انار بۇلت \ شينجياڭ گازەتىنىڭ ٴتىلشىسى گاۋ فىڭ
3 ـ ايدىڭ 24 ـ كۇنى «ورتا، شاعىن كاسىپورىنداردىڭ اقشاسىنىڭ تولەنۋىن قامتاماسىز ەتۋ ەرەجەسى» جاريالاندى، 4 كۇننەن كەيىن اشىلعان مەملەكەتتىك كەڭەستىڭ ۇنەمىلىك ىستەر ماجىلىسىندە تاعى كاسىپورىنداردىڭ كەشەۋىلدەتىلگەن اقشاسىن اداقتاۋ قىزمەتىن جەدەلدەتۋ جونىندە ارناۋلى ورنالاستىرۋ جاسالدى.
حالىقتىق كاسىپورىنداردىڭ باسىم كوبى ورتا، شاعىن كاسىپورىندار، كاسىپورىنداردىڭ كەشەۋىلدەتىلگەن اقشاسىن جەدەل، كۇش سالا اداقتاۋ — حالىقتىق كاسىپورىنداردىڭ اڭىسى كۇشتى بولعان ماسەلەلەرگە تىكە باعىتتالعان ناقتى شارا بولماق.
باس شۋجي شي جينپيڭ بىلاي دەپ اتاپ كورسەتتى: جاڭا ٴداۋىردىڭ جاڭا جورىعىندا حالىقتىق شارۋاشىلىقتىڭ دامۋ ٴورىسى كەڭ، بولاشاعى نۇرلى، قالىڭ حالىقتىق كاسىپورىندار مەن حالىقتىق كاسىپورىنشىلاردىڭ بار ونەرىن ايگىلەيتىن ٴساتى كەلدى.
بۇكىل ەلدەگى باسقا ولكە، رايوندارمەن ۇقساس شينجياڭداعى ٴتۇرلى تيجارات تۇلعالارى جالپى مولشەرىنىڭ %97تەن استامىن يەلەيتىن حالىقتىق كاسىپورىندار ەكونوميكانىڭ، قوعامنىڭ جوعارى ساپالى دامۋىن ىلگەرىلەتۋدە كەم بولسا بولمايتىن كۇشكە اينالدى.
جاڭا داۋىردە بازاردىڭ جويقىن تولقىنى تولاسسىز جوڭكىلۋدە، قايتكەندە شينجياڭداعى حالىقتىق كاسىپورىندارعا اناعۇرلىم جاقسى دامۋ ورتاسىن جاراتۋعا بولادى؟ قايتكەندە حالىقتىق كاسىپورىنشىلاردىڭ بەلسەندىلىگى مەن جاسامپازدىعىن ونان ارى قاۋلاتۋعا بولادى؟ قالىڭ حالىقتىق كاسىپورىندار ورايدى قالاي يگەرىپ، جەدەل دامۋى كەرەك؟ بۇلار بۇكىل قوعام نازار اۋدارىپ وتىرعان داۋىرلىك تاقىرىپقا اينالدى.
باعىتتاس، قادامداس دامىدى
قوزعاۋشى كۇشتى، ومىرشەڭ كۇشتى ارتتىردى
شينجياڭ لۇڭجۇي جاڭا ماتەريالدار شەكتى سەرىكتەستىگىنىڭ ٴوندىرىس سەحىندا اق ٴتۇستى ۆينيل سيان تالشىق جىپشەلەرى وڭدەلگەننەن كەيىن قارا ٴتۇستى كومىرتەگى تالشىق جىپشەلەرىنە اينالدى، بۇل 3000 سەلتسي گرادۋستىق جوعارى تەمپەراتۋراعا توزە الادى، توزىمدىلىگى تىپتەن بولات ـ تەمىردىڭ 9 - 7 ەسەسىندەي، قولدانىلاتىن سالاسى كەڭ. بيىل بۇل سەرىكتەستىك 4500 توننا كومىرتەگى تالشىعى ونىمدەرىن ٴوندىرۋدى جوسپارلاپ وتىر، بۇل بىلتىرعىنىڭ 2 ەسەسىنەن كوپ.
