شينحۋا اگەنتتىگىنىڭ 3 ـ ايدىڭ 30 ـ كۇنى بەيجيڭنەن بەرگەن حابارى. جۋىقتا جۇڭگو كوممۋنيستىك پارتياسى ورتالىق كوميتەتى كەڭسەسى، مەملەكەتتىك كەڭەس كەڭسەسى «ماڭگىلىك نەگىزگى ەگىنجايدى بىرتىندەپ جوعارى ولشەمدى ەگىنجاي ەتىپ قۇرۋ جونىندەگى اتقارۋ جوباسىن» (تومەندە قىسقارتىلىپ «جوبا» دەلىنەدى) باسىپ تاراتتى ٴارى حابارلاندىرۋ شىعارىپ، جەر ـ جەردەن، تاراۋلاردان ٴىس جۇزىندىكپەن ۇشتاستىرىپ مۇقيات دايەكتىلەندىرۋدى، تياناقتاندىرۋدى تالاپ ەتتى.
«جوبادا» مىنالار اتاپ كورسەتىلدى: استىق حاۋىپسىزدىگى — ستراتەگيالىق ماسەلە. مەملەكەتتىڭ استىق حاۋىپسىزدىگىن قامتاماسىز ەتۋدىڭ ٴتۇبىرلى نەگىزى — ەگىستىك جەر، جوعارى ولشەمدى ەگىنجاي قۇرۋ — ماڭىزدى تۇتقا. شي جينپيڭ جاڭا ٴداۋىر جۇڭگوشا سوتسياليزم يدەياسىن جەتەكشى ەتۋگە تاباندى بولىپ، پارتيا 20 ـ قۇرىلتايىنىڭ جانە 20 ـ كەزەكتى ورتالىق كوميتەت ەكىنشى، ٴۇشىنشى جالپى ماجىلىستەرىنىڭ رۋحىن ىشكەرىلەي دايەكتىلەندىرىپ، جاڭا دامۋ ۇستانىمىن تولىق، دالمە ـ ٴدال، جاپپاي دايەكتىلەندىرىپ، جاڭا دامۋ ارناسىن جەدەل قالىپتاستىرىپ، جوعارى ساپالى دامۋدى كۇش سالا ىلگەرىلەتىپ، استىق ساقتاۋدا جەرگە سۇيەنۋ، استىق ساقتاۋدا تەحنولوگياعا سۇيەنۋ ستراتەگياسىن ىشكەرىلەي اتقارىپ، استىق جانە ماڭىزدى اۋىل شارۋاشىلىق ونىمدەرىن ٴوندىرۋ قۋاتىن جوعارىلاتۋدى باستى مىندەت ەتىپ، جوعارى ولشەمدى ەگىنجاي قۇرىلىسى، تەكسەرىپ وتكىزىپ الۋ، باسقارۋ ـ باپتاۋ مەحانيزمىن كەمەلدەندىرىپ، قۇرىلىس ورنالاسىمىن ساپالىلاندىرىپ، قۇرىلىس ۋاقىت ٴتارتىبىن ايقىنداپ، ۇسىنىلىم سەرپىنىن ارتتىرىپ، جاڭادان قۇرۋ مەن وزگەرتۋگە تەڭ ٴمان بەرىپ، سان مەن ساپاعا تەڭ ٴمان بەرىپ، قۇرۋ مەن باسقارىپ ـ باپتاۋعا تەڭ ٴمان بەرىپ، ناعىز شارت ـ جاعداي ازىرلەگەن ەگىستىك جەردى، اسىرەسە، ماڭگىلىك نەگىزگى ەگىنجايدى ەگىستىككە ۇيلەسەتىن، قۋاڭشىلىقتا دا، سۋ باسقاندا دا ٴتۇسىمى كەمەيمەيتىن، مول، ورنىقتى ٴونىم الۋعا بولاتىن وسىزاماندانعان قۇنارلى ەگىنجاي ەتىپ شىنايى قۇرىپ، استىق حاۋىپسىزدىگى نەگىزىن ونان ارى بەكەمدەۋ كەرەك.
«جوبادا» العا قويىلعان نەگىزگى نىسانا مىنالار: 2030 ـ جىلعا جەتكەندە جيىنى ٴبىر ميلليارد 350 ميلليون مۋ جوعارى ولشەمدى ەگىنجاي قۇرىپ، جيىنى 280 ميلليون مۋ ەگىنجايدى وزگەرتىپ، دارەجەسىن جوعارىلاتۋعا كۇش سالىپ، جوعارى ٴونىمدى سۋ ۇنەمدەپ سۋارۋدى ٴبىر تۇتاس جوبالاپ، تەڭ قادامدا اتقارىپ، جوعارى ٴونىمدى سۋ ۇنەمدەپ سۋارىلاتىن ەگىنجايدى تىڭنان 80 ميلليون مۋ كوبەيتۋ؛ 2035 ـ جىلعا جەتكەندە شارت ـ جاعداي ازىرلەگەن ماڭگىلىك نەگىزگى ەگىنجايدىڭ ٴبارىن جوعارى ولشەمدى ەگىنجاي ەتىپ قۇرىپ، جيىنى 455 ميلليون مۋ ەگىنجايدى وزگەرتىپ، دارەجەسىن جوعارىلاتىپ، جوعارى ٴونىمدى سۋ ۇنەمدەپ سۋارىلاتىن ەگىنجايدى تىڭنان 130 ميلليون مۋ كوبەيتۋ.
«جوبادا» قۇرۋدى ورنالاستىرۋ، قۇرۋدى باسقارۋ، شارۋاشىلىق جۇرگىزۋ، باسقارۋ ـ باپتاۋ، ساياساتتاردى سايكەستىرۋ، قامتاماسىز ەتۋ شارالارى جاعىندا ناقتى تالاپتار ورتاعا قويىلدى.
