”گۇل تاماشالاۋ 1.0دەن“ ”كاسىپ سالاسى 2.0گە“ دەيىن
”شينجياڭنىڭ ٴبىرىنشى كوكتەمى“ كوكتەمگى ەكونوميكانى جانداندىردى
انار بۇلت \ شينجياڭ گازەتىنىڭ ٴتىلشىسى حى جياڭ
شاڭعى اۋەسكەرلەرى التايدىڭ ”ۇلپا قار مەكەنىنەن“ قايتقىسى كەلمەي جاتقاندا، تۇرپاندى القىزىل ورىك گۇلى كومكەردى. 3 ـ ايدىڭ 22 ـ كۇنى ”شينجياڭنىڭ ٴبىرىنشى كوكتەمى · گۇل اشىلعان تۇرپان“ 2025 تۇرپان ورىك گۇلى ماۋسىمى مادەنيەت ـ ساياحات قيمىلى جانە توقسۇن اۋدانىنىڭ 8 ـ كەزەكتى ورىك گۇلى ماۋسىمى قيمىلى (تومەندە قىسقارتىلىپ ”ورىك گۇلى ماۋسىمى“ دەلىنەدى) توقسۇن اۋدانىندا سالتاناتپەن باستالدى. وسى كەزدە توقسۇن اۋدانى شيا قالاشىعى نانحۋ قىستاعىندا ورىك اعاشتارىنىڭ بۇتاقتارىندا القىزىل نازىك گۇل جاپىراقتارى قىس كەتىپ، كوكتەم كەلگەندىگىن ايگىلەپ تۇرعانداي.
كوكتەم بەتاشارى
بۇل جارتى جىل دايىندالعان قايتا كەزدەسۋ بولدى. قولدارىنا قايشى العان تۇرپان شارۋالارى ورىك باعىندا قاربالاس ٴجۇر، ورىك گۇلى شىرت ۇيقىدا جاتقان كوبەلەك قۇرتىنداي بار كۇشىن بويىنا جيناپ قاۋاشاق جارۋعا دايىندالدى. 3 ـ ايدىڭ ورتا شەنىندە سان مىڭداعان القىزىل قاۋاشاق ٴتۇيىن جارىپ، 10 مىڭ مۋلىق ورىك ورمانىن ۇشى ـ قيىرسىز گۇلدى كىلەمگە اينالدىردى. مەملەكەت تاس جولىنداعى اۆتوكولىكتەر يرەلەڭدەي اققان وزەنگە ۇقسايدى، اۋادا حوش ٴيىس پەن موتوردىڭ گۇرىلدەگەن داۋىسى توعىسىپ، شينجياڭعا ٴتان ”كوكتەمگە كوشۋدىڭ“ مارشىن اسقاقتاتا شىرقادى.
جىبەك جولىنداعى، ٴسوزسىز، باسىپ وتەتىن جەر رەتىندە، تۇرپاننىڭ ورىك گۇلى ەجەلدەن وركەنيەتتىڭ توعىسۋىنىڭ ايعاعى بولىپ كەلەدى. قازىر ول جاڭا حيكىمەتتى جارىققا شىعارۋدا: ورىك گۇلى ماۋسىمى باستالعان كۇنى توقسۇن اۋدانى مەجەمەن 300 مىڭ ساياحاتشى (رەت) قابىلدادى. شارۋالار شاتتىعى ساياجايىنىڭ قوجايىنى ۋاڭ شياۋلۇڭ تاڭنان ۇلكەن قازان اسىپ، 100دەن استام ادامعا جەتەتىن پالاۋدىڭ حوش ٴيىسى ورىك باعىندا اڭقىدى؛ كەستەشى تۇنيازحان ٴنازىم 40 نەشە كەستەلى بۇيىمدى ورىك اعاشىنىڭ تۇبىنە جايىپ، جىبەك ٴجىپ پەن گۇل جاپىراقشاسى كوكتەم سامالىندا بيگە باستى؛ ەلەكتروندى ساۋدا جۇرگىزۋشىلەر ورىك باعىندا قايشالىسىپ، تىكە تاراتۋ بولمەسىندە ”شينجياڭنىڭ ٴبىرىنشى ورىگىنە“ تاپسىرىس بەرۋ مولشەرى ۇزدىكسىز جاڭالاندى. 20 كۇندەي اشىلاتىن بۇل گۇلدەر مەجەمەن 900 ميلليون يۋان مادەنيەت ـ ساياحات تۇتىنۋىن جارىققا شىعارادى.