لۇڭجۇي سەرىكتەستىگى قۇرىلعان قىسقا عانا 5 جىلدا تەز قارقىنمەن دامىپ، شينجياڭداعى كومىرتەگى تالشىعىن وندىرەتىن بىردەن ـ ٴبىر كاسىپورىنعا اينالدى. سەرىكتەستىكتىڭ باس جوراسى، قوسىمشا باس ديرەكتورى ۋاڭ كايرۇي شينجياڭنىڭ ۇزدىكسىز جاقسارىپ كەلە جاتقان شارۋاشىلىق ـ ساۋدا ورتاسى كاسىپورىنداردىڭ دامۋىنا بەرىك قامتاماسىزدىق ازىرلەدى دەپ قارادى.
ٴبىر قاتار سيفرلار حالىقتىق شارۋاشىلىقتىڭ ومىرشەڭ كۇشىن بەينەلەي الادى:
— تيجارات تۇلعالارىنىڭ سانى ورنىقتى ارتتى. 2024 ـ جىلدىڭ سوڭىنا دەيىن شينجياڭدا تىزىمگە الىنعان حالىقتىق شارۋاشىلىق تيجارات تۇلعالارى 2 ميلليون 525 مىڭ 100 بولىپ، سايكەس مەزگىلدەگىدەن %5.96 ارتىپ، ٴتۇرلى تيجارات تۇلعالارى جالپى سانىنىڭ %97.32ىن يەلەدى؛
— حالىقتىق ونەركاسىپتىڭ ومىرشەڭ كۇشى ارتتى. 2024 ـ جىلى شينجياڭنىڭ كولەمنەن جوعارى ونەركاسىپ حالىقتىق كاسىپورىندارىنىڭ ارتقان قۇنى سايكەس مەزگىلدەگىدەن %17.3 ارتىپ، ارتۋ قارقىنى كولەمنەن جوعارى ونەركاسىپتىڭ ارتقان قۇنىنان 9.3 پايىز جوعارى بولدى؛
— حالىقتىق قارجى قوسۋدىڭ تىرەگى پارمەندى بولدى. 2024 ـ جىلى شينجياڭنىڭ حالىقتىق قارجى قوسۋى سايكەس مەزگىلدەگىدەن %24.3 ارتىپ، تۇراقتى مۇلىككە قوسىلعان قارجىنىڭ %37.2ىن يەلەپ، تۇراقتى مۇلىككە قوسىلعان قارجىنىڭ 7.8 پايىز ارتۋىن ىلگەرىلەتتى؛
— سىرتقى ساۋدانىڭ تەز قارقىنمەن ارتۋىن جەبەدى. 2024 ـ جىلى شينجياڭداعى حالىقتىق كاسىپورىنداردىڭ يمپورت ـ ەكسپورت قۇنى 403 ميلليارد 110 ميلليون يۋان بولىپ، سايكەس مەزگىلدەگىدەن %21.1 ارتىپ، سىرتقى ساۋدا يمپورت ـ ەكسپورت جالپى قۇنىنىڭ %92.6ىن يەلەدى...
ساندى مالىمەتتەر جاڭا داۋىرگە وتكەندە شينجياڭداعى حالىقتىق كاسىپورىنداردىڭ ۇزدىكسىز تيبىن وزگەرتىپ دارەجەسىن جوعارىلاتىپ، جوعارى ساپالى دامۋدىڭ جولىنا جەدەل قادام تاستاپ، ارتۋدى ورنىقتىرۋ، جۇمىستاندىرۋدى جەبەۋ، حالىق تۇرمىسىنا تيىمدىلىك جاساۋ، ورنىقتىلىقتى قامتاماسىز ەتۋ سياقتى جاقتاردا ماڭىزدى رول اتقارىپ وتىرعاندىعىن كورسەتتى.
