انار بۇلت \ شينجياڭ گازەتىنىڭ ٴتىلشىسى باي سۋجۇن
ٴار جولى اعىلشىن ٴتىلى ساباعى اياقتاعاننان كەيىن، وقۋشىلار گاۋ ۋىنبونى قاۋمالاپ اڭگىمەلەسە كەتەدى نەمەسە بىرگە گيتار شەرتىپ، ٴان ايتادى.
24 جاستاعى گاۋ ۋىنبو جىڭ اۋداندىق 4 ـ ورتا مەكتەپ 7 ـ جىلدىق (6) كلاسىنىڭ كلاس جەتەكشىسى، قوسىمشا اعىلشىن ٴتىلى مۇعالىمى. 2023 ـ جىلى 8 ـ ايدىڭ 1 ـ كۇنى ول گانسۋدان اتتانىپ، قالىڭ باتىس بولىك جوسپارى ەرىكتىلەرىمەن بىرگە شينجياڭعا جول الادى. ”شينجياڭعا كەلۋىمە اكەمنىڭ ىقپالى كۇشتىرەك بولدى. 20 نەشە جىلدىڭ الدىندا ول كىسى شينجياڭدا جۇمىس ىستەگەن، ٴار جولى شينجياڭنىڭ جەرگىلىكتى سالت ـ ساناسىن اڭگىمە ەتكەندە قاتتى قىزىعاتىنمىن. اكەم دە مەنى سىرتقا كوبىرەك شىعىپ شىنىعۋعا شابىتتاندىراتىن، سونىمەن مەكتەپ بىتىرە سالا جوعارى مەكتەپ وقۋشىلارىنىڭ باتىس بولىككە ەرىكتى بولىپ قىزمەت وتەۋ جوسپارىنا قاتىناسۋعا تىزىمدەلدىم، ـ دەدى. گاۋ ۋىنبو ٴوزىنىڭ شينجياڭعا كەلگەندە ٴارى ـ ٴسارى بولماعاندىعىن، جولدا دا داعدارماعاندىعىن، قازىر ٴتىپتى دە وكىنبەيتىندىگىن ايتتى.
”شينجياڭدىقتار ەرەكشە ىقىلاستى، اق كوڭىل كەلەدى، قىزمەتتەستەرىم بولسىن، الدە وقۋشىلارىمنىڭ اتا ـ اناسى بولسىن، ٴبارى دە مەنى جاتسىنعان ەمەس“. گاۋ ۋىنبو ۋاقىت وتكەن سايىن شينجياڭدا قالعىسى كەلەتىندىگىن ايتتى.
گاۋ ۋىنبو تىلشىمەن ٴوزىنىڭ 2 جىلدان بەرى جىڭ اۋدانىندا باستان كەشكەن ۇمتىلماس ساتتەرىمەن ٴبولىستى، وسىنداي مەيىرىمدى سەزىنگەن ول قالۋعا بەكيدى.
بىلتىر جازدا گاۋ ۋىنبو قىزمەتتەسىمەن بىرگە باقشاعا كەلىپ سەيىلدەپ، قايتارىندا قول تەلەفونى ابايسىزدا كوگالدا قالىپ قويادى، قاتتى ابىرجىپ تۇرعانىندا ساقشى ونىڭ قول تەلەفونىن مەكتەپ قاقپاسىنا جەتكىزىپ بەرەدى. اسىلىندە ٴبىر قالا تۇرعىنى قول تەلەفوندى تاۋىپ العاننان كەيىن دەرەۋ ساقشىعا تاپسىرىپتى، ساقشى جاق جوعالتۋشىنى انىقتاعاننان كەيىن، قايتارىپ بەرۋگە اسىعا جەتكەنى ەكەن.
تاعى ٴبىر جولى گاۋ ۋىنبو وقۋشىسى ازامات ابليكىمنىڭ ۇيىنە جاعداي ۇعىسا بارادى. ول بارعاندا ۇستەلگە ىستىق ٴسۇتتى شاي، ٴتۇرلى بالكۇلشەلەر جانە جەمىس ـ جيدەكتەر داستارقانعا تولتىرا تىزىلەدى.
