انار بۇلت \ شينجياڭ گازەتىنىڭ ٴتىلشىسى جاڭ شياۋمي
ورىك گۇلى شەشەك اتاتىن مەزگىل تاياپ قالدى، قاشقار جاڭا ساياحات حالىقارالىق ساياحات كووپەراتيۆى شەكتى جاۋاپكەرشىلىك سەرىكتەستىگىنىڭ باس ديرەكتورى ابدۇقيۇم مامەت وزىنە ايرىقشا سەنىمدى — گۇل شەشەك مەزگىلى جەتپەي جاتىپ، 20 ۇيىرمە الدىن الا تاپسىرىس بەردى.
1993 ـ جىلى ساياحات كاسىبىمەن اينالىسقاننان بەرى، ابدۇقيۇم جەرگىلىكتى ورىنداعى ساياحات كووپەراتيۆتەرىنىڭ قارقىندى دامۋىنا كۋا بولدى. ساياحات كووپەراتيۆىن قۇرساق بولا ما، بولماي ما؟ قيىن با؟ قازىر ماڭايىنداعى تۋىستارى، دوستارى اراسىندا ساياحات كاسىبى قوسىنىنا قوسىلعىسى كەلەتىندەر بارعان سايىن كوبەيدى. ”الاڭسىز قۇرىڭدار، مادەنيەت ـ ساياحات تاراۋلارى ٴبىزدىڭ ارتقى تىرەگىمىز، قيىن ماسەلەگە جولىقساق، ولار ٴبىزدىڭ ونى شەشۋىمىزگە كومەكتەسەدى“، ـ دەدى ول.
بيىل 3 ـ ايعا دەيىن قاشقار ايماعىنداعى ساياحات كووپەراتيۆىنىڭ سانى 155كە جەتتى. 2022 ـ جىلى بۇل سان 64 عانا بولاتىن.
جەرگىلىكتى ورىنداعى ساياحات كووپەراتيۆتەرىنىڭ دامۋىن قولداۋ جانە ىنتالاندىرۋ ٴۇشىن، قاشقار ايماقتىق مادەنيەت، راديو ـ تەلەۆيزيا جانە ساياحات مەكەمەسى تەكسەرىپ بەكىتۋ ىستەرىن ساپالىلاندىرۋ، ساياسات، زاڭ ەرەجەلەردى تياناقتاندىرۋ، قىزمەت وتەۋ مەحانيزمىن ورناتۋ، ماركا جاراتۋعا ىنتالاندىرۋ، ۇگىتتەۋ، جالپىلاستىرۋ ىقپالىن كۇشەيتۋ، باۋلۋ سەرپىنىن زورايتۋ سياقتى جاقتاردان باستاپ كىرىسىپ، ٴبىر قىدىرۋ پارمەندى شارا قولداندى.
سوڭعى جىلدارى جەرگىلىكتى ورىن ساياحات كووپەراتيۆتەرىنىڭ تيجارات كۋالىگى مەن رۇقسات كۋالىگىن ٴبىتىرۋ سياقتى جاقتاردا ”جاسىل ارنا“ اشىپ، ”تومەنگە ٴتۇسىرۋ، باسقارۋ، قىزمەت وتەۋ“ شارالارىن تياناقتاندىردى. ساتى ـ دارەجە ٴتارتىبىن ازايتىپ، تەكسەرىپ بەكىتۋ ۋاقىتىن قىسقارتىپ، كاسىپورىنداردىڭ وزىندىك قۇنىن تومەندەتىپ، كاسىپورىندار ٴۇشىن قىرۋار تەكسەرىپ بەكىتۋ جانە كۋالىكتەردى پوچتادان جىبەرۋدى كۇتۋ ۋاقىتىن ۇنەمدەدى. بەلگىلەمەدەگى ٴتارتىپ بويىنشا ”قۇرىلعانىنا 3 جىل تولعان ٴارى اكىمشىلىك ورگانداردىڭ ايىپ سالۋىن جانە ودان جوعارى ورىنداردىڭ جازالاۋىنا ۇشىراماعان“ بولۋ شارتىنا ۇيلەسەتىن كاسىپورىندارعا مەڭزەس، ساپا كەپىل قاراجاتىن ۋاقىتشا قايتارۋ ساياساتىن ۇزدىكسىز تياناقتاندىردى. تۇتاس جىلدىق مەرزىمدى ارالاۋ جوسپارىن جاساپ، ٴار اپتادا، كەمىندە، ٴبىر رەت قاتىستى مادەنيەت ـ ساياحات كاسىپورنىن ارالاۋعا كەپىلدىك ەتىپ، كاسىپورىنداردىڭ قيىنشىلىعىن جانە سۇرانىسىن ۇعىسىپ، ٴارقايسى تاراۋدى ٴىس جۇزىندىك ماسەلەلەردى كومەكتەسىپ شەشۋگە سايكەستىردى.