”شينجياڭدا حالىقتىق كاسىپورىنداردىڭ دامۋىندا باستان ـ اياق ٴبىر كورنەكتى ەرەكشەلىك جارىققا شىقتى، ياعني باستان ـ اياق اۆتونوميالى رايوننىڭ تۇرلىشە مەزگىلدەگى دامۋ ستراتەگيالارىن ارقاۋ ەتىپ، باعىتتاس، قادامداس دامىدى“، ـ دەدى اۆتونوميالى رايوندىق ساۋدا ـ ونەركاسىپشىلەر بىرلەستىگىنىڭ ورىنباسار ٴتوراعاسى لۋ ۋيدۇڭ.
1985 ـ جىلى شينجياڭدا تۇڭعىش جەكەشە كاسىپورىن تيجارات كۋالىگى شينجياڭ حۇڭدا شەكتى جاۋاپكەرشىلىك سەرىكتەستىگىنە تاراتىلۋى شينجياڭنىڭ حالىقتىق شارۋاشىلىعىنىڭ قارىشتاپ دامي باستاعاندىعىنىڭ بەلگىسىنە اينالدى.
1996 ـ جىلى شينجياڭدا تۇڭعىش ساۋداگەرلەر قوعامى ۇيىمى قۇرىلىپ، حالىقتىق شارۋاشىلىقتىڭ دامۋى جاڭا كەزەڭگە ٴوتىپ، حالىقتىق كاسىپورىندار اناعۇرلىم ايقىن، اناعۇرلىم ۇستامدى دامۋ تانىمىنا يە بولدى. ساۋدا سالاسىنىڭ ورلەۋى ـ باسەڭدەۋى مەن سان وتكەلدەن ٴوتۋ بارىسىندا ٴبىر توپ حالىقتىق كاسىپورىن بىرتىندەپ جەتىلىپ، زورايىپ، قوعامدىق جاۋاپكەرشىلىك ارقالاپ، داڭقتى ىستەرگە ات سالىسىپ، قوعامنىڭ قۇرمەتىنە بولەندى.
قازىر قالىڭ حالىقتىق كاسىپورىندار شينجياڭنىڭ ەكونوميكالىق دامۋىنىڭ ماڭىزدى تىرەگىنە، قازىنا سالىق كىرىسىنىڭ ماڭىزدى قاينارىنا، جۇمىستاندىرۋدى كەڭەيتۋدىڭ ماڭىزدى ارناسىنا اينالدى. حالىقتىق كاسىپورىنداردىڭ كەيبىرەۋى ەل ٴىشى ـ سىرتىندا ىقپال كۇشكە يە ٴىرى كاسىپورىن توبى بولىپ جەتىلدى، كەيبىرەۋى سايگۇلىك كاسىپورىنعا اينالىپ، ٴوز سالاسىندا اعالاپ العا شىقتى. مەملەكەتتىڭ جالپى جاعدايىنداعى شينجياڭنىڭ ستراتەگيالىق ورنىن كوزدەگەن حالىقتىق كاسىپورىندار شينجياڭنىڭ ”ون ٴىرى كاسىپ سالاسى شوعىرى“ قۇرىلىسىنا بەلسەنە ات سالىسىپ، ٴتىپتى دە جوعارى دەڭگەيدەگى ىشكە، سىرتقا ەسىك اشۋمەن توعىسىپ، شينجياڭنىڭ ەكونوميكالىق قۇرىلىسىنداعى جالىندى كۇشكە اينالدى.
ساياساتتان تىكە، تەز يگىلىكتەندىردى
دامۋداعى قيىن ماسەلەلەردى شەشتى
حالىقتىق كاسىپورىندار رەفورما جاساۋدىڭ، ەسىك اشۋدىڭ ۇلى بارىسىنا ىلەسە قارىشتاپ دامىدى. پارتيانىڭ حالىقتى بايىتۋ ساياساتى ادامداردىڭ ساۋدا تانىمىن وياتىپ، حالىقتىق شارۋاشىلىق پەن حالىقتىق كاسىپورىنداردى جارىققا شىعاردى. حالىقتىق كاسىپورىنداردىڭ دامۋىن قولداۋ — پارتيا ورتالىق كوميتەتىنىڭ دايەكتى باعىتى.
