جاڭا ەنەرگيالى اۆتوكولىكتەردى قىستاقتا ەركىن زاريادتاۋ جۇزەگە اسىرىلدى
انار بۇلت \ شينجياڭ گازەتىنىڭ ٴتىلشىسى جاڭ تيڭ
مامىقتاي اپپاق قارمەن كومكەرىلگەن دالادا بىرنەشە جاڭا ەنەرگيالى اۆتوكولىك جەمەنەي اۋدانى لاستى قالاشىعى بايكۇشىك قىستاعى جيلين شاعىن اۋماعىنداعى زاريادتاۋ پۋنكتىندە توقتاپ تۇر. زاريادتاۋ باعاناسىنداعى كورسەتكىش شام ريتىمدى جارقىلداپ، وسى قىستاقتىڭ جاسىل وزگەرىسىن سىبىرلاپ جەتكىزىپ تۇرعانداي.
”بۇرىن اۋدانعا بارىپ زاريادتايتىنبىز، ۋاقىتىمىز بارىپ ـ كەلگەن جولىمىزعا كەتەتىن. قازىر قىستاقتا زاريادتاۋ باعاناسى ورناتىلدى، كەز كەلگەن ۋاقىتتا كەلىپ زاريادتاي الامىز، قولايلى بولدى!“،ـ دەدى بايكۇشىك قىستاعىنىڭ تۇرعىنى شۇي جىنشياڭ تام بۇرىشىنداعى اق ٴتۇستى زاريادتاۋ باعاناسىنا قارا ٴتۇستى زاريادتاۋ سىمىمەن جالعانىپ تۇرعان ٴوزىنىڭ جاڭا ەنەرگيالى اۆتوكولىگىن نۇسقاپ تۇرىپ.
جەمەنەي اۋدانى ورتالىعىنان شىعىسقا قاراي 3 كيلومەتر جەرگە ورنالاسقان وسى قىستاققا بۇگىنگى تاڭدا جاڭا كورىنىس قوسىلدى — 2024 ـ جىلى 5 ـ ايدا جاڭادان 12 الەۋمەتتىك زاريادتاۋ باعاناسى ورناتىلىپ، جاڭا ەنەرگيالى اۆتوكولىكتەر كەلە سالىسىمەن زاريادتاۋ جۇرگىزە الاتىن بولدى، اپتا سوڭىندا ٴوز كولىگىمەن ساياحاتتاۋشىلاردىڭ اياعى ۇزىلمەدى.
ٴار كۇنى تۇستەن بۇرىن ساعات 10دا زاريادتاۋ پۋنكتى دۋمانعا بولەنە باستايدى. ٴۇرىمجىنىڭ اۆتوكولىك ٴنومىرىن اسقان ٴبىر جاڭا ەنەرگيالى اۆتوكولىك كەلىپ توقتاسىمەن اۆتوكولىك يەسى ۋاڭ مىرزا ىسىلعان بەينەمەن ەكىلىك كودتى جايمالاپ زاريادتاۋ جۇرگىزدى، ”جول نۇسقاۋ جۇيەسىنەن قىستاقتا زاريادتاۋ باعاناسىنىڭ بار ەكەنىن كورىپ توتە كەلدىم، وسى بىرنەشە كۇندە وسى توڭىرەكتە قۇمارىم قانعانشا ٴبىر ساياحاتتايىن دەپ تۇرمىن!“
زاريادتاۋ پۋنكتىندە بىرنەشە قىستاق تۇرعىنى اۆتوكولىكتەرىن زاريادتاي وتىرىپ قىسىر كەڭەس قۇردى. قىستاق تۇرعىنى ۋاڭ بين بىلاي دەدى: ”ٴبىر رەت زاريادتاپ السام، 3 كۇنگە جەتەدى، اۋدان ورتالىعىنداعى بازارعا زات اپارعاندا بەنزينمەن جۇرەتىن اۆتوكولىگىمدى مىنبەيتىن بولدىم“. اڭگىمە ارەدىگىندە ٴبىر جاڭا ەنەرگيالى اۆتوكولىك زاريادتاۋ پۋنكتىنە كىردى، ونىڭ شوفەرى شۇي شياۋ ـ ۋ اۋدان ورتالىعىنان شىراق جابدىقتارى دۇكەنىن اشقان، ۇنەمى توڭىرەكتەگى اۋىل ـ قىستاقتارعا زات جەتكىزىپ تۇراتىن، ”قازىر اۋدان ورتالىعىنان دا، قىستاقتان دا زاريادتاي الاتىن بولدىق، جولعا شىققاندا الاڭدامايتىن بولدىق“.
