انار بۇلت \ شينجياڭ گازەتىنىڭ ٴتىلشىسى گو حۇڭلەي
4 ـ ايداعى شينجياڭدا جاسىل لەپ ەسىپ، بارلىق جەر ورايعا تولدى. فوتوۆولتتىق ەلەكتر زاۆودىنان تارتىپ زەردەلى ماقتا اتىزىنا دەيىن، جۇندۇڭ ەكونوميكالىق، تەحنولوگيالىق اشۋ رايونىنان تارتىپ تاكلاماكان قۇمدى ٴشولىنىڭ قويناۋىنا دەيىن بارلىق جەردەن جاستاردىڭ قاراسىن كورۋگە بولادى.
شىعىس وڭتۇستىك ازيادا تالاي جىل ەل ارالاعان شارۋاشىلىق قۇرۋشى ۇرىمجىگە قونىستانىپ ورتا ازيادان بازار اشتى، 90 ـ جىلدان كەيىن تۋعان شەتەلدەن ورالعان دوكتور شينجياڭعا كەلىپ جاڭا ەنەرگيا كاسىپ سالاسىنا ات سالىستى، حۋناندىق بويجەتكەن وڭتۇستىك شينجياڭعا تامىر تارتىپ، اپپارات كوزىمەن قۋاڭ دالانىڭ جاسىل القاپقا اينالعان كەرەمەتىن ەستەلىككە الدى... شينجياڭنىڭ تارتىمدىلىعى ٴداۋىردى اڭگىمەلەۋدى جەكە ادامنىڭ ورايىنا اينالدىرعان سانسىز مۇمكىندىگىندە جاتىر.
ناعىز جاستىق ومىرشەڭ كۇش ىلعي دا ٴداۋىر دامۋىنىڭ الدىڭعى لەگىندە جانە ۇمىتكە تولعان جەردە جارىققا شىعادى. شينجياڭ سيىسىمدى دا اشىق بەينەسىمەن ارمان ارقالاعان جاستارعا شارۋاشىلىق قۇرىپ كۇرەس جاساۋدىڭ كەڭ ساحناسىن ازىرلەپ، ولاردىڭ وسى ارادا ٴومىر قۇنىن جۇزەگە اسىراتىن وراي تابۋىنا مۇمكىندىك جاساۋدا.
ەسىك اشۋدىڭ الدىڭعى شەبى
”وزبەكستاننىڭ تاشكەنت قالاسىنداعى فايرمونت قوناق عيماراتىن اشەكەيلەۋ ينجەنەرياسى“، ”قازاقستان تەمىر تەمىر جول سەرىكتەستىگىنىڭ اۆتوكولىكتەردى ەسەپكە الۋ، مەڭگەرۋ جۇيەسى قۇرىلىسى“... دەرلىكتەي ٴار كۇنى ورتا ازيا ساتىپ اكەلۋ، مەردىگەر شاقىرۋ سايتى ورتا ازياداعى 5 ەلدەگى ساتىپ اكەلۋ، مەردىگەر شاقىرۋ سياقتى نىسانداردىڭ ەڭ جاڭا ينفورماتسيالارىن جاريالاپ تۇرادى.
3 ـ ايدىڭ سوڭىنا دەيىن ورتا ازيا ساتىپ اكەلۋ، مەردىگەر شاقىرۋ سايتى ارقىلى ينفورماتسياعا يە بولعان ٴارى ورتا ازياداعى ەلدەرمەن سەلبەستىك جاساسقان نىسانداردىڭ جالپى سوماسى 10 ميلليارد يۋان حالىق اقشاسىنان استى. ورتا ازيا ساتىپ اكەلۋ، مەردىگەر شاقىرۋ سايتىنىڭ قۇرۋشىسى ما حاۋحىڭ كەزىندە شىعىس وڭتۇستىك ازيادا شارۋاشىلىق قۇرىپ ەلەكتروندى ساۋدامەن تالاي جىل اينالىسقان، وسى رەت شارۋاشىلىق قۇرۋى تۋرالى ٴسوز بولعاندا، ول بەرتىنگى جىلدارى شينجياڭنىڭ ەسىك اشۋ، دامۋ قادامىنىڭ جەدەلدەپ، بۇرىن بولىپ كورمەگەن وراي اكەلگەنىن ايتتى.
