شي جينپيڭ استاناداعى مىندەتتى اعاش ەگۋ قيمىلىنا قاتىناسقاندا بىلاي دەپ باسا دارىپتەدى
كورىكتى جۇڭگونى بىرگە قۇرۋدىڭ تەلەگەي كۇشىن توپتاپ، وتانىمىزدىڭ بايتاق دالاسىندا ٴتىپتى دە جاسىل لەپ ەستىرۋ، ومىرشەڭ كۇشتى تاسقىنداتۋ كەرەك
لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ قاتىناستى
4 ـ ايدىڭ 3 ـ كۇنى پارتيا مەن مەملەكەت باسشىلارىنان شي جينپيڭ، لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ قاتارلىلار بەيجيڭ قالاسى فىڭتاي رايونىنداعى يۇڭديڭ وزەنى جاعاسىنا بارىپ، استاناداعى مىندەتتى اعاش ەگۋ قيمىلىنا قاتىناستى. سۋرەتتە: شي جينپيڭ كوپشىلىكپەن بىرگە اعاش ەگۋدە.
□ سۋرەتتى شينحۋا اگەنتتىگىنىڭ ٴتىلشىسى شيە حۋانچى تۇسىرگەن
شينحۋا اگەنتتىگىنىڭ 4 ـ ايدىڭ 3 ـ كۇنى بەيجيڭنەن بەرگەن حابارى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ٴتوراعاسى، ورتالىق اسكەري ىستەر كوميتەتىنىڭ ٴتوراعاسى شي جينپيڭ 4 ـ ايدىڭ 3 ـ كۇنى تۇستەن بۇرىن استاناداعى مىندەتتى اعاش ەگۋ قيمىلىنا قاتىناسقاندا بىلاي دەپ باسا دارىپتەدى: اعاش ەگىپ ورمان ٴوسىرۋ — ەكولوگيالىق وركەنيەت قۇرىلىسىنىڭ ماڭىزدى بۋىنى. وڭىرلەر، تاراۋلار جابال ارەكەتكە كىرىسىپ، قالىڭ كادرلاردى، بۇقارانى ورمان ٴوسىرىپ، جاسىلداندىرۋعا بەلسەنە قاتىناسۋعا جۇمىلدىرىپ، ۇيىمداستىرىپ، جاسىل دامۋ ۇستانىمىن امالياتتا ايگىلەپ، ەكولوگيالىق مادەنيەتتى اسقاقتاتىپ، كورىكتى جۇڭگونى بىرگە قۇرۋدىڭ تەلەگەي كۇشىن توپتاپ، وتانىمىزدىڭ بايتاق دالاسىندا ٴتىپتى دە جاسىل لەپ ەستىرۋ، ومىرشەڭ كۇشتى تاسقىنداتۋ كەرەك.
چيڭميڭ تاياپ قالدى، استانا بەيجيڭ كوركەم كوكتەم تۇسىنە ەنىپ، ەركە سامال ەسىپ تۇر. تۇستەن بۇرىن ساعات 10نان 30 مينۋت مولشەرىندە، پارتيا مەن مەملەكەت باسشىلارىنان شي جينپيڭ، لي چياڭ، جاۋ لىجي، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ قاتارلىلار توپتىق اۆتوكولىككە وتىرىپ، فىڭتاي رايونىنداعى يۇڭديڭ وزەنى جاعاسىنا بارىپ، كادر، بۇقارامەن بىرگە مىندەتتى اعاش ەگۋگە قاتىناستى.
اعاش ەگۋ ورنى يۇڭديڭ وزەنى جاسىلداندىرۋ ارناسى ۇلگى كورسەتۋ بولىگىندە، بۇل ٴوڭىردىڭ سۋ جۇيەسىنىڭ قۇرىلىمى ٴار الۋان، ۇلاسپالى 7 كيلومەترلىك جاعاجاي كەڭىستىگى بار، ٴدال قازىر ەكولوگيانى نارلەندىرۋ جانە سەيىلدەۋ، دەنە شىنىقتىرۋ يقۋاتى سايما ـ ساي كەلگەن جاعاجاي جاسىل ٴدالىزىن قالىپتاستىرىپ جاتقان بولاتىن.
باس شۋجيدىڭ كەلگەنىن كورىپ، اعاش ەگىپ جاتقان كادر، بۇقارا جاپا ـ تارماعاي باس شۋجيگە ىستىق ىقىلاسپەن امانداستى. شي جينپيڭ كوپشىلىككە قول بۇلعاپ قۇرمەت ٴبىلدىردى، كۇرەك كوتەرىپ اعاش ەگەتىن جەرگە بارىپ، بەيجيڭ قالاسىنداعى، مەملەكەتتىك ورمان شارۋاشىلىعى جانە جايلىم مەكەمەسىندەگى جاۋاپتى جولداستارمەن، سونداي ـ اق كادر، بۇقارامەن، پيونەرلەرمەن بىرگە قاربالاس جۇمىسقا كىرىسىپ كەتتى.
