انار بۇلت \ شينجياڭ گازەتىنىڭ ٴتىلشىسى ياۋ گاڭ
”اۆتوكولىك تايىپ جولدان شىعىپ كەتىپتى، شۇعىل كومەك قاجەت“!
3 ـ ايدىڭ 11 ـ كۇنى ساعات 14تە التاي قالاسى شۋەدۋ الەۋمەتتىك يگىلىك شۇعىل قۇتقارۋ ـ كومەكتەسۋ اترەتىنىڭ ۋيشين توبىنا وسىنداي شۇعىل حابارلاندىرۋ كەلدى.
سول كۇنى التاي قالاسىندا قالىڭ قار جاۋىپ، ٴىشىنارا جەرلەردە جاۋعان قاردىڭ قالىڭدىعى 40 سانتيمەتردەن اسىپ، جولدىڭ كورىنۋ ارالىعى كۇرت قىسقارىپ، ٴبىر ٴبولىم جول بولىكتەرىندە اۆتوكولىكتەردىڭ قاتىناۋى كەدەرگىگە ۇشىرادى.
”مەن سول ماڭدامىن، بارايىن“! وقيعا تۋىلعان جەر قىزىلتاس قالاشىعى ساۋىن سيىر فەرماسىنا ەڭ جاقىن جەردەگى اترەت مۇشەسى ەرلان دوسان حاباردى كورە سالا دەرەۋ جاۋاپ قايتاردى دا، اۆتوكولىگىنىڭ كىلتىن الا سالىپ دالاعا قاراي جۇگىردى. اۆتوكولىك ساتۋمەن اينالىساتىن ول قالىڭ قاردىڭ قامالىپ قالعان اۆتوكولىك جونىنەن نەنى اڭعارتاتىنىن ابدەن بىلەتىن، مۇندايدا اۆتوكولىكتەر قارعا باتقان سايىن اۋدارىلىپ كەتۋ حاۋپى كۇشەيە تۇسەتىن ەدى.
قار توپەپ جاۋىپ تۇر، كوشەدە كولدەنەڭ جۇرگەن ادام نە اۆتوكولىك كورىنبەيدى. ەرلان مامىق شاپانىن قىمتانا ٴتۇسىپ، اۆتوكولىكتىڭ جاعدايىن تەكسەرىپ شىقتى دا، دالالىق اۆتوكولىگىن ايداپ قالىڭ قار توپەپ تۇرعان الەمگە كىردى دە كەتتى.
قاپالاقتاپ جاۋعان قالىڭ قاردان تاياق تاستام جەر كورىنبەيدى، ەرلان اينەك سىپىرعىشتى ەڭ جوعارى شەكتە اشىپ قويسا دا، توپەلەگەن قاردى تازارتىپ ۇلگىرە المادى. ساۋىن سيىر فەرماسىنا باراتىن اۋىل تاس جولىن قالىڭ قار باسىپ تاستاپتى، ”مەنىڭ اۆتوكولىگىم دە نەشە رەت تايعاناپ جولدان شىعىپ كەتە جازدادى“. ون نەشە جىلدىق قارلى دالادا كولىك جۇرگىزۋ تاجىريبەسى بار وسى ساقا شوفەر اۆتوكولىگىنىڭ رولىن مىقتاپ ۇستاپ، ٴسات سايىن جەر جاعدايىن بارلاپ، تايعاناق جول بولىكتەرىنە كەلگەندە كولىگىن توقتاتىپ، دوڭگەلەكتىڭ استىنداعى قاردى كۇرەكپەن كۇرەي ٴجۇرىپ، ماشاقاتپەن ىلگەرىلەپ كەلەدى.
سول ورىنعا جەتكەن كەزدە قاردا قامالىپ قالعان جەڭىل كولىكتىڭ وڭ جاق ارتقى دوڭگەلەگى سۋ اعارعا كەپتەلىپ، اۆتوكولىك ٴبىر جاعىنا مۇلدە قيسايىپ، ەندى از بولسا اۋدارىلۋعا تاياپ تۇر ەكەن.