2022 ـ جىلى ما حاۋحىڭ بىرنەشە شىنجىندىق سەرىگىن ەرتىپ شينجياڭنىڭ ۇرىمجىسىنە قايتىپ كەلىپ، ىلگەرىندى ـ كەيىندى ٴۇرىمجى، قاشقار، قورعاس سياقتى جەرلەردە تەكسەرۋ جۇرگىزدى، سودان تاعى ورتا ازياداعى 5 ەلگە باردى. ەل ٴىشى ـ سىرتىنداعى ينفورماتسياداعى وراسان زور پارىق ونىڭ شينجياڭنىڭ ”ٴبىر بەلدەۋ، ٴبىر جولدىڭ“ وزەكتى رايونى بولۋ رەتىندەگى شەكسىز كومەسكى كۇشىن كورىپ ـ بىلۋىنە مۇمكىندىك جاسادى.
قۇرىلىس سالاسىندا ورتا ازيا اۋىس ـ كۇيىس، سەلبەستىك ينتەرنەت تۇعىرىن قۇرۋ — ما حاۋحىڭنىڭ شارۋاشىلىق قۇرۋ بەتالىسى بولدى، ايتسە دە باستاپقى مەزگىلدە تالاي قيىنشىلىق كوردى. ”2023 ـ جىلى 5 ـ ايدا جۇڭگو — ورتا ازيا باسشىلار ٴماجىلىسى وتكىزىلىپ، ساياساتتىڭ پايداسى تارالىپ، سەلبەستىك جاساسۋ ۇسىنىستارى تولاسسىز كەلدى“. ما حاۋحىڭ ٴوز تاڭداۋىن مەملەكەتتىڭ ستراتەگياسىمەن ۇندەستىرسە، ٴداۋىردىڭ پايداسى تابيعي تۇردە ورايعا اينالاتىندىعىن ايتتى.
بۇگىنگى تاڭدا ما حاۋحىڭ تاشكەنتتە جۇمىس ٴبىتىرۋ ورنىن اشتى، بۇل ينفورماتسيا جيناۋعا قولايلى بولۋمەن بىرگە، تاعى جەرگىلىكتى ۇكىمەتكە، كاسىپورىندارعا اۋدارماشىلىق سياقتى قىزمەت كورسەتۋلەر ازىرلەدى.
شينجياڭنىڭ ايقارا اشىلعان ەسىگىنىڭ ونان ارى اشىلا ٴتۇسۋى اناعۇرلىم كوپ ورتا ازيا جاستارىنىڭ شينجياڭعا كەلىپ دامۋ ورايىن ىزدەۋىنە مۇمكىندىك جاسادى.
قىرعىزستاننان كەلگەن ماحمەتقۇلوۆا اينۇرا ماراتوۆ مىنە وسىلاردىڭ ٴبىرى. 2024 ـ جىلى 10 ـ ايدا ماحمەتقۇلوۆا ٴۇرىمجى قالاسىنداعى شينجياڭ جياحى جۇڭشين ەڭبەك جۇمىستارى بويىنشا قىزمەت وتەۋ شەكتى سەرىكتەستىگىنە قىزمەتكە ورنالاسىپ، اۋدارماشىلىق قىزمەتىمەن شۇعىلداندى.
”قازىر جۇڭگو مەن ورتا ازيانىڭ سەلبەستىگى بارعان سايىن جيىلەدى، ونىڭ ۇستىنە كوبى شينجياڭدا جۇزەگە استى، بۇل ارادا وراي كوپ، وسى ارادا قالعىم كەلەدى“، ـ دەدى ماحمەتقۇلوۆا.
ماحمەتقۇلوۆا ٴبىر رەتكى ساياحاتتان كەيىن شينجياڭدى ۇناتىپ قالعان، بۇل ارانىڭ تىنىشتىعى مەن گۇلدەنۋى ونىڭ كوكەيىنەن كەتپەي، شينجياڭعا كەلىپ قىزمەت ىستەۋ ويىنا كەلەدى.