”بۇل قىسقى، كوكتەمگى مادەنيەت پەن ساياحاتتىڭ جىكسىز ٴتۇيىلىسۋى“، ـ دەدى تۇرپان قالالىق مادەنيەت، دەنە تاربيە، راديو ـ تەلەۆيزيا جانە ساياحات مەكەمەسى پارتيا باسشىلىق گرۋپپاسىنىڭ ورىنباسار شۋجيى، ورىنباسار مەكەمە باستىعى ياڭ يۇڭ. 2024 ـ جىلى 11 ـ ايدان باستاپ تۇرپان قالاسى قىسقى ساياحاتتىڭ دارەجەسىن جوعارىلاتۋ ارەكەتىن باستاپ، حالىققا تيىمدىلىك جاساۋ ساياساتىن جاريالاۋ، قىسقى ساياحاتتىڭ سارا جەلىلەرىن ۇسىنۋ سياقتى جەلىلەس شارالار ارقىلى، اسىرەسە، ٴار اپتانىڭ سوڭىندا ورىستەتىلەتىن ”اۋىل شارۋاشىلىعى، مادەنيەت، ساياحات“ نەگىزگى تاقىرىپتىق قيمىلى ارقىلى ساياحاتشىلاردى ايالداتىپ، ٴداستۇرلى سايابىر مەزگىلدى ”شۋاقتى قىسقا“ اينالدىردى.
شينجياڭ ٴاي ـ ۋانكى حالىقارالىق ساياحات كووپەراتيۆى شەكتى سەرىكتەستىگىنىڭ باس ديرەكتورى لي حۇيدىڭ ەسەپ داپتەرى وسى دۋماندى شاقتى دالەلدەدى: ”ورىك گۇلى ماۋسىمىنىڭ الدىڭعى 3 كۇنىندە 4000نان استام ادام تىزىمدەلدى، ٴۇرىمجى، سانجى، شىحىزى ساياحاتشىلارى باسىم كوپ ساندى يەلەيدى“. ال نانحۋ قىستاعىندا ديقان ٴاشىراپ ھيسامديندە ەڭ قاراپايىم ەسەپ داپتەرى ساقتالعان: ٴار جىلى گۇل اشقان مەزگىلدە ساياحاتشىلاردىڭ اياعى ۇزىلمەيدى، 25 مىڭ يۋان كىرىس كىرەدى.
كاسىپ سالاسى مەن قالا بىرگە جانداندى
8 جىلدىق كوكتەم مەن كۇزدە شىڭدالۋدان ”شينجياڭنىڭ ٴبىرىنشى كوكتەمىن“ التىن ماڭدايشالىق ەتكەن ورىك گۇلى ماۋسىمى ”گۇل تاماشالاۋ 1.0دەن“ ”كاسىپ سالاسى2.0گە“ دەيىنگى وزگەرىستى ورىندادى. بيىل ورىك گۇلى ماۋسىمىندا 70 نەشە الاڭ مادەنيەت سالتاناتى ىركەس ـ تىركەس قويىلىپ، جىبەك جولىنىڭ كوكتەمگى حيكايالارىن ۋاقىت قويناۋىنا قاراي كەڭەيتتى.
توقسۇن اۋدانى 12 مۇقامنىڭ تامىلجىعان اۋەنىن كۇنچۇي تەاترىنىڭ جاعىمدى ۇنىمەن توعىستىرىپ، ۋاقىت پەن كەڭىستىكتەن اتتاعان مادەنيەت ديالوگىن ايگىلەدى؛ گاۋچاڭ رايونى ”يارعۇلدى تۇندە سەرۋەندەۋ“ نىسانىن ۇسىنىپ، مىڭ جىلدىق بايىرعى قالا شام ونەرى ارقىلى جاڭا ومىرشەڭدىك قاۋلاتتى؛ ٴپىشان اۋدانى ٴلاپار قولما ـ قول جىرلاۋ مەن ٴۇش قاتار 9 شىنى قوناعاسىسىن ٴوزارا ۇشتاستىرىپ، تىڭداۋعا، سەزىنۋگە بولاتىن ەلىتە سەزىنۋ كورىنىسىن سومدادى... كوپتەگەن جاڭادان اشىلعان كورىنىس تۇيىندەرى مەن كورىنىستەر ارت ـ ارتىنان جارىققا شىعىپ، اۋەلى، تۇرپاندىقتاردىڭ ٴوزى دە ”كورىپ ۇلگىرە المادىق“ دەپ گۋلەستى.
دەن قويا جوبالانعان وسى ەلىتە سەزىنۋ سيپاتتى كورىنىستەر تۇرپان ساياحات كاسىبىنىڭ ”قۇنىن اسىرۋعا ەڭبەكتەنگەن“ بۇرىلىسىن كورسەتتى _ ”ٴبىر رەت عانا مىندەتتى تۇردە بارۋدى” “باياندى سەزىنۋگە“ اينالدىرىپ، تۇتاس وڭىرلىك ساياحاتتىڭ دامۋىنا باياندى قوزعالىس قۋاتىن ۇستەدى.
