انار بۇلت \ شينجياڭ گازەتىنىڭ ٴتىلشىسى لۋ فىڭباۋ 3 ـ ايدىڭ 26 ـ كۇنى كورلادان حابارلايدى. 3 ـ ايدىڭ 26 ـ كۇنى شينجياڭنىڭ ٴتۇيىندى تاس جول قۇرىلىسى نىساندارىندا شوعىرلى قۇرىلىس باستاۋ سالتى كورلا قالاسىندا وتكىزىلدى، 8 ٴتۇيىندى تاس جول نىسانىندا شوعىرلى قۇرىلىس باستالدى.
3 ـ ايدىڭ 26 ـ كۇنى تۇستەن بۇرىن S30 جەلىسىندەگى كورلا تاشدەن - شاڭكۋ ونەركاسىپ باقشاسى (كورلا اۋماعىنان وتەدى) نىسانى جۇمىس باسىندا ماشينالاردىڭ گۇرىلدەگەن داۋىسى قۇلاق تۇندىردى، جەر تەگىستەۋ ماشيناسى نىسان جەلىسىنىڭ بەتالىسىن بويلاي جەر بەتىن تەگىستەپ، قازۋ ماشيناسى قۇم ـ شاعىل قاباتىن قازىپ، جول تاپتاعىش ماشينا ونىڭ سوڭىنان ەرىپ قايتا تاپتاپ جاتتى.
”تاشدەن - شاڭكۋ جوعارى قارقىندى تاس جول نىسانى قوس باعىتتا 4 اۆتوكولىك قاتىنايتىن جوعارى قارقىندى تاس جول ولشەمى بويىنشا سالىنادى، قۇرىلىس مەرزىمى 4 جىل، سالىنىپ بولعاننان كەيىن G3012 جەلىسىنىڭ كورلانى باسىپ وتەتىن بولىگىندەگى قاتىناس قىسىمى جەڭىلدەپ، شينجياڭنىڭ جول تورى دەڭگەيى جوعارىلايدى“، ـ دەدى شينجياڭ تاشدەن ـ شاڭكۋ تاس جول قارجى قوسۋ، دامىتۋ شەكتى جاۋاپكەرشىلىك سەرىكتەستىگىنىڭ القا باستىعى اكرامجان مامەت.
وسى رەت شوعىرلى قۇرىلىس باستالعان S30 جەلىسىندەگى كورلا تاشدەن - شاڭكۋ ونەركاسىپ باقشاسىنا دەيىنگى تاس جول (كورلا اۋماعىنان وتەتىن)، بەدەل شەكارا وتكەلى تاس جولى، S236 جەلىسى نوم - اراتۇرىك تاس جولى، S246 جەلىسى بەيشان كومىر قۇمدانى - جيجيحۋ كولى تاس جولى قاتارلى 8 ٴتۇيىندى تاس جول نىسانىنىڭ قۇرىلىس ارالىعى 331 كيلومەتر، جيىنى 13 ميلليارد يۋان قارجى قوسىلعان. مۇنىڭ ىشىندە باقشا رايونى تاس جولى، شەكارا وتكەلى تاس جولى دا، بايلىق تاس جولى دا بار، نىسان سالىنىپ بولعاننان كەيىن ”ٴبىر بەلدەۋ، ٴبىر جول“ حالىقارالىق زات اينالىمى ۇلكەن ارناسىن اناعۇرلىم ىركىلىسسىزدەندىرىپ، بۇكىل رايون ەكونوميكاسىنىڭ ”كۇرە تامىرىن“ اشىپ، ”ون ٴىرى كاسىپ سالاسى شوعىرى“ قۇرىلىسىنا اناعۇرلىم ويداعىداي قىزمەت وتەپ، شينجياڭنىڭ جوعارى ساپالى دامۋىنا قۋاتتى قوزعالىس قۋاتىن ۇستەيدى.
سوڭعى جىلدارى شينجياڭ نەگىزدىك قۇرىلعىلار قۇرىلىسى سەرپىنىن ٴۇرتىس ارتتىردى، 2024 ـ جىلعا دەيىن بۇكىل شينجياڭداعى تاس جولدىڭ جالپى ۇزىندىعى 230 مىڭ كيلومەترگە جەتتى. بيىل شينجياڭ G3033 جەلىسى كۇيتۇن - مايتاۋ - كۇشار تاس جولى، G217 جەلىسى ياركەن - تاشقورعان تاس جولى، G571 جەلىسى لاپەيچۋان - باشقورعان تاس جولى قاتارلى 20 كەلەلى نىساندا قۇرىلىس باستاۋدى جوسپارلادى.
8 ٴتۇيىندى تاس جول نىسانىندا قۇرىلىس باستالعاننان كەيىن قۇرىلىسقا قاتىناسقان ورىندار قۇرىلىس جۇرگىزۋدى ۇيىمداستىرۋدى ساپالىلاندىرىپ، ادام كۇشىن، زاتتىق كۇشتى تولىقتاپ، قۇرىلىس جۇمىسىن جەدەل ىلگەرىلەتىپ، نىساندى ەرتەرەك اياقتاتۋعا كۇش سالادى. ”تۇتاس جىلدا 80 ميلليارد يۋان قارجى قوسۋ نىسانا ـ مىندەتىن كوزدەپ، نىسان قۇرىلىسىن بار كۇشپەن ىلگەرىلەتىپ، نىسانداردىڭ ەرتەرەك سالىنۋىنا، ەرتەرەك اۆتوكولىك قاتىناۋىنا، حالىققا ەرتەرەك تيىمدىلىك جەتكىزۋىنە شىنايى كەپىلدىك ەتىپ، جۇڭگو ۇلگىسىندەگى وسىزامانداندىرۋدىڭ شينجياڭ امالياتىن ىلگەرىلەتۋگە قاتىناس جاعىندا اناعۇرلىم زور كۇش قوسىپ، اۆتونوميالى رايون قۇرىلعاندىعىنىڭ 70 جىلدىعىن ۇزدىك ناتيجەمەن قارسى الامىز“، ـ دەدى اۆتونوميالى رايوندىق قاتىناس ـ تاسىمال مەڭگەرمەسى پارتكومىنىڭ شۋجيى، ورىنباسار مەڭگەرمە باستىعى گو شىڭ.