”6 ـ ايدان 9 ـ ايعا دەيىن ساياحاتتىڭ قاۋىرت مەزگىلى، مادەنيەت ـ ساياحات مەكەمەسى باس بولىپ ٴتۇيىلىستىرىپ، ساياحات كووپەراتيۆتەرىنىڭ ۇيىرمەلەرگە كولىك سايكەستىرۋىنە، قوناق ۇيگە كەپىلدىك ەتۋىنە كومەكتەسىپ، ٴبىزدىڭ ساياحاتشىلاردى الاڭسىز قابىلداۋىمىزعا مۇمكىندىك جاسادى“، ـ دەدى ابدۇقيۇم.
قاشقار ايماعى ساياحات كووپەراتيۆتەرىنىڭ ساپالىلانعان، تاپسىرىستىق، دارالانعان ونىمدەر شىعارۋىنا جانە قىزمەت وتەۋ جۇرگىزۋىنە قولداۋ كورسەتتى. بىلتىر ابدۇقيۇمنىڭ ساياحات كووپەراتيۆى تاپسىرىس بويىنشا 500دەن استام ساياحات ۇيىرمەسىن قابىلدادى. ول دا ساياحات كووپەراتيۆىنىڭ ۇزدىك جاۋاپتىسى رەتىندە، تاعى باسقا 49 كاسىپتەسىمەن بىرگە 2024 ـ جىلعى ”جىبەك جولىنداعى مەرۋەرت دارىندىلار“ سيلىعىن ەنشىلەدى. ول 20 مىڭ يۋان سيلىق قاراجاتىن ورىك اعاشى ساياسىنداعى تۇسكى شاي، بايىرعى قالاداعى بەيزاتتىق مادەنيەت مۇرالارىن سەزىنۋ سياقتى جاڭا جەلى ونىمدەرىن اشۋعا جۇمساۋدى جوسپارلاۋدا.
”ٴار جىلى قىرۋار ساياحاتشى ساياحات كووپەراتيۆتەرى ۇيىمداستىرعان جالداما ۇشاقپەن، ارناۋلى جەلى پويەزىمەن قاشقاردا ەمىن ـ ەركىن ساياحاتتايدى“. قاشقار ايماقتىق مادەنيەت، راديو ـ تەلەۆيزيا جانە ساياحات مەكەمەسى پارتيا باسشىلىق گرۋپپاسىنىڭ شۋجيى، ورىنباسار مەكەمە باستىعى ليۋ حۇي بىلاي دەدى: ”ٴبىز ساياحات كووپەراتيۆتەرىنىڭ دامۋىنا ۇزدىكسىز قولداۋ كورسەتىپ، تاماشا بازار جۇيەسىن قۇرامىز“.
2024 ـ جىلدان 2025 ـ جىل ارالىعىنداعى كۇز ـ قىس ماۋسىمىندا ىلە قازاق اۆتونوميالى وبلىسىنداعى مادەنيەت ـ ساياحات تاراۋلارى 10 ميلليون يۋان شىعارىپ، ”قۇلجاعا ساياحاتشى شاقىرۋ“ سيلىق، قوسىمشا قاراجاتى ەتتى، مۇنىڭ 2 ميلليون 500 مىڭ يۋانى شيەچىڭ تۇعىرى ارقىلى قوسىمشا قاراجات رەتىندە تاراتىلدى. 2024 ـ جىلى 12 ـ ايدىڭ 20 ـ كۇنىنەن باستاپ ساياحاتشىلار ىلە وبلىسىنداعى حالىقتىق تۇسەلحانالارعا، سونداي ـ اق قوناق ۇيلەرگە ورنالاسسا، %30 تيىمدىلىك جاسالادى، ەڭ جوعارى بولعاندا، 200 يۋان ازايتۋعا بولادى. 3 ـ ايدىڭ 10 ـ كۇنىنە دەيىن 742 قوناق ٴۇي نەمەسە حالىقتىق تۇسەلحانا ۇكىمەت قوسىمشا قاراجاتىنان يگىلىكتەندى، قوسىمشا قاراجات قارجىسى 2 ميلليون 400 مىڭ يۋان بولىپ، 11 ميلليون 600 مىڭ يۋان ساۋدا سوماسىنا تىكەلەي تۇرتكى بولدى.
ىلە وبلىسى فۋگۋاڭ · فوتو سۋرەتكە ٴتۇسىرۋ ٴۇيى حالىقتىق تۇسەلحاناسى وسى مەزگىلدە 172 بولمەگە قوناق قابىلداپ، 16 مىڭ يۋان قوسىمشا قاراجاتتان يگىلىكتەندى، ول 60 مىڭ يۋان ساۋدا سوماسىنا تىكەلەي جەبەۋ بولدى.