2023 ـ جىلى شينجياڭ ەركىن ساۋدا سىناق رايونى قۇرىلعان حابار تارالىپ، ساياحات كووپەراتيۆىندەگى دوسى وعان شينجياڭ ەركىن ساۋدا سىناق رايونى ٴۇرىمجى اۋماعى ميدۇڭ يقۋاتتىق بولىگى حالىقارالىق ساۋدا بويىنشا جەتىلدىرۋ بازاسىن تانىستىرادى، ”ول جەردە ورتا ازيالىق دارىندىلارعا ارنايى ازىرلەنگەن ٴبىر بەكەتتىك قىزمەت وتەۋ بار“. ول دەرەۋ جۇڭگوداعى جۇمىسقا قابىلداۋ سايتىنا قىسقاشا مالىمەتىن جىبەرىپ، تەز ارادا جۇمىسقا قابىلداۋ ۇسىنىسىن الادى.
2024 ـ جىلى 10 ـ ايدا ماحمەتقۇلوۆا شينجياڭعا تاعى كەلىپ، وسى ارادا ”شەشە ۇلگىسىندەگى قىزمەت وتەۋدى“ سەزىندى: قىزمەتكەرلەر وعان ينتەرنەت جەلىسىندە وقۋ ماعلۇماتى كۋالاندىرۋىن تاپسىرۋىنا كومەكتەستى، قوعام حاۋىپسىزدىگى حالىق ساقشىلارى سول جەردىڭ وزىندە پاسپورت ينفورماتسيالارىن تەكسەرىپ بەردى... 60 شارشى مەترلىك ادەمى اشەكەيلەنگەن، ٴۇي ەلەكتر جابدىقتارى تولىق، دايىن كىرە سالاتىن حالىقارالىق دارىندىلار قوناق ٴۇيى ونى ەرەكشە قۋانىشقا بولەدى.
”بۇگىنگى كۇندە تەك ميدۇڭ رايونىنىڭ ٴوزى ون نەشە ورتا ازيا كاسىپورنىن ىرگە تەبۋگە باۋرادى. بۇل جەردىڭ تاماشا شارۋاشىلىق ـ ساۋدا ورتاسى ٴاربىر كاسىپكەردىڭ الاڭسىز دامۋىنا مۇمكىندىك جاسادى“، ـ دەدى ماحمەتقۇلوۆا.
عىلىم ـ تەحنولوگيادا جاڭالىق اشۋدىڭ قۇنارلى توپىراعى
”كاسىپورىننىڭ الدىڭعى شەبىن، ٴوندىرىستىڭ الدىڭعى شەبىن ىشكەرىلەي ارالاماساڭىز، ناعىز ماسەلەلەردى استە بايقاي المايسىز“. 3 ـ ايدىڭ 20 ـ كۇنى شينجياڭ ينجەنەريا شۋەيۋانى مەن جۇندۇڭ ەكونوميكالىق، تەحنولوگيالىق اشۋ رايونىن باسقارۋ كوميتەتى بىرلەسىپ ورىستەتكەن ”100 دوكتوردىڭ 100 كاسىپورىنعا جايعاسۋى“ قيمىلىنا قاتىناسقان ۋاڭ گاڭ قۋانىشىن جاسىرا المادى، ول وسى رەت كاسىپورىننىڭ الدىڭعى شەبىن ىشكەرىلەي ارالاپ تەكسەرۋ ـ زەرتتەۋ جۇرگىزدى، ونان دا ماڭىزدىسى، جەرگىلىكتى كاسىپورىنمەن سەلبەستىك جاساۋ نيەتىنە كەلىستى.
حيلۇڭجياڭنىڭ حىگاڭىنان كەلگەن وسى شەتەلدەن ورالعان دوكتور 2022 ـ جىلى دارىندىلاردى ەنگىزۋ بويىنشا شينجياڭ ينجەنەريا شۋەيۋانىنا كىرىپ، نەگىزىنەن، كۇن ەنەرگياسى جىلۋىن پايدالانۋ جانە جىلۋ ەنەرگياسىن ساقتاۋ زەرتتەۋىمەن اينالىستى. وسىناۋ توپىراقتىڭ عىلىم ـ تەحنولوگيا دارىندىلارى جونىندەگى قاجەتىن 40 نەشە كۇنگە جالعاسقان ”دارىندىلاردان قامال الۋ“ ارەكەتىنەن انىق كورىپ الۋعا بولادى. سول كەزدە شينجياڭ ينجەنەريا شۋەيۋانى ەنەرگيا ينجەنەرياسى شۋەيۋانىنىڭ باستىعى بولىپ تۇرعان لي ۋىنلياڭ ۋاڭ گاڭنىڭ ەلگە قايتۋ ويى بار ەكەنىنەن حابار تاپقان سوڭ ٴار كۇنى تەلەفون جالعاپ، شينجياڭنىڭ دامۋ ورايىن جان ـ جاقتى تانىستىرىپ تۇردى. ”شۋەيۋان باستىعى لي ۋىنلياڭنىڭ شىن ىقىلاسى ماعان شينجياڭنىڭ دارىندىلارعا باسا ٴمان بەرەتىندىگىن كورسەتتى“، ـ دەدى ۋاڭ گاڭ ەسكە الىپ.
