شينحۋا اگەنتتىگىنىڭ 3 ـ ايدىڭ 28 ـ كۇنى بەيجيڭنەن بەرگەن حابارى (تىلشىلەر دۇڭ شۋە، فىڭ شينران). 3 ـ ايدىڭ 28 ـ كۇنى تۇستەن بۇرىن مەملەكەت ٴتوراعاسى شي جينپيڭ بەيجيڭ حالىق سارايىندا بانگلادەش ۋاقىتتىق ۇكىمەتىنىڭ باس اقىلشىسى يۇنۇسپەن كەزدەستى.
شي جينپيڭ بىلاي دەپ اتاپ كورسەتتى: جۇڭگو _ بانگلادەش حالقىنىڭ دوستىق بارىس ـ كەلىسى ۇزاقتان جالعاسقان، بايىرعى جىبەك جولى ەكى ەلدى تىعىز بايلانىستىرعان. ديپلوماتيالىق قارىم ـ قاتىناس ورناتقاننان بەرى ەكى جاق باستان ـ اياق ٴبىرىن ـ ٴبىرى قولداپ، تەڭ تۇرعىدا مامىلە جاساپ، سەلبەسىپ تەڭ يگىلىككە كەنەلىپ كەلدى. جۇڭگونىڭ بانگلادەشكە قاراتقان تاتۋ كورشى، دوس بولۋ ساياساتى وسكەلەڭ ورنىقتىلىقتى جانە ۇلاسپالىلىقتى ساقتادى، بۇكىل بانگلادەش حالقىن بەتكە العان تاتۋ كورشى، دوس بولۋ ساياساتىن مىزعىماي اتقاردى، بانگلادەش جاقپەن ٴوزارا سەنىم ارتقان جاقسى كورشى، ابزال دوس، جاقسى سەرىك بولۋدان جازبادى. بيىل _ جۇڭگو مەن بانگلادەشتىڭ ديپلوماتيالىق قارىم ـ قاتىناس ورناتقاندىعىنىڭ 50 جىلدىعى جانە جۇڭگو _ بانگلادەش گۋمانيتارلىق اۋىس ـ كۇيىس جىلى. جۇڭگو جاق بانگلادەش جاقپەن بىرگە قۇلشىنىپ، جۇڭگو _ بانگلادەش سەلبەستىگىن ۇزدىكسىز جاڭا ساتىعا كوتەرىپ، ەكى ەل حالقىنا ٴتىپتى دە ويداعىداي باقىت جاراتۋدى قالايدى.
شي جينپيڭ بىلاي دەپ باسا دارىپتەدى: جۇڭگو _ بانگلادەش ەكى جاق ساياسي ٴوزارا سەنىمدىلىكتى ۇزدىكسىز تەرەڭدەتىپ، ٴبىر ـ ٴبىرىنىڭ وزەكتى مۇددەسىنە ساياتىن جانە ٴجىتى قاداعالاپ وتىرعان كەلەلى ماسەلەلەردە ٴبىرىن ـ ٴبىرى باتىل قولداۋى كەرەك. جۇڭگو جاق بانگلادەش جاقتىڭ مەملەكەتتىڭ يەلىك ۇقىعىن، تاۋەلسىزدىگىن جانە تەرريتوريا تۇتاستىعىن قورعاپ، ٴوز ەلىنىڭ مەملەكەت جاعدايىنا ۇيلەسەتىن دامۋ جولىنا ىزدەنىس جاساۋىن قولدايدى. جۇڭگو رەفورمانى ونان ارى جاپپاي تەرەڭدەتىپ، جوعارى دەڭگەيدە سىرتقا ەسىك اشۋدى كەڭەيتەدى، بۇل بانگلادەشتى قامتىعان دۇنيە جۇزىندەگى ٴار ەلدىڭ دامۋىنا جاڭا وراي اكەلەدى. جۇڭگو جاق بانگلادەش