شيەچىڭ توبى شينجياڭ ٴىرى رايونىنىڭ باس ديرەكتورى جاڭ جۇنيان بىلاي دەدى: ”سيلىق، قوسىمشا قاراجات ساياساتى مادەنيەت ـ ساياحات تۇتىنۋىنا ٴونىمدى تۇرتكى بولىپ، جەرگىلىكتى ورىنداعى قونالقى ورىن كاسىبىنىڭ قىستا شارۋاشىلىق جۇرگىزۋ بەلسەندىلىگىن قوزعادى“. تەك ىلە وبلىسى عانا ەمەس، شيەچىڭ توبى شينجياڭداعى كوپتەگەن جەرمەن سەلبەستىك جاساسىپ، OTA تۇعىرىندا تۇتىنۋ بەلەتىن تاراتۋ سياقتى ٴتاسىل ارقىلى شينجياڭنىڭ مادەنيەت ـ ساياحات تۇتىنۋىنىڭ دارەجەسىن تاعى جوعارىلاتۋىن بەلسەنە ىلگەرىلەتىپ، مادەنيەت ـ ساياحات كاسىپورىندارىنىڭ دامۋىن جەبەدى.
ناق اقشا قوسىمشا قاراجاتى تاراتىلىپ قانا قويماي، كەمەلدى ەرەجە، زاڭ ەرەجەلەر دە شىعارىلدى. «ىلە قازاق اۆتونوميالى وبلىسىنىڭ حالىقتىق تۇسەلحانالاردى باسقارۋ جانە جەبەۋ ەرەجەسى» 2 ـ ايدىڭ 1 ـ كۇنى رەسمي اتقارىلدى، جەرگىلىكتى ورىنداعى حالىقتىق تۇسەلحانالار باعا، كولەم، ۇگىت جاعىندا اناعۇرلىم جۇيەلى باسقارۋعا يە بولدى.
ستيلى الۋان ٴتۇرلى قونالقى ورىن كاسىپ كۇيى ىلە وبلىسىنا كەلگەن اناعۇرلىم كوپ ساياحاتشىنىڭ وزگەشە قونالقى ورىن سەزىنۋى ٴۇشىن اقشا جۇمساۋىنا تۇرتكى بولدى ٴارى اناعۇرلىم كوپ تيجاراتشىنى ىلەگە كەلىپ قارجى قوسىپ شارۋاشىلىق قۇرىپ، حالىقتىق تۇسەلحانا جۇرگىزۋگە باۋرادى.
ىلە وبلىستىق مادەنيەت، راديو ـ تەلەۆيزيا جانە ساياحات مەكەمەسى پارتيا باسشىلىق گرۋپپاسىنىڭ شۋجيى جاڭ چۇنميڭ مىنالاردى ٴبىلدىردى: ”قازىر ىلە وبلىسىنداعى قونالقى ورىن كاسىبىنىڭ ارتۋى تەز، قونالقى ورىن كاسىپورىندارىنىڭ سانى كوپ“. 2024 ـ جىلدىڭ سوڭىنا دەيىن ىلە وبلىسىندا جالپى 207 مىڭ توسەك ورىن بولدى، تاعى ٴبىر توپ بەس جۇلدىز دارەجەلى قوناق ٴۇي، جاڭا حالىقتىق تۇسەلحانا ىسكە قوسىلدى. 2023 ـ جىلى، 2024 ـ جىلى توسەك ورىن سانىنىڭ ارتۋى تۇگەلدەي 20 مىڭنىڭ ۇستىندە بولدى. قازىر تاعى ٴبىر توپ جوعارى دارەجەلى قوناق ٴۇي، جاڭا حالىقتىق تۇسەلحانا قاۋىرت سالىنۋ ۇستىندە.
”بازار قاجەتى بولعاندا عانا قونالقى ورىن كاسىبىنىڭ اقاۋسىز دامۋىن اناعۇرلىم ويداعىداي جەبەۋگە بولادى“. جاڭ چۇنميڭ بىلاي دەدى: ىلە وبلىسى ەرەجەنى ۇزدىكسىز كەمەلدەندىرىپ، قارجى، سيلىق، قوسىمشا قاراجات بەرىپ، مادەنيەت ـ ساياحات ونىمدەرىن مولايتىپ، كورىنىستىك سەزىنۋدە جاڭالىق اشىپ، ساياحات ساپاسىن جوعارىلاتىپ، حالىقتىق تۇسەلحانالاردىڭ ساپاسىن جوعارىلاتىپ جاڭالاۋعا قولداۋ كورسەتىپ، شارۋاشىلىق ـ ساۋدا ۇگىتى ارقىلى ايگىلى ماركا تۇلعالايدى.