الايدا ۇزاق ۋاقىتتان بەرى حالىقتىق شارۋاشىلىقتىڭ دامۋى ساياسات شەكتەمەسى، بايلىق تاپشىلىعى، بازارعا كىرۋ رۇقساتى سياقتى كوپتەگەن سىن ـ سايىستارعا ٴدوپ كەلگەنى تالاسسىز شىندىق بولدى، بۇل شينجياڭنىڭ كەيبىر جەرلەرىندە، كەيبىر سالالارىندا ٴالى دە ورىن تەۋىپ وتىر. كەيبىر سۇيەمەلدەۋ ساياساتتارى تولىق تياناقتاندىرىلمادى، كەيبىر سالالاردا حالىقتىق كاسىپورىندارعا شەك قويىلدى، كەيبىر جەرلەردە فاكتورلار تولىق قامتاماسىزداندىرىلمادى، كەيبىر تاراۋلار مەن ٴىرى كاسىپورىنداردىڭ حالىقتىق كاسىپورىنداردىڭ اقشاسىن كەشەۋىلدەتۋى اۋىر بولدى، كەيبىر حالىقتىق كاسىپورىنداردىڭ، اسىرەسە، ورتا، شاعىن كاسىپورىنداردىڭ قارجى قۇراۋى قيىن، قارجى قۇراۋى قىمبات بولدى، سونداي ـ اق ەل ٴىشى سۇرانىسىنىڭ جەتكىلىكسىز بولۋى سەبەبىنەن كەيبىر كاسىپورىنداردىڭ تيجارات جۇرگىزۋى، دامۋى ٴبىرشاما زور قىسىم مەن قيىنشىلىقتارعا ٴدوپ كەلۋدە، ت.ب، وسىنىڭ ٴبارى حالىقتىق شارۋاشىلىقتىڭ جوعارى ساپالى دامۋىنا بەلگىلى دارەجەدە تۇساۋ بولۋدا.
تاياۋ جىلداردان بەرى شينجياڭ باس شۋجي شي جينپيڭنىڭ حالىقتىق شارۋاشىلىقتى دامىتۋ جونىندەگى ماڭىزدى بايىمداۋلارىن ىشكەرىلەي ۇيرەنىپ، دايەكتىلەندىرىپ، ”ەكىدەن تيتتەي دە اۋىتقىماۋدى“ بۇلجىماي تياناقتاندىرىپ، ۇزدىكسىز امالىن تاۋىپ كۇش توپتاپ، ٴادىس ـ امال قاراستىرىپ، حالىقتىق شارۋاشىلىقتىڭ زورايۋىن، كۇشەيۋىن بار كۇشپەن قولدادى.
«شينجياڭ ۇيعۇر اۆتونوميالى رايونىنىڭ حالىقتىق شارۋاشىلىقتىڭ دامۋىن، زورايۋىن جەبەۋ جونىندەگى ٴبىرقانشا ساياسات ـ شارالارى» سياقتى ٴبىر قىدىرۋ ساياساتتىق حۇجاتتار شىعارىلىپ، حالىقتىق شارۋاشىلىقتىڭ دامۋىنا دەم بەرەتىن، قولداۋ كورسەتەتىن، جەتەكشىلىك ەتەتىن ساياساتتىق قىزمەت وتەۋ جۇيەسى قالىپتاستى. اۆتونوميالى رايوندىق پارتكوم مەن ۇكىمەتتىڭ نەگىزگى باسشىلارى حالىقتىق كاسىپورىندارعا ساياتىن حالىق قۇرىلتايى ۇسىنىسىن، ساياسي كەڭەس ۇسىنىس جوبالارىن باستاماشىلدىقپەن بىتىرۋگە قۋزاپ، شينجياڭ كاسىپورىندارى · ٴتوراعالار بەتپە ـ بەت كەڭەسۋ اڭگىمە ٴماجىلىسىن ۇدايىلاندىرىپ وتكىزىپ، شارۋاشىلىق ـ ساۋدا ورتاسىن ساپالىلاندىرىپ، دەڭگەيىن جوعارىلاتۋدىڭ 3 جىلدىق ارەكەتىن اتقارۋدى ۇزدىكسىز ىلگەرىلەتىپ، تۇتاس قوعامعا ساۋداگەرلەردى قۇرمەتتەيتىن، ساۋداگەرلەرگە ٴمان بەرەتىن، ساۋداگەرلەرمەن ەتەنە، ساۋداگەرلەردى قورعايتىن ايقىن بەتالىس كورسەتىپ، تاماشا ساياساتتىق ورتا مەن قوعامدىق راي قالىپتاستىردى.
