 30دان استام ۋاكىل بىرلەسىپ ۇسىنعان. وسى كەڭەستىك جوبالاردىڭ اراسىندا زاڭ شىعارۋ جاعىنا قاتىستىسى 268؛ باقىلاۋ جاعىنداعىسى ٴبىر. مازمۇنى، باستىسى، مىنالارعا شوعىرلاندى: جالپى بارىستىق حالىق دەموكراتياسى ٴتۇزىمى جۇيەسىن اقاۋسىزداندىرىپ، حالىقتىڭ وزىنە ـ ٴوزى قوجايىن بولۋىن قامتاماسىز ەتۋ؛ سوتسياليستىك بازار شارۋاشىلىعى ٴتۇزىمىن اقاۋسىزداندىرىپ، جوعارى ساپالى دامۋدى ىلگەرىلەتۋگە ٴتيىمدى ٴتۇزىلىس ـ مەحانيزمدى كەمەلدەندىرۋ؛ جاپپاي جاڭالىق اشۋعا قولداۋ كورسەتەتىن ٴتۇزىلىس ـ مەحانيزمدى ورناتىپ، وقۋ ـ اعارتۋ، عىلىم ـ تەحنولوگيا، دارىندىلار ٴتۇزىلىس ـ مەحانيزمىن ٴبىر تۇلعالاندىرۋ رەفورماسىن ٴبىر تۇتاس جوسپارلاپ ىلگەرىلەتۋ؛ سوتسياليستىك مادەنيەتتە قۋاتتى ەل قۇرىپ، زاتتىق وركەنيەت پەن رۋحاني وركەنيەت ٴوزارا سايكەسكەن وسىزامانداندىرۋدى ىلگەرىلەتۋ؛ حالىقتى بارىنەن جوعارى قويۋعا تاباندى بولىپ، حالىق تۇرمىسىن قامتاماسىز ەتۋ جانە جاقسارتۋ ٴتۇزىم جۇيەسىن اقاۋسىزداندىرۋ؛ نازاردى جاسىل، تومەن كومىر قىشقىل گازدى دامۋدى ىلگەرىلەتۋگە شوعىرلاندىرىپ، ەكولوگيالىق وركەنيەت زاڭ ـ ٴتۇزىمىن كەمەلدەندىرۋ؛ جالپى تۇلعالىق مەملەكەت حاۋىپسىزدىگى كوزقاراسىن جاپپاي دايەكتىلەندىرىپ، مەملەكەتتىڭ حاۋىپسىزدىك جۇيەسى مەن الەۋمەتتىك حاۋىپسىزدىكتى باسقارۋ مەحانيزمىن اقاۋسىزداندىرۋ، كەمەلدەندىرۋ؛ شەتەلگە ساياتىن زاڭمەن باسقارۋ قۇرىلىسىن كۇشەيتىپ، شەتەلگە ساياتىن سالادا زاڭ شىعارۋدى اقاۋسىزداندىرۋ. ٴماجىلىس حاتشىلار باسقارماسى ۋاكىلدەر ورتاعا قويعان كەڭەستىك جوبالارعا ٴبىر ـ بىردەن مۇقيات تالداۋ جاساپ، زەرتتەۋ جۇرگىزىپ، وسى رەتكى ٴماجىلىستىڭ قاراۋىنا ەنگىزىلۋگە ٴتيىستى كەڭەستىك جوبا جوق دەپ قارادى. ٴماجىلىس حاتشىلار باسقارماسى ۋاكىلدەر ورتاعا قويعان كەڭەستىك جوبالاردى جەكە ـ جەكە مەملەكەتتىك حالىق قۇرىلتايىنىڭ قاتىستى ارناۋلى كوميتەتتەرىنىڭ قاراۋىنا تاپسىرۋدى ۇسىندى. قاتىستى ارناۋلى كوميتەتتەر جوعارىدا ايتىلعان كەڭەستىك جوبالاردى قاراعاننان كەيىن، مەملەكەتتىك حالىق قۇرىلتايى تۇراقتى كوميتەتىنە قاراۋ ناتيجەسى جونىندە بايانداما تاپسىرادى، مەملەكەتتىك حالىق قۇرىلتايى تۇراقتى كوميتەتى قاراپ ماقۇلداعاننان كەيىن، 14 ـ كەزەكتى مەملەكەتتىك حالىق قۇرىلتايىنىڭ 4 ـ ماجىلىسىنە باسىپ تاراتادى. ٴماجىلىس حاتشىلار باسقارماسى ۋاكىلدەردىڭ كەڭەستىك جوبالارىن قاراۋ جانە قاتىستى قىزمەتتەر جونىندە تومەندەگىدەي ۇسىنىستاردى العا قويدى: پارتيا باسشىلىعىنا تاباندى بولۋدى زاڭ شىعارۋ قىزمەتىنىڭ ٴار جاعىندا، تۇتاس بارىسىندا دايەكتىلەندىرۋ، تياناقتاندىرۋ؛ رەفورما مەن زاڭمەن باسقارۋدىڭ ٴوزارا بىرلىگىنە تاباندى بولىپ، زاڭمەن باسقارۋدىڭ رەفورما جاساۋداعى كەدەرگىلەردى جويۋداعى، رەفورما جەتىستىكتەرىن بەكەمدەۋدەگى بەلسەندى رولىن اناعۇرلىم ويداعىداي ساۋلەلەندىرۋ؛ عىلمي زاڭ ـ ەرەجە شىعارۋدى، دەموكراتيالى زاڭ ـ ەرەجە شىعارۋدى، زاڭ بويىنشا زاڭ ـ ەرەجە شىعارۋدى ىشكەرىلەي ىلگەرىلەتىپ، زاڭ شىعارۋ ساپاسىن جوعارىلاتۋ؛ ۋاكىلدەرمەن بايلانىس جاساۋ ٴتۇزىم ـ مەحانيزمىن اقاۋسىزداندىرىپ، ۋاكىلدەردىڭ زاڭ شىعارۋ قىزمەتىنە ات سالىسۋىن ۇزدىكسىز كەڭەيتۋ.
جيىن داۋىسقا سالۋ ارقىلى 14 ـ كەزەكتى مەملەكەتتىك حالىق قۇرىلتايى 3 ـ ٴماجىلىسى حاتشىلار باسقارماسىنىڭ ۋاكىلدەر ورتاعا قويعان كەڭەستىك جوبالاردى ٴبىر جاقتى ەتۋ پىكىرى جونىندەگى بايانداماسىن ماقۇلدادى.
ٴتوراعالار القاسىنىڭ تۇراقتى ٴتوراعالارى ۋاڭ دۇڭميڭ، شياۋ جيە، جىڭ جيانباڭ، ديڭ جۇڭلي، حاۋ ميڭجين، ساي دافىڭ، حى ۋي، ۋ ۋيحۋا، تيە نيڭ، پىڭ چيڭحۋا، جاڭ چيڭۋي، لوساڭجياڭسۇن، شوكىرات زاكىر، ليۋ چي جيىنعا قاتىناستى.