شينجياڭعا كەلگەن 2 جىلدان استام ۋاقىتتان بەرى، ۋاڭ گاڭنىڭ عىلمي زەرتتەۋ ىستەرى قارىشتاپ دامىدى. مەكتەپ جاقتىڭ قولداۋىندا ۋاڭ گاڭ باستاماشىلدىقپەن ٴوتىنىش ەتىپ جولداعان اۆتونوميالى رايوننىڭ جاراتىلىستىق عىلىم قورى جاستار عىلىم قورى نىسانى سياقتى 3 نىسان تۇگەل ماقۇلدانىپ، ول 2024 ـ جىلى مەملەكەت دارەجەلى جوعارى دەڭگەيلى جاس دارىندى بولىپ باعالاندى.
”مەكتەپ بىتىرە سالا ۇجىم باستاپ نىسان ٴوتىنىش ەتىپ، دەرەۋ قۇپتاۋعا يە بولدىم، بۇل مەنىڭ اۋەلگى جوسپارىمدا ويلاۋعا باتىلىم بارماعان ٴىس ەدى“، ـ دەدى ۋاڭ گاڭ. اۆتونوميالى رايوننىڭ ”ون ٴىرى كاسىپ سالاسى شوعىرى“ قۇرىلىسىنىڭ دامۋ شىعىس جەلىنە سۇيەنگەن ۋاڭ گاڭ ۇجىمى كۇن ەنەرگياسى ارقىلى جىلۋ ەنەرگياسىن ساقتاۋ سالاسىندا ۇزدىكسىز تىڭ تابىسقا جەتتى، مۇنىڭ ىشىندە ٴبىر نىسان اياقتالۋ كەزەڭىنە ٴوتتى.
2 جىلدان استام ۋاقىتتان بەرى، ول ىلگەرىندى ـ كەيىندى جوعارى تەمپەراتۋرالى قاتتى كۇيدە جىلۋ ەنەرگياسىن ساقتاۋ تاجىريبەحاناسىن، ۇزاق ۋاقىت جىلۋ ەنەرگياسىن ساقتاۋ تەحنولوگياسىن زەرتتەۋ تاجىريبەحاناسىن جانە دالالىق زەرتتەۋ بازاسىن قۇردى، سونداي ـ اق مەكتەپ دارەجەلى عىلمي زەرتتەۋ ۇجىمىن قۇردى. قازىر ول اۆتونوميالى رايون دارەجەلى زەرتتەۋ تۇعىرىن جانە عىلىم جالپىلاستىرۋ تۇعىرىن ٴوتىنىش ەتۋگە كىرىستى. ”شينجياڭ ماعان ويلاپ تا كورمەگەن ەسەيۋ ساحناسىن ازىرلەدى“، ـ دەدى ۋاڭ گاڭ.
تاياۋ جىلدان بەرى، شينجياڭنىڭ جاڭا ەنەرگياسى قارىشتاپ دامىپ، اگراگاتتار كولەمى مەن ەلەكتر تاراتۋ مولشەرى تۇگەل بۇكىل ەل بويىنشا الدىڭعى قاتاردان ورىن الدى. اگراگاتتار كولەمىنىڭ جەدەل ارتۋىنا ىلەسە، شينجياڭ ”شينجياڭ ەلەكترىن سىرتقا جەتكىزۋ“ جانە ەنەرگيا ساقتاۋ تەحنولوگياسىن دامىتۋ ارقىلى قابىلداۋ قۋاتىن ٴونىمدى ارتتىرىپ، شينجياڭنىڭ جاڭا ەنەرگيا تۇتاس كاسىپ سالاسى تىزبەگى تولىق دامۋعا قول جەتكىزدى.