بايكۇشىك قىستاعى پارتيا ياچەيكاسىنىڭ شۋجيى ۋاڭ شياۋلي تىلشىگە بىلاي دەدى: ەسىك الدىنا زاريادتاۋ باعاناسىنىڭ ورناتىلۋىنا ىلەسە، قىستاقتا جاڭا ەنەرگيالى اۆتوكولىك ساتىپ العاندار دا كوبەيە باستادى، ”بيىل جاڭا ەنەرگيالى اۆتوكولىكتەرىمەن ۇيىنە قايتىپ كوكتەم مەرەكەسىن وتكىزەتىن قىستاق تۇرعىندارى زاريادتاۋدان الاڭدامايتىن بولدى، ٴوز اۆتوكولىگىمىزدى زاريادتاۋعا ورىن تابىلۋمەن قاتار، ساياحاتشىلار مەن جولشىباي شوفەرلەردىڭ دە زاريادتاۋ قاجەتىن قاناعاتتاندىردىق“.
”قىستاققا زاريادتاۋ باعاناسى ورناتىلۋدان بۇرىن بەنزينمەن جۇرەتىن جۇك اۆتوكولىگىمدى جۇرگىزەتىنمىن، بەنزين اقىسى ٴۇشىن ايىنا 800 نەشە يۋان جۇمساپ كەلدىم“. شۇي شياۋ ـ ۋ قول تەلەفونىن الىپ، ونداعى زاريادتاۋ ەستەلىگىن اشىپ: ”قازىر جاڭا ەنەرگيالى اۆتوكولىككە اۋىستىردىم، ايلىق توك اقىسى 200 يۋاننىڭ ۇستىندە، ۇنەمدەلگەن اقشاعا تاعى ٴبىرتالاي زات ساتىپ الا الام“، ـ دەدى.
اۋىلىنداعى وزگەرىستەردى اۋىزعا العاندا، شۇي شياۋ ـ ۋ اسەرلەنىپ بىلاي دەدى: ”سوڭعى جىلدارى جوعارى قارقىندى تاس جول قاتىنادى، قىستاق تۇرعىندارى دا بايىدى. كوپتەگەن اۋىلداس شارۋالار شاتتىعى ساياجايىن، شاعىن ازىق ـ تۇلىك دۇكەنىن، قوناق ٴۇي اشتى، كوپشىلىكتىڭ كۇن كورىسى بارعان سايىن جاقسارىپ كەلەدى“.
ۋاڭ شياۋلي بىلاي دەدى: سوڭعى جىلدارى جەمەنەي اۋدانى ەكولوگيالىق ساياحات پەن زەرتتەۋ ـ ۇيرەنۋ ساياحاتىن زور كۇشپەن دامىتىپ، كوپتەگەن ساياحاتشىنى باۋرادى. اۋدان ورتالىعىمەن ىرگەلەس بايكۇشىك قىستاعى زاريادتاۋ پۋنكتىنىڭ قارسى جاعىنان ٴوزى كولىك جۇرگىزىپ ساياحاتتاۋ ەرۋجايىن سالىپ، اقىسىز WiFi، ىستىق سۋ، دەنە شىنىقتىرۋ ٴۇيى، شايحانا، مونشا، الەۋمەتتىك دارەتحانا، اۆتوكولىك توقتاتۋ الاڭى، ورتاق پايدالاناتىن اس ٴۇي، ورتاق پايدالاناتىن قۇرال ـ سايمان ٴۇيى، ۇيدەگى جانە سىرتتاعى بالالار وينايتىن قۇرىلعىلار سىندى حالىققا ٴتيىمدى 10 ٴىرى قىزمەت وتەۋمەن قامدادى.
”ساياحاتشىلاردىڭ كوبەيۋى جەرگىلىكتى ورىنداعى قىزمەت وتەۋ كاسىبىنىڭ دامۋىن دا جەتەكتەدى، كوپتەگەن ساياحاتشى ٴبىزدىڭ وسى ارادا ايالداپ، شارۋالار تاماعىنان اۋىز ٴتيىپ، اۋىل ـ قىستاقتىڭ كورىنىسىنەن تاماشالايدى“، ـ دەدى ۋاڭ شياۋلي.
بۇگىنگى كۇندە اۋىل ـ قىستاقتاردا ادامدار كوبەيىپ، ساياحات تا قىزا ٴتۇستى، شارۋالاردىڭ قالتاسى اناعۇرلىم قامپايدى. 2024 ـ جىلى بايكۇشىك قىستاعىنداعى تۇراقتى قونىستانعان جان سانىنىڭ جان باسىندىق ورتاشا قولداعى تابىسى 22 مىڭ 560 يۋان بولىپ، سايكەس مەزگىلدەگىدەن %16 ارتتى.
”قىستاقتا 300دەن استام وتباسى بار، 15 جاڭا ەنەرگيالى اۆتوكولىك بار“. ۋاڭ شياۋلي بىلاي دەدى: ٴوزىم دە ماشينا جۇرگىزۋدى ۇيرەنىپ جاتىرمىن، جاڭا ەنەرگيالى اۆتوكولىك ساتىپ الىپ، وتباسىمداعىلاردى ەرتىپ ساياحاتتاماقشىمىن.
