ساۋدا ىستەرى مينيسترلىگى امەريكانىڭ تەڭ كەدەن باجىسىن جاريالاعانىنا جاۋاپ قايتاردى:
قارسى شارالاردى باتىل قولدانىپ، ٴوز ۇقىق ـ مۇددەمىزدى قورعايمىز
شينحۋا اگەنتتىگىنىڭ 4 ـ ايدىڭ 3 ـ كۇنى بەيجيڭنەن بەرگەن حابارى. ساۋدا ىستەرى مينيسترلىگىنىڭ اقپارات مالىمدەمەشىسى 4 ـ ايدىڭ 3 ـ كۇنى مىنالاردى ٴبىلدىردى: جۇڭگو جاق امەريكانىڭ شىعىس بولىك ۋاقىتى بويىنشا 4 ـ ايدىڭ 2 ـ كۇنى امەريكا جاقتىڭ بارلىق ساۋدا سەرىكتەرىنەن ”تەڭ كەدەن باجىسىن“ الاتىندىعىن جاريالاعاندىعىن اڭعاردى. جۇڭگو جاق بۇعان باتىل قارسى تۇرادى ٴارى باتىل قارسى شارا قولدانىپ، ٴوز ۇقىق ـ مۇددەسىن قورعايدى.
مالىمدەمەشى بىلاي دەدى: امەريكا جاق ٴوزىنىڭ حالىقارالىق ساۋدادا زيان تارتقانىن ايتىپ جار سالىپ، ايتىلمىس ”تەڭدىكتى“ سىلتاۋراتىپ، بارلىق ساۋدا سەرىكتەرىنىڭ كەدەن باجىسىن جوعارىلاتتى، ونىڭ بۇل ارەكەتى كوپ جىلدان بەرگى كوپ جاقتى ساۋدا كەلىسسوزىندە قول جەتكەن مۇددە تەپە ـ تەڭدىگى ناتيجەسىن ەسكەرۋسىز قالدىردى، سونداي ـ اق امەريكانىڭ ۇزاق ۋاقىت حالىقارالىق ساۋدادان قىرۋار پايدا تۇسىرگەن فاكتىن دە ەلەپ ـ ەسكەرمەدى. امەريكا جاق سۋبيەكتيۆ، سىڭار جاقتى باعالاۋ نەگىزىندە ايتىلمىس ”تەڭ كەدەن باجىسىن“ شىعاردى، بۇل حالىقارالىق ساۋدا ەرەجەسىنە ۇيلەسپەيدى، قاتىستى جاقتاردىڭ ورىندى، زاڭدى ۇقىق ـ مۇددەسىنە اۋىر زيان جەتكىزەدى، بۇل تيپتىك سىڭار جاقتى زورەكەرلىك ارەكەت. بۇعان كوپتەگەن ساۋدا سەرىكتەرى كۇشتى نارازىلىق ٴبىلدىردى جانە ايقىن قارسى تۇردى.
مالىمدەمەشى مىنانى ٴبىلدىردى: تاريح كەدەن باجىسىن جوعارىلاتۋ امەريكانىڭ ٴوز ماسەلەسىن شەشە المايتىندىعىن، امەريكانىڭ ٴوز مۇددەسىنە زيان جەتكىزۋمەن بىرگە، دۇنيە ٴجۇزى ەكونوميكاسىنىڭ دامۋىنا جانە ٴوندىرۋ، قامداۋ تىزبەگىنىڭ تۇراقتىلىعىنا دا حاۋىپ توندىرەتىندىگىن دالەلدەدى. ساۋدا سوعىسىندا جەڭىمپاز بولمايدى، قورعامپازدىقتا شىعار جول جوق. جۇڭگو جاق امەريكا جاقتى سىڭار جاقتى كەدەن باجىسى شارالارىن دەرەۋ كۇشىنەن قالدىرىپ، ساۋدا سەرىكتەرىمەن تەڭ تۇرعىدا تىلدەسۋ ارقىلى الاۋىزدىقتاردى ۇيلەسىمدى شەشۋگە قۋزايدى.
