انار بۇلت \ شينجياڭ گازەتىنىڭ ٴتىلشىسى لي ياڭ 3 ـ ايدىڭ 18 ـ كۇنى اقسۋدان حابارلايدى. 3 ـ ايدىڭ 18 ـ كۇنى شينجياڭ كەن شارۋاشىلىعى ۇقىعىن وتكەرمەلەۋ نىساندارىن تانىستىرۋ ٴماجىلىسى اقسۋ قالاسىندا وتكىزىلدى. اۆتونوميالى رايوندىق پارتكومنىڭ ورىنباسار شۋجيى، اۆتونوميالى رايوننىڭ ٴتوراعاسى ەركىن تۇنياز تانىستىرۋ ماجىلىسىنە قاتىناستى ٴارى ارناۋ ٴسوز سويلەدى.
ەركىن تۇنياز بىلاي دەپ اتاپ كورسەتتى: پارتيا 18 ـ قۇرىلتايىنان بەرى، شي جينپيڭ جولداستى ۇيتقى ەتكەن پارتيا ورتالىق كوميتەتى شينجياڭ قىزمەتىنە بارىنشا ٴمان بەرىپ، ايرىقشا كوڭىل ٴبولىپ، قامقورلىق جاساپ، شينجياڭعا ”بەس ۇلكەن ستراتەگيالىق ورىن“ بەلگىلەدى، شينجياڭنىڭ جوعارى ساپالى دامۋى ماڭىزدى ستراتەگيالىق وراي مەزگىلىن قارسى الدى. اۆتونوميالى رايوندىق پارتكوم بۇكىل شينجياڭداعى ٴار ۇلت كادرلارى مەن بۇقاراسىن ىنتىماقتاستىرىپ جانە باستاپ، جاڭا داۋىردەگى پارتيانىڭ شينجياڭدى باسقارۋ جالپى جوباسىن تولىق، دالمە ـ ٴدال، جاپپاي دايەكتىلەندىرىپ، وڭىرلىك ورىن، ەنەرگيا، بايلىق سياقتى جاقتارداعى ارتىقشىلىعىن، كومەسكى كۇشىن جەدەل ىسكە قوستى، شينجياڭ ەكونوميكاسىنىڭ، قوعامىنىڭ ”ورنىقتىلىق“ نەگىزى ٴتىپتى دە بەكەمدەلىپ، ”ىلگەرىلەۋ“ قوزعالىس قۋاتى كورنەكتى كۇشەيىپ، ”جاڭالىق اشۋ“ ساپا ـ ونىمدىلىگى زور دارەجەدە جوعارىلادى. ٴبىز مەملەكەتتىڭ قاجەتىن، شينجياڭنىڭ قابىلەتىن تياناق ەتىپ، مەملەكەتتىك ەنەرگيا بايلىعى ستراتەگيالىق قامتاماسىزدىق بازاسىن تۇلعالاۋدى ارقاۋ ەتە وتىرىپ جاڭا كەزەكتى كەن ىزدەۋدە تىڭ تابىسقا جەتۋ ستراتەگيالىق ارەكەتىن ىشكەرىلەي اتقارىپ، جاسىل كەن شارۋاشىلىعى سياقتى ”ون ٴىرى كاسىپ سالاسى شوعىرىن“ جوعارى دەڭگەيدە قالىپتاستىرىپ، ٴبىر توپ ۇلكەن كەن، ساپالى كەن، شۇعىل قاجەتتى كەندەردى جاڭادان بايقاپ، كەن شارۋاشىلىعى ۇقىعىن وتكەرمەلەۋ مولشەرى، كەلىسۋ سوماسى، تابىسى تالاي رەت جاڭا دەڭگەيگە جەتىپ، ٴبىر توپ ستراتەگيالىق كەن بايلىعى مەن باسىمدىققا يە كەن بايلىعىن بارلاۋ ـ اشۋ زاپاس ٴوڭىرىن، ستراتەگيالىق جالعاستىرۋ ٴوڭىرىن جەدەل قالىپتاستىردىق. شينجياڭعا قارجى قوسۋ بولاشاققا قارجى قوسقاندىق. شينجياڭ جاڭا دامۋ ۇستانىمىن تولىق، دالمە ـ ٴدال، جاپپاي دايەكتىلەندىرىپ، جىبەك جولى ەكونوميكالىق بەلدەۋى وزەكتى رايونى قۇرىلىسىن جەدەل ىلگەرىلەتىپ، شينجياڭ ەرەكشەلىگىنە يە وسى زامانعى كاسىپ سالاسى جۇيەسىن كۇش سالا ورناتىپ، بازارلانعان، زاڭمەن باسقارىلاتىن، حالىقارالانعان شارۋاشىلىق ـ ساۋدا ورتاسىن قۇلشىنا قالىپتاستىرىپ، فاكتور قامتاماسىزدىعىن ۇزدىكسىز كۇشەيتىپ، ٴتۇرلى كاسىپورىنداردىڭ شينجياڭدا دامۋىنا تاماشا شارت ـ جاعداي ازىرلەيدى. كوپشىلىكتىڭ شينجياڭعا كەلىپ قارجى قوسىپ، شارۋاشىلىعىن گۇلدەندىرىپ، شينجياڭنىڭ كەن بايلىعىن بارلاۋ ـ اشۋىنا بەلسەنە ات سالىسىپ، دامۋ ورايىنان بىرگە يگىلىكتەنۋىن قىزۋ قارسى الامىز.