حالىقتىق كاسىپورىنداردىڭ اۆتونوميالى رايوننىڭ كەلەلى دامۋ ستراتەگياسىمەن توعىسىپ، ”ون ٴىرى كاسىپ سالاسى شوعىرى“، ”ٴبىر بەلدەۋ، ٴبىر جول“ وزەكتى رايونى قۇرىلىسى سياقتىلاردى ارقاۋ ەتىپ، ٴتۇيىندى نىساندارعا قارجى قوسۋ قۇرىلىسىنا بەلسەنە ات سالىسۋىنا قولداۋ كورسەتتى —
شينجياڭ چييا جاڭا ماتەريالدار شەكتى سەرىكتەستىگى قارجى قوسىپ سالعان جىلىنا 6 ميلليون توننا كومىر نەگىزدى مەتيل سپيرتىن ٴوندىرۋ نىسانى دۇنيە جۇزىندەگى وسى تەكتەس نىسانداردىڭ ەڭ ۇلكەنى. قازىر چييا توبى شەكتى سەرىكتەستىگىنىڭ شينجياڭدا قوسقان قارجىسى كرەمني نەگىزدى، اليۋمين نەگىزدى، كومىر حيميا ونەركاسىبى، جاڭا ەنەرگيا جانە كەن كاسىبى سىندى 5 ۇلكەن بولىكتى قامتىپ، سوماسى 60 ميلليارد يۋانعا جەتتى، الداعى 10 جىلدا شينجياڭعا قارجى قوسۋ تەبىنىن ۇزدىكسىز ارتتىرماقشى.
2024 ـ جىلى شينجياڭ حالىقتىق كاپيتالعا 120 نىسان تانىستىرىپ، جالپى 75 ميلليارد 327 ميلليون يۋان قارجى قوستى. بيىل شينجياڭ تاعى حالىقتىق كاسىپورىنداردىڭ تەمىر جول، ەنەرگيا، سۋ يگىلىگى، قالانى جاڭالاۋ سياقتى كەلەلى نەگىزدىك قۇرىلعى نىساندارى قۇرىلىسىنا ات سالىسۋىنا ۇزدىكسىز قولداۋ كورسەتىپ، ۇكىمەت پەن قوعامدىق كاپيتالدىڭ سەلبەستىك جاڭا مەحانيزمىن ارناعا ٴتۇسىرىپ اتقارىپ، حالىقتىق قارجى قوسۋدىڭ ٴورىسىن كەڭەيتىپ، نەگىزدىك قۇرىلعى جانە الەۋمەتتىك ىستەر نىسانى قۇرىلىسىنىڭ اينالىم دەڭگەيىن جوعارىلاتادى.