”كاسىپ سالاسى تىزبەگىنىڭ تومەنگى بۋىنىندا بولسا دا، زور دامۋ ٴورىسى جاتىر“، ـ دەدى شينجياڭ ۋيپىڭ ەلەكتر تەحنولوگياسى ينفورماتسيا عىلىم ـ تەحنولوگياسى شەكتى سەرىكتەستىگىنىڭ باس ديرەكتورى ياڭ فىڭچىڭ. اۆتونوميالى رايوننىڭ جوعارى، جاڭا تەحنولوگيالىق كاسىپورنى بولعان وسى سەرىكتەستىك، نەگىزىنەن، جاڭا ەنەرگيا بويىنشا ەلەكتر ساتۋ بولىگىمەن شۇعىلدانادى.
العاشىندا 3 ادامنان قۇرالعان ۇجىمنىڭ بىرنەشە جىل ىشىندە 50 نەشە ادامعا كوبەيەتىنىن كىم ويلاعان، سەرىكتەستىك تاعى جۇيەلى ەلەكتر ساتۋ ساۋدا زالىنا يە بولدى. ياڭ فىڭچىڭ: اۆتونوميالى رايون ”ون ٴىرى كاسىپ سالاسى شوعىرىنىڭ“ ٴتۇيىندى سالالارىن ارقاۋ ەتىپ كاسىپ سالاسى تىزبەگىن كەمەلدەندىردى، كاسىپورىن تەك شينجياڭنىڭ كاسىپ سالاسى سۇرانىسىمەن تۇيىلىسسە بولعانى دامۋ ٴورىسىن تابا الادى، ـ دەدى.
”سەرىكتەستىك ەسەيۋ بارىسىندا عىلىم ـ تەحنولوگيا تاراۋلارى كەلىپ جەتەكشىلىك ەتىپ، كاسىپ سالاسى تىزبەگىنىڭ جوعارعى، تومەنگى بۋىندارىنا تۇعىر ازىرلەپ بەردى“. ياڭ فىڭچىڭ: قازىر سەرىكتەستىكتىڭ ەلەكتر ساۋداسى شەشىم جۇيەسى ٴدال جوعارعى، تومەنگى بۋىننىڭ سۇرانىسىن تولىق تۇسىنگەننەن كەيىن دەربەس زەرتتەپ جاسالعان دەدى.
بۇل جۇيە اۋا رايى ساندى مالىمەتتەرى، ەلەكتر تورى جۇكتەمەسى، ەلەكتر تاراتۋ بولجالى سياقتى 18 ٴتۇرلى ساندى مالىمەت قاينارىن زەردەلى ەسەپتەۋ امالىنا اينالدىرىپ، 15 مينۋت ىشىندە 96 ۋاقىت بولىگىندەگى ەلەكتر قۋاتىن ۇلەستىرۋدى ەسەپتەپ، ٴار ۆات جاسىل ەلەكتردىڭ ورنىن تابۋىنا مۇمكىندىك بەرىپ، ەلەكتر زاۆودى مەن ەلەكتردەن پايدالانۋشى سەرىكتەستىككە اناعۇرلىم عىلمي، زەردەلى قامداۋ ـ قاجەتسىنۋ شەشىمىن ازىرلەي الادى.
2024 ـ جىلى شينجياڭ ۋيپىڭ ەلەكتر تەحنولوگياسى ينفورماتسيا عىلىم ـ تەحنولوگيا شەكتى سەرىكتەستىگىنىڭ ساۋدالاعان ەلەكتر مولشەرى 400 ميلليون كيلوۆات ساعات بولدى. قازىر سەرىكتەستىكتىڭ كاسىپ بويىنشا قىزمەت وتەۋ كولەمى شينجياڭنان شانشي، تيانجين، سىچۋان، گانسۋ سياقتى ولكەلەرگە دەيىن كەڭەيدى.