ەرلان مەن جەڭىل كولىكتىڭ يەسى باقىتبەك سەرىك ەكەۋى دەرەۋ كولىك سۇيرەۋ ارقانىن اۆتوكولىككە بايلاپ، دوڭگەلەكتىڭ استىنداعى توڭ توپىراقتى كەزەكتەسىپ قازىپ، دايىنداپ العان تايعاناۋدان ساقتايتىن شاعىلدى كۇرەكتەپ دوڭگەلەكتىڭ اراسىنا توگە باستادى. جەل ۇشىرعان قار تۇيىرشىكتەرى مەن قۇم قيىرشىقتار بەتكە ۇرىپ، مامىق شاپانى قاردىڭ سۋىنا مالشىنىپ ساۋىس بوپ قاتىپ قالدى، قاس ـ كىرپىكتەرىن مۇز سۇڭگى قاپتادى... 40 مينۋتتان اسا جانتالاسىپ قايتا ـ قايتا جوندەگەن سوڭ، گۇرىلدەگەن موتور ۇنىنە ىلەسە، باتىپ قالعان اۆتوكولىك اقىرى قاتەردەن قۇتقارىلدى.
”قۇتقارۋ ٴساتتى بولدى“! ساعات 16دان 49 مينۋت وتكەندە ەرلان ۋيشين توبىندا جاۋاپ قايتاردى، قۇتقارۋ ـ كومەكتەسۋ اترەتىنىڭ مۇشەلەرى جاپا ـ تارماعاي ”باسبارماق شىعارعان“ بەينەلەۋىش سۋرەتتەر جولداپ ماداق ٴبىلدىردى.
بۇل جولعى قيان ـ كەسكى قۇتقارۋ ارەكەتى شۋەدۋ الەۋمەتتىك يگىلىك شۇعىل قۇتقارۋ ـ كومەكتەسۋ اترەتىنىڭ سول كۇنگى ون نەشە رەتكى قۇتقارۋ ارەكەتىنىڭ بىرەۋى عانا. اترەت قۇرۋشىسى لو رۇيجۇن بىلاي دەدى: اۆتوكولىك جۇمىستارىمەن اينالىسۋشىلار، قوسىننان شەگىنگەن اسكەريلەر، دالالىق ساياحات اۋەسكەرلەرى سياقتى 500دەن استام ەرىكتىدەن قۇرالعان وسى قوسىن 2015 ـ جىلى قۇرىلعاننان بەرى ۇشى ـ قيىرسىز قارلى دالادا سانسىز قۇتقارۋ ـ كومەكتەسۋدىڭ ٴىزىن قالدىردى. قالىڭ قار جاۋىپ تۇرعان كەشتەردە وڭتۇستىكتەن كەلگەن ساياحاتشىلاردى قايتار جولىنا جەتكىزىپ سالۋدان تارتىپ، جاز ماۋسىمىندا تاۋ قويناۋلارىنا ەنىپ اداسىپ كەتكەن ساياحاتشىلاردى ىزدەۋ ـ قۇتقارۋعا دەيىن، الەۋمەتتىك يگىلىك بويىنشا قۇتقارۋ ـ كومەكتەسۋدى تاباندىلىقپەن جالعاستىرعان وسىناۋ اترەت مۇشەلەرىن كوپشىلىك جاقىن تارتىپ ”تاس جول باتىرلارى“ دەپ اتاپ كەتتى.
