شينحۋا اگەنتتىگىنىڭ 4 ـ ايدىڭ 1 ـ كۇنى بەيجيڭنەن بەرگەن حابارى. 4 ـ ايدىڭ 1 ـ كۇنى مەملەكەت ٴتوراعاسى شي جينپيڭ ٴۇندىستان زۇڭتۇڭى مۋرمۋمەن ٴوزارا قۇتتىقتاۋ تەلەگرامماسىن جولداپ، ەكى ەلدىڭ ديپلوماتيالىق قارىم ـ قاتىناس ورناتقاندىعىنىڭ 75 جىلدىعىن قۇتتىقتادى.
شي جينپيڭ بىلاي دەپ اتاپ كورسەتتى: جۇڭگو مەن ٴۇندىستان بىردەي وركەنيەتتى بايىرعى ەلدەر، وركەندەپ كەلە جاتقان ٴىرى ەلدەر، ”جەر شارىنىڭ وڭتۇستىگىنىڭ“ ماڭىزدى مۇشەلەرى رەتىندە، ٴارقايسىسى وزدەرىنىڭ وسىزامانداندىرۋ قۇرىلىسىنىڭ شەشۋشى مەزگىلىندە تۇر. جۇڭگو — ٴۇندىستان قارىم ـ قاتىناسىنىڭ دامۋ بارىسى ٴبىرىن ـ ٴبىرى تابىسقا جەتكىزەتىن سەرىك بولۋ، ”ايداعار مەن ٴپىلدىڭ قاتار بيلەۋىن“ جۇزەگە اسىرۋ — ەكى جاقتىڭ دۇرىس تالعامى ەكەندىگىن، ەكى ەلدىڭ جانە ەكى ەل حالقىنىڭ ٴتۇبىرلى مۇددەسىنە بۇكىلدەي ۇيلەسەتىندىگىن ايگىلەپ وتىر. ەكى جاق ستراتەگيالىق دەڭگەيدەن جانە ۇزاق بولاشاقتىق تۇرعىدان جۇڭگو — ٴۇندىستان قارىم ـ قاتىناسىنا مامىلە جاساۋعا جانە ونى ٴبىر جاقتى ەتۋگە تاباندى بولىپ، كورشىلەس ٴىرى ەلدەردىڭ بەيبىت قاتار تۇراتىن، ٴوزارا سەنىم ارتىپ ٴوزارا پايدا جەتكىزەتىن، بىرگە داميتىن وتاسۋ جولى جونىندە بىرگە ىزدەنىس جاساپ، دۇنيە ٴجۇزىنىڭ كوپ ۇيەكتەنۋى مەن حالىقارالىق قارىم ـ قاتىناستىڭ دەموكراتيالانۋىن بىرگە ىلگەرىلەتۋگە ٴتيىس.
شي جينپيڭ بىلاي دەپ باسا دارىپتەدى: مەن زۇڭتۇڭ حانىممەن بىرگە قۇلشىنىپ، ەكى ەلدىڭ ديپلوماتيالىق قارىم ـ قاتىناس ورناتقاندىعىنىڭ 75 جىلدىعىن وراي ەتىپ، ەكى جاقتىڭ ستراتەگيالىق ٴوزارا سەنىمدىلىگىن نىعايتىپ، ٴار سالاداعى اۋىس ـ كۇيىستى، سەلبەستىكتى كۇشەيتىپ، كەلەلى حالىقارالىق ىستەردەگى بايلانىس پەن سايكەستىكتى تەرەڭدەتىپ، جۇڭگو — ٴۇندىستان شەكارا ٴوڭىرىنىڭ بەيبىتشىلىگىن، تىنىشتىعىن بىرگە ويداعىداي قورعاپ، جۇڭگو — ٴۇندىستان قارىم ـ قاتىناسىنىڭ اقاۋسىز، ورنىقتى ارنانى بويلاپ العا قاراي دامۋىن ىلگەرىلەتىپ، دۇنيە ٴجۇزىنىڭ بەيبىتشىلىگىن، گۇلدەنىپ ـ كوركەيۋىن جەبەۋگە ۇلەس قوسۋدى قالايمىن.
مۋرمۋ مىنالاردى ٴبىلدىردى: ٴۇندىستان مەن جۇڭگو ەكەۋى كورشىلەس ٴىرى ەل، دۇنيە ٴجۇزىنىڭ ۇشتەن ٴبىرىن ۇستايتىن جان سانى بار. ورنىقتى، مەجەلەۋگە بولاتىن جانە دوس ەكى جاقتى قارىم ـ قاتىناس ەكى ەلگە جانە دۇنيە جۇزىنە قۇت ـ ىرىس اكەلەدى. ٴبىز ٴۇندىستان مەن جۇڭگونىڭ ديپلوماتيالىق قارىم ـ قاتىناس ورناتقاندىعىنىڭ 75 جىلدىعىن وراي ەتىپ، ٴۇندىستان — جۇڭگو قارىم ـ قاتىناسىنىڭ اقاۋسىز، ورنىقتى دامۋىن بىرگە ىلگەرىلەتۋىمىز كەرەك.
سول كۇنى، مەملەكەتتىك كەڭەستىڭ زۇڭليى لي چياڭ ٴۇندىستان زۇڭليى موديمەن ٴوزارا قۇتتىقتاۋ تەلەگرامماسىن جولدادى. لي چياڭ مىنالاردى ٴبىلدىردى: جۇڭگو جاق ٴۇندىستان جاقپەن بىرگە قۇلشىنىپ، ەكى ەلدىڭ ديپلوماتيالىق قارىم ـ قاتىناس ورناتقاندىعىنىڭ 75 جىلدىعىن وراي ەتىپ، ستراتەگيالىق ٴوزارا سەنىمدىلىكتى ۇزدىكسىز نىعايتىپ، ٴار سالاداعى اۋىس ـ كۇيىستى، سەلبەستىكتى ىلگەرىلەتىپ، شەكارا ماسەلەسىن ۇيلەسىمدى ٴبىر جاقتى ەتىپ، ەكى ەل قارىم ـ قاتىناسىنىڭ اقاۋسىز، ورنىقتى ارنانى بويلاپ العا قاراي دامۋىن ىلگەرىلەتىپ، ەكى ەل حالقىنا اناعۇرلىم كوپ قۇت ـ ىرىس اكەلۋدى قالايدى.
مودي مىنالاردى ٴبىلدىردى: ٴۇندىستان مەن جۇڭگو ەكى ٴىرى وركەنيەتتى بايىرعى ەل، ادامزات تاريحىن جاراتۋ بارىسىندا ماڭىزدى رولدارىن ساۋلەلەندىردى، قازىر بەيبىتشىلىك پەن دامۋدى جەبەۋ سىندى كەلەلى مىندەت ارقالاپ وتىر. ٴۇندىستان — جۇڭگو قارىم ـ قاتىناسىنىڭ دامۋى دۇنيە ٴجۇزىنىڭ گۇلدەنىپ ـ كوركەيۋىنە، ورنىقتىلىعىنا ٴتيىمدى بولۋمەن بىرگە، دۇنيە ٴجۇزىنىڭ كوپ ۇيەكتەنۋىن جۇزەگە اسىرۋعا دا پايدالى. ٴۇندىستان مەن جۇڭگونىڭ ديپلوماتيالىق قارىم ـ قاتىناس ورناتقاندىعىنىڭ 75 جىلدىعى ەكى ەل قارىم ـ قاتىناسىن اقاۋسىز، ورنىقتى دامۋ ساتىسىنا وتۋگە جەتەكتەيدى.