بازارلانعان، زاڭمەن باسقارىلاتىن، حالىقارالانعان شارۋاشىلىق ـ ساۋدا ورتاسىن ۇزدىكسىز قالىپتاستىرىپ، بازارعا كىرۋگە رۇقسات ەتۋدە ايقىن بولعان، كومەسكى بولعان كەدەرگىلەردى الاستاپ، حالىقتىق كاسىپورىنداردىڭ بايلىقتى اشۋعا، پايدالانۋعا ات سالىسۋىنا قولداۋ كورسەتتى —
جۇڭمان مۇناي ـ تابيعي گاز توبى جارنا شەكتى سەرىكتەستىگى شينجياڭ تارىم ويپاتى ونسۋ بولىگىندەگى مۇناي ـ گاز بارلاۋدا مەردىگەرلىككە قابىلدانىپ، داعدىلى مۇناي ـ گاز اشۋ رۇقسات كۋالىگىن تۇڭعىش العان، ەل ىشىندە جوعارعى بۋىنداعى مۇناي ـ گاز بارلاۋ كەن ۇقىعىن تۇڭعىش العان، ەل ىشىندە مۇناي ـ تابيعي گازدىڭ جاڭادان ارتقان ساقتالۋ مولشەرىن انىقتاۋ مالىمەتى باعالاۋىنان ٴوتىپ، ەستەلىككە الىنعان تۇڭعىش حالىقتىق كاسىپورىنعا اينالدى. قازىر ونسۋ بولىگىندە شامامەن 450 ٴوندىرۋ ۇڭعىماسى بار، كوكيار مۇناي الابىنىڭ، حۇڭچيپو مۇناي الابىنىڭ، سايكى مۇناي الابىنىڭ مۇناي ـ گاز قورى ىركەس ـ تىركەس انىقتالدى.
كەن ۇقىعىن وتكەرمەلەۋ ٴتۇزىمى رەفورماسىن اتقارىپ، اشىق ماڭدايشالىق اسۋ، جوعارى باعا قويعاندار يە بولۋ ٴتاسىلى ارقىلى كەن ۇقىعىن وتكەرمەلەپ بەردى، مەملەكەت مەنشىگىندەگى كاسىپورىندار مەن حالىقتىق كاسىپورىندارعا بىردەي قاراپ، اناعۇرلىم كوپ مىقتى كاسىپورىنداردىڭ كەن بايلىعىن اشۋعا ات سالىسۋىنا ”اشىق، تەڭ، ٴادىل“ تۇعىر جانە وراي ازىرلەدى.
ساياساتتان تىكە، تەز يگىلىكتەندىرۋ مەحانيزمىن كەمەلدەندىرىپ، فاكتورمەن قامتاماسىز ەتۋدى كۇشەيتىپ، قارجى قۇراۋ ارناسىن كەڭەيتىپ، كاسىپورىنداردىڭ سالىق ـ اقى اۋىرتپالىعىن كۇش سالا جەڭىلدەتتى —
تاپسىرىس ەڭ كوپ بولعان كەزدە شيكىزات باعاسى ۇزدىكسىز جوعارىلادى. شينجياڭ حىڭيۋان جۇڭحۇي ٴتۇستى باسپا، قوراپتاۋ جارنا شەكتى سەرىكتەستىگى قارجى قىسىمىنا ٴدوپ كەلگەندە، جۇڭگو اۋىل شارۋاشىلىعى بانكەسى ٴۇرىمجى بولىمشە بانكەسى ”ٴبىر قاريدارلار توبىنا ٴبىر جوبا“ ساياساتىنان پايدالانىپ، وعان 9 ميلليون يۋان ساپ امانات ـ قارىز اقشاسىن تاراتىپ، قارجى قىسىمىن باسەڭدەتۋگە كومەكتەسۋمەن بىرگە، كاسىپورىن ٴۇشىن 80 مىڭ يۋاننان استام قازىنالىق وزىندىك قۇن ۇنەمدەپ بەردى.
بانكە قۇرىلىمدارىن ”ەكىدەن تيتتەي دە اۋىتقىماۋدى“ باتىل تياناقتاندىرۋعا بەلسەنە جەتەكتەپ، فينانستىق قىزمەت وتەۋ مەحانيزمىن كەمەلدەندىرىپ، فينانس ونىمدەرىمەن قامداۋدى مولايتىپ، امانات ـ قارىز ۇسىنىلىمى تەبىنىن ارتتىرىپ، حالىقتىق كاسىپورىنداردىڭ قارجى قۇراۋداعى قول جەتىمدىلىگىن جوعارىلاتتى.
...