جاراتىلىستىق بايلىق مينيسترلىگى كەن بايلىعىن قورعاۋدى باقىلاۋ مەكەمەسىندەگى، جۇڭگو گەولوگيالىق تەكسەرۋ مەكەمەسى بايلىقتى باعالاۋ بولىمىندەگى قاتىستى جاۋاپتى جولداستار ارناۋ ٴسوز سويلەدى.
شاندۇڭ التىن توبى شەكتى سەرىكتەستىگى، شينجياڭ ياشين كومىر قاباتى گازىنا قارجى قوسۋ، اشۋ (توبى) شەكتى جاۋاپكەرشىلىك سەرىكتەستىگى سياقتى كاسىپورىنداردىڭ ۋاكىلدەرى ٴسوز سويلەدى.
ماجىلىستە جاراتىلىستىق بايلىق مينيسترلىگى، اۆتونوميالى رايون سىندى ەكى دارەجەلى كۋالىك تاراتۋ ۇقىق شەگىندە بەرىلەتىن كەن شارۋاشىلىعى ۇقىعىن وتكەرمەلەۋ نىساندارى جانە بيڭتۋاننىڭ كەن شارۋاشىلىعى ۇقىعىن وتكەرمەلەۋ نىساندارى تانىستىرىلدى. اقسۋ ايماعى، ٴۇرىمجى قالاسى، تۇرپان قالاسى، حوتان ايماعى، تارباعاتاي ايماعى جەكە ـ جەكە قاراستىلىعىنداعى وڭىرلەردىڭ كەن شارۋاشىلىعى ۇقىعىن وتكەرمەلەۋ نىساندارىن تانىستىردى.
تانىستىرۋ ماجىلىسىندە قاتىستى ايماق، وبلىس، قالالار كاسىپورىندارمەن سول جەردە كەلىسىم جاساستى.
وسى رەتكى تانىستىرۋ ماجىلىسىندە 171 ساپالى رايون بولىكتەرى شوعىرلى تانىستىرۋعا دەن قويا دايىندالىپ، مۇناي ـ تابيعي گاز، كومىر، مىس، التىن، ليتي، كالي تۇزى سياقتى 21 ٴتۇرلى نەگىزگى كەن بايلىعىن قامتىدى، ٴارقايسى رايون بولىكتەرى تۇگەلدەي ەگجەي ـ تەگجەيلى دالەلدەۋ، اشالاي سۇرىپتاۋ ارقىلى ٴبىرشاما جاقسى كەن قالىپتاستىرۋ گەولوگيالىق شارت ـ جاعدايىنا، كەن ىزدەۋ بولاشاعىنا جانە بايلىق كومەسكى كۇشىنە يە بولدى.
چىن ۋيجۇن باسقاردى، حا زىڭيوۋ قاتىناستى. اۆتونوميالى رايوننىڭ جانە بيڭتۋاننىڭ قاتىستى تاراۋلارى مەن ورىندارىنىڭ جاۋاپتى جولداستارى، ٴارقايسى ايماق، وبلىس، قالالاردىڭ نەگىزگى جاۋاپتى جولداستارى، شينجياڭنىڭ ٴىشى ـ سىرتىنداعى قاتىستى كاسىپورىنداردىڭ، فينانس قۇرىلىمداردىڭ جاۋاپتىلارى ماجىلىسكە قاتىناستى.