كوڭىل تىنىش بولىپ، جايعاسار جەرىن تاپتى
”ساپار جوباسىن جاساۋشى، ۇزدىك جەتەكشى، قۇراستىرۋشى، دايىنداۋشى رەجيسسەر... ٴبىز ەركىندىككە جانى قۇمار، ٴىس ىستەۋگە پەيىل، ٴىس تىندىرا الاتىن جولداستارىمىزدى شينجياڭنىڭ ساياحات ىستەرىندە بىرگە قىرپۋلى ەڭبەك ەتۋگە قابىلدايمىز“. 3 ـ ايدىڭ 29 ـ كۇنى ۋاڭ شياۋحان ۋيشين دوستار شەڭبەرىندە كوكتەمگى جۇمىسقا قابىلداۋ حابارلاندىرۋىن جاريالاپ، الداعى شينجياڭنىڭ ساياحات قاۋىرت ماۋسىمىنا دايىندىق جاسادى.
ۋاڭ شياۋحاننىڭ نازارىندا شينجياڭ ساياحات كاسىبىنىڭ دامۋى ورنىقتى قاداممەن جاقسارۋدا. 2024 ـ جىلى مادەنيەت ـ ساياحات كاسىپ سالاسى اۆتونوميالى رايوننىڭ ”ون ٴىرى كاسىپ سالاسى شوعىرىنا“ ەنگىزىلىپ، مادەنيەت ـ ساياحات تاراۋلارى مەن كاسىپ قوعامدارىنىڭ باقىلاۋى مەن جەبەۋىندە كاسىپتىڭ جۇيەگە ٴتۇسۋى كورنەكتى جوعارىلادى. كاسىپپەن شۇعىلدانۋشىلار اعىن مولشەرىنە عانا تالپىنباي، قىزمەت وتەۋ مەن جۇمىس ٴادىسى جاعىندا ۇتىمدى باسەكەگە ٴتۇستى. مۇنداي وزگەرىس ۋاڭ شياۋحاندى ٴسۇيىندىردى — ول ”قىزۋ سۇيىسپەنشىلىكپەن اۋىلىندا قىرپۋلى ەڭبەك ەتۋدىڭ“ كەلەشەگىن كوردى.
3 جىلدىڭ الدىندا ۋاڭ شياۋحان بەيجيڭدەگى بەلگىلى كينو سەرىكتەستىگىنىڭ دايىنداۋشى رەجيسسەرى بولاتىن، جىلدىق ەڭبەكاقىسى ٴتاۋىر بولعانىمەن، ايتەۋ ٴوزىن ”ورنىقتى“ سەزىنبەۋشى ەدى. ول بۇكىل جۇڭگونى ارالادى، ٴار جولى شينجياڭعا قايتىپ كەلگەندە اۋىلىنىڭ ايبىندى كورىنىسى ونى قاتتى اسەرلەندىرەتىن. ”ٴاربىر شينجياڭدىق وسىناۋ توپىراقتىڭ كوركەمدىگىن ٴتىپتى دە كوپ ادامعا كورسەتۋدى ويلايدى، مەن دە سولاي“، ـ دەدى ۋاڭ شياۋحان.
سونىمەن ۋاڭ شياۋحان شينجياڭعا قايتىپ كەلىپ ساياحات كاسىبىمەن شۇعىلدانىپ كەتتى، الدىمەن ساياحات جەتەكشىسى بولۋدان قازىر ەكىنشى شەپكە شەگىنىپ قالالىقتاردى ەڭ جاقسى تۇسىنەتىن ساياحات كووپەراتيۆىن قۇرعانعا دەيىن ارالىقتا ۋاڭ شياۋحان اۋىلىن قىزۋ سۇيەتىن ٴوزى سياقتى كوپتەگەن سەرىكتەرىمەن تانىستى.
ٴدال وسىنداي قىزۋ سۇيىسپەنشىلىك ولاردى قىزمەت بارىسىندا وزىندىك قۇنمەن ەسەپتەسپەي، بار كۇشتەرىن سالۋعا جەتەلەدى. كاسىپتىك ساياحاتتىق سۋرەتكە ٴتۇسىرۋ جابدىقتارىن ٴوز اقشالارىمەن ساتىپ الۋدان ساياحاتشىلارعا قولعابىس ەتۋگە، ودان بۇگىنگى كۇندەگى ۇجىمدى جۇيەلى باۋلۋعا دەيىن بارلىق جەتەكشىلەردەن دۇرىس مادەنيەتتى ٴتۇسىندىرۋدى تالاپ ەتتى.