توپىراق كۇرەپ، شۇقاناق قازدى، توپىراق قومداپ بوگەن جاسادى، شەلەك كوتەرىپ، اعاش سۋاردى... شي جينپيڭ ماي قاراعاي، التىن بۇتاقتى اق ۇيەڭكى، اسەم الحورى، چىلياڭمۋ، دۋجۇڭ، ۇيەڭكى تال سياقتى كوپتەگەن اعاشتىڭ قالامشاسىن ىركەس ـ تىركەس وتىرعىزدى. شي جينپيڭ اعاش وتىرعىزا ٴجۇرىپ، بالالاردىڭ ۇيرەنۋ، تۇرمىس جانە ەڭبەكپەن شىنىعۋ جاعدايىن سۇرادى. ول بىلاي دەپ باسا دارىپتەدى: تاماشا تۇرمىستىڭ ٴبارى ەڭبەكتەن كەلەدى، قالىڭ جاستار مەن ورەندەر ەڭبەكتى قىزۋ ٴسۇيۋى، ۇلى تابيعاتتى قىزۋ ٴسۇيۋى، اعاش ەگىپ ورمان ٴوسىرۋ سياقتى الەۋمەتتىك يگىلىك قيمىلىنا بەلسەنە قاتىناسۋى، ەڭبەك بارىسىندا دەنەسىن شىنىقتىرىپ، جىگەرىن شىڭداپ، ٴبىلىمىن مولايتۋى، احىلاق، اقىل ـ وي، دەنە، ەستەتيكا، ەڭبەك جاقتارىنان جان ـ جاقتى جەتىلۋى قاجەت. اعاش ەگۋ ورنىندا دۋماندى ەڭبەكتىڭ قاربالاس كورىنىسى قالىپتاستى.
اعاش ەككەن كەزدە شي جينپيڭ سول جەردەگى كادر، بۇقارامەن ىقىلاستى اڭگىمەدە بولدى. ول بىلاي دەدى: قازىر ەلىمىزدىڭ ورمانمەن كومكەرىلۋ مولشەرى %25تەن اسىپ، بۇكىل جەر شارىنا شامامەن %25 جاڭادان جاسىلداندىرىلعان جەر اۋدانى ۇلەسىن قوستى. ۇزدىكسىز قۇلشىنۋ ارقىلى تاكلاماكان ٴشولى ”جاسىل ٴشارپى“ وراندى، حورچين قۇمايت جەرى جايلاۋ كوركىن قايتا تاپتى، بۇل ناتيجەلەرگە وڭاي ـ وسپاق قول جەتكەن جوق. ەكولوگيالىق ورتانىڭ ۇزدىكسىز جاقسارۋىن حالىق بۇقاراسى ەڭ تىكە، ەڭ شىنايى سەزىنە الدى. سونىمەن بىرگە ەلىمىزدە ورمان، جايلىم بايلىعىنىڭ جالپى مولشەرى ٴالى دە جەتكىلىكسىز، ساپاسى مەن ونىمدىلىگىنىڭ ٴالى دە جوعارى ەمەس ەكەندىگىن كورە ٴبىلۋىمىز كەرەك. كورنەكتى ماسەلەلەردى شىن مانىندە شەشىپ، جىلدان ـ جىلعا جاقسى ىستەۋگە كۇش سالۋ كەرەك.
شي جينپيڭ مىنالاردى اتاپ كورسەتتى: وتاندى جاسىلداندىرۋدا جاسىلدى كەڭەيتۋ، جاسىلدى گۇلدەندىرۋ، جاسىلدى قورعاۋ سىندى ”ٴۇش جاسىلدى“ قاتار اتقارۋعا، ٴسوزسىز، تاباندى بولىپ، ورماننىڭ سۋ قويماسى، اقشا قامباسى، استىق قامباسى، كومىر قىشقىل گازى قامباسى سىندى ”ٴتورت قامبا“ بولۋىن سايكەستى ىلگەرىلەتۋ كەرەك. ”ساپاسىن جوعارىلاتۋعا“ اناعۇرلىم ٴمان بەرىپ، ورمان الابى قۇرىلىمىن ساپالىلاندىرىپ، ورمان تيجاراتىن ويداعىداي ىستەۋ، جايلىم ەكولوگياسى ساپاسىن بىرگە جوعارىلاتۋ كەرەك. ”شارۋاشىلىقتى گۇلدەندىرۋگە“ اناعۇرلىم ٴمان بەرىپ، رەفورما جاساۋ ٴادىسىن كوبىرەك قولدانىپ ورمان، جايلىم بايلىعىنان جاندى پايدالانۋ، ورمان، جايلىم كاسىپ سالاسىن زورايتۋ كەرەك. ”حالىققا پايدا جەتكىزۋگە“ اناعۇرلىم ٴمان بەرىپ، بۇقارانىڭ ماڭىنداعى جاسىلدى ارتتىرۋ، كوز الدىنداعى كوركەم كورىنىستى كوبەيتۋ، ورمان، جايلىم جاعىندا جۇمىستاندىرىپ كىرىستى ارتتىرۋ كەڭىستىگىن كەڭەيتۋ كەرەك.
شي جينپيڭ بىلاي دەپ باسا دارىپتەدى: مىندەتتى اعاش ەگۋ — جالپى حالىقتىق ارەكەت، ونى ۇرپاقتان ـ ۇرپاققا جالعاستىرىپ ىستەۋ كەرەك. جاۋاپكەرشىلىك تانىمىن كۇشەيتىپ، قاتىناسۋ تاسىلىندە جاڭالىق اشىپ، قىزمەت وتەۋ تىرەگىن كۇشەيتىپ، بۇل قيمىلدى ويداعىداي تىڭعىلىقتى ورىستەتىپ، ورمان ٴوسىرىپ جاسىلداندىرۋدىڭ ناقتى ونىمدىلىگىن ۇزدىكسىز جوعارىلاتۋ كەرەك.
جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ بەيجيڭدەگى مۇشەلەرى، ورتالىق كوميتەت شۋجيچۋىنىڭ شۋجيلەرى، مەملەكەتتىك كەڭەستىڭ مۇشەلەرى قاتارلىلار اعاش ەگۋ قيمىلىنا قاتىناستى.
