انار بۇلت \ شينجياڭ گازەتىنىڭ ٴتىلشىسى جاڭ تيڭ
”كورىنىستىك پەردەنى ٴىلىپ قويدىق“!
3 ـ ايدىڭ 29 ـ كۇنى تاڭەرتەڭ حوتان اۋدانى اۋات اۋىلى اقچال قىستاعىنىڭ قىستاق تۇرعىندار كوميتەتى اۋلاسىندا 23 جاستاعى حۋ چۇنفاڭ بەيجيڭ تيان ـ انمىندى ارتقى كورىنىس ەتكەن 3 مەترلىك كورىنىستىك پەردەنى تام قابىرعاسىنا ىلگەننەن كەيىن ارتىنا بۇرىلىپ، جانىندا قاراپ تۇرعان ۇيعۇر اعايعا يشارالاپ: ”جاقسى بولىپتى ما“؟ ـ دەپ سۇرادى، اعاي كورىنىستىك پەردەنى سيپالاپ ەزۋ تارتا كۇلىپ: ”بەيجيڭ، جاقسى“! ـ دەدى.
حۋ چۇنفاڭنىڭ ٴبىر كۇندىك قىزمەتى وسىلاي باستالدى — ول وسىندا ات باسىن بۇرعان ٴاربىر اۋىلداستى ”تيان ـ انمىن“ الدىندا سۋرەتكە ٴتۇسىردى.
”بالاقاي، بەرى قاراي عوي“!
”اچا (اپەكە)، باسىڭىزدى ٴبىراز بۇرىڭىز“!
حۋ چۇنفاڭ تىزەسىن بۇگىپ فوتو جاپقىنى باستى.
70 نەشە جاستاعى قارت اجە ارنايى ادەمى گۇلدى كويلەك كيىپ كەلىپتى، قاسىنداعى شالى دوپپاسىن قايتا ـ قايتا ٴسۇرتىپ جاتتى. ”بويجەتكەن، وزىڭە ۇلكەن راقىمەت! ومىرلىك ارمانىمدى ورىندادىڭ“، ـ دەدى قاريا حۋ چۇنفاڭنىڭ قولىن قىسا ۇستاپ.
2024 ـ جىلى 6 ـ ايدا ٴالى دە چۇڭچيڭ ماشينا ـ ەلەكتر جابدىقتارى كاسىپتىك ـ تەحنولوگيالىق داشۋەسىنىڭ 4 ـ جىلدىعىندا وقىپ جاتقان حۋ چۇنفاڭ مەكتەپتەگى ٴبىر قيمىلدا، حوتانمەن تۇڭعىش رەت ”جۇزدەستى“. ۇگىت فيلمىندە التىن سارى توراڭعىلاردىڭ ساعىمى سازدىق بەتىنە ٴتۇسىپ تۇر، دۋتار شالعان ۇيعۇر قاريانىڭ ٴاجىم باسقان جۇزىنەن قۋانىش لەبى ەسكەن ەدى. ”قۇربان اتايدىڭ اۋىلى“! كىشكەنتايىنان ”قۇربان تۇلىم اتايدىڭ ەسەكپەن بەيجيڭگە بارماقشى بولعاندىعى“ تۋراسىنداعى حيكايانى ەستىپ وسكەن وسى بويجەتكەن ٴوز ومىرىندەگى ماڭىزدى ٴبىر بەكىمدى جاسادى — شينجياڭعا بارامىن، وتانىمىز قاجەت ەتكەن جەرگە بارامىن. اتتاناردا جانۇياسىنداعىلار ونىڭ جۇك سالعان چەمودانىنا حوگونىڭ دامدەندىرگىشىن تولتىرا سالدى ٴارى: ”ياۋىر تاماعىڭدى جاقسى ٴىش، ٴبىزدى ساعىنساڭ تەلەفوندا حابارلاس، جاقسى كۇتىن“ دەپ قاداعالادى.
2024 ـ جىلى 10 ـ ايدىڭ 28 ـ كۇنى شىنىمەن حوتان دالاسىنا تابانى تيگەندە، شياۋحۋ ويىنداعى شينجياڭنىڭ رەالدىقپەن مۇلدە ۇقسامايتىندىعىن بايقادى: ٴىرى تيپتى ماقتا تەرۋ ماشينالارى ماقتا اتىزىندا جۇمىس جۇرگىزۋدە؛ تەگىس ٴارى كەڭ جول جاعاسىندا ايقاسا ورنالاسقان ادەمى ۇيلەر بوي كوتەرىپ تۇر. اۋىلداستار ىستىق ىقىلاستى، قوناقجاي ەكەن، تىلدەرى ۇقساماسا دا، جىميا كۇلگەندەرى دە، قول يشاراتتارى دا مەيىرىمدىلىك پەن ىزگىلىكتى اڭعارتۋشى ەدى.
