ۋاكىل ۋاڭ ميڭشان قاتارلىلار كەڭەستىك جوبا ۇسىندى:
مەملەكەت تۋى زاڭىنىڭ اتقارىلۋى جونىنەن تەكسەرۋ ۇيىمداستىرۋدى ۇسىنىس ەتەمىن
انار بۇلت \ شينجياڭ گازەتىنىڭ ٴتىلشىسى گو ليڭ 3 ـ ايدىڭ 10 ـ كۇنى بەيجيڭنەن حابارلايدى. مەملەكەت تۋى _ مەملەكەتتىڭ سيمۆولى جانە بەلگىسى، ول مەملەكەتتىڭ بەدەلى مەن ابىرويىنا ۋاكىلدىك ەتەدى، ال مەملەكەت تۋى زاڭى _ مەملەكەتتىڭ ابىرويىن قورعايتىن، وتانشىلدىق رۋحتى ساۋلەلەندىرەتىن وزەكتى زاڭ. 14 ـ كەزەكتى مەملەكەتتىك حالىق قۇرىلتايىنىڭ 3 ـ ٴماجىلىسى كەزىندە مەملەكەتتىك حالىق قۇرىلتايىنىڭ ۋاكىلى ۋاڭ ميڭشان باسقا 30 ۋاكىلمەن بىرلەسىپ «مەملەكەت تۋى زاڭىنىڭ اتقارىلۋ احۋالىنا مەڭزەس، زاڭنىڭ اتقارىلۋىن تەكسەرۋدى ورىستەتۋ جونىندەگى كەڭەس جوباسىن» ۇسىنىپ، مەملەكەتتىك حالىق قۇرىلتايى تۇراقتى كوميتەتىنە بۇكىل ەل كولەمىندە مەملەكەت تۋى زاڭى بويىنشا زاڭنىڭ اتقارىلۋىن تەكسەرۋدى ۇيىمداستىرۋ ۇسىنىسىن قويدى.
مەملەكەت تۋى زاڭى مەملەكەت تۋىن دۇرىس پايدالانۋدى قامتاماسىز ەتۋدە، مەملەكەت تۋىنىڭ ابىرويىن قورعاۋدا، ازاماتتاردىڭ مەملەكەتتى شىنايى مويىنداۋىن كۇشەيتۋدە، وتانشىلدىق رۋحتى اسقاقتاتۋدا ماڭىزدى رول اتقاردى. «جۇڭحۋا حالىق رەسپۋبليكاسىنىڭ جەرگىلىكتى ٴار دارەجەلى حالىق قۇرىلتايلارىنىڭ جانە جەرگىلىكتى ٴار دارەجەلى حالىق ۇكىمەتتەرىنىڭ ۇيىمدىق زاڭىنىڭ» 5 ـ تارماعىنداعى بەلگىلەمە بويىنشا نەگىزگى زاڭنىڭ، زاڭداردىڭ جانە اكىمشىلىك زاڭ ـ ەرەجەلەردىڭ ٴوز اكىمشىلىك وڭىرىندە اتقارىلۋىنا كەپىلدىك ەتۋ جەرگىلىكتى ٴار دارەجەلى حالىق قۇرىلتايلارىنىڭ زاڭدا بەلگىلەنگەن مىندەتى بولىپ تابىلادى. شينجياڭ مەملەكەت تۋى زاڭىن دايەكتى اتقارۋدى زاڭمەن باسقارۋ قۇرىلىسىنىڭ ماڭىزدى تۇتقاسى ەتىپ، جۇڭحۋا ۇلتى ورتاق تۇلعا تانىمىن بەكەمدەۋمەن تىعىز ۇشتاستىرىپ، مەملەكەت تۋى زاڭى ۇگىت ـ تاربيەسىن بەلسەنە ورىستەتەدى.
ۋاكىل ۋاڭ ميڭشان قاتارلىلار بىلاي دەپ قارادى: بۇكىل ەل كولەمىندە ٴبىر رەت مەملەكەت تۋى زاڭى بويىنشا زاڭنىڭ اتقارىلۋىن تەكسەرۋ وتە قاجەتتى، ول مەملەكەت تۋى زاڭىنا قاتىستى بىلىمدەردى جالپىلاستىرۋدا، مەملەكەتتىڭ نەگىزگى زاڭى مەن زاڭدارىنىڭ ابىرويىن قورعاۋدا، سوتسياليستىك وزەكتى قۇن كوزقاراسىن جەتىلدىرۋدە جانە امالياتتا ايگىلەۋدە، جۇڭحۋا ۇلتى ورتاق تۇلعا تانىمىن بەكەمدەۋدە، وتانشىلدىق رۋحتى اسقاقتاتۋدا ماڭىزدى مانگە يە.