”تيىم سالىنباعان بولسا تاباندا ەنگىزۋ“ كەڭ كولەمدە ورىستەتىلدى، ”ٴبىر جەلىدە ٴبىر تۇتاس بىتىرۋدە“ ونىمدىلىككە قول جەتتى، ”تۇڭعىش رەت قايشىلىق جاساعانداردى جازالاماۋ“ جالپى بەتتىك اتقارىلدى... شينجياڭ ٴتۇيىندى سالالار مەن شەشۋشى بۋىندار رەفورماسىن ىلگەرىلەتىپ، بازار مەحانيزمى ٴونىمدى بولعان، ۇكىمەتتىڭ قامتاماسىز ەتۋى تياناقتى بولعان شارۋاشىلىق ـ ساۋدا ورتاسىن قالىپتاستىرىپ، ساياسات پايداسىنىڭ ناقتى تياناقتانۋىنا اناعۇرلىم ٴمان بەرىپ، حالىقتىق شارۋاشىلىق دامۋدا ٴدوپ كەلگەن ”اينەك ەسىكتى“، ”اينالمالى ەسىكتى“، ”سەرىپپەلى ەسىكتى“ تالقانداپ، ورتا، شاعىن كاسىپورىنداردىڭ قيىنشىلىعىن شەشۋ، كەشەۋىلدەتىلگەن اقشاسىن اداقتاۋ قىزمەتىن ويداعىداي ىستەپ، حالىقتىق كاسىپورىنداردىڭ شينجياڭعا تامىر تارتۋ، دامىپ ـ زورايۋ سەنىمى مەن ومىرشەڭ كۇشىن ۇزدىكسىز تاسقىنداتتى.
وتان سۇيىسپەنشىلىگىن كۇشەيتتى
دامۋ ورايىمەن قاۋىشتى
قيىنشىلىقتار، سىن ـ سايىستار ىشىندە جەڭىس جىرىن شىرقاي ىلگەرىلەدى.
40 نەشە جىلدان بەرى حالىقتىق كاسىپورىندار تيانشان الابىنىڭ ۇلان ـ بايتاق توپىراعىنا تامىر تارتىپ دامۋدا كۇرەس جۇرگىزىپ جەڭىسكە جەتەتىن جىگەر ـ قايراتقا سۇيەندى. شينجياڭدا كۇرەس جۇرگىزىپ، دامىعان حالىقتىق كاسىپورىنشىلاردىڭ بەينەسىنە ٴورىس اشا جاڭالىق اشۋ، ادال دا ەڭبەكشىل بولۋ، قايسار دا مىقتى بولۋ، سيىسىمدى دا كىشى پەيىل بولۋ، قوعامدىق جاۋاپكەرشىلىكتى ارقالاۋ جانە وتان سۇيىسپەنشىلىگى سياقتى كوپتەگەن تاڭداۋلى قاسيەتتەر مەن رۋح شوعىرلانعان.
وزىندىك دامۋدى، الۋەتتەنۋدى جۇزەگە اسىرۋ بارىسىندا قالىڭ حالىقتىق كاسىپورىنداردىڭ الدىمەن بايىعاندارى سوڭعىلارىن بايۋعا باستاپ، بىرگە بايۋدى جەبەپ، ”10 مىڭ كاسىپورىن 10 مىڭ قىستاققا كومەكتەسۋ“ ارەكەتى سياقتىلارعا بەلسەنە ات سالىستى. 2024 ـ جىلى 12 ـ ايعا دەيىن شينجياڭنىڭ ”10 مىڭ كاسىپورىن 10 مىڭ قىستاقتى گۇلدەندىرۋ“ ارەكەت ەسەبى جۇيەسىنە 1722 حالىقتىق كاسىپورىن، 1915 قىستاقتى گۇلدەندىرۋ ٴىسى، 2265 قىستاقتى گۇلدەندىرۋ نىسانى ەنگىزىلدى، قارجى قوسۋ، تيجارات تۇرىندەگى نىسانعا 8 ميلليارد 541 ميلليون يۋان، الەۋمەتتىك يگىلىك جىلۋ اتاۋ تۇرىندەگى نىسانعا 290 ميلليون يۋان قارجى قوسىلدى.