”جەتەكشى جول باستاۋشى عانا ەمەس، ونان دا ماڭىزدىسى، مادەنيەت اۋىس ـ كۇيىسىنىڭ ەلشىسى“، ـ دەدى ۋاڭ شياۋحان باتىل تۇردە. قازىر ونىڭ قىزمەتى قاربالاس، تۋعان جەرىنە تامىر تارتىپ، اۋەسىنە بەرىلە كىرىسكەندىكتەن كوڭىلى ٴارقانداي كەزدەگىدەن دە تىنىش بولدى.
تاياۋ جىلداردان بەرى، شينجياڭعا كەلگەن ادامداردىڭ كۇن سايىن كوبەيۋىنە ىلەسە، ”شينجياڭ ۇگىتشىلەر“ قوسىنى دا ۇزدىكسىز زورايا ٴتۇستى. حۋناننان شينجياڭعا كەلگەن 95 ـ جىلدان كەيىن تۋعان لي شين كەريا اۋدانىنىڭ داريابويى اۋىلىنا تامىر تارتىپ، نەگىزگى ساتى كادرى بولعاننان كەيىن ٴوز ەركىمەن ”شينجياڭ ۇگىتشىسى“ بولدى، ول داريابويى اۋىلىنىڭ اعاش ەگۋ ينجەنەرياسىنا ات سالىسىپ قانا قويماي، وسى باعالى بارىستى اپپارات كوزىمەن ەستەلىككە الدى.
«قۇمدى شولدەگى شاعىن قالاشىقتى قورعاۋ — داريابويىندا اعاش ەگۋ ەستەلىكتەرى» اتتى دەرەكتى فيلمدى لي شين مەن جۇبايى اي چيڭ بىرلەسىپ تۇسىرگەن. بۇل دەرەكتى فيلم وسى اۋىلداعى بۇقارانىڭ اۋىلدارىن قورعاپ، قۇمايتتانۋعا قارسى تۇرىپ سەكسەۋىل ەككەن حيكاياسىن ەستەلىككە الىپ، ”عىلىم جالپىلاستىرىلعان جۇڭگو“ 2020 ـ جىلعى مەملەكەتتىك ورمان شارۋاشىلىعى جانە جايلىم عىلىم جالپىلاستىرۋ شاعىن بەينەجازبا بويىنشا جاڭالىق اشۋ، شارۋاشىلىق قۇرۋ جارىسىندا 1 ـ دارەجەلى سيلىققا يە بولدى.
قىزمەتتەن سىرت، لي شين مەن جۇبايى ۇنەمى اپپارات كوزى ارقىلى اۋىلداستاردىڭ قۇمدى شولدە ەككەن ەتتى سۇڭعىلاسىنا ۇگىت سۋرەتىن ٴتۇسىردى، داريابويى اۋىلىنداعى كونە بۇيىمداردى سۋرەتكە ٴتۇسىردى، ت . ب، بۇل ٴتىپتى دە كوپ ادامنىڭ بۇل جەردىڭ وزگەرىسىن كورۋىنە وراي جاراتتى.
لي شين بىلاي دەدى: ماڭىمدا وتە كوپ اسەرلى حيكايالار بار: زەينەتكە شىققاننان كەيىن دە مىندەتتى ۇگىت لەكسيانى تاباندىلىقپەن جالعاستىرعان ٴماتتۇرسۇن قاسىم كاريا، ٴوز اقشاسىمەن حاتكەرلىك ۇيرەتكەن مادەنيەت سارايى قىزمەتكەرى، قىستاق تۇرعىندارىن ۋايىمنان ارىلتقان قىستاقتا تۇراتىن كادرلار...
”ٴدال وسىنداي قاراپايىم ادامداردىڭ ٴوز جۇمىس ورىندارىندا كۇن سايىن قايتالاعان تاباندىلىعى مەن ەڭبەگى شينجياڭدا كۇن سايىن جاڭالانىپ، اي سايىن تۇلەجىگەن وزگەرىس تۋدىردى“. ال ونىڭ ٴوزى دە وسىنداي سەنىمدى باستان ـ اياق كوكەيىندە ساقتادى — قوس قولىممەن وسىناۋ توپىراقتى ٴتىپتى دە گۇلدەندىرەمىن، مىنە بۇل مەنىڭ قۇنىم.