حۋ چۇنفاڭ بۇل اراداعى مەيىرگە تولى حيكايالاردان كىدىرمەي ـ اق ٴبىرتالايىن ايتىپ بەرە الادى. وسىنىڭ الدىندا ونى ٴبىر ٴىس قاتتى اسەرلەندىردى.
3 ـ ايدىڭ باس شەنىنىڭ ٴبىر كۇنى قۇمدى بوران ۇيىرگەن قۇم ـ قيىرشىقتار بەت قاراتپاي تۇر، حۋ چۇنفاڭ جولدا تۇقىرايا ٴجۇرىپ كەلە جاتقاندا، الدەكىمنىڭ ۇيعۇر تىلىندە ٴوزىن شاقىرعانىن ەستىپ قالدى. بۇرىلىپ قاراپ ەدى، ٴۇش دوڭگەلەكتى ەلەكترسيكلگە مىنگەن ۇيعۇر اپايدىڭ وزىنە توقتاماي قول بۇلعاعاندىعىن كوردى.
ول اپايدىڭ ەلەكترسيكلىنە وتىرىپ الدى، الگى اپاي سوزىنە قول يشاراتىن ارالاستىرا بىردەڭە سۇرادى، حۋ چۇنفاڭ سوندا بارىپ ونىڭ وزىنەن قايدا باراسىڭ دەپ سۇراپ تۇرعانىن اڭعاردى.
حۋ چۇنفاڭ دەرەۋ جانقالتاسىنان قول تەلەفونىن الىپ شىعىپ، اۋدارما جۇمساق دەتالى ارقىلى باراتىن جەرىنىڭ اتىن جازدى. سودان كۇلىمسىرەگەن اپايدىڭ كوزى اينالاسىنداعى اجىمدەر انىق كورىندى، دوڭگەلەك باسىپ وتكەن توپىراق جولدىڭ سىرىلداعان ٴۇنى ىشىندە اپاي جاتىق بولماعان مەملەكەت تىلىندە ”قۇمكول قىستاعى“ دەدى دە تاعى ٴوزىن نۇسقادى. اسىلىندە مىنا بەيتانىس اپاي قۇمكول قىستاعىنىڭ تۇرعىنى ەكەن. سويلەسە كەلە حۋ چۇنفاڭ اپايدىڭ ٴوزىن قۇمدى بوراندا جولدان اداسىپ ٴجۇر ەكەن دەپ قالعاندىعىن ٴبىلدى.
سۋرەتكە تۇسىرۋگە اۋەس حۋ چۇنفاڭ اۋات اۋىلىنىڭ ۇگىت كادرى بولىپ، اپتا اياعى بولعاندا ول فوتو اپپاراتىن كوتەرىپ الىپ، اينالانى ەستەلىككە الادى. ول اتىز اراسىن، ەگىس باسىن فوتوعا تۇسىرەدى، بازارداعى حالىقتىڭ جايدارى ٴجۇزىن سۋرەتكە الادى، قايسار ومىرشەڭ كۇشكە يە توراڭعىلاردى سۋرەتكە تارتادى... ٴاربىر پارشا سۋرەت، ٴاربىر بەينەجازبا تۇگەلدەي ونىڭ وسىناۋ مەكەنگە دەگەن قىزۋ سۇيىسپەنشىلىگىن قامتىپ جاتتى.
3 ـ ايدىڭ باس شەنىندە اتىز اراسىندا كوكتەمگى ەگىس كورىنىسىن سۋرەتكە ٴتۇسىرىپ جۇرگەندە، قىستاقتاعى ٴبىر ساقا پارتيا مۇشەسى اڭگىمە اراسىندا وعان ٴوزىنىڭ ايەلىن ەرتىپ تيان ـ انمىنگە بارىپ سۋرەتكە ٴتۇسۋدى قاتتى ارماندايتىندىعىن ايتادى. بۇعان حۋ چۇنفاڭنىڭ كوڭىلى قاتتى تولقيدى. ”ولارعا كومەكتەسىپ ارماندارىن ىسكە اسىرا الامىن با؟“ دەپ ويلاعان ول اۋىلعا قايتىپ كەلگەن سوڭ ٴوز ويىن دەرەۋ اۋىلدىق پارتكومعا جەتكىزەدى.
قولداۋعا يە بولعان حۋ چۇنفاڭ ينتەرنەتتەن تيان ـ انمىن الاڭىنىڭ سۋرەتى تۇسىرىلگەن ۆيرتۋالدى كورىنىستىك پەردەنى ساتىپ الدى. ىلە ـ شالا ول جابدىقتارىن سايكەستىرۋمەن، سۋرەتكە ٴتۇسىرۋ ورنىن قاراستىرۋمەن قاربالاس بولىپ كەتتى. قىستاق تۇرعىندار كوميتەتىنىڭ سىرتى، شاعىن الاڭ دەگەندەي، ايتەۋ جارىق جاقسى تۇسەتىن، كەڭ الاڭقى بولسا بولعانى، ول ٴبىر ـ بىردەن ەستەلىككە الدى. اناعۇرلىم كوپ قىستاق تۇرعىنىن قاتىناستىرۋ ٴۇشىن، ول قىستاق كادرلارىمەن بىرگە ٴۇي باسى سايىن ارالاپ، كوپشىلىكتىڭ قالاۋىن ۇعىستى. يە بولعان جاۋابى ونى قاتتى كوڭىلدەندىردى، اۋىلداستاردىڭ تيان ـ انمىنگە دەگەن اڭسارى ونىڭ ويلاعانىنان دا اسىپ ٴتۇستى، ٴدال ەگىس جۇمىسىنىڭ قاربالاس تۇسى بولسا دا، كوپشىلىك تۇگەلدەي بەلسەنە ٴۇن قوستى.