ەل ىشىندەگى دامىعان ولكەلەرمەن سالىستىرعاندا شينجياڭنىڭ حالىقتىق شارۋاشىلىعىندا ٴالى دە زور پارىق بار ەكەنىن، ٴسوز جوق، سەرگەكتىكپەن تانۋ كەرەك. ەكونوميكانىڭ جالپى مولشەرىندە حالىقتىق شارۋاشىلىقتىڭ يەلەگەن سالىستىرماسى ٴالى دە ٴبىرشاما تومەن. حالىقتىق كاسىپورىنداردىڭ كولەمنەن جوعارى ونەركاسىپ كاسىپورىندارىنىڭ سانى، اسىرەسە، ٴىرى كاسىپورىندار توبىنىڭ سانى ٴبىرشاما از؛ 3 ـ كاسىپتىڭ دامۋ دەڭگەيى مەن حالىقتىق كاسىپورىنداردىڭ ونداعى ۇلەسى بۇكىل ەلدىڭ ورتاشا دەڭگەيىنەن كورنەكتى تومەن.
لۋ ۋيدۇڭ بىلاي دەپ قارادى: جاڭا ٴداۋىردىڭ جاڭا جورىعىندا شينجياڭنىڭ حالىقتىق كاسىپورىندارى مەن حالىقتىق كاسىپورىنشىلارى جاقسى ـ جاماندى ايىرىپ، جاڭالىققا كوشىپ، جاڭا ورايمەن قاۋىشىپ، جاڭا ناتيجە جاراتۋى كەرەك.
قازىر شينجياڭنىڭ بارلىق جەرى دامۋ ورايىنا تولى، بولاشاق كومەسكى كۇشى زور، بولاشاعى نۇرلى. پارتيا ورتالىق كوميتەتى شينجياڭعا مەملەكەتتىڭ جالپى جاعدايىنداعى ”بەس ۇلكەن ستراتەگيالىق ورىن“ بەلگىلەپ بەردى، قازىنا، قارجى، سالىق، نىسان، دارىندى، شينجياڭعا كومەكتەسۋ سياقتى جاقتاردا بەرىلگەن ٴبىر قىدىرۋ ەرەكشە ساياساتتاردىڭ پايداسى قاباتتاسىپ جارىققا شىعىپ، جوعارى دەڭگەيدە ىشكە، سىرتقا ەسىك اشۋ ورايى بۇرىن بولماعان دارەجەگە جەتتى. ”ون ٴىرى كاسىپ سالاسى شوعىرىن“ تىرەك ەتكەن وسىزاماندانعان كاسىپ سالاسى جۇيەسى قۇرىلىسى قارىشتاپ دامىپ، شينجياڭنىڭ بايلىق ابزالدىلىعى ەكونوميكالىق ابزالدىلىققا اينالىپ، دامۋ باسىمدىعىنىڭ كومەسكى كۇشى زور بولدى.
وراي تاعى دا كەلدى، شينجياڭداعى حالىقتىق كاسىپورىنشىلار جۇرەكتىلىكپەن جاڭالىق اشىپ، باتىلدىقپەن وزگەرىس جاساپ، كاسىپورىننىڭ كەلەشەگىن مەملەكەتتىڭ ستراتەگياسىمەن، قوعامنىڭ قاجەتىمەن، حالىقتىڭ تىلەگىمەن اناعۇرلىم تىعىز توعىستىرۋعا ٴتيىس، سوندا عانا، ٴداۋىردىڭ الدىندا تۇرىپ، اناعۇرلىم زور دامۋدى قارسى الا الادى.
وتان ٴۇمىتىن اقتاۋدى كوكەيدە ساقتاپ، بار پەيىلىمەن دامۋدى كوزدەپ، زاڭعا بويسۇنىپ شارۋاشىلىق جۇرگىزۋگە شەبەر بولىپ، الدىمەن بايۋ ارقىلى بىرگە بايۋدى جەبەۋ كەرەك. جاڭا داۋىردەگى حالىقتىق شارۋاشىلىقتىڭ شينجياڭ ەكونوميكاسىنىڭ، قوعامىنىڭ جوعارى ساپالى دامۋىنا اناعۇرلىم تاسقىنداعان قوزعالىس قۋاتىن ۇستەۋىن ٴۇمىت ەتەمىز.