بۇل عانا ەمەس، ”شينجياڭنىڭ ٴبىرىنشى كوكتەمى“ ماركاسىنىڭ تامىرى تۇرپان كاسىپ سالاسىنىڭ تەرەڭ قاتپارىنا قاراي كەڭەيدى. توقسۇن سىندى وسى ونەركاسىپ ماڭىزدى قالاشىعىندا ساياحات كاسىبىنىڭ قوسقان ۇلەسى ٴۇرتىس ارتتى _ 23 مىڭ شارۋانىڭ اۋىل شارۋاشىلىعىنا جاتپايتىن كاسىپپەن جۇمىستانۋىن جۇزەگە اسىردى، ەرەكشە اۋىل شارۋاشىلىق ونىمدەرى بۇكىل ەلگە ساتىلدى، ٴتىپتى، ورىك اعاش بۇتاقتارى دا حالىقتىق تۇسەلحانانى اشەكەيلەۋ ماتەريالىنا اينالدى. ٴبىر ميلليارد 300 ميلليون يۋان قارجى قوسىلعان جۇڭگو لۇيفا شينجياڭ حۋامەي شىڭدي تۇرپان حيلتون قوناق ٴۇيى شوعىرى نىسانى گاۋچاڭ رايونىندا قۇرىلىس باستادى، بولاشاقتا جىلىنا 100 مىڭ ادام (رەت) جوعارى دەڭگەيلى ساياحاتشى قابىلداۋ سىندى كوتەرىمدىلىك قۋاتىن قالىپتاستىرىپ، بۇكىل قالاداعى 524 حالىقتىق تۇسەلحانامەن بىرگە ”پيراميدا“ ۇلگىسىندەگى جاتىن ورىن تورىن قالىپتاستىرادى.
كوكتەم تاسقىنى سيمفونياسى
شينجياڭدىقتار جونىنەن العاندا، كوكتەمدى كۇتۋ ۇلى تابيعاتپەن ۋادەلەسۋ بولىپ تابىلادى. جارتى جىلعا سوزىلعان قاقاعان قىستا تۇرمىستىق كۇيبىڭ ورىك اعاش بۇتاقتارى ىرعالعانعا دەيىن پاردىڭ شەتىندەگى الاقانداي جەردەن اسپايدى.
كەشكى بازاردا كومىردەن شىققان ىس ـ تۇتەكتە ساياحاتشىلار جەرگىلىكتى تۇرعىندارمەن بىرگە كاۋاپتان ٴدام تاتتى؛ حالىقتىق تۇسەلحانا اۋلالارىندا ساياحاتشىلار دوۋيىن تىكە تاراتىلىمىندا سايتتاستارمەن ورىك گۇلى قويمالجىڭىنىڭ قانت قۇرامى سالىستىرماسى جونىندە قيان ـ كەسكى ايتىسسا، بىلاي شىعا، قول تەلەفونىنىڭ فوتو البومىندا ساقتاعان باقىتتى ساتتەردى ٴوزارا ٴبولىستى... وسىنداي كۇندەلىكتى ۇساق ـ تۇيەك ىستەر ورىك گۇلى جاپىراقشالارىنىڭ كارىز سۋىمەن اعىپ، ەڭ سوڭىندا تۇرپاننىڭ كوكتەمگى تاسقىنىنا قوسىلعانىنا ۇقسايدى _ شار تاراپتان كەلگەن قوناقتار گۇل اشۋ مەزگىلىنە تۋرالاپ جەتكەندە، ۇلى تابيعاتتىڭ سيى ادامداردىڭ ٴۇنى مەن قايناعان دۋماندى ٴومىر اراسىندا تۇرمىستىڭ مەيىرى بولىپ قالىپتاستى.
”شينجياڭنىڭ ٴبىرىنشى كوكتەمىنىڭ“ ماعىناسى گۇل اشۋ مەزگىلىنەن اسىپ ٴتۇسىپ، شينجياڭنىڭ بايتاق دالاسىنداعى سيمفونياعا اينالدى. بەينە تۇرپاننىڭ ورىك گۇلىنىڭ ەجەلدەن القاۋدى كۇتىپ تۇرماعانى سياقتى، ولار شارۋالاردىڭ جارىلعان الاقانىندا، توڭىرەكتىڭ ٴتورت بۇرىشىنان كەلگەن ساياحاتشىلاردىڭ كۇلكى ۇيىرىلگەن جۇزىندە، شينجياڭنىڭ ەكونوميكالىق دامۋىنىڭ تولقىنىندا اشىلدى.