كەيبىر قىستاق تۇرعىندارى ەگىس جۇمىستارىن ىستەپ بولا سالىسىمەن، ارنايى ۇيلەرىنە قايتىپ تازا كيىمدەرىن اۋىستىرىپ كەلىپ سۋرەتكە تۇسەدى؛ تاعى كەيبىر قىستاق تۇرعىندارى ەلەكترسيكلىنە مىنە سالىپ اسىعىپ جەتەدى، ولاردىڭ جانارلارى ۇمىتكە تولىپ تۇردى. ٴبىر اپاي سۋرەتكە ٴتۇسىپ بولعان سوڭ قۋانعانىنان بيلەي جونەلدى. حۋ چۇنفاڭ بۇدان ەرەكشە اسەرلەندى، ول ٴوزىنىڭ ىستەپ جاتقانى تەك سۋرەتكە ٴتۇسىرۋ عانا بولماستان، ونان دا ماڭىزدىسى، ٴۇمىت جانە ارمان سيلاۋ ەكەندىگىن ٴتۇسىندى.
حۋ چۇنفاڭ ٴاربىر پارشا سۋرەتكە ەكىلىك كودىن قوسۋعا بەكىدى، جايمالاسا بولعانى سول سۋرەتتىڭ ەلەكتروندى نۇسقاسىنا يە بولۋعا بولادى. سونىمەن حۋ چۇنفاڭ مەن اۋىلدىڭ ۇگىت مۇشەسى ۋاڭ حاۋشياڭ ٴتۇن بويى ماتەريال اقتاردى، كاسىپتىك مامانداردان كەڭەس سۇرادى، AI مەن ”شەكە سۇيەستىرىپ“ تاڭعى ساعات 5 - 4 كە دەيىن وتىردى. تابىسقا جەتكەن سول ٴبىر ساتتە، ول تەبىرەنگەنىنەن كوزىنە جاس الدى.
قيمىلدىڭ ورىستەتىلۋىنە ىلەسە، حۋ چۇنفاڭنىڭ سۋرەتكە ٴتۇسىرۋ ۇجىمىنداعىلار 5 ادامعا كوبەيدى. بىرەۋى، كوپشىلىكتىڭ سۋرەتكە ٴتۇسۋ ارمانىن اۋدارىپ بەرۋگە، بىرەۋى، سۋرەتكە تۇسىرەتىن اپپاراتتىڭ قوندىرعىسىن رەتتەۋگە، بىرەۋى، اۋىلداستاردىڭ كيىم ـ كەشەگىن، شاشىن تۇزەۋگە جاۋاپتى بولدى. كوپشىلىك بىرگە تالقىلاپ، بىرگە جوبالاپ، وسى قيمىلدى قايتكەندە ٴتىپتى دە جاقسى جۇرگىزۋدى ويلاستىردى. ولار 6 ـ ايدىڭ اياق شەنىنەن بۇرىن، 4000 پارشا سۋرەت ٴتۇسىرۋدى جوسپارلادى.
بۇگىنگى كۇندە اۋىلدا جۇرسە، قىستاق تۇرعىندارىنىڭ ٴبارى حۋ چۇنفاڭمەن قىزۋ امانداسادى: ”شياۋحۋ، ۇيگە كەلىپ تۇر“! ”شياۋحۋ، ٴبىزدىڭ ۇيگە بارىپ كەپتىرىلگەن جەمىستەن اۋىز ٴتي“! دەپ جاتادى.
چۇڭچيڭدىق وسى بويجەتكەن بىلاي دەدى: قىستاق تۇرعىندارىنىڭ سۋرەتتى تاپسىرىپ العاننان كەيىن جۇزدەرىندە ويناعان كۇلكىسى مەن سۋرەتكە ٴتۇسىپ بولعاننان كەيىن الاقانىما سالىپ جاتاتىن ٴبىر ۋىس مەيىزى، شىلانى مەنى قاتتى اسەرلەندىردى، قىستاق تۇرعىندارى قۇددى ٴوز ۇيىمدەگىلەر سياقتى ەتەنە، مەيىربان. مەن ٴوزىمدى وسى اراداعىلارمەن ٴبىر تۇلعاعا اينالىپ كەتكەندەي سەزىنەمىن.