لو رۇيجۇن 10 جىل ىشىندە قانشا اۆتوكولىكتى قۇتقارىپ، قانشا ادامعا كومەكتەسكەندىگىن ۇمىتىپ تا قالىپتى، قۇتقارۋ ـ كومەكتەسۋ اترەتى العاش قۇرىلعاندا نەبارى 5 ادام بولعانى، قازىر كوبەيىپ 500دەن استامعا جەتىپ، التاي ايماعىنىڭ بارلىق اۋدان، قالاسىن قامتىعانى عانا انىق ەسىندە ەكەن. قازىر جەرگىلىكتى ورىنداعى قوناق ٴۇي، كورىنىس ٴوڭىرى سياقتىلاردىڭ ٴبارى كورنەكتى ورىنعا شۋەدۋ الەۋمەتتىك يگىلىك شۇعىل قۇتقارۋ ـ كومەكتەسۋ اترەتىنىڭ حابارلاسۋ ٴنومىرىن جازىپ قويادى. لو رۇيجۇن ٴار جولعى قۇتقارۋ ـ كومەكتەسۋ بارىسىن دوۋيىن تۇعىرىندا جاريالاپ وتىرادى، بەينەجازبادا دا قۇتقارۋ ـ كومەكتەسۋ اترەتىنىڭ حابارلاسۋ ٴنومىرى بار، حاۋىپ ـ قاتەرگە ۇشىراعانداردىڭ تاۋىپ الۋىنا وتە قولايلى.
”كىم بولسا دا قيىنشىلىققا ۇشىرايتىن كەزى بولادى“، نە ٴۇشىن الەۋمەتتىك يگىلىك قۇتقارۋ ـ كومەكتەسۋ ىسىمەن اينالىستىڭىز دەگەن سۇراققا ”ساتىپ العان اۆتوكولىكتەرىمنىڭ بارىندە كولىك سۇيرەۋ ارقانى دايىن تۇرادى“، ـ دەپ ەرلان كۇلە جاۋاپ بەردى. ول قول تەلەفونىن 24 ساعات بويى اشىپ، داۋىسىن ەڭ جوعارى دەڭگەيگە كوتەرىپ، قۇتقارۋ سيگنالى كەلگەن زامان اتتانۋعا ساقاداي ساي تۇرادى.
ءتىلشى اسەرى
قار ـ مۇز قۇرسانعان جولداعى مەيىرىم
قارلى بوران ۇيتقىعان جولدا مۇلدە بەيتانىس ٴبىر ادامنىڭ 40 مينۋت بويى قارعا مالشىنىپ سەنى قۇتقارىپ، كومەكتەسكەنى جان ـ جۇرەگىڭدى جىلىتارى حاق.
مۇنداي حيكايالار التاي قالاسى شۋەدۋ الەۋمەتتىك يگىلىك شۇعىل قۇتقارۋ ـ كومەكتەسۋ اترەتىندە كۇندە تۋىلىپ جاتادى. اۆتوكولىك جوندەۋشىدەن تارتىپ قوسىننان شەگىنگەن اسكەريلەرگە دەيىن، حالىقتىق تۇسەلحانا قوجايىنىنان تارتىپ شاڭعى جاتتىقتىرۋشىسىنا دەيىن 500دەن استام ەرىكتى وزدەرىنىڭ مەيىر ـ ماحابباتىنان قورعان جاساپ، باسىنا ٴىس تۇسكەن جانداردىڭ قاسىنان تابىلدى. اترەت قۇرۋشىسى لو رۇيجۇننىڭ قول تەلەفونىنداعى فوتو البومدا كوپتەگەن بەينەجازبالار مەن سۋرەتتەر بار، وسى بەينەجازبالار مەن سۋرەتتەردەن ادامدار الەۋمەتتىك يگىلىك كۇش ـ قۋاتىنىڭ تولىسۋىن عانا ەمەس، ونان دا ماڭىزدىسى، ٴبىر قالانىڭ مەيىرىمدىلىككە تولعان قاسيەتىن دە بايقاي الادى.
الەۋمەتتىك يگىلىكپەن شۇعىلدانعان وسى جانداردى شينجياڭنىڭ ەڭ كوركەم كورىنىسى دەۋگە بولادى، ولار قاشاندا سۋىرىلىپ شىعىپ وزگەلەرگە ٴۇمىت باعىشتايدى، قار ـ مۇز قۇرسانىپ تۇرسا دا ىستىق مەيىرىن سيلايدى.