جاقپەن ”ٴبىر بەلدەۋ، ٴبىر جولدى“ جوعارى ساپامەن بىرگە قۇرۋدى ىلگەرىلەتىپ، سيفرلى ەكونوميكا، جاسىل ەكونوميكا، تەڭىز ـ مۇحيت ەكونوميكاسى، نەگىزگى قۇرىلعىلار قۇرىلىسى، سۋ ىستەرى سياقتى سالالارداعى سەلبەستىكتى كەڭەيتىپ، گۋمانيتارلىق اۋىس ـ كۇيىستى كۇشەيتىپ، حالىقتاردىڭ ٴوزارا ٴتۇسىنىسۋىن، ٴوزارا ەتەنە بولۋىن جەبەۋدى قالايدى. جۇڭگو جاق تەرەزەسى تەڭ، ٴتارتىپتى دۇنيە ٴجۇزىنىڭ كوپ ۇيەكتەنۋىن، جالپىعا ٴتيىمدى، سيىسىمدى ەكونوميكانىڭ جاھاندانۋىن دارىپتەيدى، بانگلادەش جاقپەن كوپ جاقتى سايكەسۋدى، سەلبەسۋدى كۇشەيتىپ، جەر شارىنىڭ وڭتۇستىگىنىڭ ىنتىماقتاسىپ ٴوزىن الۋەتتەندىرۋىن ىلگەرىلەتىپ، ادامزاتتىڭ تاعدىرلاس ورتاق تۇلعاسىن قۇرۋدى قالايدى.
يۇنۇس مىنالاردى ٴبىلدىردى: بانگلادەش پەن جۇڭگونىڭ دوستىعى تەرەڭ، باستان ـ اياق ٴبىرىن ـ ٴبىرى ٴتۇسىنىپ، ٴوزارا قۇرمەت ەتىپ، ٴبىر ـ بىرىنە سەنىم ارتىپ كەلەدى، جۇڭگو بانگلادەشتىڭ سەنىمدى سەرىگى جانە دوسى. بانگلادەش جاق ٴبىر جۇڭگو پرينسيبىن باتىل قولدايدى، ”تايۋاندى دەربەستەندىرۋگە“ قارسى تۇرادى. بانگلادەش جاق بيىل بانگلادەش پەن جۇڭگونىڭ ديپلوماتيالىق قارىم ـ قاتىناس ورناتقاندىعىنىڭ 50 جىلدىعىن وراي ەتىپ، جۇڭگو جاقپەن ەكى ەلدىڭ جالپى بەتتىك ستراتەگيالىق سەلبەستىك سەرىكتەستىك قارىم ـ قاتىناسىنىڭ ٴتىپتى دە زور دامۋشىلىققا قول جەتكىزۋىن بىرگە ىلگەرىلەتۋدى قالايدى. ەكى ەل ”ٴبىر بەلدەۋ، ٴبىر جولدى“ بىرگە قۇرۋ سەلبەستىگىن تەرەڭدەتۋى كەرەك، بانگلادەش جاق ٴتىپتى دە كوپ جۇڭگو كاسىپورىندارىنىڭ بانگلادەشكە كەلىپ قارجى قوسىپ، بانگلادەش ەكونوميكاسىنىڭ تيبىن وزگەرتۋىن جەبەۋىن قارسى الادى. بانگلادەش جاق ٴتوراعا شي جينپيڭ ورتاعا قويعان ٴۇش ۇلكەن الەمدىك باستاما سياقتى كەلەلى ۇستانىمداردى بارىنشا القايدى، جۇڭگو جاقپەن تىعىز سايكەسىپ، ورايدى بىرگە يگەرىپ، سىن ـ سايىسقا بىرگە توتەپ بەرىپ، دۇنيە ٴجۇزىنىڭ بەيبىتشىلىگىن، ورنىقتىلىعىن جانە دامىپ ـ گۇلدەنۋىن بىرگە قورعاۋدى قالايدى.
ۋاڭ ي كەزدەسۋگە قاتىناستى.
