ۋاكىل ٴمامتىمىن قادىر قاتارلىلار كەڭەستىك جوبا ۇسىندى:
مەجە ەسەپ زاڭىنا وزگەرىس ەنگىزۋدى جەدەلدەتىپ، قازىنانىڭ بەلسەندى رولىن اناعۇرلىم ويداعىداي ساۋلەلەندىرۋ كەرەك
انار بۇلت \ شينجياڭ گازەتىنىڭ ٴتىلشىسى گو ليڭ 3 ـ ايدىڭ 10 ـ كۇنى بەيجيڭنەن حابارلايدى. مەملەكەتتى باسقارۋ جۇيەسى مەن باسقارۋ قابىلەتىن وسىزامانداندىرۋدى جاپپاي ىلگەرىلەتىپ، مەجە ەسەپتىڭ ەكونوميكانىڭ، قوعامنىڭ جوعارى ساپالى دامۋىن قامتاماسىز ەتۋدەگى ماڭىزدى رولىن اناعۇرلىم ويداعىداي ساۋلەلەندىرۋ ٴۇشىن، 14 ـ كەزەكتى مەملەكەتتىك حالىق قۇرىلتايىنىڭ 3 ـ ٴماجىلىسى كەزىندە مەملەكەتتىك حالىق قۇرىلتايىنىڭ ۋاكىلى ٴمامتىمىن قادىر باسقا 30 ۋاكىلمەن بىرلەسىپ، «مەجە ەسەپ زاڭىنا وزگەرىس ەنگىزۋ جونىندەگى كەڭەستىك جوبانى» ۇسىندى.
ۋاكىل ٴمامتىمىن قادىر بىلاي دەپ تانىستىردى: قازىر اتقارىلىپ وتىرعان «جۇڭحۋا حالىق رەسپۋبليكاسىنىڭ مەجە ەسەپ زاڭى» اتقارىلعاننان بەرى، ۇكىمەتتىڭ كىرىس ـ شىعىس ارەكەتىن ارناعا ٴتۇسىرۋ، مەجە ەسەپ تەجەمىن كۇشەيتۋ، جاپپاي ارناعا تۇسكەن، اشىق، جاريا مەجە ەسەپ ٴتۇزىمىن ورناتۋ سياقتى جاقتاردا بەلسەندى رول اتقاردى. پارتيا 18 ـ قۇرىلتايىنان بەرى، شي جينپيڭ جولداستى ۇيتقى ەتكەن پارتيا ورتالىق كوميتەتى مەجە ەسەپ رەفورماسىن تەرەڭدەتۋ، حالىق قۇرىلتايىنىڭ مەجە ەسەپتى، سوڭعى ەسەپتى تەكسەرۋىن، باقىلاۋىن كۇشەيتۋ جونىندە ٴبىر قىدىرۋ كەلەلى شەشىمدەر مەن ورنالاستىرۋلار جاسادى، قازىر اتقارىلىپ وتىرعان مەجە ەسەپ زاڭى وتكەرمەلەپ تولەۋ، ناتيجە ـ ونىمدىلىك باسقارۋى، ۇكىمەت قارىزى، حالىق قۇرىلتايىنىڭ باقىلاۋى سياقتى جاقتاردا پارتيا ورتالىق كوميتەتىنىڭ مەجە ەسەپ باسقارۋ جونىندەگى قازىرگى جاڭا تالابىنا ۇيلەسە الماي وتىر.
«جۇڭحۋا حالىق رەسپۋبليكاسىنىڭ مەجە ەسەپ زاڭى» (وزگەرىس ەنگىزىلگەن) 14 ـ كەزەكتى مەملەكەتتىك حالىق قۇرىلتايى تۇراقتى كوميتەتىنىڭ زاڭ شىعارۋ جوباسىنا ەنگىزىلدى. ۋاكىل ٴمامتىمىن قادىر قاتارلىلار مىناداي ۇسىنىس قويدى: زاڭعا وزگەرىس ەنگىزۋ قىزمەتىن جەدەلدەتىپ، زاڭ شىعارۋ جونىندە تەكسەرۋ ـ زەرتتەۋدى ٴتارتىپتى ورىستەتىپ، مەجە ەسەپ زاڭىنداعى وتكەرمەلەپ تولەۋ، ۇكىمەت قارىزى، حالىق قۇرىلتايىنىڭ تەكسەرىپ باقىلاۋى، زاڭدىق جاۋاپكەرشىلىك سياقتى مازمۇندار جونىندەگى زەرتتەۋدى ٴتۇيىندى كۇشەيتىپ، مەجە ەسەپ زاڭىنا وزگەرىس ەنگىزۋ جوباسى نۇسقاسىن تەز ارادا قالىپتاستىرۋ ٴارى كەڭ كولەمدە پىكىر الىپ، پارتيانىڭ ەركىن دەر كەزىندە زاڭ مازمۇنىنا اينالدىرىپ، مەجە ەسەپتى تەكسەرۋ، باقىلاۋ جاعىنداعى تاماشا تاجىريبەلەردى زاڭ ولشەمىنە كوتەرىپ، زاڭ شىعارۋ مەن رەفورمانىڭ ٴبىرىن ـ ٴبىرى جەبەۋىن ىلگەرىلەتىپ، قازىنانىڭ بەلسەندى رولىن اناعۇرلىم ويداعىداي ساۋلەلەندىرۋ كەرەك.