”وقۋ جاعدايىن ايتىپ بولىپ، قايتۋعا ىڭعايلانعانىمدا اكە ـ شەشەسى ٴلاڭمان جەپ كەت دەپ، مەنى جىبەرمەدى“. گاۋ ۋىنبو: كەتەرىمدە اكە ـ شەشەسى قالتاما شىلان جانە جاڭعاقتى تولتىرا سالىپ بەردى، ـ دەدى.
ٴبىر جىلدىق قىزمەت وتەۋ مەرزىمى اياقتاعاندا گاۋ ۋىنبو قاتتى تولعانادى. ول ۇيىندەگىلەرگە شينجياڭعا قالۋ ويىن ايتقاندا، ۇيىندەگىلەر ونى قولدايدى.
گاۋ ۋىنبونىڭ بولاشاققا سەنىمى زور. بوس ۋاقىتىندا وقۋشىلارعا تەگىن ساباق پىسىقتاپ بەرۋمەن بىرگە، ىرىقتىلىقپەن الەۋمەتتىك اۋماققا بارىپ الەۋمەتتىك يگىلىك قيمىلدارىنا قاتىناسادى. ونىڭ دوستار شەڭبەرى مەن شياۋحۇڭشۋىندا شينجياڭنىڭ ٴدامدى تاعامدارىن، اسەم كورىنىستەرىن جانە: جاڭا كەلگەنىمدە قىسقا مەرزىم قىزمەت وتەيمىن دەپ ويلادىم، ال قازىر وسى ارادا ۇزاق ۋاقىت ەڭبەكتەنگىم كەلەدى. 500 نەشە كۇندە شينجياڭ سىندى وسى جەر قاريتاداعى بەيتانىس كوورديناتادان جانىمداي جاقسى كورەتىن ەكىنشى مەكەنىمە اينالدى، ـ دەپ جازعان اسەرلەرى بار...
2024 ـ جىلى 10 ـ ايدا گاۋ ۋىنبو جىلدىقتار گرۋپپاسىندا ۇزدىك وقىتۋشى بولىپ باعالاندى. ”گاۋ ۋىنبو مۇعالىم ساباقتى قىزىقتى وتەدى، ساباقحانادا اسەرلى اڭگىمەلەردى قىستىرىپ وقۋشىلارمەن ىقپالداسۋعا شەبەر، وقۋشىلار ونى قاتتى ۇناتادى“، ـ دەدى جىڭ اۋداندىق 4 ـ ورتا مەكتەپ پارتيا باس ياچەيكاسىنىڭ شۋجيى سۇن جيانفىڭ.
سول جىلى 11 ـ ايدا گاۋ ۋىنبونىڭ قىز دوسى ما يارۋ دا حىناننان جىڭ اۋدانىنا كەلگەن. ”شينجياڭنىڭ قۇبا ٴتۇزىنىڭ جەلى، بالالاردىڭ كۇلكى ۇيىرىلگەن جۇزدەرى، تاعى قارت اجەيدىڭ پالاۋى مەنى باۋرادى“. ما يارۋ قۋانا ەكەۋىنىڭ جىڭ اۋدانىندا وتاۋ قۇرماقشى ەكەندىگىن ايتتى.
بوس ۋاقىتىندا گاۋ ۋىنبو وقۋشىلاردى جىڭ اۋدانىنداعى ەكولوگيالىق باقشاعا توراڭعى اعاشىنىڭ ۇرىعىن تەرۋگە ەرتىپ بارادى، ول وقۋشىلارعا: ”ٴشول دالاداعى تىرشىلىك تاعدىرعا ەشقاشان وڭاي ـ وسپاق باس يمەيدى، كىشكەنە تۇقىمدا دا جوعارىعا تالپىناتىن كۇش بار“.
”ناعىز تاربيە ٴبىر ٴتۇپ اعاشتى ولشەمگە ٴتۇسىرىپ قيۋ ەمەس، قايتا ٴار ٴتۇيىر تۇقىمنىڭ وزىنە ۇيلەسەتىن توپىراقتى تابۋىنا كومەكتەسۋ. شينجياڭدا تامىر تارتىپ، وقۋشىلاردىڭ اقاۋسىز ەرجەتۋىنە كومەكتەسۋدى قالايمىن“، ـ دەدى گاۋ ۋىنبو.
