65.35 مەتر
شينجياڭدىق جىگىت ەرلەر دەسكى لاقتىرۋ تۇرىندە مەملەكەتتىك رەكوردتى جاڭالادى
انار بۇلت \ شينجياڭ گازەتىنىڭ ٴتىلشىسى حۋاڭ شيڭ 4 ـ ايدىڭ 2 ـ كۇنى ۇرىمجىدەن حابارلايدى. 4 ـ ايدىڭ 2 ـ كۇنى چىڭدۋدا وتكىزىلگەن 2025 ـ جىلعى مەملەكەتتىك جەڭىل اتلەتيكا لاقتىرۋ تۇرلەرى جارىسىنىڭ 2 ـ بەكەت جارىسىندا شينجياڭ سپورتشىسى ابدۇعيني تۇرعۇن ەرلەر دەسكى جارىسىندا 65 .35 مەترلىك ناتيجەمەن اعا جۇلدەگەر بولىپ، 29 جىلعا تاياۋ ۋاقىت جاڭالانباعان مەملەكەتتىك رەكوردتى بۇزدى.
65.35 مەتر! بۇل جۇڭگو جەڭىل اتلەتيكا جارىسىنداعى شاعىن قادام بولعانىمەن، شينجياڭنىڭ جەڭىل اتلەتيكاسىندا ارشىندى قادام سانالادى.
سول كۇنگى جارىستا ابدۇعيني ٴار رەت 62 مەتردەن استام جەرگە لاقتىردى. ول الدىمەن 64.95 مەترلىك ناتيجە جاراتىپ، بىرنەشە كۇننىڭ الدىندا ٴوزى جاراتقان شينجياڭ ەرلەر دەسكى رەكوردىن جاڭالادى. ويلاماعان جەردەن بۇل تەك باستاماسى عانا بولدى. وسىدان كەيىن ول بار كۇشىمەن لاقتىردى، تورەشى ناتيجەسىن 65.35 مەتر دەپ جاريالاعاندا، بۇكىل الاڭداعىلار الاقايلاستى، قارسىلاستارى دا ارت ـ ارتىنان قۇتتىقتادى.
وسىدان بۇرىن جۇڭگو ەرلەر دەسكى مەملەكەتتىك رەكوردى 65.16 مەتر ەدى، ونى شاندۇڭ شەبەرى لي شاۋجيە 1996 ـ جىلى مەملەكەتتىك جەڭىل اتلەتيكا جۇلدەلى جارىسىندا جاراتقان بولاتىن. كوپ جىلداردان بەرى، ەل ىشىندە تەك ابدۇعيني مەن ونىڭ جاتتىقتىرۋشىسى نۇرمامەت تۇراق عانا وسى ناتيجەگە جاقىنداعان. قازىر ابدۇعيني بۇل رەكوردتى 0.19 مەتر جوعارىلاتتى.
”قاتتى تەبىرەندىم، قاتتى قۋاندىم. ومىرىمدە وسى رەكوردتى جاڭالاۋدى نىسانا ەتكەن ەدىم، سپورتتىق ومىرىمدە ورىندالماعان ارمانىمدى قازىر شاكىرتىم ورىندادى، بارلىعى دا ويلاعانىمداي بولدى“، ـ دەدى نۇرمامەت تەلەفوندا قۋانا.
بىلتىر جىل سوڭىندا اۆتونوميالى رايوندىق دەنە تاربيە مەكەمەسى ىرگۇڭ دەنە تاربيە جاتتىعۋ ورتالىعى ابدۇعينيعا گەرمانيانىڭ ايگىلى لاقتىرۋ جاتتىقتىرۋشىسى ديتر كلاركتى ۇسىنىس ەتتى. كلارك گۇڭ ليجياۋدى تاربيەلەپ، ونىڭ دۇنيە جۇزىلىك اعا جۇلدەگەر بولۋ ارمانىن جۇزەگە اسىرۋىنا قول ۇشىن بەرگەن ەدى. گەرمانياداعى بىرنەشە ايلىق شوعىرلى جاتتىعۋدا كلارك ابدۇعينيدى شەبەرلىك ارەكەتتەرىنە مۇقيات جاتتىقتىرىپ، كۇش جاتتىعۋىن كۇشەيتتى. وسى قۇلشىنىستار ارقىلى ول تەز ارادا ۇزدىك ناتيجەگە قول جەتكىزدى، 3 ـ ايدىڭ 29 ـ كۇنى 2025 ـ جىلعى مەملەكەتتىك جەڭىل اتلەتيكا لاقتىرۋ تۇرلەرىندەگى جارىسىنىڭ 1 ـ بەكەت جارىسىندا ول 64.36 مەترلىك ناتيجەمەن شينجياڭ رەكوردىن جاڭالادى، وسىدان كەيىنگى 4 كۇندە ابدۇعيني ٴوزى ساقتاپ كەلگەن شينجياڭ رەكوردىن 3 رەت بۇزدى ٴارى مەملەكەتتىك رەكوردتى جاڭالادى.
بيىل ابدۇعيني تاعى 5 ـ ايداعى ازيا جەڭىل اتلەتيكا جۇلدەلى جارىسى، 8 ـ ايداعى دۇنيە جۇزىلىك جەڭىل اتلەتيكا جۇلدەلى جارىسى جانە 9 ـ ايداعى مەملەكەتتىك سپورت جارىسى سىندى 3 رەتكى ماڭىزدى جارىسقا قاتىناسادى، بەينەسى وتە جاقسى، ونىڭ ۇزدىكسىز جاڭا رەكورد جاڭالاۋىنان ٴۇمىت بار.
”ٴبىز 6 ـ ايدا گەرمانياعا بارىپ شوعىرلى جاتتىعۋ جۇرگىزۋدى، سونداي ـ اق كەيبىر حالىقارالىق جارىستارعا قاتىناسىپ، ونىڭ جارىس تاجىريبەلەرىن بايىتۋدى جوسپارلاپ وتىرمىز، بۇدان كەيىن ابدۇعينيدىڭ باسقا ۇلكەن جارىستاردا ٴوز رەكوردىن ۇزدىكسىز جاڭالاۋىن ٴۇمىت ەتەمىز“، ـ دەدى اۆتونوميالى رايوندىق دەنە تاربيە مەكەمەسى ىرگۇڭ دەنە تاربيە جاتتىعۋ ورتالىعى پارتكومىنىڭ شۋجيى جاي حۇڭفي.
